Bìoball air-loidhne

EFÈZYƐŊ 3 - Bafia Nouveau Testament

Kìsay ki Bɛ̀ll à faghà Pol lɛ a ki a ɓumɓɛ ɓɛ yin Ɓɛ̀yudɛ̀n

¹ Kìɓan kiǹ kɛɛ̀ki mɛ̀ Pol ànɛ ǹɗì kìmbùŋ ki Yeesus Kiris ɓisuu win mìni ɓɛ ɓì yin Ɓɛ̀yudɛ̀n mɓɔ̀ɔɓɔŋzì Bɛ̀ll.

² I ɓì ɓaghà lɛ ɓi wog di ɓɛɛ̀ kakali geesɛ̀n ìnɛ Bɛ̀ll à rèsìghà mɛ̀ lɛ ǹɗoòzi rìyitì ɗi à ɓaghà rì ɗyɔ ɓi san wìn.

³ Mɛ̀ n-yii fèg à Bɛ̀ll ànɛ a rìnyam fɛlɛ yɛ̀ɛ màa fèèghrɛɛ mìni kì còŋi lɛsàg lɛ nnyɛɛ resii mɛ̀ fèg ànɛn.

⁴ I ɓì ɓàli gàɓ ì ɓìɓan inɛ màa kàni, ɓì rì lɛ ɓì ghɛn lèg ànɛ yɛ̀ɛ ǹ-yii ɓìɓan ɓi a rìnyam ɓi ɓi seesee Kiris.

⁵ Bɛ̀ll à rèsìghà ɓi gbàà yi ɓum yi abɛ̀y ɓìɓan ɓi a rìnyam ɓìn yɛ̀ɛ à mɛ rèsi ɓyɔ ɓigomìnɛ lɛ, rì a ɓɛ̀kɛ̀nì-fìtom ɓii ɓɛ ɓɛ ri ɓɛ̀tɛnɛn rì a ɓɛ̀kpaŋzì-ɓìɓan, rì ìtèɗ wu Nghay.

⁶ Ɓumɓɛ ɓɛ yin Ɓɛ̀yudɛ̀n ɓɛ ti girig ɗì gàɓ ɓi ɓyom ɓi Bɛ̀ll à nyamgà ɓisuu ɓum ɓii, ɓɛ ɓa ɓìkàɓ ɓi nyoo bog, ɓɛ ki ɓa girig ɓumɓɛ ɓɛ ri ɓi nkàg wu Bɛ̀ll à faghà ɓi Yeesus Kiris lɛ Syeesyee à Ɓɔlɛ,

⁷ ànɛ ǹɗì ǹkìì-kìsay anɛ miì lɛ rìfa ɗi Bɛ̀ll à faghà mɛ̀ ìtèɗ wii, ɓi geesɛ̀n yìì.

⁸ Mɛ̀ ànɛ ǹɗì tìì-kìtòn a zɛy ànɛ ɓi ɓɛ̀gherɛ̀n ɓɛ̀cèm, mɛ̀ɛ nnɛ Bɛ̀ll à kìghà geesɛ̀n ìnɛ lɛ nghagsi Syeesyee à Ɓɔlɛ ànɛ ɓi kìrɔɔ ki ki ri ɓi Kiris, ki ɓum ɓɛ yin lɛ ɓɛ wog, a ɓumɓɛ ɓɛ yin Ɓɛ̀yudɛ̀n.

⁹ Lɛ nɗesi ɓi kìtɛɛtɛn yɛ̀ɛ Bɛ̀ll a rooroòzì fèg wìì anɛ a maà ɓa ǹnyamɛn, cààmɛ̀n kìcèm. Bɛ̀ll ànɛ à kìghà ɓyom ɓìcèm, nnyaà nyamnyàm fèg ànɛ̀n nyimiɗ.

¹⁰ Fɔɔnnɛ à tumɛ̀n ɓigomìnɛ, ɓɛ̀làmì, rì mɛ̀tèɗ mɛ ɓi ɗyoo ɓi ɗùm, ɓɛ yii ɗyomzɛ̀n ɗi Bɛ̀ll, ɓi ɓìɓan ɓìcèm lɛ kìseŋi ki ɓɛgherɛ̀n.

¹¹ Bɛ̀ll à kìghà fɔlɔɔ lɔŋ yɛ̀ɛ rìyitì ɗi a maa ɓa rì ɗyɔ fìɗyàɓ fikɔ̀ɔ̀ ɗi ri; ɗyɛɛ̀ɗi à roòzìghà rì Yeesus Kiris à Kan wìs.

¹² Ɓi nyi, bee i rì ɓìsi kìkpaŋ lɛ ti kɛǹ Bɛ̀ll jàŋbog rì ntyweeyi ɓi nɗem lɛ rìgherɛ̀n ɗi tì gherɛɛ nyi.

¹³ Fɔɔnnɛ ǹkpaa mìni lɛ: mɛ̀tɔɓ mɛ nwowog ɓisu win mɛ̀ kɛɛ̀ fa mini ìɓwɛɗ; mɛ̀tɔɓ mɛ̀n mɛ ri ɓisuu rikem ɗin.

¹⁴ Kìɓan kiǹ kɛɛ̀ki m̀ɓaagh mɛ̀ɗu ɓi zi ɓi mis mɛ Tààta,

¹⁵ ànɛ naa yi ɓum yìcèm lɛ rì yi aɗyoo rì yi ɓi ziinɛ, yɛɛ̀ fuughag yi a lɔ̀ŋkii.

¹⁶ Ǹtɔg nyi lɛ a fa mìni Nghay wìì lɛ a foŋ mìni ìteɗ ɓi nɗem,

¹⁷ di fɔɔnnɛ Kiris a kɔri ɓi mɛ̀rem min lɛ rìgherɛ̀n. Fɔlɔɔ nnɛ ɓì rì ɓiì kìi lɛ, ɓì ròò gàŋ, ɓì ki ɓa ɓɛnyìsɛn ɓi nkɔ̀nɛ̀n ɓi ɗùm;

¹⁸ fɔɔnnɛ ɓì ɓiì yii ǹɗaŋ ri ɓɛ̀gherɛ̀n Bɛ̀ll ɓɛ̀cèm lèg ànɛ ǹkɔ̀nɛ̀n à Kiris à kìi lɛ: à fùùrɛ̀n, à ràɓ, à rim, à ki teŋmɛn,

¹⁹ rì tì lɛ, ɓi yi ǹkɔ̀nɛ̀n à Kiris ànɛ̀n, ànɛ ɓum ɓɛ yin lɛ ɓɛ tɔɔnɛ̀n kì yiì; fɔlɔɔ nnɛ ɓi ɓa ɓɛ̀ronɛn syeesyee à rìron ɗì rìɓa ɗi Bɛ̀ll à rì nɗonɛn.

²⁰ Nni roànɛ à rì rì ìtèɗ wulɛ à kì ɓìɓan ɓìcèm ɓi tì rì lɛ tì tɔg, nsoò lɛ tì fèg, à ceesàg kɛ̀ɛ̀ vèg rì ìtèɗ wu wɛɛ̀ kìki kisay ɓi ɓìsi,

²¹ nnyɛɛ ghɛɛ̀sɛɛ rì rìkem ɓi kìseŋi ki ɓɛgherɛ̀n, rì ɓi Yeesus Kiris ɓi gbàà yi ɓum yìcèm, à kpaŋ fìɗyàɓ fikɔ̀ɔ̀ ri fìɗyàɓ fikɔ̀ɔ̀. Ààmɛ̀n.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan