MARIKUS 14 - Bafia Nouveau Testament

Ɓɛ tɔ̀kɛɛ Yeesus

¹ Tìcàɓ ti Paskà ti ɓɛnkìlàg bìrɛs kɛ̀ɛ̀ nwìɗ miì ti ɓaghà di tyaa rɔ̀ɓ mɛru mɛɓɛɛ̀, nni ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna ɓɛ kaakààghà bee inɛ lɛ ɓɛɛ ɓaǹ Yeesus a rìnyam ɓɛɛ wey nyi.

² Lɛ ɓɛ kpaakpààghà lɛ, kìɓan kiǹ ki ghɛɛ̀sɛɛ ɓi ki kìlɛɛ ɓi nyìinyìm à tìcàɓ, lɛ ki ɓiì yùu yi rì kìyoòyòò ɓi kìlɔ̀ŋ.

Giɓ adɛŋ a sùùrii Yeesus tìrààre ɓi nto a Bɛtanii

³ Yɛ̀ɛ Yeesus à ɓaghà a Bɛtanii ɓi naa ì Simɔn ànɛ à ɓaghà kukwiy, nni giɓ adɛŋ à ɗiŋìghày di Yeesus a ɗiɗi ɓiɗilàg, giɓ anɛ̀n à ɓaghày rì ɓeŋ ànɛ a ɓaghà ǹsoɓɛn ri rìkuu ɗi gɔ̀g ɗi ŋwèrim-ŋwèrim, ɓeŋ àncèm à ɓaghà ǹɗonɛn ri ɓìsyeesyee ɓi tirààre, ɓi ɓi ɓaghà ɓì kɛŋɛn lɛɛ̀gwey; fɔɔnnɛ à weeyàkà ɓeŋ ànɛ̀n, à sùùrì Yeesus tìrààre ɓi ǹto.

⁴ Nni ki ɓeɓkà ɓum ɓɛdɛŋ ɓɛ ɓɛ ɓaghà wɔɔ, ɓɛ tumɛ̀n rìŋwɔ̀ŋwɔ̀ŋì di ɓɛɛ̀ kpaakpaa lɛ, ki ghɛɓsii cɛ lɛ a yogsi tìrààre fɛlɛ̀?

⁵ Tyàa rì lɛ ti cee ɓɛ̀tɔɔsìm ɓɛraa, di ɓɛ kaɓi tyɔ, ɓɛ fa mɔ̀ɔ̀ni mɛ miì rì ɓɛ̀soghàsogha; ɓɛ kpɔmdɛ̀ngà giɓ anɛ̀n lɛɛ̀gwey.

⁶ Nni Yeesus à kpaaghà ɓɔ lɛ: Càrina giɓ anɛ, ɓi kìki nyi fɔlɔɔ lɛ cɛ? À kìi syeesyee à kìɓan ɓisu wɛ̀m.

⁷ Lɛ ɓì rì rì ɓɛ̀soghàsogha ɓyààmɛ̀n ɓìcèm, ɓì ki rì lɛ ɓì kì ɓɔ kìrɔɔ cààmɛ̀n kìcèm ki ɓì kɔ̀ni, kìɓan kìfog mɛ̀ màa ɓa ɓi ri mìni cààmɛ̀n kìcèm.

⁸ Giɓ anɛ à kìi gàɓ ìnɛ ì ghɛ̀ɛ̀sɛɛ rì nyi. À loogh mɛ̀ kì siŋii tirààre ɓi rìɓòm ɗi ɓɛ ri mɛ̀ ɓiì ɓòmi.

⁹ Ǹkalii mìni ɓi saaɗ lɛ, jàŋbimiɗ ìnɛ Syeesyee à Ɓɔlɛ à kaakàlɛɛ gɛ ɓi ziinɛ bimiɗ, ɓɛ kpaakpaa gɛ girig kìɓan ki giɓ anɛ à kìi ki, ɓɛ yiìyìtàg nyi miì.

Zyudas à ɗiŋii dàŋ rì ɓɛ̀pìrɛɛtìrɛ̀ ɓɛgwey lɛ ɓɛɛ ɓaǹ Yeesus

¹⁰ Fɔɔnnɛ Zyudas Iskariyot, kìbog ki ɓi ɓɛ̀yilàg ɓɛ Yeesus ǹtɛ̀ɗ rì ɓɛɓɛɛ̀, à kɛ̀ngà kì ghɛɛ̀ ɓɛ̀pìrɛɛtìrɛ̀ ɓɛgwey lɛ a kaɓ ɓɔ Yeesus.

¹¹ Yɛ̀ɛ ɓɛ̀roɓɛ̀n ɓɛ wokà fɔlɔɔ, ɓɛ nyaàrɛ̀n lɛɛ̀gwey, ɓɛ ki kàg nyi lɛ, ɓɛ ri nyi ɓiì faà mɔ̀ɔ̀ni. Fɔɔnnɛ Zyudas à tumɛ̀ngà min rikaakàà ɗi kirɔŋiɗ ki lɛ a fa ɓɔ Yeesus.

Yeesus à ɗii Paskà ǹɗaŋ rì ɓɛ̀yilàg ɓii

¹² Ŋwos a ǹtonto ànɛ ɓi mɛ̀ru mɛ ɓɛ nkìlàg bìrɛs ɓɛ̀ kɛɛ̀ foŋ nwìɗ miì, innɛ ɓɛ ŋweeyì jɔ̀ɔ̀ ì Paskà; ɓɛ̀yilàg ɓɛ Yeesus ɓɛ tɔkà nyi lɛ: Fe nnɛ u kɔ̀nkɔn lɛ tì kɛǹ wɔ̀ kì pègsɛɛ ɓiɗilàg ɓi Paskà?

¹³ Fɔɔnnɛ Yeesus à romgà ɓɛ̀yilàg ɓii ɓɛdɛŋ ɓɛɓɛɛ̀, à kpaa ɓɔ lɛ: Kɛ̀ɛna ɓi bàn, ɓì ɓiì tuusɛɛ ri ŋwaàdɛŋ di à tɛ̀tɛɛgh bèè i mɛ̀nig, ɓi nɔɔ̀ti nyi,

¹⁴ naa ìnɛ à rì miì ɓiì ɗiŋii, ɗiŋiina girig wɔɔ, ɓi kpaà ŋwaàmɛɛ lɛ: Ǹɗèsàg lɛ kìden ki naa ki nyii ri ɓiì ɗii Paskà miì rì ɓɛ̀yilàg ɓii kiǹ ki ri fe yɔ?

¹⁵ À rì mìni ɓiì rèsii coo kìden ki naa ɓi mɛɛ aɗyoo, kì pègsɛn ri ɓyom ɓìcèm, wɔɔ nnɛ ɓì ɓiì pègsɛɛ ɓiɗilàg ɓi Paskà.

¹⁶ Nni ɓɛ̀yilàg ɓɛ kɛngà ɓɛ kpaŋ ɓi bàn, ɓɛ tanɛ̀n ɓìɓan ɓìcèm lɔŋ yɛ̀ɛ Yeesus à kpaaghà ɓɔ, ɓɛ pegsɛ̀n ɓìɗilàg ɓi Paskà wɔɔ.

¹⁷ Yɛ̀ɛ cɛnkò ki kpagà, Yeesus à yùy rì ɓɛ̀yilàg ɓii ǹtɛ̀ɗ rì ɓɛɓɛɛ̀.

¹⁸ Yɛ̀ɛ ɓɛ kɔrìghà ɓi ɓìɗilàg, nni Yeesus à kpaaghà ɓɔ lɛ: Ǹkpaa mìni ɓi saaɗ lɛ, kìbog ki ɓi mìni ki kɛɛ̀ ɗiɗi nɗaŋ ri mɛ̀, ki ri mɛ̀ ɓiì kàɓi.

¹⁹ Nni ɓɛ̀yilàg ɓɛ samgàkà, rì ànɛ̀n miì à tɔg nyi lɛ, mɛ̀ yɛɛ ri nya yɔ̀?

²⁰ Yeesus à ɓàkà ɓɔ lɛ: Kìbog ki ɓi mìni ɓɛ kìntɛ̀ɗ rì ɓɛɓɛɛ̀, ki ti ɗiɗi taasà bog, rì kɔ kɛɛ̀ ri.

²¹ Man à mum à rì ɓiì wiì lɔŋ yɛ̀ɛ ɓɛ kangà lɛ à ghɛ̀ɛ̀sɛɛ kì wiì, kìɓan kìfog nyìighnyìg rì ŋwaànɛ à rì nyi ɓiì kàɓi, ki ɓaghà kìrɔɔ lɛ ŋwaànɛ̀n kɛ̀ɛ yalɛn.

Yeesus à faa ɓɛ̀yilàg ɓii ɓiɗilàg ɓi Bɛ̀ll

²² Yɛ̀ɛ ɓɛ ɗiɗìghà, nni Yeesus à tekà bìrɛs, à fa Bɛ̀ll ɓìtògsɛ̀n, à ɓɛg min yɔ̀, à fa rì ɓɛ̀yilàg ɓii, à kpaa ɓɔ lɛ: Terina, nyoo yɛ̀m yɛ̀ɛ ri lɛ̀.

²³ Fɔɔnnɛ à teɗtìghà ɓeŋ, à fa ɓɛ̀yilàg di à mɛ ka fa Bɛ̀ll ɓìtògsɛ̀n, nni ɓɛ̀yilàg ɓɛ nɔghà ɓeŋ ànɛ̀n ɓɛ̀sɛ̀ɛ̀ ɓɛ̀cèm.

²⁴ Yeesus à kpaa ɓɔ lɛ: Bwaɓ yɛm̀ yɛɛ ri lɛ, bwaɓ yi rìràrɛn ɗi lɛ rì Bɛ̀ll rì ɓum, yɛɛ ri ɓiì kpaŋì ɓisuu ɓum lɛɛ̀gwey.

²⁵ Ǹkalii mìni ɓi saaɗ lɛ: Màa nɔti ɓi mɛrɔ̀g mɛ vìinyɛ̀ à kpaŋ ŋwos anɛ ǹnɔtii gɛ mɔ, nyɔɔnyɔn à rìnɔ, ɓi kìlɔ̀ŋ ki Bɛ̀ll.

²⁶ Fɔɔnnɛ ɓɛ ɓaghà lɛ, ɓɛ mɛ ghàɓ tyem, ɓɛ ɓɔg min ɓi dòn ì ɓɛ̀òlivyee.

Yeesus à kpaa lɛ, Pyɛɛri à rì nyi ɓiì roòzɛɛ

²⁷ Nni Yeesus à kpaaghà ɓɛ̀yilàg ɓii lɛ: Mìniìcèm ɓì rì ɓiì kɛ̀ɓtɛɛ fiɓàg lɛ, ki ri kì kànɛn lɛ: Ǹɗì ɓiì wolì m̀ɓèŋì-jɔ̀ɔ̀, jɔ̀ɔ̀ yii yi saàtɛ̀n jaŋ̀bimiɗ.

²⁸ Wɔ̀lɛ ajɛ̀m ì rìghèmɓɛ̀n ɗyɛm̀ ǹɗì ɓiì loloogh ri mìni a Galile.

²⁹ Pyɛɛri à kpaa nyi lɛ: Nsoò ɓum ɓɛ̀cèm ɓaa kɛ̀ɓtɛɛ fìɓàg, mɛ̀ màa kɛ̀ɓtɛn ɓi.

³⁰ Fɔɔnnɛ Yeesus à kpaaghà nyi lɛ: Ǹkpaa wɔ̀ ɓi saaɗ lɛ: Ɓi ru wu gɛɛ̀nɛ wu, ù rì mɛ̀ ɓiì roòzɛɛ gɛ̀n yiraa, di ǹlem à zag à ka rɔŋ ɓi gɛ̀ɛ ɓɛɛ̀.

³¹ Kìɓan kifog, Pyɛɛri à siìrɛ̀n ɓi jɛ̀ɛ̀ yìì ìnɛ lɛ: Nsoò kaa kpaŋi lɛ, ǹwu ɓɛɛ̀ wɔ̀ ǹɗaŋ, màa roòzɛn ɓì wɔ. Ɓɛ̀yilàg ɓɛmbog ɓɛ̀sɛ̀ɛ̀ ɓɛ̀cèm ɓɛ kpaatì girig fɔlɔɔ.

Yeesus à ɓɔ̀ŋzaagh Bɛ̀ll a Gɛsemane

³² Nni ɓɛ kɛngà min ɓi jàŋ ìdɛŋ ɗii lɛ Gɛsemane, Yeesus à kpaa ɓɛ̀yilàg ɓii lɛ: Kɔ̀riina fɛ, cààmɛ̀n ki mɛ̀ɛ ǹka kìki bɔ̀ŋzɛ̀n.

³³ Fɔɔnnɛ à reŋìghà lɛ, rì Pyɛɛri rì Zyag rì Zyaŋ lɛ ɓɛɛ kɛǹ nyi kì foŋì, à tumɛ̀n rìwog ɗi ǹɗemi-kɛŋɛn ɗì ìris,

³⁴ Nni à kpaaghà ɓɔ lɛ: Ǹɗì rì ǹɗemi-kɛŋɛn wu wu ri lɛ, wu wey mɛ̀; nni rɔ̀ɓina foo, ɓi kɔri cem.

³⁵ Fɔɔnnɛ à kɛ̀ɛ̀dìghà asu lɛsàg, à kpì ɓi zi ri mɛ̀ɗu, à ɓɔ̀ŋzì Bɛ̀ll lɛ, i kaa rì lɛ ki kilɛ̀n lɛ kìɓeɓtàg ki cààmɛ̀n ki kɛɛ raɓsɛn nyi,

³⁶ à kpaakpààghà lɛ: Tààta wɛ̀m, ù rì rì ìtèɗ wulɛ ù kì com kìcèm; kìya lɛ ɓeŋ à rìwu ànɛ a ràɓsɛn mɛ̀; nsoò ǹkpaa fɔlɔɔ, kìya rìkɔ̀n ɗyɔɔ, àa ɗiŋkɛ̀m.

³⁷ Nni à sugtìghày jàŋ inɛ ɓɛ̀yilàg ɓɛ ɓaghà, à tanɛ̀n ɓɔ di ɓaa cuu tilò, à kpaa Pyɛɛri lɛ: Simɔn, ù lali yɛɛ lɔɔ lɛ rìkɔ̀rì ɗì lɛ u kɔri cem bimiɗ à hawò ɗyaa yaagh wɔ̀ wa?

³⁸ Kɔ̀riina cem, ɓì ki ɓɔ̀ɔɓɔŋzàg Bɛ̀ll lɛ kɛ̀ ɓi tanɛn ri mɛ̀fèèghrɛn. Ɓisuulɛ ǹghay wu mum wu ri rì ìtèɗ kìɓan kifog nyoo ì ɓa kɛ̀ɛ̀ ìtèɗ.

³⁹ Nni à kɛ̀ɛ̀dìghà tì ɓɔ fìràɓ a ɓɔ̀ŋzì Bɛ̀ll, à ɓììtì tì lɔŋ jɛ̀ɛ̀ yi à lokà kì kpaà.

⁴⁰ Yɛ̀ɛ à sugtìghày tì rì jɛ̀m, à tanɛ̀n tì lɔŋ ɓɛyilàg ɓi fìlo, lɛ fìlo fi rongà ɓɔ mis, ɓɛ̀ kɛɛ̀ ɓa rì com ki kpaayɛn.

⁴¹ Yɛ̀ɛ à sugtìghày tì ɓi gɛ̀n i kìraa, nni à kpaaghà ɓɔ lɛ: Ɓigomìnɛ, lalinà lɛ ɓi fɔɔ̀sɛn; kì leègh, cààmɛ̀n ki ghɛɛ̀sɛɛ, ɓi ghɛn yɛ̀ɛ ɓɛ ɓiì kàɓi Man à mum rì ɓɛ̀kìì-kìɓe.

