EFÈZYƐŊ 4 - Bafia Nouveau Testament

Rìɓùtɛ̀n ɗi mɛrem ɓi kìseŋi ki ɓɛgherɛ̀n

¹ Fɔɔnnɛ mɛ̀ ànɛ ǹɗì kìmbùŋ lɛ ǹsàsay Kan, ǹkpaa mìni lɛ, ghɛɓina rìkuu ɗi cɛɓ ɗi ɗi ghɛɛ̀sɛɛ rì ǹɗeèghreŋi wu wu kpagà a lɔ̀ŋkin,

² sɛɛ̀diinà mìniìɓɔmiɗ ɓi zi, ɓì kɔ̀rì lɛ fyòoog, ɓì ɓa rì kìnìri ki nɗem, ɓì cenɛ̀n lɛ ɓi ghɛɓ rì ɓɛ̀geni ɓin lɔŋ yɛ̀ɛ ɓɛ ri, ɓɔ girig ɓɛ ki fɔlɔɔ ɓi san wìn, rìkì ɗiǹ ɗìcèm ɗi ɓa ɓi nkɔ̀nɛ̀n ɓi ɗùm;

³ ɓì tèètèèsì nyoo lɛ ɓi ɓeŋ rìɓa ɗi kibyɔg kìfog ɗi ɓi mɛ̀ghay rì fyòoog ànɛ à ràri mìni ɓɛ̀sɛ̀ɛ̀ ɓɛ̀cèm.

⁴ Nyoo ì rì lɔŋ bog, Nghay lɔŋ bog, fɔɔnnɛ ɓì rì girig ɓɛ̀ reŋiyɛn lɛ ɓi ɓa rì dyàɓɛn bog, yɛ̀ɛ ri dyàɓɛn inɛ ɓi nɗeèghreŋi win.

⁵ Kan à rì lɔŋ bog, rìgherɛ̀n ɗifog, bàɓtis bog,

⁶ Bɛ̀ll bog, nnyɛɛ ri Seŋi ɓum ɓɛ̀cèm, à làmii ɓɛ̀sɛ̀ɛ̀ ɓɛ̀cèm, à kìkì kìsay ɓi ɓum ɓɛ̀cèm, à ki ɓa ɓi ɓɔɔ̀cèm.

⁷ Wɔ̀lɛ mum ǹcèm ànɛ ɓi ɓìsi à tekà bimiɗ à rìfa ɓi lèg ànɛ Kiris à faghà nyi.

⁸ Fɔlɔɔ nnɛ ki ri kì kaliyɛn lɛ: Yɛ̀ɛ à ɓɔkà ɓi jàŋ yi yi teŋmaagh, à kɛ̀ngà rì ɓìmbùŋ, à fa ɓum ɓyom.

⁹ Rìkpaa ɗi lɛ à ɓɔkà ɗi resii cɛ? Ɗi resii lɛ à sɛngà ɓi kìrimi ki zi.

¹⁰ Roànɛ à sɛngày, nnyɛɛ ri girig roànɛ à ɓɔkà aɗyoo ɗi ɗi teŋmɛɛ kɛ̀ɛ̀ vèg, lɛ di a ron ɓi ɓyom ɓìcèm.

¹¹ Nnyɛɛ faghà ɓɛ̀ro ɓɛdɛŋ lɛ ɓɛɛ ɓa ɓɛ̀kɛ̀nì-fìtom, ɓɛ̀ro ɓɛmbog ɓɛ̀kpaŋzì-ɓìɓan, ɓɛmbog ɓɛ̀kalì-Syeesyee à Ɓɔlɛ, ɓɛmbog ɓɛ̀pàstɛɛ̀rì nsoò lɛ ɓɛ̀rèsàg.

¹² À kìghà fɔlɔɔ lɛ di ɓɛ̀gherɛ̀n ɓɛɛ tɔɔ̀ ɓɛ kpaŋ ɓi nɗɛli wu ɓɛ ri lɛ ɓɛ ki kìsay ɓi rìtoŋ ɗi nyoo ì Kiris.

¹³ À kɛ̀n kì kpaŋì ɓi jàŋ inɛ rìgherɛ̀n ɗis, rì rìyi ɗi tì yii Man à Bɛ̀ll, ɓyɛɛ ɓa com kìfog di tì mɛ sììrɛn ɓum, tì ghɛ̀ɛ̀sɛ̀n ɗì kɔɔ̀kɔɔ̀ à ǹɗɛli a Kiris.

¹⁴ Fɔlɔɔ nnɛ tyàa ɓa ti ɓi ɓɔɓti ɓɛ ɓɛ ri kɛ̀ɛ̀ goo, ɓɛ ɓɛ ri lɛ rì rìkuu ɗi dɔgtɛ̀n ɗiǹ miì ɓɛ nɔɔ̀tì, ɓum ɓɛ yeèghyègsì ɓɔ lɛ rì momzɛ̀n maa, rì mɛ̀ghèy mɛ ɓɛ ti ɓɛ syogì ɓum miì ɓi rìnàn.

¹⁵ Wɔ̀lɛ, i ti kakali saaɗ rì ǹɗem wu nkɔ̀nɛ̀n, tì ɓiì tɔɔtɔɔ ɓɛɓɛg ɓɛ̀cèm ɓi Kiris ànɛ à rì nto.

¹⁶ Lɛ nyi nnɛ nyoo bimiɗ ì ti ì kìlàg lɛ, ì tɔɔ, ì ki toŋɗɛn yɔ̀miɗ ɓi nkɔ̀nɛ̀n ɓi ɗùm lèg ànɛ à ghɛ̀ɛ̀sɛɛ rì ɓìkàɓ ɓi miì ɓìcèm; nyoo ìnɛ̀n ì rì ǹwògakɛn lɛ syeesyee ì ki ɓa nɗàrakɛn lɛ kpeg kpeg rì gòga yìcèm yi ì rì rì yɔ̀.

Cɛɓ ki nyɔn ki ki ghɛɛ̀sɛɛ rì ɓɛ̀gherɛ̀n Kiris

¹⁷ Kìɓan ki mɛ̀ ǹkalii, ǹki sììrɛn ɓi ɗii ɗi Kan kɛɛ̀ki lɛ: Kɛ̀ ɓi ghɛɓti yɛ̀ɛ ɓum ɓɛ zɛy ɓɛ ɓɛ yin ɓɛgherɛ̀n, ɓɔ yɛɛ ti ɓɛ nɔɔ̀tàg ɓɔɔ momzɛ̀n ɓaa ɓɛ kɛ̀ɛ̀ ìsu.

¹⁸ Ɗyomzɛ̀n ɗyaa ɗi ri ɗì sigtɛn birìm, fɔɔnnɛ ɓɛ yin ri gàɓ ɓi cɛɓ ki Bɛ̀ll lɛ kɛ̀ɛ̀ rìyi wàà, rì rìɓa ɗi mɛ̀rem maa mɛ ri mɛ̀ tèrɛn.

¹⁹ Ɓɛ yiìdi ri ǹtoòrìɗ, fɔɔnnɛ ɓɛ mɛ ɗiŋi ɓi kìɓùùsì, ɓɛ kɛǹ ɓiì kìkii ɓiɓan ɓi tifin, kɛ̀ɛ̀ tìmin, ɓɛ ɓutɛ̀n tì zày ì ìkum miì.

²⁰ Ɓi san ànɛ a lɔ̀ŋkin, àa fɔlɔɔ nnɛ mìnii yilàkà Kiris;

²¹ di ɓì ki wokà di ɓɛɛ̀ kpaakpaa kiɓan kii, ki ki ɓa lɛ nyi nnɛ ɓɛ resìghà mìni, lɔŋ yɛ̀ɛ saaɗ ànɛ ɓi Yeesus à rì.

²² Ɓì ghɛ̀ɛ̀sɛɛ kì rinii fiɗyàɓ fin fi riɓa fi ɓi cɛɓ ki ɓì ghɛghɛ̀ɓkà abɛ̀y, ɓìɓan ɓi ǹɗem wu mum wu ti wu kɔngì ɓi rìɓa ɗi yɛ̀ɛ ɗiǹ, ɓi ri rì ǹ-yègsɛ̀n, ɓi ki ɓa ɓiɓan ɓi ɓi ri lɛ ɓi yogsì mum.

²³ Ɓì ghɛ̀ɛ̀sɛɛ kì ɓaà ɓɛ̀nyɔɔnyɔn ɓɛ ɓum lɛ kɔɔ̀kɔɔ̀ ɓi mɛ̀rem min, rì ɓi mɛ̀yitì min.

²⁴ Ɓì waatɛ̀n nyɔɔnyɔn à rìɓa ànɛ à rì ǹkìyɛn ɓi kìpisɛn ki Bɛ̀ll, rìɓa ɗìn ɗi resɛ̀n ɓi cɛɓ ki nkpaà rì ki tɛnɛn, ki ki fuu yì ɓi saaɗ.

²⁵ Kìɓan kiǹ kɛɛ̀ki càrina pwàà, mum ǹcèm ànɛ ɓi mìni a kalag geni kìɓan yɛ̀ɛ ki ri, ɓisuulɛ, ɓìsiìcèm tì rì ɓìkàɓ ɓi ɓi nyoo bogtɛ̀n.

²⁶ I ɓì woogh bim, ɓì konàg lɛ kɛ̀ ɓi kì kiɓe; ŋwos kɛ̀ɛ màg ɓilɛy di bim yiǹ ì kaka.

²⁷ Kɛ̀ ɓi nɛm Satàn ikɔ̀ɔ̀.

²⁸ Ŋwaànɛ àa nti à fyaasàg ɓyom, à lèg ɓi wii, kìɓan kifog, a teki ntɔɓ lɛ a say rì ɓyàg ɓii yɛ̀ɛ ki ghɛɛ̀sɛɛ, fɔɔnnɛ a ɓa rì com ki à rì lɛ à ghɛɓsì soghàsogha ri kɔ̀.

²⁹ Ŋwɔm win wu ghɛɛ̀sɛɛ ɓi ki kpaà kìɓan ki ɓeɓtɛn, wɔ̀lɛ i ki kpaŋi lɛ ɓi toòghrɛn, jɛ̀ɛ̀ yìn i ghɛ̀ɛ̀sɛɛ kì ɓaa jɛ̀ɛ̀ ìnɛ ì rì lɛ ì fa ìtèɗ ɓi rìgherɛ̀n ì ki ɓa ri ǹghɛɓsɛn ɓisuu ɓɛroɓɛ ɓɛ woogh yɔ̀.

³⁰ Kɛ̀ ɓi kì lɛ Kìtɛntɛ̀ɛ̀n ki Nghay ki Bɛ̀ll à rèmzàkà mìni rì kɔ ɓisuu ŋwos anɛ gòri yìì ì ri ɓa, kɛ̀ɛ wog bim.

³¹ À tumɛɛ lɛ kìmìighmigtɛ̀n, kìnyɛn, bim, kìyoòyòò, mɛ̀wɔ̀wɔrì, rì rìgɛn mɛ̀kuu mɛ̀cèm, ɓi ghɛɛ̀sɛɛ kì lèegh ɓi nyìinyìm wìn.

³² Ɓaana rì nɗem wu geesɛ̀n ɓi nyìinyìm wìn, ɓì yi rìghɛn ɗi ɓɛro ɓɛmbog nyìighnyìg. Ɓaana rì rìcenɛ̀n ɓi nyìinyìm wiǹ, fɛlɛ yɛ̀ɛ Bɛ̀ll à cenɛ̀ngà mìni ɓi Kiris.