Bìoball air-loidhne

LUKAS 6 - Bafia Nouveau Testament

Yeesus rì kìɓan ki Saɓàt
( Mt. 12:1-8 ; Mk. 2:23-28 )

¹ Ŋwosi Saɓàt àdɛŋ, Yeesus à ghaghàghìyà ɓi dɛmi nyas, ɓɛ̀yilàg ɓii ɓɛ kɛɛnkɛ̀n di ɓɛɛ sòsori nyas, ɓɛ pyepyèg rì ɓyàg di ɓɛɛ ɗiɗì.

² Fɔɔnnɛ Ɓɛ̀fàrìzyɛŋ ɓɛdɛŋ ɓɛ tɔkà ɓɔ lɛ: Ɓisuucɛ nnɛ ɓi kìki ɓìɓan ɓi mum à ghɛ̀ɛ̀sɛɛ ɓi ki kìi ŋwosi Saɓàt?

³ Nni Yeesus à ɓàkà ɓɔ lɛ: Ɓì ka ɓalà ɓi kiɓan ki Davit a kìghà ŋwos adɛŋ di zày ì kɔ̀ni lɛ, rì nyi rì ɓum ɓii?

⁴ Yɛ̀ɛ Davit à ɗiŋìghà ɓi naà-Bɛ̀ll à teɗ bìrɛs yi ɓɛ faghà ɓisuu Bɛ̀ll ɓɛ ɗi yɔ rì ɓum ɓii, kɔm̀ lɛ ɓɛ̀pìrɛɛtìrɛ̀ cɛ̀ncaa ɓɛɛ ɓaghà lɛ, ɓɛ ɗi bìrɛs yiǹ.

⁵ Fɔɔnnɛ Yeesus à kpaatìghà ɓɔ lɛ: Man à mum à làmii Saɓàt.

Ŋwaànɛ à ɓaghà rì kìɓɔmà ki càg
( Mt. 12:9-14 ; Mk. 3:1-6 )

⁶ Ɓi gòn i Saɓàt ìdɛŋ, Yeesus à ɗiŋìghà ɓi naà-bɔ̀ŋzɛ̀n ìdɛŋ, à tum ɗì rèsàg ɗi ɓum; nni ŋwaàdɛŋ à ɓaghà wɔɔ, càg ki weèlem kìɓɔmɛn.

⁷ Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ fifìɓìghà nyi lɛ fyɛɛyi, lɛ ɓɛɛ ghɛǹ ǹkòo à ɓiì wɔ̀ɔ̀zii mum ŋwosi Saɓàt, lɛ ɓɛ kaakààghà kìɓan ki ɓɛɛ ɓanɛn mii lɛ ɓɛɛ sɔmɛn nyi.

⁸ Kìɓan kifog, Yeesus à yighà ɓɛ̀fèg ɓaa, nni à kpaaghà ŋwaà càg kiɓɔmà lɛ: Pɛ̀sɛn aɗyòò, u rɛli fɛ̀ ɓi nyìinyìm à ɓum; nni ŋwaànɛ̀n à pɛ̀sɛ̀ngà aɗyòò, à rɛlì wɔɔ.

⁹ Fɔɔnnɛ Yeesus à tɔkà ɓɔ lɛ: Kaliina ɓà mɛ, ɓìdɔ̀gsɛna ɓis ɓi kalii lɛ, ɓi gòn i Saɓàt, mum a ki kìɓe gìn kìrɔɔ? Lɛ a ghɛɓsi mum gìn, a caɗ nyi lɛ a wu?

¹⁰ Nni Yeesus a seesèèghà ɓɔɔ̀cèm, à kpaa min ŋwaànɛ̀n lɛ: Nàma càg kɔɔ, ŋwaà nàm, càg ki ghàs kì ɓaà lɛ syeesyee.

¹¹ Fɔɔnnɛ ɓumɓɛ̀n ɓɛ wokà bim, ɓɛ tumɛ̀n rìnyoònyòlɛ̀n ɓi com ki ɓɛ rì ɓiì kìi Yeesus.

Yeesus à ɓɔ̀ni ɓɛ̀yilàg ǹtɛ̀ɗ rì ɓɛɓɛɛ̀, lɛ ɓɛɛ ɓa ɓɛ̀kɛ̀nì-fìtom
( Mt. 10:1-4 ; Mk. 3:13-19 )

¹² Ɓi cààmɛ̀n kiǹ innɛ Yeesus à ɓɔkà ki ɓɔ̀ŋzaagh ɓi dòn aɗyòò, à ghagsì ìru wùcèm ɓi rìɓɔ̀ŋzì ɗi Bɛ̀ll.

