MARIKUS 1 - Bafia Nouveau Testament

Rìkalì ɗi ɓɔlɛ ɗi Zyaŋ Bàɓtis

¹ Rìtumɛ̀n ɗi Syeesyee à Ɓɔlɛ à Yeesus Kiris Man à Bɛ̀ll.

² Fɛlɛ yɛ̀ɛ ki ri kìkànɛn ɓi kaàtà à ǹkpaŋzì-ɓìɓan Ezayii lɛ: Ghɛna, ǹɗomi wɔ̀ mum Wɛm̀ à fìtom beèbɛ̀y, lɛ a pegsɛn wɔ̀ bee.

³ Jɛ̀ɛ̀ ìnɛ ìrì jɛ̀ɛ̀ ì roànɛ a làalamɓɛ̀n yì ɓi-reɓ lɛ: pègsɛɛna bee yi Kan ɓi rɛsàg yɔ lɛ saaɗ.

⁴ Nni Zyaŋ à peeghày ɓi-reɓ, à ɓààɓàɓtì ɓum à ki làalamɓɛ̀n lɛ, ɓum, ɓɛɛ ɓɛɛ lɔɔ̀ghrɛn mɛ̀rem, ɓɛ̀ ɓaɓtɛ̀n, fɔɔnnɛ Bɛ̀ll a cenɛn mìni ɓìɓe ɓyaa.

⁵ Ɓum ɓɛ̀cèm ɓɛ ɓi ziì Zyude, rì ɓɛ a Yorisalɛm, ɓɛ pɛɛ̀pɛ̀sɛ̀ngày di ɓɛɛ̀ yùyuiy a lɔ̀ŋkii, nyii ki ɓàaɓaɓtì ɓɔ ɓi ǹsyòm wulɛ Zyuridɛŋ, di ɓɛ mɛ kpàki ɓiɓe ɓyaa.

⁶ Zyaŋ à ɓaghà ri kìlàà ki ɓɛ tiŋi ri nyùŋ yi syàmoo, à ŋirɛ̀n kànɗa à gòò ɓi kìɓon, à ki ɗiɗi lɛ, rì ɓìtàtàɗ, rì mɔ̀ɔ mɛ ilòò wu ɓɛ pisii yì ɓi cog.

⁷ A kakàlìghà ɓum lɛ: Roànɛ à rìì mɛ̀ ajɛ̀m, à cee mɛ̀ ɓi-tèɗ, ǹkpaŋi ɓi ɓi ǹkoŋ wulɛ ǹlaŋi, ǹfùmì mɛ̀ɗig mii mɛ gòò.

⁸ Mɛ̀, m̀bàɓtii mìni rì mɛ̀nig, kìɓan kifog nyii ri mìni ɓiì ɓàɓtii ri Kìtɛntɛ̀ɛ̀n ki Nghày.

Bàɓtis i Yeesus

⁹ Lɔŋ ɓi mɛ̀ru mɛ̀n, Yeesus à pɛsɛngày a Naazarɛt, ɓi kiden ki zi ki a Galile à yùy, Zyaŋ à ki ɓàɓti nyi ɓi Zyuridɛŋ.

¹⁰ Yɛ̀ɛ Yeesus à kpaŋkpàŋgày ɓi mɛ̀nig, nni à ghɛngà di ɗyoo ɗi nɛmɓɛɛ, Kìtɛntɛ̀ɛ̀n ki Nghay ki sɛnsɛ̀n yì nyi ɓi nyoo fɛ lɛ yɛ̀ɛ kuùkuù.

¹¹ Jɛ̀ɛ̀ i ki ɓɔ̀ɓ yi aɗyoo lɛ: Ù ri Man wɛm̀ à ǹɗem, ɓi wɔ̀ nnɛ ǹfoŋi kìnyàà kɛm̀ kìcèm.

¹² Ajɛ̀m ìnɛn, nni Nghay à Bɛ̀ll à ghàskà kì tinii Yeesus lɛ a kɛǹ ɓi-reɓ.

¹³ Fɔɔnnɛ à ghagsighà mɛ̀ru mɛ̀tin mɛɓɛɛ̀ ɓi-reɓ wiǹ, Satàn a fèèghrɛ̀n nyi wɔɔ. À ghɛghɛ̀ɓkà wɔɔ ri nyàm yi ɓi cog, wɔ̀lɛ ɓum ɓɛ titom ɓɛ kikìghà nyi tìtom.

Yeesus à kalii ɓìɓan ɓi Bɛ̀ll a Kapɛrinawum; à ɓɔ̀n ɓum ɓɛniǹ lɛ ɓɛɛ ɓa ɓɛ̀yilàg ɓii

¹⁴ Yɛ̀ɛ ɓɛ ɓaghà di ɓɛ mɛ ɓan Zyaŋ, Yeesus à kɛ̀ngà a Galile, à kakàlì Syeesyee à Ɓɔlɛ à Bɛ̀ll.

¹⁵ À kpaakpààghà ɓum lɛ: Cààmɛ̀n ki ghɛ̀ɛ̀sɛɛ, kìlɔ̀ŋ ki Bɛ̀ll ki mɛ tyɛ̀ɛ̀tɛn yi; lɔ̀ɔ̀ghrɛɛna mɛ̀rem, ɓi gherɛn Syeesyee à Ɓɔlɛ.

¹⁶ Yɛ̀ɛ Yeesus à ghaghàghìyà ɓi ǹwɔŋì wu riɓày ànɛ a Galile, nni à ghɛngà ɓɛ̀-Simɔn ɓɛɛ̀ Andire à geni di ɓɛɛ̀ pìpig dam ɓi rìɓày, lɛ ɓɛ ɓaghà ɓɛ̀pììgh-dam.

¹⁷ Yeesus à kpaa ɓɔ lɛ: Nɔ̀ɔ̀tiina mɛ̀, di ǹki lɛ ɓi ɓa ɓɛ̀syòŋì-ɓum.

¹⁸ Fɔɔnnɛ ɓɛ ghaskà kì càri dam yaa, ɓɛ nɔɔ̀tì nyi.

¹⁹ Yɛ̀ɛ à kɛ̀ɛ̀dìghà tì asu lɛsàg, nni à ghɛngà Zyag, man à Zeɓede ɓɛɛ Zyaŋ à geni; ɓɛ ɓaghà ɓi rìpègsɛ̀n ɗi dam yaa ɓi kìkɔm ɓiɗùm.

²⁰ Fɔɔnnɛ Yeesus à ghaskà ɓɔ ki reŋii, ɓɛ̀roɓɛǹ ɓɛ rinì Zeɓede à seŋi wàà ɓi kìkɔm, rì ɓɛ̀kìì-ɓìsay, ɓɛ nɔɔ̀tì nyi.

Yeesus à wɔ̀ɔ̀zii ɓum mɛ̀kuu mɛ̀kuu

²¹ Nni ɓɛ kɛngà a Kapɛrinawum, Yeesus à ɗiŋì ɓi naà-bɔ̀ŋzɛ̀n ŋwosi Saɓàt; à tumɛ̀n rìrèsàg ɗi ɓum.

²² Ɓum ɓɛ kuuràkà rìrèsàg ɗii, ɓisuulɛ ɗi ɓaghà ɓi yɛ̀ɛ ɗi ɓɛ̀rèsàg-ɓìdɔ̀gsɛna ɓi Ɓɛ̀yudɛ̀n; rìrèsàg ɗii ɗi ɓaghà ɗi ŋwaànɛ ɓɛ faa ìtèɗ wulɛ a reèrèsàg ɓum.

²³ Ŋwaàdɛŋ ànɛ à ɓaghà rì kìɓeɓtàg ki nghay à ɓaghà kɔmiɗ ɓi naà-bɔ̀ŋzɛ̀n ì ɓumɓɛ̀n.

²⁴ Fɔɔnnɛ ŋwaànɛ̀n à syangà jɛ̀ɛ̀ aɗyoo lɛ: Ki rì wɔ̀ la ri ɓìsi, Yeesus ànɛ a Naazarɛt! wàa yùu yì fɛ lɛ u cuùsi ɓìsi? Mɛ̀ ǹkonaagh ki yiì rìkuu ɗi mum ɗi ù rì; wɔ̀ yɛɛ ri roànɛ à rì ǹtɛnɛn, lɛ Bɛ̀ll yɛɛ romiì wɔ̀.

²⁵ Nni Yeesus à fwààdɛ̀ngà kìɓeɓtàg ki nghay kìn, à kpaa kɔ lɛ: Maarɛn foo, ù ki pɛ̀sɛn ɓi ŋwaànɛ̀n.

²⁶ Fɔɔnnɛ kìɓeɓtàg ki nghay kìn ki narìghà ŋwaànɛ̀n lɛ saɗ-sààɗ, ki kpaŋ ɓi ŋwaànɛ̀n di kɛɛ̀ syansyàn jɛ̀ɛ̀ aɗyòò.

²⁷ Ìris wu ɓangà ɓum ɓɛ̀cèm ɓɛ ɓɛ ghɛngà kìɓan kiǹ ɓɛ tɔɔ̀ghtɔ̀ɔ̀ghrɛ̀n ɓɔ rì ɓɔ lɛ: Cɛ kɛɛ ri kɔmiɗ lɛ! wooghna nyɔɔnyɔn à dɔgtɛ̀n ànɛ a rèresi ri ìtèɗ wu rilàmì; a kɔ̀ɔkɔmɛ̀n lɛ rì ɓìɓeɓtàg ɓi mɛghay miì, ɓi ki kìki nyi mɛ̀wog'

²⁸ Fɔɔnnɛ rìkem ɗi Yeesus ɗi ghaskà ki sàa ɓi ziì Galile bimiɗ.

²⁹ Yɛ̀ɛ ɓɛ kpagày ɓi naà-bɔ̀ŋzɛ̀n, nni ɓɛ kɛngà rì ɓɛ̀-Zyag ɓɛɛ Zyaŋ a mɛɛ mɛ ɓɛ̀-Simɔn ɓɛɛ̀ Andire.

³⁰ Jɛɛ gili Simɔn à ɓaghà kìnɔ̀ŋnɔ̀ŋ lɛ à ɓaghà lɛ tɔ̀gtɔ̀g. Fɔɔnnɛ ɓɛ fyɛɗmɛ̀ngà kìkpaà Yeesus fìroɓ fi giɓ anɛ̀n.

³¹ Yeesus à tyòŋdɛ̀n nyi jàŋbog, à ɓan nyi ɓi càg, à pɛ̀sì nyi aɗyòò; rìɓa ɗi à ɓaghà lɛ tɔ̀gtɔ̀g ɗi leg, à tumɛ̀n ɓɔ rìkàà ɗi ɓiɗilàg.

³² Yɛ̀ɛ cɛ̀ɛŋkò ki kpagà, ɗi ŋwos a mɛ cèŋ, nni ɓɛ yughày Yeesus lɛ, rì ɓum ɓɛ̀cèm ɓɛ ɓɛ roròɓkà, ri ɓɛ ɓɛ ɓaghà rì ɓìɓeɓtàg ɓi mɛghay.

³³ Fɔɔnnɛ ɓum ɓɛ̀cèm ɓɛ ɓi bàn ìnɛn ɓɛ kunìghà asuunaa.

³⁴ Yeesus à wɔ̀ɔ̀zì ɓum lɛɛ̀gwey ɓɛ ɓɛ roròɓkà tìroɓ mɛ̀kuu lɛ mɛ̀kuu; à nàɓ girig ɓìɓeɓtàg ɓi mɛghay lɛɛ̀gwey, wɔ̀lɛ, à faghà ɓi ɓiɓeɓtàg ɓi mɛghay ìtèɗ wulɛ ɓyɛɛ toòghrɛn, lɛ ɓi yighà nyi lɛ syeesyee.

³⁵ Yɛ̀ɛ duri i ɓaghà di ì ti jàŋbog ɗì rìtan, wɔ̀lɛ di birìm ì kaka lɛɛ̀gwey, Yeesus à pɛ̀sɛ̀ngà aɗyoo à kpaŋ ɓi dan, à kɛ̀n jàŋ inɛ ɓum ɓɛ wuɓsɛ̀ngà ɓi, à tumɛ̀n rì ɓɔ̀ŋzàg ɗi Bɛ̀ll.

³⁶ Fɔɔnnɛ Simɔn, ri ɓumɓɛ ɓɛ ɓaghà rì ɓɔ, ɓɛ tumɛ̀ngà nyi rìkaa kìɓan ɗi kìɓan.

³⁷ Yɛ̀ɛ ɓɛ tanɛ̀ngà nyi, ɓɛ kpaa nyi lɛ: Ɓum ɓɛ̀cèm ɓɛɛ tɔtɔg wɔ.

³⁸ Yeesus à ɓàg ɓɔ lɛ: Ti kɛǹ jàŋ idɛŋ ɓi ɓɔɔ bàn ɓɛ ɓɛ wuɓsɛɛ fɛ̀, nkalì girig Ɓɔlɛ à Bɛ̀ll wɔɔ, lɛ ɓisuu kisay kiǹ innɛ màa kpaŋiì.

³⁹ Fɔɔnnɛ à kɛ̀ngà di a rereni ziì Galile à kakàlì Ɓɔlɛ à Bɛ̀ll ɓi naa yi bɔ̀ŋzɛ̀n à ki nànaɓ ɓiɓeɓtàg ɓi mɛghay.

Yeesus à wɔ̀ɔ̀zii kukwiy

⁴⁰ Kukwiy adɛŋ à yùghà Yeesus a nyoo, à kpì nyi asu rì mɛ̀ɗu, à yɛ̀gsì nyi ɓyàg à kpaa lɛ: I ki kɔni wɔ̀, ù rì lɛ ù kì lɛ m̀ɓa ti lɛ syeesyee ɓi nyoo yɛ̀m.

⁴¹ Fɔɔnnɛ nyìighnyìg ì kìghà Yeesus rì ŋwaànɛ̀n, à nàm càg à kòm nyi, à kpaa lɛ: Ki kɔni mɛ̀, ɓaya lɛ syeesyee ɓi nyoo yɔ̀ɔ̀.

⁴² Nni kwiy a ŋwaànɛ̀n à ghaskà kì kùrɛɛ, nyoo yìì i sugtì lɛ syeesyee.

⁴³ Yeesus à ɓaghà lɛ, à mɛ rɔgsag nyi syeesyee à rìrɔ̀gsàg, à ghàs nyi kì càri lɛ a kɛǹ.

⁴⁴ À kpaa nyi lɛ: Kɔ̀ɔ fèg mum kì ɓùŋi kiɓan ki; kɛ̀na lɔŋ ki rèsɛɛ ɓi mis mɛ pìrɛɛtìrɛ̀, u ki fa rifa ɗi Moyis à kpaaghà lɛ ɓɛɛ falag ɓisuu zòghɛ̀n yɔ̀ɔ̀, lɛ kɛɛ ɓa ɓɔ kìrèmzɛna ki lɛ ù mɛ wɔ̀n.

⁴⁵ Kìɓan kifog, yɛ̀ɛ ŋwaànɛ̀n à kɛ̀ngà, nni à tumɛ̀ngà rìlààlàmɓɛ̀n ɗi ɓɔlɛ à kìɓan kiǹ, à sààsààtì nyi lèg ànɛ lɛ Yeesus à ɓatìghà ɓi lɛ à ɗiŋì ɓi bàn ìdɛŋ ɓi mɛ̀tàna. Wɔ̀lɛ àa ǹti à kɔ̀ràg ɓi ɓɛ̀kòdò ɓɛ ɓɛ lɛŋzɛɛ rì bàn, rì jàŋ yi ɓum ɓɛ wuɓsɛɛ ɓi, fɔɔnnɛ ɓum ɓɛ pɛɛ̀pɛ̀sɛ̀ngày ɓɛ̀tum ɓɛ̀cèm, ɓɛ yuyù nyi kì ghɛnghɛni.