Bìoball air-loidhne

LUKAS 10 - Bafia Nouveau Testament

Yeesus à romi ɓɛ̀yilàg mɛ̀tin mɛraa rì ǹtɛ̀ɗ

¹ Ajɛ̀m ìnɛn, Kan à ɓɔ̀ɔ̀dìghà ɓɛ̀yilàg ɓɛdɛŋ mɛ̀tin mɛraa rì ǹtɛ̀ɗ à log ɓɔ kì romì beèbɛ̀y ɓɛ̀sɛ̀ɛ̀ ɓɛɓɛɛ̀ ɓɛɓɛɛ̀, ɓi bàn rì ɓi jàŋ yicèm yi nyimiɗ à ghɛ̀ɛ̀sɛ̀ngà wɔɔ ki kɛ̀ɛ.

² Nni à kpaaghà ɓɔ lɛ: Mɛ̀saŋ mɛ teghɛɛ lɛɛ̀gwey, kìɓan kifog ɓɛ̀kìì-ɓìsay lɛsàg; ɓɔ̀ŋzaaghna min ŋwaànɛ à rì rì mɛ̀saŋ lɛ, a rom yì ɓɛ̀kìì-ɓìsay ɓɛ ɓɛɛ sàŋ nyi mɛ̀saŋ.

³ Kɛ̀ɛna, ǹɗomi mìni fɛlɛ yɛ̀ɛ ɓɔn ɓɛ jɔ̀ɔ̀ ɓi nyìinyìm à ɓìmonɗo.

⁴ Kɛ̀ ɓi teɗ mɔ̀ɔ̀ni, nsoò ɓàm, nsoò gòò, kɛ̀ ɓì tògsi mum ɓi bee.

⁵ Mɛɛ mɛcèm mɛ ɓi ɗiŋii wɔɔ, kaliina ɓumɓɛ miì lɛ: Fyòoog à Bɛ̀ll a ɓa ɓi mɛɛ mɛ.

⁶ I ŋwaà fyòoog à rì ɓi mɛɛ mɛncèm fyòoog wìn a ɓiì kɔ̀rii a lɔ̀ŋkii. Wɔ̀lɛ i ŋwaà fyòoog à yin ɓi mɛɛ mɛǹ, fyòoog wìn a ɓiì sugtii yi mìni ɓi nyòò.

⁷ Kɔ̀riina lɔŋ ɓi mɛɛ mɛǹ, ɓi ɗiɗì ɓi ki nɔnɔ ɓyom ɓi ɓɛ faa mìni wɔɔ, ɓisuulɛ, ǹkìì-kìsay a ghɛɛ̀sɛɛ kì ɓaà rì mɛ̀lèɓ; kɛ̀ ɓi dèŋdèŋ lɛ, ì ɓì rì ɓi naa ìnɛ, ɓì cee ɓi ìnɛ.

⁸ Bàn bimiɗ ìnɛ ɓì rì ɓiì ɗiŋii miì, i ɓɛ ghaɓi mìni lɛ syeesyee, ɓi ɗi com kìcèm ki ɓɛ ɓiì faà mìni wɔɔ.

⁹ Wɔ̀ɔ̀ziina ɓɛ̀roroɓ ɓɛ̀cèm ɓɛ ɓi bàn ìnɛn, ɓì kpaa ɓɔ lɛ: Kìlɔ̀ŋ ki Bɛ̀ll ki ti mìni jàŋbog.

¹⁰ Kìɓan kifog, bàn bimiɗ ìnɛ ɓì rì ɓiì ɗiŋii miì, ì ɓumɓɛ miì ɓɛ ghaɓi ɓi mini, kpaŋdɛɛna ɓi beègwey, ɓì kpaa lɛ:

¹¹ Tì kùri kùrùɓu ànɛ ɓi bàn yìn ànɛ àa maɓkii ɓìsi ɓi mɛ̀kòò lɛ a ɓa fɛlɛ yɛ̀ɛ wusìnɛ̀ɗ wis. Kìɓan kifog yiina lɛ, kìlɔ̀ŋ ki Bɛ̀ll ki ti mìni jàŋbog.

¹² Ǹkalii mìni lɛ: ŋwosi ɓɛyɔ̀m ɓaa ɓiisɛn ɓi ki nyɛnì rì ɓumɓɛ a Sɔdɔm yɛ̀ɛ à ri nyɛn ri ɓumɓɛ ɓi bàn ìnɛ̀n.

¹³ Nyìighnyìg rì wɔ̀ Korazɛŋ, nyìighnyìg rì wɔ̀ Bɛdsayida, lɛ i dàm yi ɓiɓan yi yi mɛ kìlɛn yi fɛ a lɔ̀ŋkin yɛɛ kilɛn fɔlɔɔ a Tiir, rì a Sidɔŋ, di ɓumɓɛ wɔɔ ɓɛ lɔɔ̀ghrɛ̀ngà mɛ̀rem fìɗyàɓ, ɓɛ waatàg mɛ̀kùtì, ɓɛ ki siŋɗɛn kiɓu, lɛ ɓɛɛ resi ɓum bim ìnɛ ɓɛ woogh ɓisuu ɓiɓe ɓyaa.

¹⁴ Nni yiina lɛ, Bɛ̀ll à ri nyɛn ri mìni a cee rìnyɛn ɗi à ri nyɛn ri Tiir nsoò lɛ rì Sidɔŋ ŋwosi ɓɛyɔ̀m.

¹⁵ Nni wɔ̀ Kapɛrinawum, u fèfeg nya lɛ, ù ɓiì ɓɔɔgh ù kpaŋ aɗyoo? Èe èe ù ɓiì sɛnì, ù kpaŋ a nyɔ̀ɛ̀y.

¹⁶ I mum à woogh mìni, di mɛ̀ nnɛ à woogh; ŋwaànɛ à ɓeni mìni di à ɓèni mɛ̀; wɔ̀lɛ i mum à ɓèni mɛ̀ di, à ɓèni girig roànɛ à romgày mɛ̀.

¹⁷ Fɔɔnnɛ ɓɛ̀yilàg mɛ̀tin mɛraa rì ǹtɛ̀ɗ ɓɛ sugtighày rì kìnyàà, ɓɛ kpaa Yeesus lɛ: Kan, nsoò ɓìɓeɓtàg ɓi mɛghay ɓyɛɛ ririsi ɓisi di tì fwààdɛɛ ɓyɔ ɓi ɗii ɗyɔ̀ɔ̀.

¹⁸ Yeesus à kpaa ɓɔ lɛ: Mɛ̀ ǹghɛngà di Satàn a kɔ̀sɛɛ yì aɗyòò, à kpì fɛlɛ yɛɛ̀ ŋwàaŋwàɗ.

¹⁹ Ghɛɛna lɛ, mɛ̀ɛ nfaa mìni ìtèɗ wulɛ ɓi kɛɛ̀kɛɛ ɓi nyoo, rì ɓi tìrèè, ɓi ki dùŋzag ìteɗ wu bènàbena ànɛ lɛ Satàn wùcèm; fɔɔnnɛ com kaa kì ɓi wààdɛŋ.

²⁰ Kìɓan kifog, kɛ̀ ɓi ɓiisɛn ki nyàànyaa lɛ, ɓìɓeɓtàg ɓi mɛghay ɓyɛɛ̀ ririsi mini, nyàànyaana lɔŋ lɛ mii min mɛ ti mɛ̀ kànɛn ɓi ɗyoo ɓi ɗùm.

Yeesus à nyààrɛɛ yɛ̀ɛ Bɛ̀ll à kii lɛ Syeesyee à Ɓɔlɛ a yilɛn a ɓɔɔ ɓɔɓti
( Mt. 11:25-27 ; 13:16-17 )

²¹ Ɓi cààmɛ̀n kɔm̀ kiǹ, Kìtɛntɛ̀ɛ̀n ki Nghay ki kìghà lɛ Yeesus a wog kìrɔɔ lɛɛ̀gwey, à ki kpaa lɛ: Tààta, wàànɛ ù làmii lɛ, rì ɗyoo rì zi, ǹfaa wɔ̀ ɓìtògsɛ̀n lɛ ù nyamgàkà ɓɛ̀yiì-ɓìɓan, rì ɓum ɓɛ ɗyomzɛ̀n ɓìɓan ɓi; rì tì lɛ, ù kìghà lɛ ɓyɛɛ yilɛn a ɓɔɓti ɓɛsàg. Ɛ̀ɛ̀ Tààta, ǹtògsaagh yɛ̀ɛ ki nɗɔɔ wɔ̀ lɛ kɛɛ kilɛn fɔlɔɔ.

²² Seŋi wɛ̀m à faghà mɛ̀ ɓìɓan ɓìcèm, fɔɔnnɛ ŋwaàdɛŋ à yii ɓi ghɛn yɛ̀ɛ ri lɛ Man i ki yin lɛ Tààta rì ghɛn yɛɛ ri lɛ Tààta, i ki cee ɓi lɛ Man, rì roànɛ Man à rèsii Tààta.

²³ Fɔɔnnɛ Yeesus à nìmɓɛ̀ngà a ɓɛ̀yilàg, à kɔ̀ŋɗɛ̀n ɓɔ lɛ: Mààgh rì mìni lɛ, ɓi seesee ɓiɓan ɓi.

²⁴ Ɓisuulɛ kigwey ki ɓɛkpaŋzì-ɓìɓan, rì mɛ̀fòm, ɓɛ ɓaghà rì zày ìnɛ lɛ ɓɛɛ ghɛǹ ɓìɓan ɓi mìnii seesee ɓi, wɔ̀lɛ ɓɛ ghɛngà ɓi ɓyɔ; ɓɔ tì rì zày ìnɛ lɛ, ɓɛɛ wog ɓìɓan ɓi mìnii wowog ɓi wɔ̀lɛ ɓɛ wokà ɓi ɓyɔ.

Dàɗkì ì ŋwaànɛ a Samari ànɛ à ɓaghà rì syeesyee à ǹɗem

²⁵ Fɔɔnnɛ kìtèetèɗ ki ǹɗèsàg-ɓìdɔ̀gsɛna ki pɛsɛngày lɛ, kɛɛ feèghrɛn Yeesus, ki tɔg nyi lɛ: Ǹɗèsàg, cɛ kɛɛ̀ki ǹghɛ̀ɛ̀sɛɛ kì kìi ɓi ɗi lɛ m̀ɓa rì cɛɓ ki fiɗyàɓ fikɔ̀ɔ̀?

²⁶ Nni Yeesus à ɓàkà nyi lɛ: Cɛ kɛɛ ri kì kànɛn ɓi ɓìdɔ̀gsɛna ɓi Bɛ̀ll, ù ti ù ɓààyì la miì?

²⁷ Ŋwaànɛn à ɓàg Yeesus lɛ: Ù ghɛ̀ɛ̀sɛɛ kì keesii Kan Bɛ̀ll wɔ̀ɔ̀ rì ǹɗem wɔɔ wucèm, rì ǹghay wɔɔ kicèm, rì ìtèɗ wɔɔ wucèm, rì mɛ̀yitì mɔɔ mɛcèm, ù ki keesi ti romum ànɛ à wuɓsɛɛ wɔ̀ yɛ̀ɛ wɛ̀ɛmiɗ.

²⁸ Yeesus à ɓàg nyi lɛ: Ù konaagh kì ɓàagh; nni kìya fɔlɔɔ, di u ɓa rì cɛɓ ki fiɗyàɓ fikɔ̀ɔ̀.

²⁹ Kìɓan kìfog yɛ̀ɛ ŋwaànɛ̀n à kɔ̀nkɔ̀ngà lɛ, a resi lɛ à rì saaɗ à mum, nni à tɔkà Yeesus lɛ: Ghɛn yɛ̀ɛ rì romum ànɛ à wuɓsɛɛ mɛ̀?

³⁰ Yeesus à ɓàg tì nyi lɛ: Ŋwaàdɛŋ yɛ̀ɛ pɛsɛ̀ngà a Yorisalɛm lɛ à kɛ̀ɛ a Zyeriko, fɔɔnnɛ ɓɛ̀zyaàzyaa ɓɛ ɓangà nyi, ɓɛ ɓatàg ɓyom ɓii, ɓɛ ki ɓog nyi, ɓɛ càɗ nyi ǹɗèè rì nyɔ̀ɛ̀y.

³¹ Ŋwos anɛ̀n, pìrɛɛtìrɛ̀ àdɛŋ à ròŋighà girig bee yɔ̀miɗ inɛ̀n, nni yɛ̀ɛ à ghɛngà ŋwaànɛ ɓɛ̀zyaàzyaa ɓɛ kulà ànɛ̀n à kɔŋ bee ɓɛg àmbog.

³² Fɔɔnnɛ ŋwaàdɛŋ ànɛ ɓi boo ì mum ì Levi à kpaagà girig ɓi jàŋ inɛ̀n à ghɛn ŋwaànɛ̀n, à ghaàgh girig lɛ reeeɓ, kɛ̀ɛ ɓɛ̀ŋmɛn.

³³ Kìɓan kìfog, muu Samari àdɛŋ à kɛ̀nkɛ̀ngà rìkɛ̀ɛ̀, nni à yùghà kì kpaŋì ŋwaànɛ à nɔ̀nɔ̀ŋìghà ànɛ̀n jàŋbog, nyìighnyìg ì kì nyi rì ŋwaànɛ̀n.

³⁴ Fɔɔnnɛ à tyoŋdɛ̀ngà nyi a nyoo, à foŋ lɛ, rì mɔɔ rì mɛ̀rɔ̀g ɓi beŋ, à ki kàŋ yɔ, à pɛ̀sì min nyi, à kɔ̀ɔ̀sì nyi ɓi jàɗki yiì aɗyòò, à kɛ̀n ɗì nyi a mɛɛ mɛ ɓɛ̀kèn ɓɛɛ̀ laayi miì à kì nyi ɓìɓan ɓìcèm ɓi ɓi kɔɔ̀kɔ̀nɛ̀ngà lɛ a ki nyi.

³⁵ Ɓi duri tana nni muu Samari ànɛ̀n à sɔ̀ŋìghà tìraŋ̀ ti mɔ̀ɔ̀ni ɓɛ̀hɔnɗɛ̀ɗ ɓɛɓɛɛ̀, à fa mɔ rì ŋwaànɛ à kɔ̀mɛ̀ngà naa ì ɓɛ̀kèn inɛ̀n, à kpaa nyi lɛ: Rɔ̀ɓa mɛ̀ kì ɓèŋɓeŋi ŋwaànɛ, i ki kpaŋi lɛ ù sagtɛɛ tì mɔ̀ɔ̀ni mɛdɛŋ aɗyòò ɓi mɛ ǹcàri mɛ ɓi rìɓèŋ ɗi ù rì nyi ɓiì ɓèŋɓeŋi, ǹlèɓ wɔ̀ mɔ di ǹti ɓiì suùgh.

³⁶ Fɔɔnnɛ Yeesus à tɔkà min ǹɗèsàg-ɓìdɔ̀gsɛna ànɛ ɓɛ totòkà ànɛ̀n ɓɛɛ nyi lɛ: Ɓi ɓum ɓɛ kiraa ɓɛ̀n, roàbe nnɛ wɔ̀ɔ̀ ghɛɛ lɛ, à ɓiisɛɛ ki wuɓsɛɛ ŋwaànɛ ɓɛ̀zyaàzyaa ɓɛ kulà ànɛ̀n?

³⁷ Roànɛ̀n à ɓàg nyi lɛ: Mɛ̀ ǹghɛɛ lɛ, muu Samari ànɛ à wokà ŋwaànɛ̀n nyìighnyìg yɛ̀ɛ wuɓsɛɛ nyi. Nni Yeesus à kpaaghà min ǹɗèsàg-ɓìdɔ̀gsɛna anɛ̀n lɛ: Wɔ̀ɔ̀ kɛ̀na u kilag girig fɔlɔɔ.

Yeesus à rì yɛ̀ɛ ɓɛ-Maata ɓɛɛ̀ Marii

³⁸ Yɛ̀ɛ ɓɛ ɓaghà ɓi bee, nni Yeesus à ɗiŋìghà ɓi kìlɔ̀ŋ kidɛŋ, fɔɔnnɛ giɓ adɛŋ ɗii lɛ Maata, à ghàɓkà nyi a mɛɛ mii.

³⁹ Giɓ anɛ̀n à ɓaghà rì geni a giɓ ɗii lɛ Marii, nnyɛɛ kɔ̀righà Kan a mɛ̀kòò, à wowòg ɓìtòkì ɓii.

⁴⁰ Maata nyii ɓaghà ǹɗem rì gɛ tìtom anɛ à ghɛ̀ɛ̀sɛ̀ngà kì kìlɛɛ, ɓisuu righàɓ ɗi ɓɛ̀kèn; fɔɔnnɛ à yùghà kìkpaà Kan lɛ: Ki yeesii ɓi wɔ yɛ̀ɛ gèni wɛ̀m à càri mɛ̀ rì gìlɛ̀n cɛ̀ncɛm? Kali ɓà nyi lɛ a yu mɛ̀ kì gheŋzii.

⁴¹ Kan à ɓàg Maata lɛ: Maata wɔ̀, u kpuukputɛ̀n, nɗem wɔɔ wu ki cɛɛcɛɛ̀rɛ̀n ɓi ɓìɓan lɛɛ̀gwey.

⁴² Wɔ̀lɛ kìɓan kifog kɛɛ ri rì gɛɓsɛ̀n; Marii àa ɓɔ̀ni gàɓ ì syeesyee; ɓaa ɓàtɛn ɓi nyi yɔ̀.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan