EFÈZYƐŊ 6 - Bafia Nouveau Testament

¹ Mìni ɓɔɓti, kìina ɓɛ̀yalì ɓin mɛwog yɛ̀ɛ Kan a kɔ̀nkɔ̀n ɓisuulɛ fɔlɔɔ a ri lɛ saaɗ.

² Nyaasi soŋi ɓɛɛ̀ gaa, à rì kìdɔ̀gsɛna ki ǹtonto ki ǹkàg wu riì miì wù foŋɛn.

³ Fɔɔnnɛ ù ɓiì ɓa rì kìrɔɔ, ù ki finɛn ɓi ziinɛ lɛɛ̀gwey.

⁴ Mìni ɓɛ̀seŋi, kɛ̀ ɓi nyɛɛ̀zag ɓɔn ɓin, kìɓan kifog, tɔɔsiina ɓɔ ɓi ɓìsyeesyee ɓi ɓisyɔ̀ɔ̀, ɓì fafà ɓɔ deɓ yi yi riì yɛ̀ɛ Kan.

⁵ Mìni ɓɛ̀kpàn, kìina ɓɛ̀masà ɓin ɓɛ ɓi mɛ̀mùù mɛ̀wog, ɓì nìgì ɓɔ, ɓì fafà ɓɔ bɔgsɛ̀n, rì syeesyee à nɗem lɔŋ yɛ̀ɛ Kiris innɛ ɓi kìki kisay.

⁶ Syeesyee wìn a rìkì ɗi ɓiɓan kɛ̀ɛ ɓa lɛ yɛ̀ɛ ɓum ɓɛɛ̀ seesee mini, yɛ̀ɛ ɓɛɛ̀ kali lɛ ɓi kaakaa lɛ ɓi puɓsi ɓɔ mɛ̀rem; a ɓa lɔŋ lɛ ɓi kìki rikɔ̀n ɗi Bɛ̀ll rì nɗem win wucèm lɛ ɓì rì ɓɛ̀kpàn ɓɛ Kiris.

⁷ Kìina ɓɔ kìsay ri syeesyee à nɗem, lɔŋ yɛ̀ɛ Kan innɛ ɓi kìki kisay àa ɓum.

⁸ Ɓì yi lɛ, nsoò ǹkpàn, nsoò ŋwaànɛ à yin ǹkpàn, mum ǹcèm à rì ɓiì terì mɛ̀lèɓ yɛ̀ɛ Kan ɓi syeesyee wìì a rìkì.

⁹ Mìni ɓɛ̀masà, ghɛɓina girig fɔlɔɔ ri ɓɛ̀kpàn ɓin, kɛ̀ ɓi tamtam ɓɔ; ɓì yitì lɛ rì mìni rì ɓɛ̀kpàn ɓin ɓì rì lɔŋ Masà bog ànɛ à rì aɗyoo; nyii yin ɗi nlànag ɓi ɓum ɓɛdɛŋ.

Ɓyom ɓi ribaŋì ɓi kiristɛ̀n à ghɛ̀ɛ̀sɛɛ kì ɓaà rì ɓyɔ

¹⁰ Ǹsyɔɔdii ɓìtòkì ɓyɛm̀ lɛ: Kaana ìtèɗ win ɓi rìràrɛ̀n ɗi rì Kan, rì ɓi coo itèɗ wii.

¹¹ Ɓanɛɛna ɓyom ɓi ribaŋì ɓi Bɛ̀ll ɓìcèm di fɔɔnnɛ ɓi ɓa rì ìtèɗ wulɛ ɓì yag mɛ̀ghèy mɛ Satàn.

¹² Ɓisuulɛ àa ɓumɓɛ ɓɛ ri rì bwaɓ ɓɛɛ̀ɓɛ ti ɗùùɗuu ri ɓɔ; ti ɗùùɗuu lɔŋ ri mɛ̀tèɗ mɛ ɓiɓeɓtàg ɓi mɛghay ɓi ɓi ri ɓi ɗyoo ɓi ɗùm, ɓi ɓyɛɛ̀ làlàmì, ɓi ɓa rì ìtèɗ; ti ɗùùɗuu girig rì ɓumɓɛ ɓɛɛ̀ làlami ziì ì birìm ìnɛ.

¹³ Kìɓan kiǹ kɛɛ̀ki ɓì ghɛ̀ɛ̀sɛɛ kì wotii ɓyom ɓi ribaŋì ɓi Bɛ̀ll ɓìcèm, fɔɔnnɛ ɓi ɓa rì ìtèɗ wu cenɛn wɛ̀y, yɛ̀ɛ ŋwos a m̀ɓeɓɛn a ri kpaŋ fɔlɔɔ yɛɛ ri ɓa lɛ, i ɓyàa cee ɓɛ̀koŋnyoo ɓɛ̀cèm, ɓì rɔ̀ɓ mɛ̀rɛy.

¹⁴ Sììrɛɛna min: Ɓì sìnɛ̀n saaɗ ɓi kìɓon ɓi sìg à kànɗa; ɓì waatɛ̀n ǹkpaà fɛlɛ yɛ̀ɛ kìlàà ki bɔŋ.

¹⁵ Terina rìfalɛ̀n ɗi ɓi rìghagsì ɗi Syeesyee à Ɓɔlɛ à fyòoog, ɓì waatɛ̀n ɗyɔ fɛlɛ yɛ̀ɛ gòò.

¹⁶ Terina lɔŋ righerɛ̀n ɓyààmɛ̀n ɓìcèm fɛlɛ yɛ̀ɛ gàŋ ìnɛ yɛ̀ɛ ghɛɓsi mìni lɛ ɓi ɓuɓsi ɗuu ɗi tigɛnì ti ghèghey tìcèm ti ti riì rì ǹɗòò.

¹⁷ Terina girig gòri ì Bɛ̀ll ɓi sìg à tàm, ɓì teɗ jɛ̀ɛ̀ ì Bɛ̀ll ìnɛ ìrì gàfàg ì Kìtɛntɛ̀ɛ̀n ki Nghay.

¹⁸ Ɓɔ̀ŋziina Bɛ̀ll cààmɛ̀n kìcèm, ri Nghay, ɓì tɔtɔ̀g nyi ǹghɛɓsɛn ɓi bɔ̀ŋzɛ̀n yin yicèm; ɓaana cem ɓi rìkì ɗiǹ, ɓì ki sììrɛn miì lɛ syeesyee, ɓì ɓɔ̀ŋzàg ɓisuu ɓɛgherɛ̀n ɓɛ̀cèm;

¹⁹ ɓì ɓɔ̀ŋzàg girig Bɛ̀ll ɓisu wɛ̀m lɛ, a fa mɛ̀ jɛ̀ɛ̀ ìnɛ ǹghagsi, rì kìghɛɛsii cààmɛ̀n kìcèm ki m̀pinii ŋwɔm lɛ nɗesi ɓum kìɓan ki ki ri kì nyamɛn ɓi Syeesyee à Ɓɔlɛ.

²⁰ Syeesyee à Ɓɔlɛ ànɛ̀n innɛ mɛ̀ ǹɗì ɓi fìtom fi miì, ǹki ɓa ɓi naà-zày lɛ nyi; nni ɓɔ̀ŋzaaghna lɛ nkakali Ɓɔlɛ ànɛ̀n lɛ cààcàà yɛ̀ɛ ǹghɛ̀ɛ̀sɛɛ kì kpaakpaa.

Mɛ̀ghesɛn

²¹ Tisig, maaseŋi wìs a nɗem, ànɛ a kìki Kan kìsay ri ǹtyweeyi, à rì mìni ɓiì rèsii ɓiɓan ɓìcèm ɓi ɓi seesee cɛɓ kɛ̀m, lɛ ɓi yi com ki nkìki ɓigomìnɛ.

²² Mɛ̀ yɛɛ ɓekii lɛ nɗom yì nyi a lɔ̀ŋkin lɛ ɓi yi ǹɗɛli wis wu tì rì miì ɓigomìnɛ, à ki fɔɔsi mini mɛ̀rem.

²³ Ɓɔɔsoŋ̀, Bɛ̀ll à Seŋi wìs, ɓɛɛ̀ Kan Yeesus Kiris ɓɛɛ fa ɓɛ̀geni ɓis ɓɛ̀cèm fyòoog, rì ǹkɔ̀nɛ̀n, bas ɗì rìgherɛ̀n.

²⁴ Fɔɔnnɛ geesɛ̀n ì Bɛ̀ll yɛ̀ɛ ɓa rì ɓum ɓɛ̀cèm ɓɛ ɓɛ keesii Kan wìs Yeesus Kiris rì ǹkɔ̀nɛ̀n ànɛ à yin lɛ à ɗyoŋ.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan