MARIKUS 12 - Bafia Nouveau Testament

Dàɗkì ì ŋwaànɛ à faghà dɛm yiì rì ɓum

¹ Nni Yeesus à tumɛ̀ngà min ɓɔ rìkpaa ɗi kiɓan ɓi dàɗkì lɛ: Ŋwaàdɛŋ yɛɛ salà dɛm yiì, à ɓɛ̀y viìnyɛ̀ miì, à cèŋzɛ̀n yɔ̀ ri gari, à kì wayɗ ɓi dɛm incèm, à ki toŋ ɓyoo mɛɛ wɔɔ. Fɔɔnnɛ à faghà yɔ̀ ɓi rɛntì rì ɓɛ̀kìì-ɓìsay, nyii kɛǹ rìkɛ̀ɛ̀.

² Yɛ̀ɛ viìnyɛ̀ ì ɓàgà lɛ ɓɛɛ kɛs, nni à pɛ̀sìghà mum, à rom a ɓɛ̀kìì-ɓìsay ɓɛ à faghà dɛm ri ɓɔ, lɛ ɓɛɛ fa nyi gàɓ yìi ɓyom ɓi ɓi dɛm.

³ Nni ɓɛ̀kìì-ɓìsay ɓɛǹ ɓɛ ɓangà ŋwaànɛ ɓɛ romgày ànɛn, ɓɛ kwiy nyi, ɓɛ pɛɛ̀zì nyi rì jɛ̀m ɓyàg zɛy yɛ̀ɛ masà wìì.

⁴ Fɔɔnnɛ ŋwaàdɛm à pɛ̀sìghà tì ŋwaàdɛŋ, à romdì tì a ɓɛ̀kìì-ɓìsay ɓɛ ɓi dɛm ɓɛǹ; ɓɛ̀roɓɛ̀n ɓɛ ɓog ŋwaàncèm ɓi ǹto, ɓɛ ki sɛmgi nyi.

⁵ Nni ŋwaàdɛm à romdìghà tì lɔŋ mum ɓi gɛ̀n i kìraa, ɓumɓɛ̀n ɓɛ wey ŋwaà-fìtom ancèm; ɓɛ kitìghà tì girig ɓum ɓɛdɛŋ lɛɛ̀gwey ɓɛ ŋwaàdɛm a romgà com kìfog; ɓɛ ki lɛ: Ɓɛ kwiy ɓɛ̀roɓɛ, ɓɛ cuusì ɓɛ̀ro ɓɛmbog.

⁶ Lɔŋ m̀bobog à mum ànɛ ŋwaàdɛm à ɓaghà di à mɛ rɔ̀ɓ ri nyi à ɓaghà lɔŋ lɛ man wiì ànɛ à keesìghà lɛɛ̀gwey; nyi nnɛ à siitɛ̀ngà kì romì a ɓɛ̀kìì-ɓìsay ɓɛ ɓi dɛm yiì, à fèkì lɛ, ɓɛ ri ɓiì kuuraagh man wiì.

⁷ Wɔ̀lɛ ɓɛ̀kìì-ɓìsay ɓɛ wɔrɛ̀ngà ɓɛ kpaa lɛ: Roànɛ yɛɛ ri ɓiì rɔ̀ɓi ri dɛm i seŋì; yùuna, ti wey nyi di dɛm yɛ̀ɛ woòghrɛn rì ɓìsi.

⁸ Fɔɔnnɛ ɓɛ ɓangà min man ànɛ̀n ɓɛ wey, ɓɛ mag kìloŋ kii jɛ̀m ì gari i dɛm.

⁹ Nni ǹtɔɔ̀tɔɔgh wu ri lɛ: Cɛ kɛɛ̀ ki ŋwaàdɛm a rì ɓiì kìi? Ŋwaàdɛm a ɓiì yùu, à cuusì ɓɛ̀kìì-ɓìsay ɓɛǹ à ki reɓsɛn dɛm ri ɓum ɓɛdɛŋ lɛ ɓɛɛ sasay.