¹³ Ɓi duri tana, à reŋìghà ɓɛ̀yilàg ɓiì, à ɓɔ̀n ɓum miì ǹtɛ̀ɗ rì ɓɛɓɛɛ̀, à ròò ɓɔ ɗii lɛ, ɓɛ̀kɛ̀nì-fìtom.

¹⁴ Ɓɛ ɓaghà lɛ: Rì Simɔn ànɛ à roòghà lɛ Pyɛɛri, rì Andire à geni, rì Zyag, rì Zyaŋ, rì Filiɓ rì Batelemi,

¹⁵ rì Matyoo, rì Tomas, rì Zyag à man à Alfe, rì Simɔn ànɛ à ɓaghà Zelot

¹⁶ rì Zyudɛ à man à Zyag, rì Zyudas Iskariyot ànɛ à ki ghalà lɛ à tɔ̀kɛɛ Yeesus.

Yeesus a rèeresàg gwìy ɓìɓan ɓi Bɛ̀ll ɓi dòn à ki wɔ̀ɔwɔɔ̀zì ɓɛ̀roroɓ
( Mt. 4:23-25 )

¹⁷ Nni Yeesus à sɛngày rì ɓɔ, à rɛlì ɓi lɛ̀gsì, jàŋ inɛ coo gwìy ì ɓɛ̀yilàg ɓii i ɓaghà, rì gɛ mum ànɛ à pɛ̀sɛ̀ngày a Zyude, rì a Yorisalɛm, rì ɓi bèn ì rìɓày ànɛ a Tiir, rì Sidɔŋ.

¹⁸ Ɓumɓɛ̀n ɓɛ yughày lɛ ɓɛɛ wowog ɓìtòkì ɓi Yeesus, à ki wɔ̀ɔ̀zi ɓɔ tìroɓ tyaa, fɔɔnnɛ ɓɛ̀roɓɛ ɓìɓeɓtàg ɓi mɛghay ɓi yeèyèèsìghà, ɓɛ wɔngà girig.

¹⁹ Ɓum ɓɛ̀cèm ɓɛ kaakààghà lɛ ɓɛɛ kòm nyi, ɓisuulɛ ìtèɗ wudɛŋ wu kpaŋkpàŋgày nyi ɓi nyoo, wu wɔɔ̀wɔ̀ɔ̀zì ɓɔɔ̀cèm.

²⁰ Fɔɔnnɛ Yeesus à pɛɓsɛ̀ngà ɓɛ̀yilàg ɓii, à kpaa ɓɔ lɛ: Mààgh rì mìni ɓɛ ɓì rì ɓɛ̀soghàsogha ɓisuulɛ kìlɔ̀ŋ ki Bɛ̀ll ki ri kiŋkìn.

²¹ Mààgh rì mìni ɓɛ ɓi wowog zày ɓigomìnɛ, ɓisuulɛ ɓì ɓiì wurii! Mìni ɓɛ ɓi rènɗen ɓigomìnɛ, mààgh rì mìni lɛ ɓì rì ɓiì wɔ̀li.

²² I ɓum ɓɛ ɓeèzɛɛ mìni, ɓɛ ɓèn mìni, ɓɛ sɛmgì mìni, ɓɛ ki ren mini ɗii ɓi ǹɗaŋ waa, ɓisuu Man à mum, ɓì ɓiì ɓaa rì ɓɛ̀mààgh.

²³ Nyàànyaana, ɓì ki sànsam ɓi ŋwos anɛ̀n, lɛ mɛ̀lèɓ min mɛ aɗyoo mɛ teghɛɛ lɛɛ̀gwey; lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ tɔtɔ̀ɓkà ɓɛ̀kpaŋzì-ɓìɓan.

²⁴ Wɔ̀lɛ nyìighnyìg rì mìni ɓɛ̀guŋgum, lɛ mìnii ti rì gàɓ yìn i kìnyàà!

²⁵ Nyìighnyìg rì mìni ɓɛ ɓì mɛ wuràg ɓigomìnɛ, lɛ ɓì rì wog zày! Nyìighnyìg rì mìni ɓɛ ɓi wɔ̀wɛy ɓigomìnɛ, lɛ ɓì biì ɓaa rì ǹɗemi-kɛŋɛn ɓì ki rèn.

²⁶ Nyìighnyìg rì mìni, di ɓum ɓɛ̀cèm ɓɛɛ̀ sɛsɛg mini, lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ sɛsɛ̀kà ɓɛ̀pwààpwaà ɓɛ ɓɛkpaŋzì-ɓìɓan.

Rìkeesì ɗi ɓɛ̀bènàbena
( Mt. 5:38-48 ; 7:12 )

²⁷ Wɔ̀lɛ, ǹkalii mìni ɓɛ ɓi wowog mɛ lɛ, keesiina ɓɛ̀bènàbena ɓin, ɓì kì ɓumɓɛ ɓɛɛ̀ ɓèeɓeèzɛ̀n mìni kìrɔɔ.

