LUKAS 9 - Bafia Nouveau Testament

Yeesus à romi ɓɛ̀yilàg ɓii ǹtɛ̀ɗ rì ɓɛɓɛɛ̀

¹ Nni Yeesus à taŋzɛ̀ngà ɓɛ̀yilàg ɓii ǹtɛ̀ɗ rì ɓɛɓɛɛ̀, à fa ɓɔ itèɗ wu nàɓɛn ɓiɓeɓtàg ɓi mɛghay mɛ̀kuu mɛ̀cèm, rì wulɛ ɓɛɛ wɔɔ̀wɔ̀ɔ̀zì ɓɛ̀roroɓ.

² Fɔɔnnɛ à romgà ɓɔ lɛ, ɓɛɛ kɛǹ ki làalam̀ɓɛ̀n Syeesyee à Ɓɔlɛ à kìlɔ̀ŋ ki Bɛ̀ll ɓɛ ki wɔ̀ɔwɔɔ̀zì ɓɛ̀roroɓ.

³ Nni à kpaaghà ɓɔ lɛ: Kɛ̀ ɓi ɓanɛn com yɛ̀ɛ ɓi kɛ̀nkɛ̀n, kɛ̀ ɓi teɗ nsoò kìgeŋ, nsoò ɓàm, nsoò com kiɗiyɛn, nsoò mɔ̀ɔ̀ni, nsoò ɓìlàà ɓiɓɛɛ̀.

⁴ Naa bimiɗ ìnɛ ɓɛ ghaɓi mìni wɔɔ, kɔ̀riina ɓi naa ìnɛ̀n, à kpaŋ yɛ̀ɛ ɓi rì wɔɔ ɓiì pɛ̀sɛɛ lɛ ɓi ghaàgh.

⁵ Jàŋ bimiɗ ìnɛ ɓɛ beni mìni kì ghàɓi, kùrina kùrùɓu ànɛ mìni ɓi mɛ̀kòò di ɓì ti ɓiì pɛ̀sɛɛ ɓi bàn ìncèm, rìkì ɗiǹ ɗyɛ resi zɛ̀ɗ yaà.

⁶ Fɔɔnnɛ ɓɛ̀yilàg ɓɛǹ ɓɛ kɛngà, ɓɛ rereni ɓìlɔ̀ŋ di ɓɛɛ̀ kakali ɓum Syeesyee à Ɓɔlɛ, ɓɛ wɔɔ̀wɔ̀ɔ̀zì ɓum jàŋbimiɗ.

Ɗyomzɛ̀n ɗi ɗimi Eroodɛ ɓi kìɓan ki Yeesus

⁷ Yɛ̀ɛ Eroodɛ à wokà gɛ ɓìɓan bimiɗ ànɛ Yeesus à kìkìghà ànɛn, ɗyomzɛ̀n ɗi ɗim nyi, ɓisuulɛ ɓum ɓɛdɛŋ ɓɛ kpaakpààghà lɛ: Zyaŋ ànɛ̀n yɛɛ ghem̀ɓɛɛ yì a nyɔ̀ɛ̀y.

⁸ Ɓum ɓɛmbog lɛ Eli ànɛn yɛ̀ɛ resɛɛ tì; ɓɛdɛŋ tì lɛ, kìbog ki ɓi ɓɛ̀kpaŋzì-ɓìɓan ɓɛ abɛ̀y kɛɛ ghemɓɛɛ yì a nyɔ̀ɛ̀y.

⁹ Fɔɔnnɛ Eroodɛ à tɔɔ̀ghtɔ̀ɔ̀ghrɛ̀ngà rì ǹɗem lɛ: Mɛ̀ɛmiɗ yɛɛ kpaaghà lɛ, ɓɛɛ ren ǹto wu Zyaŋ; nni roànɛ rìkem ɗyɛɛ̀ pàpas mɛ ànɛ, nyi ri ɓà ghɛn? Fɔɔnnɛ à kaakààghà bee inɛ lɛ a ghɛǹ Yeesus.

Yeesus à faa ɓum ɓɛ̀tɔɔsìm ɓɛtaǹ ɓìɗilàg

¹⁰ Nni ɓɛ̀yilàg ɓɛ Yeesus à romgà ɓɛ sugtìghày, ɓɛ kpaa nyi ɓìɓan ɓìcèm ɓi ɓɛ kighày, fɔɔnnɛ à syògà ɓɔ lɛ ɓɛɛ kɛǹ kìpàs ɓi bàn ìdɛŋ ɗii lɛ Bɛdsayida.

¹¹ Yɛ̀ɛ ɓìtuu ɓi ɓum ɓi wokà jàŋ inɛ à ɓaghà, nni ɓi nɔɔtàkà nyi wɔɔ, Yeesus à ghàɓ ɓɔ lɛ syeesyee, à kpaakpaa ɓɔ ɓɔlɛ̀ à kìlɔ̀ŋ ki Bɛ̀ll, à ki wɔ̀ɔwɔɔ̀zì ɓumɓɛ ɓɛ ɓaghà rì rìkɛŋ ɓi nyòò.

¹² Di ŋwos a ti ɓiì kɛ̀nkɛni, nni ɓɛ̀yilàg ɓii ǹtɛ̀ɗ rì ɓɛɓɛɛ̀ ɓɛ tyɛɛ̀tɛ̀ngày, ɓɛ kpaa nyi lɛ: Kali gwìy ì ɓum ìnɛ lɛ, yɛ̀ɛ kɛǹ ɓi ɓìlɔ̀ŋ rì ɓi jɛ̀m yi ɓilɔ̀ŋ ɓi ɓi ri fɛ jàŋbog, ɓɛɛ kaà fìlo, rì com ki ɓɛ rì lɛ ɓɛ ɗi, ɓisuulɛ jàŋ inɛ tì rì ìnɛ ì rì kɛ̀ɛ̀ com.

¹³ Yeesus à ɓàg ɓɔ lɛ: Mìniìɓɔmiɗ, faana ɓɔ ɓìɗilàg; wɔ̀lɛ ɓɛ̀roɓɛǹ ɓɛ kpaa nyi lɛ: Tì rì lɔŋ fɛ lɛ bìrɛs yitaǹ, rì ɓìzɛn ɓìɓɛɛ̀; tì rì lɛ tì lam ɓumɓɛ ɓɛ̀cèm di tì ɓa tii yì nya kìlaàgh ɓiɗilàg ɓidɛŋ ɓisu wàà.

¹⁴ Ɓumɓɛ̀n ɓɛ ɓaghà nunùg ɓum ɓɛ̀tɔɔsìm ɓɛtaǹ. Yeesus à kpaaghà ɓɛ̀yilàg ɓii lɛ: Kɔ̀ɔ̀siina ɓɔ ɓì gwìy ɓi gwìy; gwìy bog ɓum mɛ̀tin mɛɓɛɛ̀ rì ǹtɛ̀ɗ.

¹⁵ Nni ɓɛ̀yilàg ɓɛ kìghà lɔŋ yɛ̀ɛ Yeesus à kpaaghà, ɓɛ kɔɔ̀sì ɓumɓɛ̀n ɓɛ̀cèm ɓi zi.

¹⁶ Fɔɔnnɛ Yeesus à tekà bìrɛs yi kitaǹ yiǹ, rì ɓìzɛn ɓi kiɓɛ̀ɛ̀, à ɓegsì mis aɗyòò, à fa Bɛ̀ll ɓìtògsɛ̀n, à ɓɛkì bìrɛs, à syòngì ɓìzɛn, à fa min ɓyom ɓìn ɓìcèm rì ɓɛ̀yilàg ɓii, lɛ ɓɛɛ kaɓsi gwìy ì ɓum ìnɛ̀n.

¹⁷ Ɓum ɓɛ̀cèm ɓɛ ɗìghà, ɓɛ wuràg ɓɛ ki taŋzɛn ɓìɓɛghà ɓi ɓi rɔ̀ɓtàkà ɓi ron ɓìkàɗ ǹtɛ̀ɗ rì ɓiɓɛɛ̀.

Pyɛɛri à kpaa lɛ Yeesus à rì Kiris

¹⁸ Ŋwos adɛŋ, di Yeesus a kìki bɔ̀ŋzɛ̀n kìpàs nɗaŋ ri ɓɛ̀yilàg ɓii nni à tɔkà ɓɔ lɛ: Gɛ ɓìtuu ɓi ɓum ànɛ a fèki ɓaà lɛ mɛ̀ ǹɗì ghɛn?

¹⁹ Fɔɔnnɛ ɓɛ̀yilàg ɓɛ ɓakà nyi lɛ: Ɓum ɓɛdɛŋ ɓɛɛ kpaaghi lɛ, ù rì Zyaŋ Bàɓtis, ɓɛmbog lɛ, wɔ̀ yɛɛ ri Eli, ɓɛmbog tì lɛ, ù rì kìbog ki ɓi ɓɛ̀kpaŋzì-ɓiɓan ɓɛ abɛ̀y, ki ki ghemɓɛɛ yì a nyɔ̀ɛ̀y.

²⁰ Nni à tɔgtìghà ɓɔ lɛ: Mìniìɓɔmiɗ ɓi kpaaghi lɛ mɛ̀ ǹɗì ghɛn? Fɔɔnnɛ Pyɛɛri à ɓàkà nyi lɛ: Ù rì Kiris ànɛ Bɛ̀ll à romiì.

²¹ Yeesus à siitɛ̀n ɓɔ, à sììràg ɓɔ kì kpaà lɛ, ɓɛ̀ kɛɛ̀ kpaa ɓum lɛ nyii ri Kiris.

Yeesus à kalii ɓɛ̀yilàg ɓii lɛ, à ɓiì woògh mɛ̀tɔɓ

²² Nni à ɓɔ̀ɓtìghà jɛ̀ɛ̀ lɛ: Ki ghɛɛ̀sɛɛ lɛ Man à mum a wog rìkɛŋ lɛɛ̀gwey; ɓɛ̀sɛ̀ɛ̀mɛn ɓɛ Ɓɛ̀yudɛ̀n rì ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna ɓɛ rì nyi ɓiì roòzɛɛ, ɓɛ ki wey nyi; kìɓan kifog à ghèmɓɛ̀n ɓi ŋwos a kìraa.

²³ Ajɛ̀m ìnɛn Yeesus à kpaaghà ɓum ɓɛ̀cèm lɛ: Ŋwaànɛ ki kɔni lɛ a nɔɔ̀ti mɛ̀, à ghɛ̀ɛ̀sɛɛ kì roòzɛɛ nyimiɗ, à ki tɛ̀g kɔrɔs wìì ŋwos anɛ aɗyòò bimiɗ, fɔɔnnɛ à nɔ̀ɔ̀tì min mɛ,

²⁴ ɓisuulɛ, mum ǹcèm ànɛ à rì ɓiì kɔ̀ni lɛ a kamɛn rì cɛɓ kii à rì kɔ ɓiì ɗimzii, ŋwaànɛ à ɓiì ɗimzii cɛɓ kii lɛ mɛ̀, nnyɛ̀ɛ ri kɔ ɓiì ghɛɓsii.

²⁵ Ki ghɛɓsii mum cɛ lɛ a fɔ̀n ziinɛ bimiɗ di à ɗimzii cɛɓ kìì?

²⁶ Ɓisuulɛ ŋwaànɛ à rì mɛ̀ ɓiì woògh ǹtoòrìɗ, nsoò lɛ à wog ɓìɓan ɓyɛm̀ ǹtoòrìɗ, Man à mum à woogh gɛ nyi girig ǹtoòrìɗ yɛ̀ɛ à yùugɛy ɓi rìkem ɗii, rì ɗì Seŋì, rì ɗi ɓumɓɛ titom ɓɛ ɓɛ ri ɓɛ̀tɛnɛn.

²⁷ Ǹkalii mìni saaɗ à rìkpàà lɛ, kìgwey ki ɓi ɓumɓɛ ɓɛ rɛrɛlii ɓɛ, kaa cuu ɓi di ki ka ghɛn ɓi kilɔ̀ŋ ki Bɛ̀ll.

Yeesus à lɔ̀ɔ̀ghrɛɛ ɓɛ̀yilàg ɓi mis dɛŋ

²⁸ Yɛ̀ɛ Yeesus à kpaaghà ɓìɓan ɓiǹ, mɛ̀ru mɛ ghaghìghà fɛlɛ yɛ̀ɛ taàraa; fɔɔnnɛ à tekà lɛ, rì Pyɛɛri, rì Zyaŋ rì Zyag ɓɛ ɓɔg ɓi dòn aɗyòò lɛ ɓɛɛ ɓɔŋzi Bɛ̀ll.

²⁹ Yɛ̀ɛ Yeesus à kìkìghà bɔ̀ŋzɛ̀n, ìsu wii wu koɓsɛ̀n, ɓìlàà ɓii ɓi sug ɓì puɓ lɛ syaŋ̀syaŋ̀.

³⁰ Fɔɔnnɛ ɓɛ sigmɛ̀ngà di à ti ɓiì tòtoogh ri ɓum ɓɛdɛŋ ɓɛɓɛɛ̀; ɓɛ ɓɛ ɓaghà lɛ rì Moyis rì Eli.

³¹ Ɓɔ yɛɛ resɛ̀ngày rì coo rigwey, ɓɛ kpaakpàà kìɓan ki risug ɗi Yeesus ɗi ɗi ghɛɛ̀sɛ̀ngà kì kìlɛɛ a Yorisalɛm.

³² Fɔɔnnɛ Pyɛɛri rì ɓɛ̀reŋkàŋ ɓii ɓɛ cuughà tìlo; yɛ̀ɛ ɓɛ ghemɓɛ̀ngà, ɓɛ ghɛn rìgwey ɗì Yeesus, rì ɓum ɓɛ kiɓɛ̀ɛ̀ ɓɛ à ɓaghà rì ɓɔ ɓɛ̀n.

³³ Yɛ̀ɛ ɓumɓɛ̀n ɓɛ ɓaghà di ɓɛ ti lɛ ɓɛɛ ghasɛn rì Yeesus, nni Pyɛɛri à kpaaghà nyi lɛ: Ǹɗèsàg! ki rì kìrɔɔ di tì rɔ̀ɓi fɛ, tì toŋ ɓìlaa ɓiraa, kìfog ɓisuu wɔɔ, kìfog ɓisuu Moyis, kìfog ɓisuu Eli. À yighà gì ɓì com ki à kpaakpààghà.

³⁴ Yɛ̀ɛ à kpaaghà fɔlɔɔ, nni kìkwìɗ ki yughà, ki riɓì ɓɔ, ìris wu ɓan ɓɛyilàg di ki ti ɓɔ ɓiì rìɓii.

³⁵ Fɔɔnnɛ jɛ̀ɛ̀ ì ɓaghày ɓi kìkwìɗ lɛ: Roànɛ, à rì Man wɛm̀ ànɛ ǹɗɔ̀tɛ̀ngà, wooghna nyì.

³⁶ Yɛ̀ɛ jɛ̀ɛ̀ ì tòòghrɛ̀ngà, ɓɛ sigmɛ̀n lɛ Yeesus à mɛ rɔ̀ɓ cɛ̀ncii. Ɓɛ̀yilàg ɓɛ nyamgà kìɓan ki ɓɛ ghɛngà kiǹ ɓi mɛ̀ru mɛ̀n, ɓɛ̀ kɛɛ̀ ɓùŋ mum kɔ.

Yeesus à wɔ̀ɔ̀zii ŋwɔti ànɛ à ɓaghà rì kìɓeɓtàg ki ǹghay

³⁷ Ɓi duri tana, yɛ̀ɛ Yeesus rì ɓɛ̀yilàg ɓii ɓɛ sɛngày dòn, coo gwìy ì ɓum ì yughà kì ɓoŋì Yeesus.

³⁸ Nni ɓi nyìinyìm à gwìy ì ɓum ìnɛ̀n, ŋwaàdɛŋ à syangà jɛ̀ɛ̀ aɗyòò lɛ: Ǹɗèsàg! kùrùg m̀ɓɔ̀ŋzaagh wɔ̀, pɛɓsɛn ɓà mɛ ŋwɔɓti wɛ̀m ànɛ, ɓisuulɛ nnyɛɛ ri lɔŋ maa m̀bobog wɛ̀m à man.

³⁹ Kìɓeɓtàg ki nghay kidɛŋ ki ti lɛ, i ki sɛni ɓi nyi, à tumɛ̀n rìsyan a kɔ̀ɔ̀ à kìkì lɛ zaɗ zaɗ, di a fuufuùsì tìtyɛɛ; ki ti ki ɓalàg kìtètèɗ ki kiɓan lɛ kìɓeɓtàg ki ǹghay kìn kɛɛ caɗ nyi, ki mɛ fɔɔsi nyi lɛ kɔɔ̀kɔɔ̀.

⁴⁰ Mɛ̀ɛ m̀ɓɔ̀ŋzaagh ɓɛ̀yilàg ɓɔɔ lɛ ɓɛɛ naɓ kìɓeɓtàg ki ǹghay kìn, nni ki n-yaagh ɓɔ rìnàɓ.

⁴¹ Yeesus à ɓàg lɛ: Mìni ɓumɓɛ ɓì rì kɛ̀ɛ̀ rìgherɛ̀n, ɓì ki ɓa ɓiɓeɓtàg ɓi ɓum ɓɛ! Ǹɗì ɓiì kɔ̀rii ti rì mìni ǹki nìniɗ ǹɗem rì ɓìɓan ɓin à kpaŋ fin? Yuiy fɛ rì man wɔɔ̀.

⁴² Yɛ̀ɛ mutyàànɛn à tyɛ̀ɛ̀tɛ̀ngà yɛ̀ɛ Yeesus, kìɓeɓtàg ki ǹghay ki sɛn ɓi nyi, ki roŋ ɓi zi, à tumɛ̀n rì kìkì lɛ zaɗ zaɗ; fɔɔnnɛ Yeesus à fwààdɛ̀ngà kìɓeɓtàg ki ǹghay, à wɔ̀ɔ̀zì ŋwɔɓti, à pɛ̀ɛ̀zì nyi rì seŋì.

⁴³ Fɔɔnnɛ ɓum ɓɛ̀cèm ɓɛ ɓɛ ɓaghà wɔɔ ɓɛ kuuràkà rìgwey ɗi itèɗ wu Bɛ̀ll. Yɛ̀ɛ ɓum ɓɛ ɓaghà di ɓɛɛ̀ ka kuukuùghràg ɓɛ̀koŋnyoo ɓɛ ɓiɓan ɓɛ Yeesus à kìkìghà ɓɛǹ, nni à kpaaghà ɓɛ̀yilàg ɓii lɛ:

Yeesus à kpaatii ɓɛ̀yilàg ɓii lɛ, nyii ri ɓiì woògh mɛ̀tɔɓ, nyii wu, nyii ki ghèmɓɛn

⁴⁴ Ramina mɛ̀reè, ɓi wog kìɓan ki ǹ-yùu mìni kì kpaà ki. Ɓɛ ri ɓiì kàɓi Man à mum ɓi ɓyàg ɓi ɓum.

⁴⁵ Kìɓan kifog, ɓɛ̀yilàg ɓii ɓɛ wokà ɓi azi anɛ ɓi rìkpaa ɗìn; ɗi rɔɓkà ɓɔ kìrìirìɓ lɛ ɓɛ̀ kɛɛ̀ yi azi anɛ miì, ɓɔɔ ki rirìsìghà nyi rìtɔg ɗi azi anɛ ɓi kìɓan kiǹ.

Yeesus à rèsii N-yilàg ànɛ à cee ɓɛ̀ro ɓɛmbòg

⁴⁶ Fɔɔnnɛ ɓɛ tumɛ̀ngà rìnyoònyòlɛ̀n lɛ ɓɛɛ yi ghɛn anɛ ɓi ɓɔ yɛɛ cee ɓɛ̀ro ɓɛmɓòg.

⁴⁷ Yɛ̀ɛ Yeesus à yìghà com ki ɓɛ fefèkà ɓi mɛ̀rem maa, nni à tekà maa ŋwɔɓti, à rɛsì nyi ŋwɔŋì rì nyi,

⁴⁸ à kpaa ɓɔ lɛ: Ŋwaànɛ à ghàɓi maa ŋwɔɓti ànɛ ɓi ɗii ɗyɛ̀m, di mɛ̀ɛmiɗ innɛ à ghàɓi; fɔɔnnɛ mum ǹcèm ànɛ à ghàɓi mɛ̀ à ghàɓi girig roànɛ à romgày mɛ̀ ɓisuulɛ roànɛ à ɓiì ɓiisɛɛ ki ghɛnɛɛ lɛsàaag ɓi nyìinyìm wìn, nnyɛɛ cee mìniìcèm.

Kìɓan ki ŋwaànɛ à nànàɓkà ɓìɓeɓtàg ɓì mɛghay

⁴⁹ Nni Zyaŋ à tòòghrɛ̀ngà, à kpaa lɛ: Ǹɗesàg! tyàa ghɛɛ ŋwaàdɛŋ, di a nànaɓ ɓiɓeɓtàg ɓi mɛghay ɓi ɗii ɗyɔɔ, nni tyàa rèegh nyi, ɓisuulɛ à yingag ɓi nɗaŋ wis.

⁵⁰ Fɔɔnnɛ Yeesus à ɓàkà Zyaŋ lɛ: Kɛ̀ ɓi règ nyi, ɓisuulɛ, ŋwaànɛ à yin ɓiì ɗùùɗuu ri mìni, à rì ɓi gàm yìn.

Ɓɛ fyarii Yeesus ɓi maa kìlɔ̀ŋ àdɛŋ ànɛ a Samari

⁵¹ Yɛ̀ɛ mɛ̀ru mɛ lɛ Yeesus a pɛsɛn ɓi ziinɛ mɛ ɓaghà dì mɛ ti jàŋbog, à rengà rì ǹɗem wii wucem lɛ, à kɛ̀ɛ a Yorisalɛm.

⁵² Fɔɔnnɛ à lokà kì romì ɓum beèbɛ̀y. Ɓumɓɛ̀n ɓɛ roŋì bee, ɓɛ kpaŋ ɓi maa kìlɔ̀ŋ àdɛŋ ànɛ a Samari lɛ ɓɛɛ pegsɛn ɓìɓan ɓi ɓi rìyù ɗii,

⁵³ kìɓan kifog ɓɛ ghaɓkà ɓi nyi wɔɔ ɓisuulɛ à ɓaghà ɓiì kɛ̀nkɛ̀ni a Yorisalɛm.

⁵⁴ Yɛ̀ɛ Zyaŋ rì Zyag ɓɛ ghɛngà fɔlɔɔ, ɓɛ tɔg nyi lɛ: Kan! tì yin lɛ tì tɔg lɛ ɗuu ɗyɛɛ sɛn yì aɗyoo ɗyɛɛ ɗigsi ɓumɓɛ?

⁵⁵ Nni à lɔ̀ɔ̀ghrɛ̀ngày à nyɛɛdɛ̀n ɓɔ, à kpaa lɛ: Ɓì yii ɓi nya rìkuu ɗi ǹghay ɗi ɗi ri ɓi mìni.

⁵⁶ Ɓisuulɛ, Man à mum à yùghà ɓi lɛ a ɗimzi ɓyɛɓ ɓi ɓum, à yùghà lɔŋ ɓyɔ kì ghɛɓsii. Fɔɔnnɛ ɓɛ kɛngà ɓi maa kìlɔ̀ŋ àdɛŋ.

Com ki mum à ghɛ̀ɛ̀sɛɛ kì kìi ɓi ɗi lɛ a nɔɔ̀ti Yeesus

⁵⁷ Yɛ̀ɛ ɓɛ ɓaghà ɓi bee, ŋwaàdɛŋ à kpaaghà Yeesus lɛ: Ǹɗì wɔ̀ ɓiì nɔ̀ɔ̀tii jàŋbimiɗ ìnɛ ù kɛ̀ɛ.

⁵⁸ Nni Yeesus à ɓàkà nyi lɛ: Ɓìbina ɓi ri rì mɛ̀kuɓi, tììlì ti aɗyòò rì ɓìlaa, kìɓan kifog, Man à mum à rì kɛ̀ɛ̀ jàŋ inɛ a fɔɔ̀sag wɔɔ.

⁵⁹ Fɔɔnnɛ Yeesus à kpaaghà ŋwaàmbog lɛ: Nɔ̀ɔ̀ti mɛ̀. Roànɛ̀n à ɓàg nyi lɛ: Ka cenɛn mɛ̀, nka ɓas̀ kì ɓòmi seŋi wɛ̀m.

⁶⁰ Yeesus à ɓàg nyi lɛ: Càra ɓìloŋ ɓyɛɛ ɓom̀ ɓìloŋ ɓyaa, kìɓan kifog wɔ̀ɔ̀ kɛ̀na kì kakalii ɓum ɓɔlɛ à kìlɔ̀ŋ ki Bɛ̀ll.

⁶¹ Nni ŋwaàdɛŋ à kpaatìghà nyi lɛ: Kan, ǹɗì wɔ̀ ɓiì nɔ̀ɔ̀tii, nni ka càra mɛ̀, ǹghesɛn yì naa yɛ̀m ì ɓum.

⁶² Yeesus à ɓàg nyi lɛ: Ŋwaànɛ à rì lɛ, i à ɓeegh kìɓan, à tumɛn kɔ, wɔ̀lɛ kɛ̀ɛ kì kɔ lɛ, a fèfeg ɓiɓan ɓidɛŋ ɓi nyi ajɛ̀m, à ghɛ̀ɛ̀sɛɛ ɓi ri kìlɔ̀ŋ ki Bɛ̀ll.