¹⁰ Ɓì ka ɓala ɓì nya yɛ̀ɛ ki ri kì kànɛn lɛ: Gɔ̀g ìnɛ ɓɛ̀toŋì-mɛɛ ɓɛ makà, yɛ̀ɛ ki ghalà gɔ̀g ìnɛ yɛ̀ɛ konag kìlèmi ǹtɔn à mɛɛ?

¹¹ Kìɓan kiǹ ki ɓaghày yɛ̀ɛ Kan, ki ki rì dàm ì kìɓan ìnɛ ì kìlɛɛ ɓìsi ɓi mis.

¹² Mɛ̀fòm mɛ Ɓɛ̀yudɛ̀n mɛ kaakààghà bee inɛ lɛ ɓɛɛ ɓaǹ Yeesus, kìɓan kifog, ɓɛ risìghà gùl ì ɓum; ɓɛ ghɛngà lɛ Yeesus à tekà dàɗkì ìnɛn ɓi ɓɔ, nni ɓɛ pɛsɛ̀ngà, ɓɛ ghaaghràg.

Ɓɛ tɔɔgh Yeesus ntɔɔ̀tɔɔgh ɓi kìɓan ki làmpoŋ̀

¹³ Ɓɛ rom lɛ rì Ɓɛ̀fàrìzyɛŋ ɓɛdɛŋ rì ɓum ɓɛdɛŋ ɓɛ ɓi ǹɗaŋ wu Eroodɛ yɛ̀ɛ Yeesus lɛ ɓɛɛ wɔɔ̀si nyi ɓi ɓìtòkì ɓii.

¹⁴ Nni ɓumɓɛ̀n ɓɛ yughày, ɓɛ kpaa nyi lɛ: Ǹɗèsàg, ti yii lɔŋ lɛ ù rì ŋwaànɛ a kpaakpaa saaɗ, ù ki ti kɔ̀ɔ risi mum, ɓisuulɛ, wɔ̀ɔ̀ yin ɓiì nɔ̀ɔnɔɔ̀tì rìɓa ɗi mum, u rèresi ɓum bee inɛ yɛ̀ɛ Bɛ̀ll yɛ̀ɛ ki ghɛɛ̀sɛɛ. Nni kali ɓìsi ǹkòo ɓìdɔ̀gsɛna ɓis ɓi gherɛɛ lɛ ti peèghi làmpoŋ̀ rì Kaaza; ki ri kàŋbɛn lɛ ti peè gìn ki yin kàŋbɛn?

¹⁵ Yeesus à yighà lɛ ɓɛ purii nyi càg ɓi ɗùm yɛɛ ri, fɔɔnnɛ à tɔkà ɓɔ lɛ: Ɓisuucɛ nnɛ ɓi fèeghfeèghrɛ̀n mɛ̀? Yùunay mɛ̀ fɛ rì fìraŋ̀ nghɛǹ.

¹⁶ Nni ɓɛ yughày nyi rì fìraŋ̀, à tɔg ɓɔ lɛ: Kìfèèghrɛnà ki ghɛn kɛɛ ri lɛ miì? Ɗii ɗi ghɛn ɗyɛɛ ki rì tì lɛ? Ɓɛ ɓaàg nyi lɛ: Ɓi ri yɛɛ lɔɔ lɛ, rì kìfèèghrɛnà ki Kaaza, rì ɗii ɗìì.

¹⁷ Yeesus à kpaa min ɓɔ lɛ: Pɛ̀ɛ̀ziina ɓyom ɓi Kaaza rì Kaaza, ɓì pɛ̀ɛ̀zì ɓi Bɛ̀ll rì Bɛ̀ll. Ɓɛ kuuràkà lɛɛ̀gwey yɛ̀ɛ à ɓàkà ɓɔ fɔlɔɔ.

Ɓɛ̀sàdùsyɛŋ ɓɛ tɔɔgh Yeesus ǹtɔɔ̀tɔɔgh ɓi kìɓan ki righèmɓɛ̀n ɗi ɓilòŋ

¹⁸ Ɓɛ̀sàdùsyɛŋ ɓɛ ɓɛɛ kpaaghi lɛ, com kidɛŋ ki yin lɛ rìghèmɓɛ̀n ɗi ɓilòŋ, ɓɛ yughày Yeesus a nyoo, ɓɛ tɔg nyi lɛ:

¹⁹ Ǹɗèsàg, Moyis à kàngà lɛ ti kilag lɛ; i gèni mum à wii à càɗ giɓ di à ka yin ɗi man ɗì nyi, geni ŋwaànɛ à wii ànɛ̀n, à ghɛ̀ɛ̀sɛɛ kì wɔlì ǹkpɔɓ wii, à yay ɓɔn rì wɔ ɓi ɗii ɗi geni.

²⁰ Wɔ̀lɛ ki kilɛ̀ngà lɛ; ɓum ɓɛdɛŋ ɓɛɛ ɓaghà ɓi rìgeni ɗyaa ɓɛsɛ̀ɛ̀ taàɓɛ̀ɛ̀, baŋì rì baŋì. Roà ǹtonto à wɔlɛ̀n, à ki wu kɛ̀ɛ càɗ man;

²¹ geni à kìɓɛ̀ɛ̀ à teɗ ǹkpɔɓ wii, nyi girig à wu, kɛ̀ɛ càɗ man, ki kilɛ̀ngà tì fɔlɔɔ ri roà kìraa,

²² rì ɓɛro ɓɛmbog ɓɛ̀sɛ̀ɛ̀ ɓɛ̀cèm, nsoò mum bog ànɛ ɓi ɓɔ ɓɛ̀sɛ̀ɛ̀ taàɓɛ̀ɛ̀, à càɗkà ɓì man rì giɓ anɛ̀n. Ajɛ̀m ì kìtaàɓɛ̀ɛ̀ ki ɓum kìn, nnɛ giɓ anɛ̀n à wughà girig.

²³ Yɛ̀ɛ ɓum ɓɛ kitaàɓɛ̀ɛ̀ ɓɛn ɓɛ wɔlà giɓ anɛ̀n ɓɔɔ̀cèm, nni à ɓaa gɛ gili ghɛn anɛ ɓì ɓɔ ŋwosi righèmɓɛ̀n ɗi ɓiloŋ?

²⁴ Yeesus à ɓàkà ɓɔ lɛ: Ɓì pwààrɛɛ, ɓisuulɛ yɛ̀ɛ ɓì yii ɓi nya ɓìɓan ɓi ɓi kaàtà à Bɛ̀ll, kɛ̀ ɓi ki yi itèɗ wu Bɛ̀ll.

²⁵ Lɛ ŋwosi righèmɓɛ̀n ɗi ɓilòŋ, ɓɛ̀baŋì ɓaa wɔɔti ɓi ɓɛ̀yiɓ, ɓɛ̀yiɓ ɓɛ̀ kɛ̀ɛ wɔɔti ɓɛbaŋì, kìɓan kifog ɓɔɔ̀cèm ɓɛ ɓaa gɛ lɔŋ yɛ̀ɛ ɓum ɓɛ titom ɓɛ ɓɛ ri aɗyòò.

²⁶ Ɓi kìɓan ki righèmɓɛ̀n ɗi ɓiloŋ ki ɓi tɔtɔ̀g, ɓì ɓalà ɓi kaàtà à Moyis jàŋ ìnɛ Bɛ̀ll à kpaaghà nyi ɓi kìtwìɗ lɛ: Ǹɗì Bɛ̀ll à Abiraham, Bɛ̀ll à Isag, Bɛ̀ll à Yakɔɓ?

²⁷ Ki rèsii lɛ Bɛ̀ll à yin Bɛ̀ll à ɓìloŋ, a rì Bɛ̀ll à ɓumɓɛ ɓɛ ri cem; ɓi rì ɓi rìnàn lɛ kɔɔ̀kɔɔ̀.

Kìdɔ̀gsɛna ki ki cee ɓìdɔ̀gsɛna ɓìcèm

²⁸ Kìbog ki ɓi ɓɛ̀rèsàg-ɓìdɔ̀gsɛna kidɛŋ ki wowòkà yɛ̀ɛ Yeesus à nyoònyòlɛ̀ngà rì ɓumɓɛ̀n, ki ki ghɛn lɛ Yeesus à konàkà ɓɔ kì ɓàagh. Nni à tyɛ̀ɛ̀tɛ̀ngày, à tɔg Yeesus lɛ: Kìdɔ̀gsɛna kibe kɛɛ cee ɓìdɔ̀gsɛna ɓìcèm?

²⁹ Yeesus à ɓàkà lɛ: Kìdɔ̀gsɛna ki asu kɛɛ̀ki lɛ: Wɔ̀ Isirayɛl, wogha lɛ Kan Bɛ̀ll wìs nnyɛɛ ri lɔŋ Kan cɛ̀ncii.

³⁰ Fɔɔnnɛ keesi Kan Bɛ̀ll wɔ̀ɔ̀, rì ǹɗem wɔɔ wucèm, rì ǹghay wɔɔ wucèm, rì mɛ̀yitì mɔɔ mɛcèm, rì ìtèɗ wɔɔ wucèm.

³¹ Ki kiɓɛ̀ɛ̀ ki ri lɛ: Keesi romum ànɛ wɔ̀ jàŋbog lɔŋ yɛ̀ɛ wɛ̀ɛmìɗ; kìdɔ̀gsɛna kìdɛŋ kì ki cee ɓiǹ, ki yiìdi.

³² Nni ǹɗèsàg-ɓìdɔ̀gsɛna anɛ̀n à kpaaghà Yeesus lɛ: Raɓì, com ki ù kpaa ki ri miì, lɛ Bɛ̀ll à rì lɔŋ bog fɔɔnnɛ Bɛ̀ll ìdɛŋ ì yiìdi;

³³ rì tì lɛ, mum à ghɛ̀ɛ̀sɛɛ kì keesii Bɛ̀ll rì nɗem wii wucèm, rì ɗyomzɛ̀n ɗii ɗicèm, rì ìtèɗ wii wucèm, à ki keesi ti romum ànɛ àrì nyi jàŋbog yɛ̀ɛ nyimìɗ; rìkì ɗiǹ ɗi rɔɔtɛɛ ɗi cee ɓìtuwe ɓi mum à rì lɛ à tɔ̀ngì ɓisuu Bɛ̀ll, nsoò ɓyom ɓi à rì lɛ à fùnɛ̀n lɛ a ɓɔgsi Bɛ̀ll miì.

³⁴ Yɛ̀ɛ Yeesus à ghɛngà lɛ ŋwaànɛ̀n à ɓàagh kìɓan kiǹ rì ɗyomzɛ̀n, nni à kpaaghà nyi lɛ: Ù ràɓsɛɛ ɓi kilɔ̀ŋ ki Bɛ̀ll; ajɛ̀m ìnɛn, ŋwaàdɛŋ à ghɛɛsìghà tì ɓi lɛ a tɔg ti nyi ntɔɔ̀tɔɔgh.

Kiris à yin lɛ à ɓa man à Davit

³⁵ Yeesus à tekà jɛ̀ɛ̀, à tumɛ̀n ɓum rìrèsàg ɗi ɓiɓan ɓi naà-Bɛ̀ll, à tɔg lɛ: Ɓisuucɛ nnɛ ɓɛ̀rèsàg-ɓìdɔ̀gsɛna ɓɛ ti ɓɛ kpaaghì lɛ Kiris à rì man à Davit?

³⁶ Davit nyimiɗ a kpaaghà, di Kìtɛntɛ̀ɛ̀n ki Nghay ki mɛ fa nyi ɗyomzɛ̀n lɛ: Kan àa ǹkpaa Kan wɛ̀m lɛ: Kɔ̀ri mɛ̀ fɛ ɓi weèlem à kpaŋ yɛ̀ɛ ǹɗì ɓiì ghaasii ɓɛ̀bènàbena ɓɔɔ com ki rɛsakɛn mɛkòò mɔɔ miì.

³⁷ I Davit nyimiɗ a reŋii nyi lɛ Kan, Lannɛ ki kɛɛ̀dii kì kpaŋì lɛ a ɓa ti man wiì? Coo gùl ì ɓum ì wowòkà ɓìɓan ɓi Yeesus à kpaakpààghà rì kìnyàà ɓi ǹɗem.

Yeesus à rèsii lɛ ɓìɓan ɓi ɓɛ̀rèsàg-ɓìdɔ̀gsɛna ɓɛɛ̀ kìkì ɓi rɔɔtɛɛ ɓi

³⁸ Nni à kpaaghà ɓum ɓɛ à rèèrèsàkà ɓɛǹ lɛ: Konaaghna rì ɓɛ̀rèsàg-ɓìdɔ̀gsɛna ɓɛ ɓɛ ti ɓɛ keesàg rìrerènì ɗi jàŋ di ɓɛ waataagh ɓyoo ɓɛ̀kàɓà, ɓɛ kɔngì girig lɛ ɓɛɛ toòtògsì ɓɔ rì coo nyaasɛ̀n ɓi gwìy.

³⁹ Ki rɔɔghì ɓɔ lɛ ɓɛɛ kɔri ɓi mɛ̀kɔ̀ɔ̀ mɛ asu di ɓɛ kɛɛ̀ kìsɛ̀nɛ̀, ɓɛ ki teki mɛkɔ̀ɔ̀ mɛ beèbɛ̀y ɓi naa yi bɔ̀ŋzɛ̀n.

⁴⁰ Ɓumɓɛ̀n ɓɛ̀fog ɓɛɛ ti ɓɛ pumzàg mɛ̀kpɔɓ mɛ ɓɛ̀yiɓ, ɓɛ ki kìlag ɓyoo bɔ̀ŋzɛ̀n lɛ ɓum ɓɛɛ sɛsɛg ɓɔ. Ɓɛ ri teri gɛ kìtèetèɗ ki pɔnɔsì ki ki ɓaa gɛ fɔlɔɔ lɛ yoɓ.

Bɔgsì ìnɛ ǹkpɔɓ wu giɓ wu faghà

⁴¹ Yeesus à kɔ̀rìghà, a fa mis rì fìkɔrɔŋ fi ɓɛ ǹpìkì mɔ̀ɔ̀ni mɛ bɔgsì miì à seesèè yɛ̀ɛ ɓìtuu ɓi ɓum ɓi pipìkà mɔ̀ɔ̀ni; ɓɛ̀guŋgum lɛɛ̀gwey ɓɛ suùsùùrì ɓyoo mɔ̀ɔ̀ni.

⁴² Nni maa ǹkpɔɓ a giɓ a yùghày girig, à pìg ɓɔɔ tiraŋ̀ ɓɛɓɛɛ̀rɛn ɓɛ kpaŋɛn dolà yiɓɛɛ̀ ɓi fìkɔrɔŋ.

⁴³ Fɔɔnnɛ Yeesus à regìghà ɓɛ̀yilàg ɓii, à kpaa ɓɔ lɛ: Ǹkpaa mìni ɓi saaɗ lɛ, rìfa ɗi maa ǹkpɔɓ a giɓ anɛ ɗi cee ri mum bimiɗ ànɛ à piìgh mɔ̀ɔ̀ni ɓi fìkɔrɔŋ;

⁴⁴ ɓisuulɛ ɓɛ̀sɛ̀ɛ̀ ɓɛ̀cèm ɓaa pìigh gàɓ ì mɔ̀ɔ̀ni ìnɛ yàa mɛ rɔ̀ɓ ɓɔ kɛ̀ɛ̀ kìsay, wɔ̀lɛ giɓ anɛ nyaa foŋi gàɓ ì com bimiɗ ìnɛ àa rì rì yɔ̀, ìnɛ àa ghɛ̀ɛ̀sɛɛ lɛ à ghɛɓ miì.