Bìoball air-loidhne

LUKAS 8 - Bafia Nouveau Testament

Ɓumɓɛ ɓɛ nɔɔ̀nɔ̀ɔ̀tìghà Yeesus

¹ Ajɛ̀m ìnɛn, Yeesus à kɛ̀ɛ̀kɛ̀ɛ̀ghà lɛ rì ɓi bàn rì ɓi ɓìlɔ̀ŋ, di a làalamɓɛ̀n à kakàlì Syeesyee à Ɓɔlɛ à kìlɔ̀ŋ ki Bɛ̀ll. A ɓaghà ǹɗaŋ lɛ rì ɓɛ̀yilàg ɓii ǹtɛ̀ɗ rì ɓɛɓɛɛ̀,

² rì ɓɛ̀yiɓ ɓɛdɛŋ ɓɛ à nàɓkà ɓìɓeɓtàg ɓi mɛghay ɓi ɓɔ, à ki wɔ̀ɔ̀zi ɓɔ tìroɓ tidɛŋ; ɓɛ̀yiɓ ɓɛǹ ɓɛ ɓaghà lɛ: Rì Marii Madelɛn ànɛ ɓìɓeɓtàg ɓi mɛghay ɓi kpagà ɓi nyoo taàɓɛ̀ɛ̀,

³ rì Zyaanɛ à gili Cuza ànɛ à ɓaghà m̀ɓèŋì-ìkum wu Eroodɛ, rì Soosana, rì ɓɛ̀yiɓ ɓɛdɛŋ tì lɛɛ̀gwey ɓɛ ɓɛ ghɛɛghɛ̀ɓsìghà ɓɔ rì ìkum waa.

Dàɗkì ì ŋwaànɛ à kɛ̀ngà kì mìsi boo ì ɓyom
( Mt. 13:1-9 ; Mk. 4:1-9 )

⁴ Nni coo gwìy ì ɓum ì taŋzɛ̀ngà; ɓum ɓɛ pɛsàg yì bàn lɛ bàn lɛ ɓɛɛ yu Yeesus a nyoo; fɔɔnnɛ à tekà min ɓɔ dàɗkì ìnɛ:

⁵ Ŋwaàdɛŋ yɛ̀ɛ kɛ̀ngà kì mìsi boo ì ɓyom yìì nni yɛ̀ɛ à mìmìskà, boo ìdɛŋ ì kɛ̀n kì kpìi ɓi bee aɗyoo, ɓɛ̀ghaàgh-bee ɓɛ ɓɛɛ̀dàg yɔ̀, tììlì ti ki ɗi yɔ̀ bimiɗ.

⁶ Gàɓ ìdɛŋ ì kpì ɓi gɔ̀g; yɛ̀ɛ ì ròòghà, ì womdàg ɓisuulɛ zi i ɓaghà kìgbag.

⁷ Fɔɔnnɛ gàɓ ìmbog ì kɛ̀ngà kì kpìi ɓi nyìinyìm à ɓìkàrag, ɓi roòsɛ̀n nɗaŋ ri boo ìnɛ̀n ɓi laatàg yɔ̀.

⁸ Gàɓ ìmbog ì kpìghà ɓi syeesyee à zi, yɛ̀ɛ ì ròòghà, ì wumgì lɛ ǹɗyèm wufog, ɓìɗùn mɛ̀tin mɛtaǹ. Yɛ̀ɛ Yeesus à kpaaghà fɔlɔɔ, nni à kalìghà ɓɔ jɛ̀ɛ̀ aɗyòò lɛ: Ŋwaànɛ à rì rì mɛ̀reè, mɛ lɛ à wog, à wog.

Ɓɛ̀yilàg ɓɛ tɔɔgh Yeesus azi anɛ ɓi dàɗkì ìnɛn
( Mt. 13:10-17 ; Mk. 4:10-12 )

⁹ Ɓɛ̀yilàg ɓe Yeesus ɓɛ tɔkà nyi kìɓan ki dàɗkì ìnɛn ì rèsii.