⁴² Pɛ̀sɛɛna aɗyoo, ti kɛǹ lɛ, roànɛ a kàkaɓ mɛ à tiì.

Ɓɛ ɓani Yeesus

⁴³ Yeesus à kaka à tòtòg fɔlɔɔ, Zyudas ànɛ à ɓaghà kìbog ki ɓi ɓɛ̀yilàg ǹtɛ̀ɗ ɗì ɓɛɓɛɛ̀ à ghàs kì kpaŋì. A ɓaghày rì kìtuu ki ɓum ki ki yughày lɛ rì gàfàg rì ɓìgeŋ; ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna rì ɓɛ̀sɛ̀ɛ̀mɛn ɓɛ ɓi naà-Bɛ̀ll ɓɛɛ romgày ɓɔ.

⁴⁴ Ŋwaànɛ à kàɓkà ɓɔ Yeesus à wooghrɛ̀ngà jɛ̀ɛ̀ rì ɓɔ, lɛ ŋwaànɛ ɓì ɓiì ghɛɛ̀ di ǹlɔ̀ri, ɓì yi lɛ nnyɛɛri, ɓi ɓaǹ, ɓi kɛ̀n ɗì nyi, ɓì ɓèŋ nyì lɛ syeesyee.

⁴⁵ Lɔŋ yɛ̀ɛ Zyudas à kpagà, à ghàs kì tyòŋdɛɛ Yeesus a nyoo, à kpaa nyi lɛ: Raɓì!

⁴⁶ À lwɛ̀ɗ nyi. Ɓumɓɛ̀n ɓɛ sɛn min ɓi Yeesus, ɓɛ ɓan nyi.

⁴⁷ Nni kìbog ki ɓi ɓumɓɛ ɓɛ ɓaghà rì Yeesus, ki sɔnìghày gàfàg ɓi ɗyaŋ, ki ɓog ǹkìì-kìsay a ǹlàmì ɓɛ̀pìrɛɛtìrɛ̀ àgwey, ìreè wu lɛy.

⁴⁸ Yeesus à kpaaghà rì ɓumɓɛ̀n lɛ: Ɓì ghɛɛ mɛ̀ lɛ ǹɗì zyaàzyaa, nni ɓi yùu yì lɛ rì gàfàg rì ɓìgeŋ lɛ ɓi ɓaǹ mɛ̀?

⁴⁹ Mɛ̀ɛ ǹɗì lɔŋ ɓi naà-Bɛ̀ll ɓɛ̀ŋwos ɓɛ̀cèm, ǹɗèèrèsàg ɓum, kɛ̀ ɓi ki ɓan mɛ; kìɓan kifog ki kilɛɛ fɔlɔɔ lɛ, ɓìɓan ɓi ɓi ri ɓì kànɛn ɓyɛɛ roǹ.

⁵⁰ Nni ɓɛ̀yilàg ɓɛ̀cèm ɓɛ tuɓìghà rì mɛ̀ree, ɓɛ rinì Yeesus.

⁵¹ Dɛlì ìdɛŋ ì nɔ̀ɔ̀nɔ̀ɔ̀tìghà Yeesus ǹɗyeɓɓɛn sànjà nyi rì nyi, nni ɓɛ ɓangà yɔ̀,

⁵² ì naŋ sànjà, ì ghaàgh rì mɛ̀ree kìtòn zɛy.

Ɓɛ kɛɛ rì Yeesus a Sànèdìrɛŋ

⁵³ Ɓumɓɛ ɓɛ ɓangà Yeesus ɓɛ kɛ̀ngà rì nyi yɛ̀ɛ nkɔ̀mɛ̀n ɓɛ̀pìrɛɛtìrɛ̀, wɔɔ nnɛ ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn, rì ɓɛ̀rèsàg-ɓìdɔ̀gsɛna ɓɛ taŋzɛ̀ngà.

⁵⁴ Pyɛɛri à nɔ̀ɔ̀nɔ̀ɔ̀tìghày Yeesus fìràɓ à kpaŋ ɓi ǹlɛmɓog wu nkɔ̀mɛ̀n-ɓɛ̀pìrɛɛtìrɛ̀ à kɔ̀rì ɓi nyìinyìm à ɓɛ̀kìì-ɓìsay, a wowòg ɗuu.

⁵⁵ Ɓɛ̀pìrɛɛtìrɛ̀ ɓɛgwey, rì ɓum ɓɛ̀cèm ɓɛ ɓi Sànèdìrɛŋ ɓɛ kaakààghà kìɓan ki lɛ ɓɛɛ wey Yeesus miì, ɓɛ kɛɛ̀ ki ghɛ̀n.

⁵⁶ Ɓisuulɛ ɓum lɛɛ̀gwey ɓɛ pwaapwààghà nyi ɓìɓan ɓi nyoo, wɔ̀lɛ ɓìɓan ɓiǹ ɓìcèm ɓyɛ̀ kɛɛ̀ wɔɔsɛn.

⁵⁷ Ɓɛ̀ro ɓɛdɛŋ ɓɛ rɛlìghà ɓɛ pwàà nyi kìɓan ɓi nyoo, ɓɛ kpaa lɛ:

⁵⁸ Tìi ǹwoogh di a kpaakpaa lɛ, a ɓiì wààghii naà-Bɛ̀ll ìnɛ ɓum ɓɛ togà ìnɛ, à toŋdì ìdɛŋ ɓi mɛ̀ru mɛraa mum kɛ̀ɛ foŋ càg miì.

⁵⁹ Nsoò ɓi ǹto wu sɔmìnà wiǹ, jɛ̀ɛ̀ yi ɓumɓɛ̀n yi ɓaghà dɛŋ dɛ̀ŋ dɛŋ.

⁶⁰ Nni ǹkɔ̀mɛ̀n-ɓɛ̀pìrɛɛtìrɛ̀ à pɛsɛ̀ngà aɗyoo ɓi nyìinyìm à rìghàdà, à tɔg Yeesus lɛ wɔ̀ɔ̀ kpaa la ɓi kìɓan ki ɓumɓɛ ɓɛ kpaa ki, ɓɛ raɗ rì wɔ̀?

⁶¹ Wɔ̀lɛ Yeesus à mìnɛ̀ngà, kɛ̀ɛ ɓàg. Nni ǹkɔ̀mɛ̀n-ɓɛ̀pìrɛɛtìrɛ̀ à ɓììtìghà nyi kì tɔɔ̀gh lɛ wɔ̀ yɛɛ rì Kiris, ànɛ à rì Man à Bɛ̀ll ànɛ ɓɛɛ̀ ɓɔgsàg?

⁶² Yeesus à ɓàg nyi lɛ: Ǹɗì Kiris, ɓì ki rì ɓiì ghɛɛ Man à mum di à kɔ̀kɔrii ɓi weèlem à Bɛ̀ll ànɛ àrì rì ìtèɗ wucèm, à ki yùyuiy ɓi ɓìkwìɗ ɓi aɗyòò.

⁶³ Fɔɔnnɛ ǹkɔ̀mɛ̀n-ɓɛ̀pìrɛɛtìrɛ̀ à ghàskàkà ɓìlàà ɓi à ɓaghà rì ɓyɔ ɓi nyoo, à kpaa lɛ: Tì ɓiì kaatii ti ɓɛ̀wusìnɛ̀ɗ ɓɛdɛŋ lɛ cɛ?

⁶⁴ Mìniìɓɔmiɗ ɓì woogh yɛ̀ɛ à fengii Bɛ̀ll, nni ɓì kpaa la? Ɓum ɓɛmbog ɓɛ̀cèm ɓɛ faghà Yeesus zɔɔ, ɓɛ kpaa lɛ, ki ghɛɛ̀sɛɛ lɛ ɓɛɛ wey nyi.

⁶⁵ Ɓɛ̀ro ɓɛdɛŋ ɓɛ tumɛ̀ngà nyi rìtuutùù ɗi tityɛɛ̀, ɓɛ kikì lɛ, i ɓɛ lɔɔgh nyi kìlàà ɓi mis, ɓɛ ɓoòɓòkì nyi ɓìkam di ɓɛɛ tɔtɔg nyi lɛ: Rèmi ŋwaànɛ à ɓoogh wɔ̀. Ɓi ɗi lɛ ɓɛɛ ghaɓ nyi, ɓɛ̀kìì-ɓìsay ɓɛ togsìghà nyi rì tyɛn ti mɛɓɛn.

Pyɛɛri à roòzɛɛ Yeesus

⁶⁶ Yɛ̀ɛ pyɛɛri à ɓaghà ǹkɔ̀kɔriyɛn ɓi kìtòn ki ǹlɛmɓog, nni giɓ adɛŋ ànɛ ɓi ɓɛ̀yiɓ ɓɛ ɓɛ ɓaghà ɓɛ̀kìì-ɓìsay ɓɛ ǹkɔ̀mɛ̀n-ɓɛ̀pìrɛɛtìrɛ̀ à yughày,

⁶⁷ à ghɛn Pyɛɛri di a wowog ɗuu, à fiɓì nyi lɛ fyɛɛyi à kpaa nyi lɛ: Wɔ̀ girig, wɔ̀ɔ ǹɗì ɓi nɗaŋ wu Yeesus ànɛ a Naazarɛt.

⁶⁸ Nni Pyɛɛri à roòzɛ̀ngà kìɓan kiǹ à kpaa lɛ: Ǹ-yisɛɛ ɓi ri kìɓan yɛ̀ɛ kiǹ, kɛ̀ɛ ǹki wog com ki u kɔ̀nkɔn lɛ u kpaà. Ajɛ̀m ìnɛn Pyɛɛri à pɛ̀sɛ̀ngà foo, à kɛ̀n ɓi jàŋ inɛ ì ɓaghà ɓi rìɗigì ɗi ɓi ǹlɛmɓog.

⁶⁹ Nni giɓ nyimiɗ anɛ̀n à ɓoɓtìghà mis ɓi nyi, à tumɛ̀n rìkpaa ɗi ɓumɓɛ ɓɛ ɓaghà wɔɔ lɛ: Ŋwaànɛnii à rì kìbog ki ɓi nɗaŋ wu ɓumɓɛ̀n.

⁷⁰ Pyɛɛri à roodì tì; yɛ̀ɛ maa cààmɛ̀n à mɛɛ ghaàgh, ɓumɓɛ ɓɛ ɓaghà wɔɔ ɓɛ kpaatì Pyɛɛri lɛ: Ki ri lɔŋ saaɗ lɛ wɔ̀ girig ù rì ŋwaànɛ ɓi ǹɗaŋ wu ɓumɓɛ̀n, ɓisuulɛ, ù rì ŋwaànɛ a Galile.

⁷¹ Fɔɔnnɛ Pyɛɛri à tumɛ̀ngà rìkànàg ɗi bɛ̀ɗ, di a kpaakpaa lɛ: Bɛ̀ll à rì mɛ̀ wusìnɛ̀ɗ lɛ ǹ-yii ɓì ŋwaànɛ ɓi kpaakpaa anɛ̀n.

⁷² Ɓi cààmɛ̀n kɔm̀ kiǹ, ǹlem à ghàs kì rɔŋì ɓi gɛ̀n i kìɓɛ̀ɛ̀; Pyɛɛri à yitì min jɛ̀ɛ̀ ìnɛ Yeesus à kpaaghà nyi lɛ: Ù rì mɛ̀ ɓiì roòzɛɛ gɛ̀n yìraa di ǹlem à ka rɔŋ ɓi gɛ̀n yiɓɛɛ̀. Fɔɔnnɛ à tumɛ̀ngà ǹkɛɛ̀gh.