Bìoball air-loidhne

LUKAS 21 - Bafia Nouveau Testament

Bɔgsì ìnɛ ǹkpɔɓ wu giɓ wu faghà
( Mk. 12:41-44 )

¹ Yɛ̀ɛ Yeesus à pìkà mis, nni à ghɛngà di ɓɛ̀guŋgum ɓɛɛ̀ pìpig bɔgsì ɓi fìkɔrɔŋ fi ɓɛ m̀pìkì mɔ̀ɔ̀ni mɛ bɔgsì miì.

² Fɔɔnnɛ à ghɛngà girig maa soghàsogha a ǹkpɔɓ wu giɓ di a pìpig ɓɔɔ tiraŋ̀ ɓɛɓɛɛ̀.

³ Yeesus à kpaa lɛ: Ǹkalii mìni ɓi saaɗ lɛ, maa nkpɔɓ a giɓ anɛ à pìigh bɔgsì à cee ɓum ɓɛm̀bog ɓɛ̀cèm.

⁴ Ɓisuulɛ ɓaa pìigh gàɓ ì mɔ̀ɔ̀ni ìnɛ yàa yiìdi ɓɔ rì kìsay, wɔ̀lɛ giɓ anɛ nyaa pìigh gàɓ ì com bimiɗ ìnɛ àa rì rì yɔ̀, ìnɛ àa ghɛ̀ɛ̀sɛɛ lɛ à ghɛɓ miì.

Yeesus à kalii ɓum lɛ naà-Bɛ̀ll ìnɛ a Yorisalɛm ì ɓiì wààrɛɛ
( Mt. 24:1-2 ; Mk. 13:1-2 )

⁵ Yɛ̀ɛ ɓum ɓɛdɛŋ ɓɛ kpaakpààghà lɛ naà-Bɛ̀ll ì rì ǹɗɛ̀ŋɛn ri ɓìsyeesyee ɓi gɔ̀g, rì ɓyom ɓìcèm ɓi ɓum ɓɛ fafàghà ɓi rìɓɔgsì ɗi Bɛ̀ll, nni Yeesus à kalìghà lɛ:

⁶ Mɛ̀ru mɛdɛŋ mɛ ɓiì ɓaà mɛ ɓyàa ghɛɛ̀di ɓi nsoò di gɔ̀g bog ìrì ǹsasaghiyɛn ɓi ìdɛŋ ì rɔ̀ɓ lɛ ɓɛ ɓigtii ɓi yɔ̀, ɓi ɓyom ɓìcèm ɓi ɓi seesee ɓi.

Mɛ̀tɔɓ mɛ mɛ ri ɓiì ghɛnɛɛ di rìlèg ɗi zi ɗi ti jàŋbog
( Mt. 24:3-14 ; Mk. 13:3-13 )

⁷ Nni ɓɛ tɔkà nyi lɛ: Ǹɗèsàg! fin innɛ kìɓan kiǹ ki ɓiì kìlɛɛ? Kìrèmzɛnà aɗi kɛɛ ri ɓiì rèsii lɛ kìɓan kiǹ ki ti jàŋbog ɗì rìkìlɛ̀n?

⁸ Yeesus à ɓàg lɛ: Ɓì konàg lɛ mum kɛ̀ɛ yègsi mini, ɓisuulɛ ɓum lɛɛ̀gwey ɓɛ ɓiì yùyuu ri ɗii ɗyɛ̀m, rì ànɛn miì à kpaa lɛ: Mɛ̀ yɛɛ ri Kiris, rì tì lɛ cààmɛ̀n ki ti jàŋbog; kɛ̀ ɓi nɔ̀ɔ̀ti ɓɔ.

⁹ Yɛ̀ɛ ɓì rì ɓiì woògh di ɓɛɛ̀ kpaakpaa ɓiɓan ɓi mɛ̀y, rì kìɓùùsì ki ɓi ɓìlɔ̀ŋ, kɛ̀ ɓi risi, lɛ ɓìɓan ɓiǹ ɓi ghɛɛ̀sɛɛ kì loògh kì rèsɛɛ, kìɓan kifog àa rìlèg ɗi zi ɗyɛɛ ri lɔɔ ɓiì ɓaà.

¹⁰ Nni à kpaaghà min ɓɔ lɛ: Ki ɓiì ɓaà lɛ, ɓumɓɛ ɓi tum a zi anɛ ɓɛ ram wɛ̀y ri ɓɛ ɓi tum a zi ambog, kìlɔ̀ŋ ki ki ram wɛ̀y ri kim̀bog;

¹¹ ki ɓiì ɓaà lɛ rìfoo rìfoo zi i nyɛ̀ŋɗɛ̀n rììtèɗ, ɓìɓeɓtàg ɓi tiroɓ ɓi ri ɓiì ɓaà, rì zày, ɓɛ̀koŋnyoo ɓɛ ɓiɓan rì ɓyoo ɓifèèghrɛnà ɓi ɓiì rèsɛɛ ɓi ɗyoo.

¹² Wɔ̀lɛ di ɓìɓan ɓiǹ ɓìcèm ɓi ka ghɛnɛn ɓi, ɓɛ ri mìni ɓiì ɓangii, ɓɛ ki mìni mɛ̀tɔɓ; ɓɛ ri mìni ɓiì faà rì ɓɛ̀rɛlì-asu ɓɛ ɓi naa yi bɔ̀ŋzɛ̀n lɛ ɓɛɛ yɔm̀ mìni, ɓɛ ki pìg mini ɓi naà-zày; ɓɛ ɓiì kɛ̀ɛ ri mìni a ɓɛ̀làmì rì a ɓɛ̀gɔmìnà ɓisu wɛ̀m.

¹³ Fɔlɔɔ a rì mìni ɓiì kìi lɛ, ɓi lom̀ kìtɛɛtɛn ɓi kìɓan kɛm̀.

¹⁴ Com ki ɓi foŋ̀ ɓi ǹto ki ri lɛ, kɛ̀ ɓi log ki fèfeegh lannɛ ɓì ɓiì yɔ̀mi,

¹⁵ ɓisuulɛ mɛ̀ɛmiɗ yɛɛ ri mìni ɓiì faà ǹkpaà rì ɗyomzɛ̀n, ɓi ɓi ri ɓiì yaàgh ɓɛ̀bènàbena ɓin, ɓɛ̀ kɛɛ̀ ghɛɛ̀di ŋwɔm.

¹⁶ Nsoò ɓɛ̀yalì ɓin, nsoò ɓɛ̀geni ɓin, nsoò boo yìn i mum, nsoò ɓɛ̀reŋkàŋ ɓin ɓɛ ri mìni ɓiì kàɓi, ɓɛ ki cuusi kigwey ki ɓi mìni.

¹⁷ Ɓum ɓɛ̀cèm ɓɛ ri mìni ɓiì ɓèèzɛɛ ɓisu wɛ̀m.

¹⁸ Kìɓan kifog, nsoò fyòŋ fi ɓi nto wu wààdɛŋ fyaa tàŋ ɓi.

¹⁹ Kìsììrì kin kɛɛ ri ɓiì kìi lɛ ɓi ghɛɓsi ɓyɛɓ ɓin.

Rìwààrɛ̀n ɗi Yorisalɛm
( Mt. 24:15-21 ; Mk. 13:14-19 )

²⁰ Yɛ̀ɛ ɓì rì ɓiì ghɛɛ di mɛ̀raŋ mɛ wɛ̀y maa kɔ̀mzɛn Yorisalɛm, ɓì ghɛ̀ɛ̀sɛɛ kì yiì lɛ, Yorisalɛm à yùu kìwààrɛɛ.

²¹ Fɔɔnnɛ ɓumɓɛ ɓɛ ri ɓiì ɓaà a Zyude, ɓɛ ghɛɛ̀sɛɛ kì ghɛŋii, ɓi dòn aɗyòò, ɓɛ̀roɓɛ ɓɛ ri ɓi bàn ɓi ɗùm, ɓɛ ghɛɛ̀sɛɛ kì kpaŋì, ɓɛ ɓi dɛm, ɓɛ̀ kɛɛ̀ ɗiŋi ti ɓi bàn.

²² Ɓisuulɛ mɛ̀ru mɛ̀n mɛ ɓiì ɓaà mɛ̀ru mɛ rɔ̀ŋɗɔ̀ŋ, mɛ ɓìɓan ɓìcèm ɓi ɓi ri ɓì kànɛn ɓi ghɛɛ̀sɛɛ kì kìlɛɛ.

²³ Nyìighnyìg rì ɓɛ̀yiɓ ɓɛ mem, rì ɓɛ̀gɛɓyɛ̀y ɓɛ ɓi mɛ̀ru mɛ̀n, ɓisuulɛ nyìighnyìg ì ɓiì ɓaà lɛɛ̀gwey ɓi kìlɔ̀ŋ, fɔɔnnɛ bim inɛ Bɛ̀ll à rì kìlɔ̀ŋ ki rì yɔ̀ ì ri rèsɛ̀n.

²⁴ Ɓɛ ri ɓɔ ɓiì cuusii ri gàfàg, ɓìlɔ̀ŋ ɓidɛŋ ɓi ɓangì ɓɔ ɓi rìkpàn, ɓumɓɛ ɓɛ yin Ɓɛ̀yudɛ̀n ɓɛ sasàɓ Yorisalɛm rì mɛ̀kòò, à kpaŋ yɛ̀ɛ cààmɛ̀n ki ɓum ɓɛ̀n ki ri ɓiì lèegh.

Rìsugtìì ɗi Man à mum
( Mt. 24:29-31 ; Mk. 13:24-27 )

²⁵ Ɓìfèèghrɛnà ɓi ɓiì rèsɛɛ lɛ, rì ɓi kìsaa ki ŋwos, rì ɓi ŋwii, rì ɓi tyɔɛy; fɛ ɓi zi, coo-ris wu ri ɓiì kìi ɓilɔ̀ŋ di ɓi woogh, rìwɔ̀ɔ̀wɔ̀ɔ̀ ɗi riɓày à kìkòn, rì gom ì ɓìkus.

²⁶ Ìris wu ɓiì wolì ɓum ɓɛdɛŋ ɓi rìɓoŋɓɔ̀ŋ ɗi kiɓan ki ki ri ɓiì kìlɛɛ fɛ ɓi ziinɛ, ɓisuulɛ mɛ̀tèɗ mɛ ɓi ɗyoo mɛ ɓiì nyɛ̀ŋɗɛɛ.

²⁷ Fɔɔnnɛ ɓɛ ri min ɓiì ghɛɛ̀ Man à mum di à rìì ɓi kìkwìɗ, lɛ rì coo-tèɗ, rì coo rigwey.

²⁸ Yɛ̀ɛ ɓìɓan ɓiǹ ɓi ɓiì tumɛɛ righɛɛ̀ghɛ̀nɛ̀n, rɛliina mɛ̀rɛy, ɓì pɛ̀sì mɛ̀to aɗyòò lɛ gòri yìn i tiì jàŋbog.

²⁹ Fɔɔnnɛ Yeesus à tekà ɓɔ dàɗkì à kpaa lɛ: Fiɓiina lɛ rì fìgyee, rì ɓìte ɓimbog ɓìcèm.

³⁰ I ɓì ghɛɛ di tyɛn ti tumɛɛ rìtɔɓ, ɓì yi lɔŋ lɛ kìlòm ki ti jàŋbog.

³¹ Fɔlɔɔ nnɛ, yɛ̀ɛ mìni girig ɓì rì ɓiì ghɛɛ̀ di ɓìɓan ɓiǹ ɓyɛɛ̀ kìikilɛ̀n, yiina lɛ kìlɔ̀ŋ ki Bɛ̀ll ki ti jàŋbog.

³² Ǹkalii mìni ɓi saaɗ lɛ, bɔ̀ɓ i ɓum ìnɛ yàa lèg ɓi bimiɗ di ɓìɓan ɓi ɓìcèm ɓi ka kilɛn ɓi.

³³ Ɗyoo rì zi ɓi ri ɓiì lèegh, kìɓan kifog ɓìɓan ɓyɛm̀ ɓyaa lèg ɓi.

³⁴ Ɓì konàg rì mìniì ɓɔmiɗ, lɛ ɓìsɛ̀nɛ̀ rì ɓìzɛ̀ŋ ɓi mɛrɔ̀g rì rìcɛɛ̀cɛ̀ɛ̀rɛ̀n ɗi nɗem ɓyɛ̀ kɛɛ̀ fa mɛrem min ìɓwɛɗ; di ŋwos anɛ̀n à ri sìɗ mini ǹsìrɛn.

³⁵ Ɓisuulɛ ŋwos anɛ̀n à ɓiì sììdii ɓum ɓɛ̀cèm ɓɛ ɓi ziinɛ yɛ̀ɛ dam ì ti ì sììdàg ɓìzɛn.

³⁶ Fɔɔnnɛ kɔ̀riina cem, ɓì ki ɓɔ̀ɔɓɔŋzàg ɓyààmɛ̀n ɓìcèm, lɛ ɓi ɓa rì ìtèɗ wulɛ ɓi ceè ɓìɓan ɓi ɓi ri ɓiì kìlɛɛ, ɓì ki kpaŋ ɓi mis mɛ Man à mum mɛ̀rɛy.

³⁷ Yeesus à kìkìghà lɛ rì ŋwos à rèèrèsàg ɓum ɓìɓan ɓi naà-Bɛ̀ll, rì ìru, à kɛ̀n kì lalì ɓi dòn ì ɓɛ̀òlìvyee.

³⁸ Nni ɓum ɓɛ̀cèm ɓɛ ɓi kìlɔ̀ŋ ɓɛ ǹti ɓɛ kɛngì nyi a nyòò rì sariwa, lɛ ɓɛɛ wowog ɓìɓan ɓi a kakàlìghà.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan