LUKAS 11 - Bafia Nouveau Testament

Bɔ̀ŋzɛ̀n ì Kan Yeesus

¹ Ŋwos adɛŋ, Yeesus à ɓɔ̀ɔ̀ɓɔ̀ŋzìghà ɓi jàŋ idɛŋ; yɛ̀ɛ à lègsìghà bɔ̀ŋzɛ̀n nni n-yilàg wìì adɛŋ, à kpaaghà nyi lɛ: Kan, rèsàg ɓìsi yɛ̀ɛ ti ɓɔ̀ŋzag, fɛlɛ yɛ̀ɛ Zyaŋ à rèsàkà ɓɛ̀yilàg ɓii, lannɛ ɓɛɛ ɓɔŋzag.

² Yeesus à kpaa ɓɔ lɛ: Cààmɛ̀n kìcèm ki ɓi ɓɔ̀ɔɓɔŋzàg, kaliina lɛ: Tààta! Ɗii ɗyɔɔ ɗyɛɛ ɓa ɗì tɛnɛn; kìlàmì kɔɔ kɛɛ yu.

³ Ɓɛ̀ŋwos ɓɛ̀cèm faa ɓìsi ɓìɗilàg ɓi ɓi ghɛɛ̀sɛɛ rì ɓìsi ɓi bimiɗ a ŋwos.

⁴ Cenɛn ɓìsi ɓìɓe ɓis, lɛ ɓìsi girig tì ti tì cenàg ŋwaànɛ à kaa ɓìsi kìɓan. Kɔ̀ɔ ki càɗ ɓisi lɛ ti kpi ɓi mɛ̀fèèghrɛn ɓiɗùm.

Mɛ̀kàg mɛ Yeesus à faghà ɓɛ̀yilàg ɓi kìɓan ɓi bɔ̀ŋzɛ̀n

⁵ Nni à kpaatìghà ɓɔ lɛ: I kìbog ki ɓi mìni ki ri rì rìghan, nni rìghan ɗiǹ ɗi yuù nyi kì ghɛɛ̀ rì ǹɗem-irù, ɗi kpaa nyi lɛ: Reŋkàŋ wɛ̀m, ɓɔ̀rɛn ɓà mɛ bìrɛs yiraa,

⁶ lɛ reŋkàŋ wɛ̀m àdɛŋ à rìì rìkɛ̀ɛ̀, nni à kpaŋi a lɔ̀ŋkɛm̀, fɔɔnnɛ ǹki yin ɗi com ki lɛ, ǹfa nyi à ɗi.

⁷ Nni i roànɛ̀n à ɓàghiì nyi wɔɔ ɓi naa lɛ: Kɔ̀ɔ̀ yeesi mɛ màa mɛ sìmdɛ̀n, rì mɛ̀ rì ɓɔn ɓɛm, tì mɛ nɔ̀ŋi ɓi zi, ǹ-yiidi lɛ m̀pɛ̀sɛ̀n tì aɗyòò lɛ ǹfa wɔ̀ bìrɛs.

⁸ Ǹkalii mìni lɛ, àa soo pɛ̀sɛɛ ɓi aɗyòò lɛ a fa nyi bìrɛs, ɓi ɗii ɗi lɛ reŋkàŋ wìì, à rì ɓiì pɛ̀sɛɛ aɗyòò, à fa nyi com kìcèm ki roànɛ̀n à tɔɔgh nyi lɛ a caɗ nyi lɛ fyòoog kɛ̀ɛ yeesi nyi.

⁹ Fɔɔnnɛ ǹkpaatii mìni lɛ, lɔnina, fɔlɔɔ nnɛ ɓɛ ri mìni ɓiì faà; kaana, fɔlɔɔ nnɛ ɓì ɓiì tanɛɛ, ɓooghna ìsuunaa, fɔlɔɔ nnɛ ɓɛ ri mìni wɔ ɓiì nɛmì;

¹⁰ lɛ mum ǹcèm ànɛ à lɔni com, ɓɛ ti ɓɛ falàg nyi kɔ̀, roànɛ à kaa, à ti à tanàg, fɔɔnnɛ roànɛ à ɓoogh naa, ɓɛ ti ɓɛ nɛngì nyi yɔ̀.

¹¹ Ghɛn anɛ ɓi mìni yɛɛrì lɛ, à ɓa rìkuu ɗi seŋi ɗi lɛ, i man à lɔni bìrɛs, nyii fa man ànɛ̀n gɔ̀g, nsoò lɛ i man à lɔni nyi kìzɛn, nyii fa man ànɛ̀n nyoo ɓi sìg à kìzɛŋ?

¹² Nsoò lɛ i à lɔni nyi ɗìg, nyii fa man fìrèè fi taataɓɓɛ̀n?

¹³ I mìni ɓɛ ɓì rì ɓìɓeɓtàg ɓi ɓum ɓi yii rìfa ɗi ɓɔn ɓin ɓɛsyeesyee ɓɛ ɓyom, lannɛ Tààta ànɛ à rì aɗyòò à ɓiì rɔ̀ɓi kɛ̀ɛ fa Kitɛntɛ̀ɛ̀n ki Nghay a ɓumɓɛ ɓɛ tɔɔgh nyi kɔ̀?

Yeesus à wɔ̀ɔ̀zii mùm-mùm ànɛ à ɓaghà rì kìɓeɓtàg ki nghày

¹⁴ Yeesus à nànàɓkà kìɓeɓtàg ki nghay ki ki pɛɛ̀zìghà mum mùm-mùm, nni yɛ̀ɛ kìɓeɓtàg ki nghay kìn ki kpagà, ŋwaànɛ à ɓaghà mùm-mùm anɛ̀n à tòòghrɛ̀n; fɔɔnnɛ gwìy ì ɓum ìnɛ ì ɓaghà wɔɔ ì kuuràkà kìɓan kiǹ.

¹⁵ Kìɓan kifog ɓum ɓɛdɛŋ ɓɛ kpaa lɛ: Ɓi-tèɗ wu Bɛlzeɓul ànɛ àrì rìfòm ɗi ɓiɓeɓtàg ɓi mɛghay innɛ a nànaɓ ɓiɓeɓtàg ɓi mɛghay.

¹⁶ Ɓi ɗi lɛ, ɓɛɛ feèghrɛn nyi, ɓɛ̀ro ɓɛdɛŋ ɓɛ tɔkà nyi lɛ a resi ɓɔ kìrèmzɛnà kidɛŋ ki ki resii lɛ ìtèɗ wu a kìki ɓiɓan miì, wu riì aɗyòò.

¹⁷ Yɛ̀ɛ Yeesus à yighà ɓɛ̀fèg ɓaa, nni à kpaaghà ɓɔ lɛ: Kìlɔ̀ŋ kìcèm ki ki ghasɛɛ gàɓ yiɓɛɛ̀ lɛ kɛɛ ɗuu rì kɔmiɗ, ki ri ɓiì cuù, à kpaŋ yɛ̀ɛ mɛɛ mɛcèm mɛ ɓi kìlɔ̀ŋ kin mɛ ɓiì kpìlaagh.

¹⁸ Nni i Satàn a ti ǹghasɛn gàɓ yiɓɛɛ̀, lɛ a ɗuù rì nyimiɗ, lannɛ kìlɔ̀ŋ kii ki ri ɓiì kɛ̀ɛ asu; yɛ̀ɛ mìniì kalag lɛ, mɛ̀ɛ nànaɓ ɓìɓeɓtàg ɓi mɛghay rì ìtèɗ wu Bɛlzeɓul?

¹⁹ I mɛ̀ɛ nki nànaɓ min ɓiɓeɓtàg ɓi mɛghay rì ìtèɗ wu Bɛlzeɓul, ɓɔn ɓin ɓɔɔ̀ nànaɓ ɓyɔ rì ìtèɗ wu ghɛn? Fɔɔnnɛ ɓɔn ɓin ɓɔmiɗ ɓɛɛ faa gɛ mìni zɔɔ ɓi kìɓan kiǹ.

²⁰ Kìɓan kifog, i ki rì lɛ nnànaɓ ɓiɓeɓtàg ɓi mɛghay rì ìtèɗ wu Bɛ̀ll fɔlɔɔ a rèsii lɛ, kìlɔ̀ŋ ki Bɛ̀ll ki ti a lɔ̀ŋkin.

²¹ I kìtèetèɗ ki mum ki ki ri rì ɓyom ɓi ribaŋì kɛɛ̀ ɓèŋɓeŋ mɛɛ mɛ kɔ, ŋwaà yin lɛ à kòm ɓyom ɓii.

²² Wɔ̀lɛ i ŋwaànɛ à cee ŋwaànɛ̀n ɓi-tèɗ à kpaŋi, à kwiy nyi, à ɓàtɛ̀n ɓyom ɓi ribaŋì ɓi ŋwaànɛ̀n àa ǹɗì rì ǹtyweeyi miì, à kàɓsag ɓyom ɓii ɓìcèm ɓi à ɓàtaagh.

²³ Mum bimiɗ ànɛ à yin ɓi gàm yɛ̀m, a ɗùùɗuu ri mɛ̀, fɔɔnnɛ roànɛ à ɓasɛɛ ɓi ri mɛ̀ ɓi rìtaŋzɛ̀n, à rì roànɛ à rì ɓi rìtyàŋzì.

²⁴ Cààmɛ̀n kìcèm ki kìɓeɓtàg ki nghas̀ ki kpaŋi mum ɓi nyoo, ki kɛǹ kì dèŋdeŋi ɓi kìgbag ki jàŋ ɓi rìkaakàà ɗi rifɔɔsɛ̀n; i kaa rɔ̀ɓ kɛ̀ kɛɛ̀ ghɛn jàŋ i rìfɔɔsɛ̀n, ki kpaa lɛ: Ǹɗì ɓiì sugtii ɓi naa ìnɛ mɛ̀ɛ m̀pɛ̀sɛɛ yì miì.

²⁵ I ki sugtii yì, ki tanɛ̀n lɛ mɛɛ mɛ ti lɛ, mɔ mɛ fyɔngakɛn, mɛ ki ɓa ti mɛ rɛ̀ŋɛn,

²⁶ ki kɛɛ̀dì min, ki teɗtìì ɓìɓeɓtàg ɓi mɛghas̀ ɓidɛŋ taàɓɛ̀ɛ̀ ɓi ɓi cee kɔ ɓi rìnyɛn, ɓi ɗiŋì ɓi naànɛ̀n ɓi kɔrì miì. Fɔɔnnɛ siitòn a rìɓa à ŋwaànɛ̀n à rì ɓiì ɓeɓtɛɛ à cee rìɓa ɗi à ɓaghà ǹtonto.

²⁷ Yɛ̀ɛ Yeesus à kpaaghà fɔlɔɔ, nni giɓ à toòghrɛ̀ngà jɛ̀ɛ̀ aɗyòò ɓi nyìinyìm à ɓum, à kpaa nyi lɛ: Mààgh rì giɓ anɛ à tɛ̀tɛ̀kà wɔ̀ ɓi ɗùm ɗii, à ki nyɔŋzi wɔ mɛlì mii.

²⁸ Wɔ̀lɛ Yeesus à ɓàkà nyi lɛ: Ɓumɓɛ ɓɛɛ̀ kìki lɛ, ɓɛ wowòg jɛ̀ɛ̀ ì Bɛ̀ll ɓɛ ki ɓèŋɓeŋ yɔ̀, ɓɛɛ ri kom̀ ɗì ɓɛ̀mààgh.

Yeesus à ɓèni kì kìi dàm

²⁹ Yɛ̀ɛ kìlɔ̀ŋ ki taŋzɛ̀ngà Yeesus a nyoo, nni à tumɛ̀ngà rìkpaa lɛ: Gbàà ì ɓum ì gɛɛ̀nɛ ìnɛ ì ɓeɓtɛɛ mɛ̀rem ìnɛ yɛ̀ɛ tɔtɔg mɛ lɛ ǹɗesi yɔ̀ dàm ì kìɓan, nni ɓaa ghɛn ɓi dàm ì kìɓan idɛŋ, i ki cee ɓi lɛ dàm ì kìɓan ki ǹkpaŋzì-ɓìɓan anɛ lɛ Zyonas.

³⁰ Lɔŋ yɛ̀ɛ Zyonas à ɓaghà fɛlɛ yɛ̀ɛ kìrèmzɛnà ɓisuu ɓumɓɛ a Niniivɛ fɔlɔɔ nnɛ Man à mum à ɓiì ɓaa ɓisuu gbàà ì gɛɛ̀nɛ.

³¹ Ŋwosi rìren ɗi ɓiɓan, giɓ anɛ à làlàmìghà kìden ki zi ki duŋzi à pɛ̀sɛɛ gɛ aɗyòò, à fa gbàà ì ɓum ì gɛɛ̀nɛ bɛ̀lɛn, ɓisuulɛ nyii pɛsɛ̀ngày ɓi jaŋ̀ inɛ zi i sugtɛɛ, lɛ a yu kì woògh ɓìtòkì ɓi ɗyomzɛ̀n ɓi Salomɔŋ à tòtòkà. Nni ghɛɛna lɛ, mìnii rì fɛ ri ŋwaànɛ à ceetii Salomɔŋ.

³² Ɓumɓɛ a Niniivɛ ɓɛ pɛsɛɛ gɛ aɗyòò ŋwosi riren ɗi ɓiɓan, ɓɛ fa gbàà ì gɛɛ̀nɛ bɛ̀lɛn ɓisuulɛ, ɓɔɔ lɔɔ̀ghrɛ̀ngà mɛ̀rem yɛ̀ɛ ɓɛ wokà ɓìɓan ɓi Bɛ̀ll ɓi Zyonas à kpaaghà ɓɔ, nni ghɛɛna lɛ, ɓì rì fɛ rì ŋwaànɛ à ceetii Zyonas.

³³ Ŋwaà yin lɛ à ròòsì lamɓà lɛ a nyam nyi, nsoò lɛ a foŋ nyi a kìbɔkɔ̀ zi, wɔ̀lɛ ɓɛɛ̀ fogi lamɓà ɓi kìrɛsì kii aɗyòò ɓi lèg ànɛ lɛ ɓumɓɛ ɓɛɛ̀ ɗiɗiŋii ɓi naa, ɓɛɛ ghɛǹ kìtɛɛtɛn.

³⁴ Ɗis ɗyɔɔ ɗi ri lamɓà à nyoo yɔ̀ɔ̀; i ɗis ɗyɔɔ ɗi ri lɛ syeesyee nyoo yɔ̀ɔ̀ bimiɗ ì ɓiì ɓaà ɓi kìtɛɛtɛ̀n. Kìɓan kifog, cààmɛ̀n ki ɗis ɗyɔɔ ɗi yin lɛ syeesyee, nyoo yɔ̀ɔ̀ i ɓa ɓi birìm.

³⁵ Nni kɔ̀ri min ɗyomzɛ̀n lɛ, kìtɛɛtɛn ki ù rì rì kɔ, kɛ̀ kɛɛ ghay birìm.

³⁶ I nyoo bimiɗ ì rì ǹkpeŋziyɛn nsoò maa kìkàɓ àdɛŋ kɛ̀ɛ ɓa ɓi birìm, nyoo yɔ̀ɔ̀ bimiɗ ì ɓiì ɓaà lɛ kpeŋkpèèŋ lɔŋ yɛ̀ɛ lamɓà à ti à kpeŋzàg wɔ̀ rì kìtɛɛtɛn kii.

Yeesus à rèsii, Ɓɛ̀fàrìzyɛŋ, rì ɓɛ̀rèsàg-ɓìdɔ̀gsɛna lɛ ɓìɓan ɓi ɓɛɛ̀ kìkì ɓi rɔɔtɛɛ ɓi

³⁷ Yɛ̀ɛ Yeesus à tòtòkà, nni Fàrìzyɛŋ àdɛŋ à tɔkà nyi lɛ, a yu kì ɗiì a mɛɛ mii. Fɔɔnnɛ a ɗìŋìyà wɔɔ, ɓɛ kɔrì ɓi ɓìɗilàg.

³⁸ Fàrìzyɛŋ ànɛ̀n à kuuràg lɛ, Yeesus à tumɛɛ rìɗi ɗi ɓyom kɛ̀ɛ sòò ɓyàg.

³⁹ Wɔ̀lɛ, Kan à kpaa nyi lɛ: Mìni Ɓɛ̀fàrìzyɛŋ ɓɛ, ɓi ti ɓì tɔ̀sàg lɛ, rì jɛ̀m ì ɓeŋ, rì jɛ̀m ì taasà, kìɓan kifog mɛ̀rem min mɛ ron lɛ rì wii rì rìgɛn.

⁴⁰ Mìni ɓìdùŋdùŋ ɓi ɓum ɓì, àa roànɛ à kìghà dan nnyɛɛ kìtìghà ɗùm?

⁴¹ Com ki ɓyàa ghɛ̀ɛ̀sɛɛ kì kìi ki ri lɛ, ɓi fa ɓɛ̀soghàsogha ɓyom rì nɗem wu syeesyee, fɔɔnnɛ ɓyom ɓìcèm ɓi ɓiì ɓaà ɓìtɛnɛn ɓisu wìn.

⁴² Nni nyìighnyìg rì mìni Ɓɛ̀fàrìzyɛŋ lɛ, mìnii ɓɔɔɓɔgsì Bɛ̀ll rì gàɓ ì kìntɛ̀ɗ ìnɛ ɓi mɛ̀kuu mɛ ɓinyàa mɛ̀cèm, ɓì sɛɛ̀sɛ̀ɛ̀tì lɛ, rì saaɗ ɗì rìkeesì ri Bɛ̀ll, kɔlɛ com ki ɓyàa ghɛ̀ɛ̀sɛɛ kì nɔ̀ɔ̀tii kɛɛ̀ kìn lɔɔ, kɛ̀ ɓi ki pisi mis ɗì ɓìɓan ɓimbog.

⁴³ Nyìighnyìg rì mìni Ɓɛ̀fàrìzyɛŋ, lɛ ɓì keesii rìkɔ̀rì ɓi mɛ̀kɔ̀ɔ̀ mɛ asu mɛ ɓi naa yi bɔ̀ŋzɛ̀n, ɓi ki keesi ti lɛ ɓɛɛ toòtògsì mìni rì nyaasɛ̀n ɓi ɓìyan ɓi tyèè.

⁴⁴ Nyìighnyìg rì mìni, lɛ ɓì rì fɛlɛ yɛ̀ɛ zɔ̀ŋ yi yi ri yì tììghgɛn, ɓum ɓɛ kɛɛ̀kɛ̀ɛ̀ mii aɗyòò ɓɛ̀ kɛɛ̀ yi.

⁴⁵ Fɔɔnnɛ kìbog ki ɓi ɓɛ̀rèsàg-ɓìdɔ̀gsɛna ki kpaaghà nyi lɛ: Ǹɗèsàg, i ù kpaa fɔlɔɔ, di ù sɛmgii lɔŋ lɛ rì ɓìsi miì.

⁴⁶ Yeesus à ɓàg nyi lɛ: Nyìighnyìg girig rì mìni ɓɛ̀rèsàg-ɓìdɔ̀gsɛna, lɛ ɓi tɛ̀ɛghtɛgsì ɓum mɛ̀tɛ̀g mɛ mɛ rirì lɛɛ̀gwey, mìniìɓɔmiɗ kɛ̀ ɓi kòm mɔ nsoò ǹkòmɛn ri manàcàg.

⁴⁷ Nyìighnyìg rì mìni, ɓisuulɛ ɓi ti bì togi ɓìsyeesyee ɓi zɔ̀ŋ ɓisuu ɓɛkpaŋzì-ɓìɓan ɓɛ ɓɛ̀seŋi ɓin ɓɛ cuusìghà.

⁴⁸ Ɓì rèsii yɛɛlɔɔ lɛ, ɓì ɓɛm̀dɛɛ rìkì ɗi ɓɛseŋi ɓin ɓɛ ɓɛsɛ̀ɛ̀mɛn, lɛ ɓɔɔ wolà ɓɛ̀kpaŋzì-ɓìɓan, mìni ɓɔn ɓaa ɓì toŋ zɔ̀ŋ yi ɓɛkpaŋzì-ɓìɓan ɓɛǹ.

⁴⁹ Kìɓan kìn kɛɛ̀ki Bɛ̀ll ànɛ à rì rì ɗyomzɛ̀n à kpaaghà lɛ: Ǹɗì ɓɔ ɓiì romìì lɛ, rì ɓɛ̀kpaŋzì-ɓìɓan, rì ɓɛ̀kɛ̀nì-fìtom; fɔɔnnɛ ɓɛ ri ɓiì kìi lɛ, ɓɛ wey ɓɛ̀roɓɛ, ɓɛ yeesì ɓɛ̀ro ɓɛmbog,

⁵⁰ lɛ di bwaɓ yi ɓɛkpaŋzì-ɓìɓan ɓɛ̀cèm ɓɛ ɓaa wewèy à tumɛ̀n yɛ̀ɛ zi i kìlɛ̀ngà, yɛɛ kɛǹ gbàà ì ɓum ìnɛ ɓi ǹto

⁵¹ à tumɛ̀n ɓi bwaɓ yi Aɓɛl, à kpaŋ ɓi yi Zakarii ànɛ ɓɛ wolà ɓi ǹlɛm̀ɓog wu naà-Bɛ̀ll, jàŋbog rì rìkùna ɗi ɓɛ ǹtɔ̀ngì ɓituwe miì ɓi rìɓɔgsì ɗi Bɛ̀ll. Ǹkpaa mìni saaɗ lɛ, kìɓan kiǹ ɓɛ tɔɔgh gɛ ɓumɓɛ ɓi gbàà ìnɛ kɔ̀.

⁵² Nyìighnyìg rì mìni ɓɛ̀rèsàg-ɓìdɔ̀gsɛna, lɛ ɓì tekà fìɗìɓà fi riyi ɗi ɓiɓan mìnii ɓɔmiɗ kɛ̀ ɓi ɗiŋi, ɓì ki règ lɛ ɓɛ̀roɓɛ ɓɛ kɔ̀nkɔ̀ngà lɛ ɓɛɛ ɗiŋi ɓɛ̀kɛɛ̀ ɗiŋi.

⁵³ Yɛ̀ɛ Yeesus à kpagày ɓi jàŋ inɛ à kɛ̀ngà kì ɗiì wɔɔ inɛ̀n, ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ fasɛ̀n mis rì nyi, di ɓɛɛ̀ ɓɛɓɛni nyi rì mɛ̀tɔɔ̀ghtɔɔgh ɓi mɛ̀to mɛ ɓiɓan lɛɛ̀gwey,

⁵⁴ ɓɛ ranɗàm nyi lɛ ɓɛɛ wog nkòo à nɛ̀si jɛ̀ɛ̀ ɓi kìɓan kìdɛŋ.