Bìoball air-loidhne

MARIKUS 16 - Bafia Nouveau Testament

Rìghèmɓɛ̀n ɗi Yeesus
( Mt. 28:1-8 ; Lk. 24:1-12 ; Zŋ. 20:1-10 )

¹ Yɛ̀ɛ Saɓàt à ghaghìghà, Marii Madelɛn rì Marii à jɛɛ Zyag rì Salome ɓɛ lakà tìrààre lɛ ɓɛɛ kɛǹ kì siŋii kìloŋ ki Yeesus.

² Ŋwosì sɔnɗì sariwa, ɓɛ kɛngà a zɔ̀ŋ di ŋwos a ti ɓiì kpaŋìì.

³ Ɓɛ tɔɔ̀ghtɔ̀ɔ̀ghrɛ̀n lɛ: Ghɛn yɛɛ ri ɓà ɓisi ɓiì ɓiŋzii gɔ̀g ìnɛ ì rì ɓi ŋwɔm wu zɔ̀ŋ?

⁴ Yɛ̀ɛ ɓɛ mɛɛ̀ pìkà mis, ɓɛ ghɛn lɛ coo gɔ̀g ìncèm ì ti m̀ɓiŋziyɛn ɓi ŋwɔŋì.

⁵ Fɔɔnnɛ ɓɛ ɗiŋìghà ɓi zɔ̀ŋ, ɓɛ ghɛn dɛlì ì mum ǹkɔ̀kɔriyɛn ɓi ɓɛg à weèlem, rì rìga à mpuɓ, ìris wu ɓan ɓɔ.

⁶ Ŋwaànɛ̀n à kpaa ɓɔ lɛ: Kɛ̀ ɓi risi; ɓi kaakaa Yeesus ànɛ a Naazarɛt ànɛ ɓɛ ǹkpani ɓi kɔrɔs; àa ghèmɓɛɛ, à yiìdi fɛ; fɛfɛ̀ nnɛ ɓɛ ǹnɔ̀ŋzii kìloŋ kii.

⁷ Kɛ̀ɛna, ɓi kpaà ɓɛ̀yilàg ɓii rì Pyɛɛri lɛ à loloogh rì mìni a Galile, wɔɔ nnɛ ɓì rì nyi ɓiì ghɛɛ̀, lɔŋ yɛ̀ɛ à kpaaghà mìni.

⁸ Fɔɔnnɛ ɓɛ kpagày ɓi zɔ̀ŋ, ɓɛ ghaàgh rì mɛ̀ree di ɓɛɛ nìighniŋdɛ̀n, ɗyomzɛ̀n ɗi ɗim ɓɔ, wɔ̀lɛ ɓɛ kpaaghà ɓi ŋwaàdɛŋ kìɓan kiǹ lɛ, ìris wu ceeghà ɓɔ.

Yeesus à kìi lɛ, à rèsɛn Marii Madelɛn à rèsɛ̀ntì a ɓɛ̀yilàg
( Mt. 28:9-10 , 16-20 ; Lk. 24:13-49 ; Zŋ. 20:11-23 ; Mkk. 1:6-8 )

⁹ Yɛ̀ɛ Yeesus à ghèmɓɛ̀ngà ŋwosì sɔnɗì sariwa, à lokà kì rèsɛɛ Marii Madelɛn. Marii ànɛ̀n nnɛ Yeesus à pisìghà ɓìɓeɓtàg ɓi mɛghay taàɓɛ̀ɛ̀ ɓi nyoo.

¹⁰ Fɔɔnnɛ à kɛ̀ngà ki kpaà ɓɔlɛ ànɛ̀n a ɓumɓɛ ɓɛ kɛɛ̀kɛ̀ɛ̀ghà rì Yeesus. Ɓumɓɛ̀n ɓɛ ɓaghà rì ǹɗemi-kɛŋɛ̀n, ɓɛ ki rènɗen.

¹¹ Yɛ̀ɛ ɓɛ wokà di a kpaakpaa lɛ Yeesus à rì cem, nyaa ki ghɛɛ ànɛ̀n, ɓɛ gherɛ̀ngà ɓi rikpaa ɗii.

¹² Ajɛ̀m ìnɛn à rèsɛ̀ngà ɓɛ̀yilàg ɓii ɓɛdɛŋ ɓɛɓɛɛ̀ ɓi rìɓa ɗidɛŋ, di ɓɛɛ kɛ̀nkɛn ɓi jɛ̀m ì kìlɔ̀ŋ.

¹³ Ɓɛ̀roɓɛ̀n ɓɛ sugtìghày girig kì kpaà ɓɛ̀geni ɓaa ɓɛmbog, wɔ̀lɛ ɓɛ̀ kɛɛ̀ gherɛn lɔŋ.

¹⁴ Fɔɔnnɛ à siitɛ̀ngà tì kì resɛɛ ɓɛyilàg ɓii ǹtɛ̀ɗ rì bog di ɓɛɛ̀ ɗiɗi ɓiɗilàg, à fwààdɛ̀n ɓɔ ɓisuulɛ ɓɛ ɓaghà rì nywey ɓɛ ki ɓa mɛrem mɛ̀tèɗkakɛn, lɛ ɓɛ gherɛ̀ngà ɓi com ki ɓumɓɛ ɓɛ ghɛngà nyi di à mɛ ghèmɓɛ̀n ɓɛ kpaaghà ɓɔ.

¹⁵ Fɔɔnnɛ à kpaaghà ɓɔ lɛ: Kɛ̀ɛna zi bimiɗ, ɓi kpaa ɓum ɓɛ̀cèm Syeesyee à Ɓɔlɛ.

¹⁶ Ŋwaànɛ à rì ɓiì gherɛɛ, à ki ɓaɓtɛn nnyɛɛ ri ɓiì ghɛɛ̀ cɛɓ; wɔ̀lɛ ŋwaànɛ à gherɛɛ ɓi à ɓiì terì bɛ̀lɛn.

¹⁷ Dàm yi ɓiɓan yi ɓumɓɛ ɓɛ gherɛɛ ɓɛ ɓiì kìkii, yi ri lɛ: Ɓɛ ri ɓiì nànaɓi ɓiɓeɓtàg ɓi mɛghay rì ɗii ɗyɛ̀m, ɓɛ ki tòtog ɓìkènekènè ɓi ɓitòkì.

¹⁸ Ɓɛ ɓiì ɓanì nyoo rì ɓyàg, ɓɛ ki nɔ nsoò ìrɔ̀g, com kɛ̀ kɛɛ̀ kì ɓɔ; ɓɛ ri ɓiì saghii ɓɛroroɓ ɓyàg ɓi nyoo, ɓɛ̀roroɓ ɓɛ wɔngì.

¹⁹ Yɛ̀ɛ Kan à tòkàkà fɔlɔɔ ri ɓɔ, nni à ɓɔkà aɗyoo, à kɔ̀rì ɓi weèlem à Bɛ̀ll.

²⁰ Fɔɔnnɛ ɓɛ̀yilàg ɓɛ kɛngà kì kakalii Syeesyee à Ɓɔlɛ jàŋbimiɗ. Kan Yeesus à ɓaghà rì ɓɔ ɓi kìsay kiǹ, à ki sìisiìràg Syeesyee à Ɓɔlɛ ànɛ ɓɛ kpaakpààghà rì dàm yi ɓiɓan yi ɓɛ kikìghà.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan