Bìoball air-loidhne

EFÈZYƐŊ 2 - Bafia Nouveau Testament

Tì ti ɓɛ̀kòrɛn lɛ geesɛ̀n ì Bɛ̀ll

¹ Ɓi ɓɛg wìn, ɓì ɓaghà ɓìloŋ lɛ zɛ̀ɗ yin rì ɓìɓe ɓin,

² ɓi ɓì ghɛghɛ̀ɓkà miì abɛ̀y di ɓi ka nɔ̀ɔnɔɔ̀tì ɓìsyɔ̀ɔ̀ ɓi ɓi ziinɛ, ɓì kìkì rìkɔ̀n ɗi rifòm ɗi ɗi lamii mɛ̀tèɗ mɛ ɓi nlɛŋlɛŋ̀, ɗyɔ yɛɛ ri ǹghay ànɛ a kìki kisay ɓigomìnɛ ɓi ɓumɓɛ ɓɛ ri rì ǹtoòtèɗ.

³ Ɓìsi ɓɛ̀sɛ̀ɛ̀ ɓɛ̀cèm, tì ɓaghà girig ɓi nɗaŋ waa lɛ tì ghɛghɛ̀ɓkà abɛ̀y ɓi ɓìɓan ɓi mɛ̀mùù mis mɛ ɓaghà zày rì ɓyɔ, tì kìkì rìkɔ̀n ɗi nyoo yis rì ɗi mɛrem mis lɛ rìɓa ɗi tì ɓaghà ɓum lɔŋ yɛ̀ɛ ɓɛ̀ro ɓɛmɓog, tì ɓaghà ɓumɓɛ bim i Bɛ̀ll ì ghɛ̀ɛ̀sɛɛ kì kpaŋì a lɔ̀ŋkaa.

⁴ Wɔ̀lɛ Bɛ̀ll à rì rì nyìighnyìg yɛ̀ɛ mɛ̀nɔ̀ɓɔ̀ fɔɔnnɛ ɓi coo nkɔ̀nɛ̀n ànɛ à keesìghà ɓìsi rì nyi,

⁵ ɓìsi ɓɛ tì ɓaghà ɓìloŋ lɛ mɛ̀nànì mis, à kìghà lɛ ti ɓa ti rì cɛɓ ǹɗaŋ ɗi Kiris. Ɓì rì ɓɛ̀kòrɛn lɛ geesɛ̀n ì Bɛ̀ll.

⁶ À kìghà lɛ, à ghèmzì ɓìsi ǹɗaŋ ri nyi, à ki kɔ̀ɔ̀si ɓisi ɓi ɗyoo ɓi ɗùm ɓi rìɓa ɗi tì rì ɓi Yeesus Kiris.

⁷ À kìghà fɔlɔɔ lɛ, di ɓyààmɛ̀n ɓìcèm ɓi asu a resi geesɛ̀n yìì inɛ ì tèghɛɛ yɛ̀ɛ mɛ̀nɔ̀ɓɔ̀, ɓi kìrɔɔ-ǹɗem ànɛ à kìghà ɓìsi ɓi Yeesus Kiris.

⁸ Ɓisuulɛ ɓì rì ɓɛ̀kòrɛn lɛ geesɛ̀n ì Bɛ̀ll, ɓi bee ì rìgherɛ̀n ɗi ɓì gherɛɛ nyi; ki kilɛɛ ɓi fɔlɔɔ lɛ rìkì ɗin, ki ri lɔŋ rifa ɗi Bɛ̀ll.

⁹ Kìɓan kiǹ ki yin yi lɛ mɛ̀kìkìì min, fɔɔnnɛ mum à yin lɛ à sanɛ̀n.

¹⁰ Ɓisuulɛ, tì rì kìsay ki nnyɛɛ salà; à yègà ɓìsi ɓi Yeesus Kiris lɛ, ti ghɛɓ cɛɓ ki ki ri rì mɛ̀kìkìì mɛ syeesyee mɛ Bɛ̀ll à lokà kì pègsɛɛ lɛ ti kilag.

Ɓɛ̀yudɛ̀n, rì ɓìlɔ̀ŋ ɓi zɛy ɓɛ ti ɓɛ̀ràrɛn ɓi Kiris

¹¹ Mìni ɓɛ ɓì yin Ɓɛ̀yudɛ̀n, ɓì ghɛ̀ɛ̀sɛɛ kì yitii lɛ, ɓumɓɛ ɓɛɛ̀ kalag lɛ ɓɔɔ ri ɓɛ̀kɛ̀rɛn, ɓɛ nɗegì mìni abɛ̀y lɛ ɓɛ̀suswiɗ; ɓɔɔ ki ɓa lɛ ɓum ɓɛɛ kɛɗkàkà ɓɔ.

¹² Ɓi cààmɛ̀n kiǹ, ɓì ɓaghà kɛ̀ɛ̀ Kiris, ɓì ɓaghà ɓɛ̀kèn, kɛ̀ ɓi ɓa ɓɛroɓɛ ɓi kìlɔ̀ŋ ki Bɛ̀ll à ɓɔ̀ngà; ɓì ɓaghà ɓi ri gàɓ ɓi bee yi Bɛ̀ll à kàkà lɛ à ɓiì renì rì kɔ; fɔɔnnɛ ɓì ghɛghɛ̀ɓkà ɓi ziinɛ, kɛ̀ɛ̀ dyàɓɛn, kɛ̀ɛ̀ Bɛ̀ll.

¹³ Wɔ̀lɛ ɓigomìnɛ, ɓi Yeesus Kiris mìni ɓɛ ɓì ɓaghà fìràɓ, ɓì mɛ tyòŋdɛn yi nyi jàŋbog lɛ bwaɓ yi Kiris.

¹⁴ Ɓisuulɛ Kiris ànɛ̀n yɛɛ mɛ fa ɓisi fyòoog, nnyɛɛ ɓaskà ɓyom ɓi ɓi ɓaghà ɓì ghasɛn kibyɔg kìfog yɛ̀ɛ à wààghàkà bàŋbàŋ ìnɛ ì fogà gasɛ̀n rì bènà ɓi nyìinyìm wìs.

¹⁵ À pisìghà ɓìdɔ̀gsɛna, rì mɛ̀siŋdɛn mɛ miì rì ɓìcèlì ɓi miì ɓi rìfa ɗi à faghà nyoo yìì lɛ di ɓìlɔ̀ŋ ɓi kiɓɛ̀ɛ̀ ɓìn ɓyɛɛ sug kìlɔ̀ŋ kìfog, ki kɛɛ ɓa nyɔɔnyɔn à kìlɔ̀ŋ ɓi rìràrɛ̀n ɗi rì nyi, fɔlɔɔ nnɛ à kìghà lɛ fyòoog a ɓa.

¹⁶ Kiris à wolà bènà ɓi rìwu ɗi à wughà ɓi kɔrɔs, à ràɗkà ɓìlɔ̀ŋ ɓi kiɓɛ̀ɛ̀rɛn lɛ ɓyɛɛ ɓa nyoo bog , ɓi ki sugti ki ràrɛɛ ri Bɛ̀ll.

¹⁷ Fɔlɔɔ nnɛ Kiris à yùghà kì ghagsii Syeesyee à Ɓɔlɛ à fyòoog, a lɔ̀ŋkin, mìni ɓɛ ɓì ɓaghà fìràɓ ri Bɛ̀ll rì a Ɓɛ̀yudɛ̀n ɓɛ ɓɛ ɓaghà jàŋbog rì Bɛ̀ll.

¹⁸ Ɓisuulɛ, rì ɓìsi, rì ɓɔ, tì rì rì bee i ǹkpaŋɛn yɛ̀ɛ Tààta lɛ nyi rì ǹghɛɓsɛn wu Nghay bog.

¹⁹ Fɔlɔɔ nnɛ ɓì yiìdi ɓɛ̀kèn nsoò lɛ ɓumɓɛ ɓɛ ri ɓi rìghaàgh, wɔ̀lɛ ɓigomìnɛ ɓì ti ɓumɓɛ ɓɛ ri kìlɔ̀ŋ kìfog rì ɓumɓɛ ɓi kìlɔ̀ŋ ki Bɛ̀ll, ɓì ki ɓa ɓumɓɛ ɓi naa ì ɓum ì Bɛ̀ll.

²⁰ Ɓì rì kìtoŋ ki ki ri kìyàghɛn yi ɓi kìsay ki ɓɛkɛ̀nì-fìtom, rì ki ɓɛkpaŋzì-ɓìɓan; Yeesus Kiris nyimiɗ a ɓa gɔ̀g ìnɛ ì ɓanɓani ntɔn à naa.

²¹ Nyi yɛɛ ti à kìlàg lɛ kìtoŋ kɛɛ kpegmɛn, ki ki ɓɔg, ki ghay naa ì Bɛ̀ll ìnɛ ì rì ǹtɛnɛn ɓi Kan ɓi ɗùm.

²² Ɓi nyi nnɛ mìnii ri girig ɓɛ̀ro ɓɛ ɓi kìtoŋ kiǹ, lɛ ɓi ɓa ǹɗaŋ ri ɓɔɔ̀ cèm mɛɛ mɛ Bɛ̀ll à kɔ̀kɔrii miì ɓi Nghay.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan