GÀLAT 5 - Bafia Nouveau Testament

Ɓum ɓɛ ti ɓɛ̀kan lɛ Syeesyee à Ɓɔlɛ

¹ Kiris à kwèɗkà ɓìsi lɛ ti ɓa ɓɛ̀kan; nni kɛ̀ ɓi foŋɗɛn ti mìniìɓɔmiɗ ɓi kìɓèg lɛ ɓi sugti ɓi rìkpàn.

² Mɛ̀ Pol ǹkalii mìni lɛ: I ɓì kɛ̀ɛ lɛ ɓɛɛ kɛɗ mìni, di Kiris àa ɓa ti ɓi ri gɛɓsɛ̀n ɓisu win.

³ M̀ɓììtii tì mìni kì kalii lɛ: Mum bimiɗ ànɛ à rì ɓiì kɛ̀ɛ kɛ̀rɛ̀n, a yi lɛ, à ghɛ̀ɛ̀sɛɛ kì ɓèŋi ɓidɔ̀gsɛna ɓìcèm.

⁴ Mìni ɓumɓɛ ɓi kaakaa lɛ ɓi ɓa lɛ saaɗ ɓi mis mɛ Bɛ̀ll lɛ rìɓèŋ ɗi ɓidɔ̀gsɛna, ɓì mɛ ghasɛn ɗi Kiris, ɓì ki ti ɓɛ mɛ̀mɛn geesɛ̀n ì Bɛ̀ll.

⁵ Ɓi ɓɛg wìs, com ki ti ɓoŋɓòŋ ki ri lɛ, tì ti rì dyàɓɛn lɛ Bɛ̀ll à ɓiì kìi lɛ ti ɓa lɛ saaɗ ɓi mis mii; kìɓan kiǹ kɛɛ̀ki ti ɓoŋɓoŋ ri ìtèɗ wu Kitɛntɛ̀ɛ̀n ki Nghay ki kɛɛ̀ kìki kisay ɓi ntyweeyi wu tì rì rì wɔ.

⁶ Ɓi ŋwaànɛ à rì ɓi Kiris ɓi ɗùm, rìɓa di lɛ à rì ǹkɛ̀rɛn nsoò lɛ à yin nkɛ̀rɛn ɗi yin com; bimiɗ à kìɓan anɛ à ghɛɓsii à rì lɛ rìgherɛ̀n ɗi ɗi ri rì mɛ̀kìkìì ɓi nkɔ̀nɛ̀n.

⁷ Ɓì tumɛ̀ngày mɛ̀ree min lɛ syeesyee, nni com aɗi kɛɛ kighà mìni lɛ kɛ̀ ɓi ɓati ri mɛ̀wog ɓi com ki saaɗ à kpaa?

⁸ Mɛ̀yitì mɛǹ mɛ fuu yì ɓi yɛ̀ɛ Bɛ̀ll ànɛ a regi mini.

⁹ Com ki ɓɛ tɔɓi rì maa gàɓ à nwìɗ ki ti ki nuràg lɛɛ̀gwey.

¹⁰ Ɓi mɛ̀, ǹɗì rì ǹtyweeyi ri Kan ɓi kìɓan kin, ɓyàa ɓa ti ɓi ri rìyitì ɗi ɗi ghasɛɛ rì ɗiŋkɛ̀m, wɔ̀lɛ Bɛ̀ll à rì ɓiì pɔnɔsii ŋwaànɛ a ɓùuɓuùsì mìni, nsoò ghɛn yaa rì.

¹¹ Ɓɔɔsoŋ̀, ɓi ɓɛg ànɛ a lɔ̀ŋkɛm̀, i kaa rì lɛ ǹkaka ǹɗèrèsì ɓum lɛ ɓɛ ghɛɛ̀sɛɛ kì kɛ̀rɛɛ, di ɓi cɛ nnɛ ɓɛ ri lɛ ɓɛ kɛnkɛ̀n asu ɓɛ tɔtɔ̀ɓ mɛ̀? I kaa rì fɔlɔɔ, di rìwu ɗi Kiris à wughà ɓi kɔrɔs ɗi yin lɛ ɗi kɛɓtì tì mum fìɓàg.

¹² Ɓumɓɛ ɓɛɛ̀ syòŋsyoŋ yi kìyoòyòò ɓi nyìinyìm wìn, ɓɛɛ ghaki gì ɓɔmiɗ di ɓɛ kɔni.

Cɛɓ ki ɓi mɛ̀mùù rì cɛɓ ki ɓi Nghay

¹³ Ɓɔɔsoŋ̀, Bɛ̀ll à reŋìghà mìni lɛ ɓi ɓa ɓɛ̀kan; nni kɛ̀ ɓi ghɛɓ zɔɔ rì rìɓa ɗiǹ lɛ ɓi nɔɔ̀ti rìyɛ̀y ɗi cɛɓ ki mɛmùù. Wɔ̀lɛ ghɛɛghɛ̀ɓsɛɛna mìni rì mìni ɓi nkɔ̀nɛ̀n;

¹⁴ ɓisuulɛ ɓìdɔ̀gsɛna ɓìcèm ɓi ti ɓì ronɛn ɓi m̀bobog à jɛ̀ɛ̀ ànɛ lɛ: Keesi ro mum ànɛ wɔ̀ jàŋbog yɛ̀ɛ wɛ̀ɛmìɗ.

¹⁵ Nni wɔ̀lɛ, i ɓì ɓaa lɛ ɓì loòlòmɓɛ̀n ɓì ki ɗiiɗilɛ̀n mìni rì mìni, ɓì konàg lɛ kɛ̀ ɓi lègsi ki weesɛɛ, mìni rì mìni.

¹⁶ Càrɛɛnà lɛ Nghay à Bɛ̀ll yɛɛ kɛɛ̀kɛ̀ɛ̀sì ɓyɛɓ ɓin, fɔɔnnɛ ɓyàa kì ti ɓi ɓiɓan ɓi mɛ̀mùù mɛɛ̀ syògi ɓum lɛ ɓɛɛ ki.

¹⁷ Ɓisuulɛ mɛ̀mùù mɛ ri rì ɓìɓan ɓi ɓyɛɛ̀ kɔ̀ngi mɔ, ɓìɓan ɓiǹ ɓi ɓa ɓì ghasɛn ri ɓi Nghay à Bɛ̀ll a kɔ̀nkɔ̀n. Nghay à Bɛ̀ll à rì rì ɓìɓan ɓi ɓyɛɛ̀ kɔ̀ngi nyi, ɓi ki ɓa ɓi ghasɛn ɗi ɓi mɛ̀mùù mɛɛ̀ kɔ̀nkɔ̀n; mɛ̀kuu mɛ ɓiɓan mɛǹ mɛ ri ɓi wɛ̀y, lèg ànɛ lɛ ɓi yin ɗi ìtèɗ wulɛ ɓi ki com ki ɓì kɔ̀ni.

¹⁸ Wɔ̀lɛ i Nghay à Bɛ̀ll yɛɛ̀ kɛ̀ɛkɛɛ̀sì mìni, ɓyàa ɓati ɓi ɓɛkpàn ɓɛ ɓidɔ̀gsɛna.

¹⁹ Ɓìɓan ɓi ɓyɛɛ̀ kɔ̀ngi mɛmùù ɓi nanɛɛ ɓì; ɓyɛɛ ri lɛ: Kìfàrà, tisɔ̀mɔ̀g, cɛɓ ki sààsaa,

²⁰ rìɓɔgsì ɗi ɓinùn, majìg, bènà, momɓɛ̀n, m̀mììghrɛ̀n, rìbiìbìmɓɛ̀n, tìkaŋ ti mɛkɔ̀ɔ̀, ǹlànag rì ǹɗèè wu nɗem.

²¹ Yàaka, rìŋwaŋ ɗi mɛrɔ̀g, dili rì mɛ̀kuu mɛ ɓiɓan mɛ fɔlɔɔ. Yɛ̀ɛ ǹlokà mìni kì kpaà, nni ǹɗɔ̀gsɛɛ tì mìni lɛ: Ɓumɓɛ ɓɛɛ̀ kìki ɓiɓan ɓiǹ, ɓaa ghɛn ɓi kilɔ̀ŋ ki Bɛ̀ll.

²² Wɔ̀lɛ ɓìɗùn ɓi Kìtɛntɛ̀ɛ̀n ki Nghay ki ti ki falàg ɓi ri lɛ: Ǹkɔ̀nɛ̀n, kìnyàà, fyòoog, rìnìɗ ɗi nɗem, rìɓòò, rì kìpuɓì nɗem, rìɓèŋ ɗi ntyweeyi, rìɓa ɗi tɛ̀tɛ̀rɛ̀ɛ̀, rìyi ɗi riɓan ɗi nɗem.

²³ Ɓìdɔ̀gsɛna ɓi ɓeezɛɛ ɓi ɓiɓan ɓi fɔ̀lɔ̀ɔ̀.

²⁴ Ɓumɓɛ ɓɛ ri ɓi Yeesus Kiris ɓi ɗùm ɓɛ mɛ kpan mɛmùù maa ɓi kɔrɔs, rì ɓìɓan ɓi ɓyɛɛ̀ rɔɔghi mɔ.

²⁵ Yɛ̀ɛ ki ri lɛ Nghay à Bɛ̀ll yɛɛ̀ fafa ɓisi cɛɓ, tì ghɛ̀ɛ̀sɛɛ min ki kɛ̀ɛ̀ghii yɛ̀ɛ Nghay a rèresi ɓisì.

²⁶ Tyɛ̀ ki kaakaa rikem ɗi kɛ̀ɛ̀ ìsu, tyɛ̀ ki kaakaa ɓɛ̀paàzì ɓi nyìinyìm wìs nsoò lɛ tì mììghmììghrɛ̀n ɓìsi rì ɓìsi.