¹⁰ Nni Yeesus à ɓakà ɓɔ lɛ: Ɓi ɓɛg wìn, Bɛ̀ll à mɛ rèsi mini ɓìɓan ɓi ɓi kìlɔ̀ŋ kii, ɓi ɓi ɓaghà di ɓi kaka a rìnyam, wɔ̀lɛ ɓi ɓɛg ànɛ a ɓum ɓɛmbog, ɓìɓan ɓi ɓi ri ɓɔ yɛ̀ɛ dàɗkì lɛ di ɓɛɛ ɓa lɛ, ɓaa soo seesèè, ɓɛ̀ kɛɛ̀ ghɛn, ɓaa soo ki wowòg, ɓɛ̀ kɛɛ̀ yi.

Yeesus à tɛɛ̀zii ɓɛ̀yilàg ɓii azi anɛ ɓi dàɗkì ìnɛ à tekà
( Mt. 13:18-23 ; Mk. 4:13-20 )

¹¹ Azi anɛ ɓi dàɗkì ìnɛn àrì lɛ: Boo ì ɓyom yɛ̀ɛ rì ɓi sìg à jɛ̀ɛ̀ ì Bɛ̀ll.

¹² Ɓɛ̀roɓɛ ɓɛ ri ɓi tim̀ à bee, ɓɔ yɛɛ rilàg lɛ, i ɓaa wog jɛ̀ɛ̀ ì Bɛ̀ll, Satàn a yùy ɓɔ yɔ̀ ki pisii ɓi mɛ̀rem lɛ ɓɛɛ rɔɓ kɛ̀ ɓɛɛ̀ gherɛn, ɓɛ ki mɛ̀n cɛɓ.

¹³ Ɓɛ̀roɓɛ ɓɛ ri ɓi tìcɔg ɓɛ ri ɓumɓɛ ɓɛ ti i ɓɛ woogh jɛ̀ɛ̀ ì Bɛ̀ll, ɓɛ ghaɓ yɔ̀ rì kìnyàà kìɓan kifog, ɓɛ̀ kɛɛ̀ càɗ jɛ̀ɛ̀ ìnɛn lɛ yɛ̀ɛ ɓag gàŋ ɓi mɛ̀rem maa; i mɛ̀fèèghrɛn mɛ kpaŋi a lɔ̀ŋkaa, ɓɛ naŋ rìgherɛ̀n.

¹⁴ Boo ìnɛ ì kpìghà ɓi ɓìkàrag ì rèsii ɓɛ̀roɓɛ ɓɛ rilàg lɛ, i ɓɛ woogh jɛ̀ɛ̀ ì Bɛ̀ll, ɓyom ɓi lɛ, rì cɛɛ̀-ǹɗem ànɛ ɓi ɓìɓan ɓi zɛy rì zɛy, rì rìyɛ̀y ɗi zi, ɓi duŋzì rìgherɛ̀n ɗyaa, ɗi rɔɓ bee ri bee, ɗyɛ̀ kɛɛ̀ wum ɓidùn ɓi lɛ ɓɛ kɔs.

¹⁵ Boo ìnɛ ì kpìghà ɓi zi i m̀fɔmɛn yɛ̀ɛ ri fɛlɛ yɛ̀ɛ ɓɛ̀roɓɛ ɓɛ ti ɓɛ wokì jɛ̀ɛ̀ ì Bɛ̀ll syeesyee à rìwog, ri mɛ̀rem mɛ syeesyee mɛ mɛ ki rì mɛ̀tɛnɛn, ɓɛ ɓeŋ̀ yɔ̀, ɓɛ ki wum ɓiɗùn lɛ kìsììrì kaa.

Daɗkì ì lamɓà
( Mk. 4:21-25 )

¹⁶ Ŋwaà yin lɛ à ròòsì lamɓà lɛ a sigtɛn nyi rì kìbɔkɔ̀, nsoò lɛ a rɛsi nyi a ɓyomɓilɔ̀ŋ ɓii zi; com ki à rì lɛ à kì ki ri lɛ, a saagh nyi ɓi com aɗyòò, lɛ i mum à ɗiŋii yì ɓi naa, à ghɛnɛ̀n.

¹⁷ Kɛ̀ɛ̀ kìɓan kìdɛŋ ki a rìnyam ki ki ri ɓiì rɔ̀ɓi lɛ ki yilɛɛ ɓì; nsoò dwìɗ idɛŋ yàa rɔ̀ɓ ɓi kɛ̀ɛ̀ kì kpagii dan.

¹⁸ Ɓì konàg lɔŋ ri riwog ɗi ɓì ti ɓì wokì ɓìɓan ɓi Bɛ̀ll; ɓisuulɛ, ŋwaànɛ à rì rì com innɛ ɓɛ ri ɓiì fatii, wɔ̀lɛ roànɛ à rì kɛ̀ɛ̀ kɔ ɓɛ ɓatɛ̀n nsoò maa gàɓ ànɛ nyiì fèfeg lɛ à rì rì nyi.

Jɛɛ Yeesus rì ɓɛ̀geni ɓɛ Yeesus
( Mt. 12:46-50 ; Mk. 3:31-35 )

¹⁹ Jɛɛ rì ɓɛ̀geni ɓɛ Yeesus ɓɛ yughày lɛ ɓɛɛ ghɛǹ nyi wɔ̀lɛ, ɓɛ ɓaghà ɓì lɛ ɓɛ kpaŋ nyi jàŋbog lɛ gwìy ì ceeghà.

²⁰ Fɔɔnnɛ ɓɛ kpaaghà nyi lɛ: Gaa rì ɓɛ̀goni ɓɛ ri fɛnii ɓi dan, ɓɛɛ̀ ki kɔ̀nkɔn lɛ ɓɛɛ̀ ghɛǹ wɔ̀.

²¹ Nni Yeesus à ɓàkà ɓɔ lɛ: Jɛɛ wɛ̀m rì ɓɛ̀geni ɓɛ̀m, ɓɛ ri ɓɛ̀roɓɛ ɓɛ ti ɓɛ wokì jɛ̀ɛ̀ ì Bɛ̀ll ɓɛ ki kì yɛ̀ɛ ì kpaa.

Yeesus à maasii coo bɛ̀ɓ
( Mt. 8:23-27 ; Mk. 4:35-41 )

²² Ŋwos adɛŋ, Yeesus à ɓɔkà ɓi kìkɔm rì ɓɛ̀yilàg ɓii, à kpaa ɓɔ lɛ: Ti syàana cɛcɛɗ ki riɓày. Fɔɔnnɛ ɓɛ pɛsɛ̀ngà lɛ ɓɛɛ syaà.

²³ Yɛ̀ɛ ɓɛ kɛnkɛni ɓi kìkɔm, fìlo fi teɗ Yeesus; nni coo bɛ̀ɓ ì tumɛ̀ngà rìfɛɓsì ɓi rìɓày lɛɛ̀gwey, lèg ànɛ lɛ kìkɔm ki ɓaghà lɛ ki ɓim, ɓɔɔ ki cùù.

²⁴ Nni ɓɛ̀yilàg ɓɛ tyoŋdɛ̀ngà Yeesus a nyoo, ɓɛ tum nyi rìghèmzì di ɓɛɛ̀ kpaakpaa lɛ: Ǹɗèsàg, ǹɗèsàg, ti cuu yɛɛ lɛ̀. Nni à ghèmbɛ̀ngà, à fwààdɛ̀n lɛ rì bɛ̀ɓ, rì ɓìkus ɓi riɓày, ɓyom ɓìn ɓi maarɛ̀n lɛ tɛ̀tɛ̀rɛ̀ɛ̀, jàŋ i sugtì lɛ fyòoog.

²⁵ Nni Yeesus à tɔkà ɓɛ̀yilàg ɓii lɛ: Righerɛ̀n ɗin ɗyɛɛ̀ mbe? Yɛ̀ɛ ìris wu ɓangà ɓɔ, nni ɓɛ kuuràkà, ɓɛ ki tɔɔtɔɔ̀ghrɛ̀n ɓɔ rì ɓɔ lɛ: Rìkuu ɗi mum aɗi ɗyɛɛ ri lɛ, ɗi ɗi tɔkì bɛ̀ɓ, rì mɛ̀nig com ki ɓyɛɛ ki ɓyɔɔ ki kì nyi mɛ̀wog?

Yeesus à wɔ̀ɔ̀zii ŋwaànɛ à ɓaghà rì ɓìɓeɓtàg ɓi mɛghay
( Mt. 8:28-34 ; Mk. 5:1-20 )

²⁶ Nni ɓɛ kpagà ɓi kìlɔ̀ŋ ki ɓumɓɛ a Geraza, ki ki ɓaghày lɛ kɔ cɛcɛɗ, Galile cɛcɛɗ.

²⁷ Yɛ̀ɛ Yeesus à sɛngày kìkɔm, nni ŋwaàdɛŋ ànɛ à ɓaghà rì kìɓeɓtàg ki nghay ɓi bàn ìnɛn, à yughà kì tuusɛɛ rì nyi. Ki ɓaghà di kaa finɛn yɛ̀ɛ ŋwaànɛ̀n à rɔ̀ɓkà kìtòn zɛy lɛ kɔɔ̀kɔɔ̀, kɛ̀ɛ laati ɓi naa, à lalày lɔŋ ɓi dɛm i zɔ̀ŋ.

²⁸ Yɛ̀ɛ ŋwaànɛ̀n à ghɛngà Yeesus, à kpì nyi a mɛ̀kòò, à syan jɛ̀ɛ̀ aɗyòò lɛ: Yeesus, Man à Bɛ̀ll ànɛ à teŋmɛɛ kɛ̀ɛ̀ vèg, ki ri wɔ̀ la ri mɛ̀? M̀ɓɔ̀ŋzaagh wɔ̀, kɔɔ yeesi ɓaà mɛ.

²⁹ À kpaaghà fɔlɔɔ ɓisuulɛ, Yeesus à kàŋkàŋgà kìɓeɓtàg ki nghay lɛ, kɛɛ kpaŋ ɓi ŋwaànɛ̀n. Kìɓeɓtàg ki ǹghay kìn ki yeèyèèsìghà ŋwàanɛ̀n ɓyààmɛ̀n lɛɛ̀gwey; ɓi ɗi lɛ ɓɛɛ ɓɛŋ̀ nyi kɛ̀ɛ dèŋdeŋ, ɓɛ ǹkàgàg nyi ɓɛn ɗì mɛ̀sɛ̀ŋi mɛ bɔŋ lɛ, rì ɓyàg rì mɛ̀kòò, kìɓan kifog, àa nti à pwagì bɛn yiǹ, kìɓeɓtàg ki nghay kìn ki tini nyi lɛ a kɛǹ kì dèŋdeŋi ɓi mɛ̀reɓ.

³⁰ Nni Yeesus à tɔkà nyi lɛ: Ù rì ɗii lɛ ghɛn? Ŋwaànɛ̀n à bàg nyi lɛ: Ǹɗì ɗii lɛ: Ɓìtuu, ɓisuulɛ ɓìɓeɓtàg ɓi mɛghay ɓi ɓaghà nyi bi nyoo ɓìtuu lɛ ɓìtuu.

³¹ Fɔɔnnɛ ɓìɓeɓtàg ɓi mɛghay ɓìn ɓi ɓɔɔ̀ɓɔ̀ŋzìghà Yeesus lɛ, kɛ̀ɛ rom ɓyɔ lɛ ɓyɛ̀ kɛǹ ɓi rìɓee ɗi ɓiɓeɓtàg ɓi mɛghày.

³² Coo kituu ki jèè ki ɓaghà wɔɔ jàŋbog, ki ɗiɗi ɓyaaɓi ɓi dòn aɗyòò. Fɔɔnnɛ ɓìɓeɓtàg ɓi mɛghay ɓi ɓɔŋzàkà Yeesus lɛ, a caɗ ɓyɔ, ɓyɛɛ kɛǹ kì ɗiŋii ɓi kìtuu ki jèè kiǹ, nni Yeesus à gherɛ̀ngà.

³³ Ɓìɓeɓtàg ɓi mɛghay ɓi kpaŋ min ɓi ŋwaànɛ̀n, ɓi ɗiŋì ɓi kìtuu ki jèè. Fɔɔnnɛ jèè yi kɛɛ̀ghrɛ̀ngày ɓi dòn aɗyòò, yi suùrɛ̀n ɓi rìɓày, yi cuu mɛnig.

³⁴ Yɛ̀ɛ ɓɛ̀ɓèŋì-jèè ɓɛ ghɛngà kìɓan kiǹ, nni ɓɛ ghɛŋìghà, ɓɛ kɛǹ kì sààtii ɓɔlɛ ànɛ̀n ɓi bàn, rì ɓi jɛ̀m i ɓilɔ̀ŋ.

³⁵ Fɔɔnnɛ ɓum ɓɛ pɛsàkày lɛ ɓɛ yuù kìghɛɛ̀ kìɓan ki ki kilɛ̀ngà kiǹ; ɓɛ tanɛ̀ngà ŋwaànɛ ɓìɓeɓtàg ɓi mɛghay ɓi pɛsɛ̀ngà ɓi nyoo ànɛ̀n di à kɔ̀kɔrii Yeesus a mɛ̀kòò, nyi rì ɓìlàà ɓi nyoo, à ki ɓa ɓi nyimiɗ, nni ɓɛ risìghà.

³⁶ Ɓumɓɛ ɓɛ ghɛngà kìɓan kiǹ kìcèm, ɓɛ kpaaghà ɓɛ̀roɓɛ ɓɛ yuyùghày ɓɛǹ, yɛ̀ɛ Yeesus à wɔ̀ɔ̀zìghà ŋwaànɛ à ɓaghà rì ɓìɓeɓtàg ɓi mɛghay.

³⁷ Nni ɓumɓɛ ɓi kìlɔ̀ŋ ki lɛ Geraza ɓɛ kpaaghà Yeesus lɛ a pɛsɛn ɓi kìlɔ̀ŋ kaa, a ghaagh fìràɓ, ɓisuulɛ ìris wu ɓangà ɓɔ lɛɛ̀gwey. Nni Yeesus à ɓɔkà ɓi kìkɔm, à sugtì a Galile.

³⁸ Fɔɔnnɛ ŋwaànɛ ɓìɓeɓtàg ɓi mɛghay ɓi kpagà ɓi nyoo ànɛ̀n à ɓɔ̀ɔ̀ɓɔ̀ŋzàkà Yeesus lɛ, nyii nɔɔ̀ti ànɛ̀n, wɔ̀lɛ Yeesus à ɓèèdɛ̀ng, à kpaa ŋwaànɛ̀n lɛ:

³⁹ Sugha a mɛɛ mɔɔ, u kpaa ɓum ɓɔɔ com ki Bɛ̀ll àa kìi wɔ̀; fɔɔnnɛ ŋwaànɛ̀n à sukà min, à lààlàmɓɛ̀n com ki Yeesus à kìghà nyi bàn bimiɗ.

Yeesus à ghèmzii gɔ̀n ì Zyayirus à wɔ̀ɔ̀zì giɓ adɛŋ
( Mt. 9:18-26 ; Mk. 5:21-43 )

⁴⁰ Yɛ̀ɛ Yeesus à sukày rìkɛ̀ɛ̀ ɗi à ɓaghày cɛcɛɗ ki riɓày, nni gwìy ì ɓum ì ghàɓkà nyi, ɓisuulɛ ɓɛ̀sɛ̀ɛ̀ ɓɛ̀cèm ɓɛ ɓoŋɓòŋgà nyi.

⁴¹ Fɔɔnnɛ ŋwaàdɛŋ ɗii lɛ Zyayirus, ànɛ à ɓaghà ǹlàmì ànɛ ɓi naà-bɔ̀ŋzɛ̀n, à yughày Yeesus a nyoo, à kpì nyi a mɛ̀kòò, à ɓɔ̀ŋzì nyi lɛ a yu a mɛɛ mii,

⁴² ɓisuulɛ, à ɓaghà lɔŋ maa man bog, àncèm giɓ, di à ti bèg ǹtɛ̀ɗ rì yiɓɛɛ̀; nni man ancèm à kɔ̀ɔ̀kɔ̀ɔ̀sìghà. Yɛ̀ɛ Yeesus à kɛ̀nkɛ̀ngà wɔɔ, gwìy ì sììsììrìghà nyi lɛɛ̀gwey.

⁴³ Nni giɓ adɛŋ à ɓaghà wɔɔ, bwaɓ yi kpaŋkpàŋ nyi, di à ti ɓi fìroɓ fìn bèg ǹtɛ̀ɗ rì yiɓɛɛ̀; à ɓaghà di à mɛ yogsi ɓɔɔ ɓyom ɓii ɓɛ̀cèm a ɓɛ̀ɗɔgtà, nsoò kìbog ki ɓi ɓɔ, ki wɔɔ̀zìghà ɓì nyi.

⁴⁴ Fɔɔnnɛ giɓ anɛ̀n à cègày Yeesus ajɛ̀m, à kòm rìkeɓ ɗii ɗi kilàà, bwaɓ yi yi kpaŋkpàŋgà nyi yi ghas kì renɛɛ lɔŋ wɔɔ foo.

⁴⁵ Nni Yeesus à tɔkà lɛ: Ghɛn yɛɛ komi mɛ̀ lɔɔ? Ɓum ɓɛ̀cèm ɓɛ ɓaghà ɓɛ ti ɓiì rooroòzɛ̀n, nni Pyɛɛri à ɓakà nyi lɛ: Ǹɗèsàg, ɓum ɓɛɛ ceŋzɛɛ wɔ̀ lɛ, ɓɛ ki sìisiìrì wɔ̀.

⁴⁶ Wɔ̀lɛ Yeesus à pɛ̀ɛ̀zì nyi lɛ: Mum à kòmi mɛ̀, ɓisuulɛ, ǹwoogh yɛ̀ɛ ìtèɗ wudɛŋ wu kpaŋiì mɛ̀ ɓi nyòò.

⁴⁷ Yɛ̀ɛ giɓ anɛ̀n à ghɛngà lɛ, kìɓan ki àa kìi ki yiìdi a rìnyam, nni à yùghà kì kpìi Yeesus a mɛ̀kòò di a nìighniŋdɛ̀n, à kpaa nyi ɓi mis mɛ ɓum ɓɛ̀cèm ɓisuucɛ nnɛ àa kòmi nyi, rì yɛ̀ɛ àa ghàsi kì wɔ̀ni lɔŋ yɛ̀ɛ àa kòmi nyi.

⁴⁸ Fɔɔnnɛ Yeesus à kpaaghà min nyi lɛ: Gɔ̀n yɛ̀m! rìgherɛ̀n ɗyɔɔ ɗi ghɛɓsii wɔ̀, kɛ̀na lɛ fyòoog!

⁴⁹ Yeesus à kaka à kpaakpàà giɓ anɛ̀n fɔlɔɔ, nni mum à pɛ̀sɛ̀ngày a mɛɛ mɛ nlàmì ànɛ ɓi naà-bɔ̀ŋzɛn, à yù kì kpaa lɛ: Zyayirus, gɔ̀n yɔ̀ɔ̀ i ti kìloŋ, kɔ̀ɔ yeesi ti ǹɗèsàg zɛy.

⁵⁰ Kìɓan kifog, Yeesus à wokà kìɓan ki ŋwaànɛ̀n à kpaaghà, fɔɔnnɛ à kpaaghà Zyayirus lɛ: Kɔ̀ɔ risi! Lɔŋ ǹtyweeyi wɛɛ̀wu ɓaya rì wɔ, di gɔ̀n yɔ̀ɔ̀ yɛ̀ɛ ɓa rì cɛɓ.

⁵¹ Yɛ̀ɛ à kpagà a mɛɛ mɛ ŋwaànɛ̀n à gherɛ̀ngà ɓì lɛ, ɓum ɓɛɛ ɗiŋi ɓi naa ǹɗaŋ ri nyi, i ki cee ɓi lɛ, rì Pyɛɛri rì Zyaŋ rì Zyag, rì ɓɛ̀yalì man ànɛ̀n, ɓɛɛ̀ɓɛ à càɗkà lɛ ɓɛɛ ɗiŋì.

⁵² Ɓum ɓɛ̀cèm ɓɛ rɔŋɗɔ̀ŋgà ɓìkiŋ di ɓɛɛ̀ sàasarɛ̀n rì ǹɗemi-kɛŋɛn ɓisuu man ànɛ̀n. Nni Yeesus à kpaaghà min ɓɔ lɛ: Kɛ̀ ɓi rènɗen, a wii ɓi, à rì ɓi fìlo.

⁵³ Ɓumɓɛ̀n ɓɛ fengàkà nyi, lɛ ɓɛ yighà saaɗ lɛ mutyàà rì kìloŋ.

⁵⁴ Kìɓan kifog Yeesus à ɓangà man ànɛ̀n ɓi càg, à kpaa jɛ̀ɛ̀ aɗyòò lɛ: Mutyàànɛ pɛ̀sɛn aɗyòò.

⁵⁵ Nghay wu ŋwɔɓti wu sugtìì, à ghàs kì pɛ̀sɛɛ aɗyòò, Yeesus à tɔg min lɛ ɓɛɛ fa nyi ɓìɗilàg.

⁵⁶ Ɓɛ̀yalì man ànɛ̀n ɓɛ kuuràkà lɛɛ̀gwey, wɔ̀lɛ Yeesus à siitàg ɓɔ lɛ: Ɓɛ̀ kɛɛ̀ kpaa mum kìɓan ki ki kilɛ̀ngà kiǹ.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan