Bìoball air-loidhne

LUKAS 13 - Bafia Nouveau Testament

Ɓumɓɛ a Galile ɓɛ Pilat à cuusìghà

¹ Ɓi cààmɛ̀n kiǹ, ɓum ɓɛdɛŋ ɓɛ yughà kì kpaà Yeesus kìɓan ki ki kighà ɓumɓɛ a Galile ɓɛ ɓɛ yughà kìɓɔgsii Bɛ̀ll rì ɓìtuwe ɓi lɛ ɓɛɛ funɛn, Pilat à ki cuusi lɛ rì ɓɔ, rì ɓìtuwe ɓyaa.

² Nni Yeesus à ɓàkà ɓumɓɛ̀n lɛ: Ɓi fèfeg nya lɛ ɓumɓɛ a Galile ɓɛǹ ɓɔ yɛɛ m̀pɔ̀ɔ̀zii kì ɓaà ɓɛ̀kìì-kìɓe ɓɛ cee ɓum ɓɛm̀bog ɓɛ a Galile, yɛ̀ɛ ɓɛ ǹtulɛɛ rì rìkuu ɗi ǹtɔɓ ɗìn?

³ Ki yin fɔlɔɔ. Ǹkpaa mìni lɛ, i ɓì lɔ̀ɔ̀ghrɛɛ ɓi mɛrem, ɓì ɓiì cuù ɓɛ̀sɛ̀ɛ̀ ɓɛ̀cèm lɔŋ yɛ̀ɛ ɓumɓɛ̀n.

⁴ Gìn ɓum ǹtɛ̀ɗ ɗì taàraa ɓɛ mɛɛ mɛ a Silowe mɛ ɓangà, ɓɛ cuu, ɓɛɛ ɓiisɛ̀ngà kì kìi kiɓe ɓɛ cee ɓum ɓɛ̀cèm ɓɛ a Yorisalɛm ɓi rìghɛn ɗin?

⁵ Ki yin fɔlɔɔ. Ǹkpaa mìni lɛ, i ɓì lɔ̀ɔ̀ghrɛɛ ɓi mɛrem, ɓì ɓiì cuù ɓɛ̀sɛ̀ɛ̀ ɓɛ̀cèm lɔŋ yɛ̀ɛ ɓumɓɛ̀n.

Dàɗkì ì fìgyee, ànɛ àa nti kɛ̀ɛ wum

⁶ Fɔɔnnɛ Yeesus à teetìghà ɓɔ dàɗkì lɛ: Ŋwaàdɛŋ yɛɛ ɓɛlà fìgyee ɓi dɛm yiì, nni à yùghà lɛ a kɛs ɓìɗùn ɓi kìte kiǹ, kìɓan kifog, à tanɛ̀n kɔ kɛ̀ɛ̀ kìɗùn nsoò kìfog.

⁷ Nni à kpaaghà min mum ànɛ àa m̀pègsàg nyi dɛm lɛ: Ghɛna bèg yiraa yɛɛ rari lɛ, yɛ̀ɛ ǹtumɛ̀ngà rìyù lɛ nkɛs ɓìɗùn ɓi fìgyee ànɛ, wɔ̀lɛ, kɛ̀ɛ ǹtanɛn com miì, nni kpɛ̀ɛ̀ya nyi, à rɛrɛlii foo à ɗiɗì ìkɔ̀ɔ̀ zɛy ɓisuucɛ?

⁸ Fɔɔnnɛ m̀pègsɛ̀n-dɛm a kpaaghà lɛ: Kan, ka cààti ɓà fìgyee ànɛ̀n ɓi bèg ìnɛ, ǹɗì ɓiì timii ǹɗyèm wii ǹcèŋzɛ̀n, ǹfoŋ kìkùnkùn miì.

⁹ Ɓaà yi ɓi à rì lɛ à wum ɓìɗùn ɓi mɛ̀ru mɛ asu; i à wumi ɓi, fɔlɔɔ nnɛ ù kpɛ̀ɛ̀ min nyi.

Yeesus à wɔ̀ɔ̀zii lɛnlɛm à giɓ adɛŋ ŋwosi Saɓàt

¹⁰ Yɛ̀ɛ Yeesus à rèrèsàkà ɓum ɓi naà-bɔ̀ŋzɛ̀n ìdɛŋ ŋwosi Saɓàt,

¹¹ giɓ adɛŋ à ɓaghà wɔɔ ri kìɓeɓtàg ki nghay ki ki lɛmzìghà yi, kìlɛm kìn ki ɓaghà di ki ti bèg ǹtɛ̀ɗ ɗì taàraa, nyii rɔɓ mɛ̀laŋ, kɛ̀ɛ̀ bee inɛ lɛ à rɛlì tì lɛsaaɗ.

¹² Yɛ̀ɛ Yeesus à ghɛngà giɓ anɛ̀n, à reŋì nyi, à kpaa nyi lɛ: Giɓ, ù wɔ̀ni kìlɛm ki!

¹³ Fɔɔnnɛ à saghìghà min nyi ɓyàg ɓi nyòò, giɓ anɛ̀n à sugtì kì rɛlii lɛsaaɗ lɔŋ a-kɔ̀ɔ̀, à ghagsɛ̀n ɗì rìɓɔgsì ɗi Bɛ̀ll.

¹⁴ Wɔ̀lɛ ǹlàmì naà-bɔ̀ŋzɛ̀n à wokà bim ɗi rìwɔ̀ɔ̀zì ɗi Yeesus à wɔ̀ɔ̀zìghà giɓ anɛ̀n ɗiǹ ŋwosi Saɓàt; à kpaa min gwìy ì ɓum ìnɛ ì ɓaghà wɔɔ lɛ: Ɓɛ̀ŋwos ɓɛ mum à ghɛ̀ɛ̀sɛɛ kì kìi kisay miì, ɓɛ ri taàfog, yùlaaghna kìɓoorɛɛ ɓi ɓɛ̀ŋwos ɓɛǹ, à cee lɛ ɓi yu ŋwosi Saɓàt.

¹⁵ Fɔɔnnɛ Kan à ɓàkà nyi lɛ: Ɓì rì lɛ fyɛɛ̀-fyɛɛ̀ ɓi ŋwɔm ìghèy ɓi ɗùm; mum ǹcèm ànɛ ɓi mìni a ti kɛ̀ɛ fùmi sanìnya wìì, nsoò lɛ jàɗki yìì, à kɛ̀n yɔ̀ ki nɔsii mɛnig ŋwosi Saɓàt?

¹⁶ Nni giɓ anɛ à rì ànɛ, à rì ɓi boo ì mum yì Abiraham, nyi nnɛ Satàn a ɓangà, à kàŋ bɛn, gɛɛ̀nɛ bèg ǹtɛ̀ɗ ɗì taàraa. Nni ki ghɛɛ̀sɛɛ ɓi lɛ ɓɛɛ fumi nyi bɛn yin ŋwosi Saɓàt?

¹⁷ Yɛ̀ɛ Yeesus à kpaaghà fɔlɔɔ, ɓɛ̀bènàbena ɓii ɓɛ̀cèm ɓɛ wog ǹtoòrìɗ. Wɔ̀lɛ gwìy ì ɓum ìnɛ ì ɓaghà wɔɔ ì nyàànyààghà rì dàm yi ɓiɓan yicèm yi à kìkìghà.

Dàɗkì ì zàm ì rìwom
( Mt. 13:31-32 ; Mk. 4:30-32 )

¹⁸ Nni Yeesus à kpaatìghà lɛ: Kìlɔ̀ŋ ki Bɛ̀ll ki pisɛɛ ɓà ri cɛ, nni mɛ̀ ǹki rì ɓà lɛ ǹfèg kɔ rì cɛ?

¹⁹ Kìlɔ̀ŋ ki Bɛ̀ll ki pisɛɛ rì maa zàm à kìte ànɛ mum à teri, à ɓɛ̀y ɓi dɛm yiì, à ròò, à tɔɔ, à ghay kìte, tììlì ti ki toŋ ɓilaa ɓyaa ɓi myaɓ mɛ kite kiǹ.

Dàɗkì ì nwìɗ
( Mt. 13:33 )

²⁰ Nni Yeesus à kpaatìghà ɓɔ lɛ: Cɛ kɛɛ̀ki ǹɗi lɛ, ǹfègtì ɓà kilɔ̀ŋ ki Bɛ̀ll rì kɔ?

²¹ Ki ri fɛlɛ yɛ̀ɛ nwìɗ ànɛ giɓ a teri à foŋ ɓi vèg yi ǹkùŋ wu kipɛn yiraa, à kpaŋ yɛ̀ɛ nwìɗ a ɓiì kìi lɛ kìpɛn kìn kɛɛ nurɛǹ di ɓɛ mɛ fyèè.

Ìsuunaa wu sɔgsɔ̀ɔ̀g
( Mt. 7:13-14 , 21-23 )

²² Yeesus à rerènìghà lɛ, rì bàn ɗì jɛ̀m i ɓilɔ̀ŋ, di a rèeresàg ɓum ɓìɓan ɓi Bɛ̀ll, à ki ròroŋi bee inɛ a Yorisalɛm.

²³ Nni ŋwaàdɛŋ à tɔkà nyi lɛ: Kan, lɔŋ maa gàɓ à ɓum lɛsàg yɛ̀ɛ ri ɓiì ghɛɛ̀ cɛɓ ɓi kìlɔ̀ŋ ki Bɛ̀ll? Yeesus à ɓàg min ɓɔ lɛ.

²⁴ Tèèsiina nyoo lɛ ɓi ɗiŋi ɓisuunaa wu sɔgsɔ̀ɔ̀g ɓisuulɛ, ɓum lɛɛ̀gwey ɓɛ kaa gɛ bee inɛ ɓɛɛ ɗiŋì, ɓɛ̀ kɛɛ̀ ghɛn, mɛ̀ yɛ̀ɛ kpaa mìni!

²⁵ Yɛ̀ɛ ŋwaàmɛɛ a pɛ̀sɛɛ gɛ aɗyòò à sìm ìsuunaa, mìni ɓɛ ɓì rɔ̀ɓi gɛ ɓi ɗyɔ̀m, ɓì tumɛɛ gɛ rìɓog ɗi isuunaa di ɓi kpaakpaa lɛ: Kan nɛma ɓìsi naa, fɔɔnnɛ à bàagh gɛ mìni lɛ: Mɛ̀ ǹ-yii ɓi jàŋ inɛ ɓì pɛ̀sɛɛ yì.

²⁶ Fɔɔnnɛ ɓì tumɛɛ gɛ min rikpaa lɛ: Tì kìghà lɛ, tì ɗiɗì tì nɔnɔ̀ ǹɗaŋ ri wɔ̀, ù ki rèsàkà ɓìɓan ɓi Bɛ̀ll ɓi ɓìɓàà ɓis.

²⁷ Nni nyii ɓàagh gɛ mìni lɛ: Ǹkalii mìni lɛ ǹ-yii ɓi jàŋ inɛ ɓì pɛ̀sɛɛ yì, ghaghiina mɛ̀ ɓi mis, lɛ mìni ɓɛ̀sɛ̀ɛ̀ ɓɛ̀cèm, ɓì rì ɓɛ̀kpàn ɓɛ kiɓe.

²⁸ Fɔɔnnɛ ɓì rènɗeni gɛ, ɓì ŋààŋààdì min, di ɓyàa ghɛn lɛ rì Abiraham, rì Isag, rì Yakɔɓ, rì ɓɛ̀kpaŋzì-ɓìɓan ɓɛ̀cèm ɓi kìlɔ̀ŋ ki Bɛ̀ll, ɓɛ ki tyɔg mini ɓi dan.

²⁹ Ɓumɓɛ pɛ̀saagh gɛy a rìkpagì ɗi ŋwos, rì a rìnɔ̀ŋɗàg ɗi ŋwos, ɓɛdɛŋ ɓɛ pɛsɛ̀n yì ǹkòkwey, ɓɛm̀bog yì duŋzi, ɓɛ yu kì kɔ̀rii a kìsɛ̀nɛ̀ ki ɓi kìlɔ̀ŋ ki Bɛ̀ll.

³⁰ Fɔɔnnɛ ɓum ɓɛdɛŋ ɓɛ ɓi ɓɛ̀yùù ajɛ̀m, ɓɛ ɓaa gɛ ɓi ɓumɓɛ asu; ɓɛ̀ro ɓɛdɛŋ ɓɛ ɓi ɓumɓɛ asu, ɓɛ ɓaa gɛ ɓumɓɛ ajɛ̀m.

Yeesus à kɛ̀ɛ kì wiì a Yorisalɛm
( Mt. 23:37-39 )

³¹ Ɓi cààmɛ̀n kiǹ, Ɓɛ̀fàrìzyɛŋ ɓɛdɛŋ ɓɛ yughà kì kpaà Yeesus lɛ: Pɛ̀sɛn fɛ, u ghaagh, lɛ Eroodɛ a kɔ̀nkɔn lɛ a wey wɔ̀.

³² Nni Yeesus à ɓàkà ɓɔ lɛ: Kɛ̀ɛna kì kpaà kìbina kiǹ lɛ: Ghɛɛna nnànaɓ ɓiɓeɓtàg ɓi mɛghay, ǹki wɔ̀ɔwɔɔ̀zì ɓum lɛ rì gɛɛ̀nɛ rì rìduri, mɛ̀ru mɛɓɛɛ̀ fɛlɛ, di m̀mɛ lègsi kisay kiǹ.

³³ Kìɓan kifog, ǹghɛ̀ɛ̀sɛɛ lɛ ǹghagsi rìkɛ̀ɛ̀ ɗyɛm̀ à tumɛɛ gɛɛ̀nɛ, à kpaŋ rìduri rì mɛ̀ru mɛɓɛɛ̀, ɓisuulɛ ǹkpaŋzì-ɓìɓan a ghɛ̀ɛ̀sɛɛ ɓi ki wiì jàŋ idɛŋ, lɔŋ a Yorisalɛm.

³⁴ Wɔ̀ Yorisalɛm! Wɔ̀ Yorisalɛm! Wàànɛ u kìki lɛ, ù cuùcùùsì ɓɛ̀kpaŋzì-ɓìɓan, ù ki wowey ɓumɓɛ Bɛ̀ll à ti à romgìì wɔ̀, di u roorogì ɓɔ gɔ̀g; gɛ̀n yaŋ yɛɛ̀ yi m̀mɛ kaa bee inɛ ǹtaŋzɛn ɓɔn ɓɔɔ fɛlɛ yɛ̀ɛ jɛɛ à zag a taŋzag ɓɔn ɓii a mɛ̀keɓ zi, kɛ̀ ɓi kɔ̀n!

³⁵ Nni ghɛɛna lɛ, ɓɛ ɓiì rinii mɛɛ min kìɓan kifog, ɓyàa ghɛɛ̀di ɓi mɛ à kpaŋ ŋwos anɛ ɓì ɓiì kalii lɛ: Bɛ̀ll a maŋ̀ roànɛ à yùu yì ɓi ɗii ɗi Kan.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan