EFÈZYƐŊ 5 - Bafia Nouveau Testament

¹ Yɛ̀ɛ ɓì rì ɓɔn ɓɛ Bɛ̀ll ɓɛ nɗem, tèèsiina nyoo lɛ ɓi nɔɔ̀ti kìfèèghrɛnà kii.

² Ɓì kɛ̀ɛ̀kɛ̀ɛ̀ ɓi nkɔ̀nɛ̀n fɛlɛ yɛ̀ɛ Kiris à rèsìghà ɓìsi, à fa cɛɓ kii ɓisu wis, fɛlɛ yɛ̀ɛ com ki ŋwaà à faa, nsoò lɛ kìtuwe ki ɓɛ funɛɛ ɓi rìɓɔgsì ɗi Bɛ̀ll; ɓyom ɓìn ɓi ɓa rì syeesyee à kìnùbe.

Ɓɛ̀gherɛ̀n ɓɛ yiìdi ɓi birìm, ɓɛ ti ɓi kìtɛɛtɛn

³ Tìsɔ̀mɔ̀g, rì ɓìɓan ɓi tifin mɛkuu mɛ̀cèm, rì zày ì ìkum, ɓì ghɛ̀ɛ̀sɛɛ ɓi lɛ ɓi ɓuŋɗɛ̀n nsoò m̀ɓùŋɗɛn ɓi nyìinyìm wìn, lɛ fɔlɔɔ yɛɛ ghɛɛ̀sɛɛ rì ɓum ɓɛ Bɛ̀ll.

⁴ Ki ghɛɛ̀sɛɛ ɓi lɛ ɓi kpaakpaa ɓìɓan ɓi ǹtoòrìɗ, rì ɓìdìmìdimi ɓi ɓiɓan, rì ɓìɓan ɓi ɓiyèg. Ki ghɛɛ̀sɛɛ lɔŋ lɛ ɓi fafa Bɛ̀ll ɓìtògsɛ̀n.

⁵ Konaaghna kì yiì lɛ mum ǹcèm ànɛ à rì ǹkìì-tìsɔ̀mɔ̀g, nsoò lɛ ǹkìì ɓìɓan ɓi tifin, nsoò lɛ ànɛ à rì rì zày ì ìkum, yɛɛ lɔɔ lɛ mɓɔgsì ɓìnùn, à yin ɗi gàɓ ɓi kìlɔ̀ŋ ki Kiris, rì ki Bɛ̀ll.

⁶ Mum kɛ̀ɛ yègsi mini rì ɓìtòkì ɓi kɛ̀ɛ̀-su lɛ ɓisuu ɓiɓan ɓiǹ innɛ bim i Bɛ̀ll ì rì ɓiì sɛni ɓi ɓɔn ɓɛ ɓɛ ri rì ǹtoòtèɗ.

⁷ Kɛ̀ ɓi ɓutɛn ri ɓɔ ɓi kìɓan kidɛŋ nsoò kìfog.

⁸ Ɓisuulɛ ɓì ɓaghà ɓumɓɛ ɓi birìm abɛ̀y, nni ɓigomìnɛ, ɓì ti kìtɛɛtɛn ɓi Kan ɓi ɗùm. Nni ghɛɓina min yɛ̀ɛ ɓɔn ɓɛ ɓi kìtɛɛtɛn.

⁹ Kìtɛɛtɛn kìn kɛɛ ti ki falàg ɓum ìtèɗ wulɛ ɓɛɛ rɔɔtɛn nɗem ɓɛ ɓa ɓumɓɛ nkpaà, ɓɛ ki ɓa ɓumɓɛ ɓɛɛ̀ kpaakpaa saaɗ.

¹⁰ Yiina rìghasì ɗi ɓiɓan ɓi ɓyɛɛ̀ rɔɔghi Kan.

¹¹ Kɛ̀ ɓi ɓasɛn ri ɓumɓɛ ɓɛɛ̀ kìki ɓiɓan ɓi birìm, ɓi ɓi ghɛɓsii ɓi com. Lɔŋ ɓì ghɛ̀ɛ̀sɛɛ kì kpàkii ɓyɔ ɓi kìtɛɛtɛn;

¹² ɓisuulɛ ɓìɓan ɓi ɓumɓɛ̀n ɓɛɛ̀ kìki a rìnyam ɓi kilɛɛ ǹtoòrìɗ, nsoò ɓi rìkpaakpàà.

¹³ Wɔ̀lɛ i ɓɛ mɛ kpàki ɓiɓan ɓiǹ ɓìcèm, ɓi konag kì ghɛnɛɛ lɛ tɛntɛ̀ɛ̀n, lɛ com kìcèm ki ki mɛ kpagi dan, ki ti ɓi kìtɛɛtɛ̀n.

¹⁴ Kìɓan kiǹ kɛɛ̀ki ki ri kì kaliyɛn lɛ: Wɔ̀ ŋwaànɛ u lalày, ghèmɓɛn ɓi fìlo pɛ̀sɛn yì aɗyoo ɓi nyìinyìm à ɓìloŋ, di Kiris a lom̀ wɔ̀ kìtɛɛtɛn.

¹⁵ Ɓì konag kì fiɓii righɛghɛ̀ɓ ɗin lɛ syeesyee; kɛ̀ ɓi ghɛghɛɓ yɛ̀ɛ ɓìyèg, ghɛɓina lɔŋ yɛ̀ɛ ɓumɓɛ ɓɛ ri rì ɗyomzɛ̀n.

¹⁶ Kɛ̀ ɓi yogsi cààmɛ̀n ki ɓì rì rì kɔ zɛy rì zɛy, lɛ mɛ̀ru mɛ tì rì mɛ miì mɛ rɔɔtɛɛ ɓì.

¹⁷ Kìɓan kiǹ kɛɛ̀ki ɓì ghɛ̀ɛ̀sɛɛ ɓi ki ɓaà ɓìdùŋdùŋ ɓi ɓum, ɓì ghɛ̀ɛ̀sɛɛ lɛ ɓi yi cɛ kɛɛ̀ki Kan a kɔ̀nkɔ̀n.

¹⁸ Kɛ̀ ɓi ŋwagi mɛrɔ̀g lɛ fɔlɔɔ a ti à syògìì cɛɓ ki ɓùùɓuu; kìɓan kifog, ɓaana ɓɛ̀ronɛn ri Kìtɛntɛ̀ɛ̀n ki Nghay.

¹⁹ Ɓì kuùkùrɛ̀n rì ɓɛ̀sam, rì mɛ̀ɓàlì, rì tyem ti Bɛ̀ll; ghàɓina mɛ̀ɓàlì lɛ ɓi ɓɔgsi Kan, rì mɛ̀rem min mɛcèm.

²⁰ Ɓi ɓìɓan ɓìcèm, faana Bɛ̀ll à Seŋi wìs ɓìtògsɛ̀n cààmɛ̀n kìcèm ɓi ɗii ɗi Kan wìs Yeesus Kiris.

Deɓ yi yi seesee naa ì ɓum ì ɓɛ̀gherɛ̀n

²¹ Ɓaana rì mɛ̀wog ɓi nyìinyìm wìn ɓisuu rinìŋ ɗi ɓì ti ɓì nìgì Kiris.

²² Mìni ɓɛ̀yiɓ, kìina ɓɛ̀yii ɓin mɛwog yɛ̀ɛ ɓì ti ɓì kìlàg Kan.

²³ Ɓisuulɛ, baŋì ì làmii giɓ wiì fɛlɛ yɛ̀ɛ Kiris à làmii kìseŋi kìì; nyimiɗ yɛɛ ti ǹghɛɓsì à kìseŋi ki ki ri nyoo yìì.

²⁴ Lɔŋ yɛ̀ɛ kìseŋi ki ti ki kilàg Kiris mɛ̀wog, fɔlɔɔ nnɛ ɓɛ̀yiɓ ɓɛ ghɛɛ̀sɛɛ girig kì woògh ɓɛ̀yii ɓaa ɓi ɓìɓan ɓìcèm.

²⁵ Mìni ɓɛ̀baŋì, keesiina ɓɛ̀yiɓ ɓin fɛlɛ yɛ̀ɛ Kiris à keesìghà Kìseŋi kii à fa cɛɓ kii lɛ kɔ.

²⁶ À kìghà fɔlɔɔ lɛ di Kìseŋi kii kɛɛ ɓa kìtɛnɛn; lɛ à tɛɛ̀zìghà kɔ lɛ rì mɛ̀nig rì jɛ̀ɛ̀;

²⁷ à kɔ̀ngà lɛ Kìseŋi kìn kɛɛ kpaŋ ɓi mis mii ɗi rìkem, kɛ̀ɛ̀ tìfin, nsoò fìrun, nsoò kìɓeɓtàg ki kiɓan kidɛŋ. Wɔ̀lɛ ki kɔngà nyi lɛ Kìseŋi kìn kɛɛ ɓa kìtɛnɛn kɛ̀ɛ̀ kìɓan ki ɓɛ fen miì.

²⁸ Fɔɔnnɛ ɓɛ̀baŋì ɓɛ ghɛɛ̀sɛɛ kì keesii ɓɛ̀yiɓ ɓaa yɛ̀ɛ ɓɔmiɗ, lɛ ŋwaànɛ à keesii giɓ wiì, à keesii nyimìɗ.

²⁹ Ɓisuulɛ mum à ka ɓeèzɛ̀ngà ɓi nyoo yìì i nyimìɗ; lɔŋ à ti à mɛnàg yɔ̀, à ki ɓèŋɓeŋ yɔ̀ lɛ syeesyee fɛlɛ yɛ̀ɛ Kiris à ti à ɓègì Kìseŋi kii.

³⁰ Lɛ ɓì rì ɓìkàɓ ɓi ɓi nyoo yìì.

³¹ Kìɓan kiǹ kɛɛ̀ki baŋì ì ɓiì càriì lɛ rì seŋi rì jɛɛ, ì ràrɛ̀n ɗì giɓ wiì, kìɓɛ̀ɛ̀ ki ɓum kìn ki ghay mum bog.

³² Kìɓan kiǹ ki ri gɛn à kìɓan ànɛ à rimi; mɛ̀ ǹkpaa fɔlɔɔ ɓi san ànɛ yɛ̀ɛ Kiris rì kìseŋi kìì.

³³ Kaa soo rì la, mum ǹcèm ànɛ ɓi mìni a keesi giɓ wiì yɛ̀ɛ nyimìɗ, giɓ bimiɗ à kì yii mɛ̀wog.