²⁸ Màŋina ɓumɓɛ ɓɛ ti ɓɛ cɛmgì mìni, ɓì ɓɔ̀ŋzàg ɓisuu ɓɛroɓɛ ɓɛɛ̀ tɔtɔɓ mini.

²⁹ I mum à ɓoogh wɔ̀ ɓi rìtam ɗi kimɛŋ, fati nyi ɗi weèlem; i ŋwaà ɓàtɛɛ wɔ̀ rìga, càra nyi a teèti bùɓi yɔ̀ɔ̀.

³⁰ Mum ǹcèm ànɛ à lɔni wɔ̀ com, faa nyi kɔ̀, fɔɔnnɛ ŋwaànɛ à ɓàtɛɛ wɔ̀ com, kɔ̀ɔ tɔg nyi lɛ a pɛɛ̀zi wɔ̀ kɔ.

³¹ Kìɓan ki ki kɔni wɔ̀ lɛ ɓum ɓɛɛ kilag wɔ̀, wɔ̀ kìlàg girig ɓɔ kɔ̀.

³² I ɓi keesii lɔŋ lɛ ɓumɓɛ ɓɛ keesii mìni, kìɓan ki kuurakɛn kaa ɓa ɓi a lɔ̀ŋkin, lɛ ɓɛ̀kìì-kìɓe ɓɛ ti ɓɛ keesàg girig ɓumɓɛ ɓɛ keesii ɓɔ.

³³ I ɓumɓɛ ɓɛ ti ɓɛ kilàg mìni kìrɔɔ ɓɛɛ̀ɓɛ ɓì ti ɓì kìlàg kìrɔɔ, di ɓì ka ki ɓi kiɓan ki kuurakɛn, lɛ ǹsoò ɓɛ̀kìì-kìɓe, ɓɛ ti ɓɛ kilàg fɔlɔɔ.

³⁴ I ɓumɓɛ ɓì yii lɛ ɓɛ ri lɛ ɓɛ leɓ mìni pon ɓɛɛ̀ɓɛ ɓì ti ɓì ɓɔ̀ràg ɓyom, kìɓan kidɛŋ ki kuurakɛn ki yin foo, lɛ ɓɛ̀kìì-kìɓe ɓɛ ti ɓɛ ɓɔràg ɓɛ̀ro ɓɛ̀kìì-kìɓe ɓyom lɔŋ lɛ ɓɛ ri ɓɔ ɓyɔ ɓiì pɛ̀ɛ̀zii.

³⁵ Kìɓan kifog, keesiina ɓɛ̀bènàbena ɓin, ɓì kìkì ɓɔ kìrɔɔ, ɓì ki ɓɔ̀rag ɓum ɓyom, kɛ̀ ɓi mìngi tityɛɛ lɛ, ɓɛ ri mìni ɓiì pɛ̀ɛ̀zii ɓyɔ. I ɓì kìi fɔlɔɔ, mɛ̀lèɓ min mɛ ri ɓiì tèghɛɛ, ɓì ki ɓa ɓɔn ɓɛ Bɛ̀ll ànɛ à teŋmɛɛ kɛ̀ɛ̀ vèg ɓisuulɛ, nyii rilàg rì geesɛ̀n ɓi ɓɛg ànɛ a ɓɛ̀tènteǹ rì ɓɛ̀kìì-rìgɛn.

³⁶ Ɓaana rì ǹɗem wu nyìighnyìg lɔŋ yɛ̀ɛ Seŋi wìn a rì rì ǹɗem wu nyìighnyìg.

Kɛ̀ ɓi yɔ̀mgi ɓɛro ɓum
( Mt. 7:1-5 )

³⁷ Kɛ̀ ɓi ɓa ɓɛ̀yɔ̀mì ɓum fɔɔnnɛ Bɛ̀ll àa yɔ̀m ɓì mini; kɛ̀ ɓi fa ɓum zɔɔ, fɔɔnnɛ Bɛ̀ll àa fa ɓi mini zɔɔ; cenɛɛna ɓɛ̀geni ɓin, fɔɔnnɛ Bɛ̀ll à rì mìni ɓiì cenɛɛ.

³⁸ Faana ɓum ɓyom fɔɔnnɛ Bɛ̀ll à rì girig mìni ɓiì faà ɓi coo vèg ìnɛ ì rì ǹɗonɛn lɛ pisa, ì ki ɓa ǹnɔ̀rakɛn, ì rààràà; vèg ìnɛn yɛɛ̀nɛ ɓɛ ri wɔ̀ ɓiì sùùrii ɓyom ɓi ɓàm à kìlàà kɔɔ; ɓisuulɛ vèg ìnɛ ù ti ù fèkì ɓɛ̀ro ɓyom miì, yɛ̀ɛnɛ ɓɛ ri girig wɔ̀ ɓyɔ ɓiì fèegh miì.

³⁹ Nni Yeesus à teetìghà ɓɔ dàɗkì ìdɛŋ lɛ: Ɗyaŋɗyàŋ à rì nya lɛ à ɓan roɗyaŋɗyàŋ ɓi kìgeŋ, ɓɛ rɔɓ lɛ ɓɛ kpii ɓi ɓɛsɛ̀ɛ̀ ɓɛ̀cèm ɓi rìɓee?

⁴⁰ N-yilàg à yin lɛ à cee ǹɗèsàg wìì, kìɓan kifog, i à kpaŋzɛɛ cilag kii, à rì lɛ à ɓa yɛ̀ɛ ǹɗèsàg wìì.

⁴¹ Ɓisuucɛ nnɛ ù ghɛɛ kìfɛfɛy ki ki ri ɓi ɗis ɗi goni, kɔ̀ɔ ghɛn ǹwɔ̀g wu wu ri ɓi ɗiǹkɔ̀ɔ̀?

⁴² Nsoò lɛ: Lannɛ ù rì lɛ ù kpaa goni lɛ, maasòŋ, kìya m̀pisi wɔ̀ kìfɛfɛy ki wɔ̀ ɓi ɗis, kɔm̀ lɛ ù ghɛɛ ɓi nwɔ̀g wu wu ri ɓi ɗiǹkɔ̀ɔ̀? Wɔ̀ ŋwaà fyɛy fyɛy ɓi ŋwɔm ìghèy ɓi ɗùm! Ka pisi ǹwɔ̀g wu wu ri wɔ̀ ɓi ɗis, di fɔlɔɔ nnɛ u konag kì ghɛɛ̀ yɛ̀ɛ u pisi kìfɛfɛy ki ki ri ɓi ɗis ɗi goni.

Kìte ki yin lɛ ki wum ɓiɗùn ɓidɛŋ
( Mt. 7:16-20 ; 12:33-35 )

⁴³ Syeesyee à kìte a maà wum ɓi ɓiɓeɓtàg ɓi ɓiɗùn, ǹsoò kìɓeɓtàg ki kite, ki yin lɛ ki wum ɓìsyeesyee ɓi ɓiɗùm.

⁴⁴ Lɛ ɓɛɛ̀ yilag kite kicèm ɓi ɓìɗùn ɓi kɔ. Ŋwaà yin lɛ à kɔs dii ɓi ǹɗyèm wu gay, ǹsoò lɛ à kɔs gin ɓi nɗyèm wu keŋ.

⁴⁵ Syeesyee à mum à ti à kìlàg ɓìɓan ɓi syeesyee lɛ, à rì rì syeesyee à ǹɗem; kìɓeɓtàg ki mum ki kilàg ɓìɓan ɓi ɓeɓtɛn lɛ, ki ri rì kìɓeɓtàg ki ǹɗem, lɛ ŋwɔm wu mum wɛɛ̀ kpaakpaa kiɓan ki ki roni nyi ǹɗem.

⁴⁶ Ɓisuucɛ nnɛ ɓi rereŋi mɛ lɛ Kan, Kan, kɛ̀ ɓi ki kì com ki ǹkpaa mìni?

⁴⁷ Ǹɗì lɛ ǹkpaa mìni lɛ, mum bimiɗ ànɛ à yùu a lɔ̀ŋkɛm̀, à wog rìrèsàg ɗyɛm̀, à ki nɔ̀ɔ̀ti ɗyɔ,

⁴⁸ à pisɛɛ ŋwaànɛ à ɓaghà ɓi kìtoŋ ki mɛɛ; à timgà zi, à kpaŋ ɓi rìɓan à ghɛ̀lɛ̀n yì kìtoŋ miì aɗyòò; yɛ̀ɛ don yi mɛnig yi kpagà, poɓɓo à yù kì roŋdɛɛ ɓi mɛɛ mɛǹ, kìɓan kifog, mɛ̀ kɛɛ̀ nyɛ̀ŋɗɛn, lɛ mɛ ɓaghà mɛ̀ toŋɛn lɛ syeesyee.

⁴⁹ Nni wɔ̀lɛ ŋwaànɛ à woogh rìrèsàg ɗyɛm̀, kɛ̀ɛ nɔ̀ɔ̀ti ɗyɔ, à pisɛɛ ŋwaànɛ à saghìghà mɛɛ mii ɓi m̀bume aɗyòò, kɛ̀ɛ tim lɛ a ghɛlɛn yì kìtoŋ ɓi zi i nteɗ. Yɛ̀ɛ poɓɓo à roŋɗɛ̀ngà miì, mɛ ghas kì kpìlaagh, mɛ waàrɛ̀n mɛ̀cèm.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan