Bìoball air-loidhne

EFÈZYƐŊ 1 - Bafia Nouveau Testament

Pol à tògsii ɓɔ

¹ Mɛ̀ Pol, ànɛ ǹɗì ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll, mɛ̀ yɛɛ kani ɓumɓɛ Bɛ̀ll rì ɓɛ̀gherɛ̀n ɓɛ ɓɛ ri ɓɛ̀falɛn ɓi Kiris Yeesus a Efɛɛzɛ.

² Bɛ̀ll à Seŋi wìs ɓɛɛ̀ Kan Yeesus Kiris ɓɛɛ fa mìni geesɛ̀n rì fyòoog.

Ɓɛ̀mààgh ɓɛ Bɛ̀ll à faghà ɓum ɓii ɓi Kiris

³ Rìkem ɗyɛɛ ɓa rì Bɛ̀ll à Seŋi Kan wìs Yeesus Kiris, ànɛ à màgà ɓìsi ɓi rìɓa ɗis ɗi tì rì ɓɛ̀ ràrɛn ɗi Kiris, yɛ̀ɛ à faghà ɓìsi ɓɛ̀mààgh ɓɛ nghay ɓɛ̀cèm ɓi ɗyoo ɓi ɗùm.

⁴ Ɓi Kiris, Bɛ̀ll à ɓɔ̀ngà ɓìsi di ziinɛ ì ka kilɛn ɓi, lɛ ti ɓa ɓɛ̀tɛnɛn, kɛ̀ɛ̀ kìɓan ki lɛ ɓɛ fen ɓi mis mii. Ɓi nkɔ̀nɛ̀n wìì,

⁵ Bɛ̀ll à lokà kì rèni lɛ à ɓiì kìi lɛ, ti ɓa ɓɔn ɓii lɛ Yeesus Kiris. Ki kɔngà nyi lɛ a ki kìɓan kiǹ lɛ ki rɔɔghà nyi fɔlɔɔ,

⁶ lɛ a nyaàsì rìkem ɗi geesɛ̀n yìì inɛ à kìghà ɓìsi ɓi Man wiì à nɗem.

⁷ Ɓi Man ànɛ̀n, tì ti ɓɛ̀kòrɛn ri bwaɓ yii, ɓìɓe ɓis ɓi ɓa ɓìcàrɛn lɔŋ lɛ coo itègh wu geesɛ̀n ì Bɛ̀ll,

⁸ ìnɛ à rèsìghà ɓìsi lɛɛ̀gwey, yɛ̀ɛ à kìghà lɛ ti ɓa rì ɗyomzɛ̀n, tì ki ɓa ri syeesyee à fèg.

⁹ À kpàkàkà ɓìsi dwìɗ i rìkɔ̀n ɗii ɗi a rìnyam, ɓi kìɓan ki nɗem wii wu lokà kì renì lɛ à kìi gɛ ɓi Kiris.

¹⁰ Kìɓan kiǹ, Bɛ̀ll à ɓiì ràtɛɛ kɔ kì kìi, di cààmɛ̀n ki mɛ ghɛ̀ɛ̀sɛ̀n; à taŋzɛ̀n ɓyom ɓìcèm ɓi ɓi ri aɗyoo, rì ɓi ɓi ziinɛ lɛ ɓyɛɛ ɓa rìfòm ɗifog lɛ Kiris.

¹¹ Ɓi rìɓa ɗis ɗi tì rì ɓi Kiris, tì mɛ teɗ gàɓ yìs i cɛɓ lɛ Bɛ̀ll à lokà ɓìsi kì ɓɔ̀ni lɔŋ yɛ̀ɛ rìyitì ɗii ɗi ɓaghà. Bɛ̀ll a kìlag ɓiɓan lɔŋ yɛ̀ɛ ǹɗem wii wu kɔnì.

¹² Lɛ di ɓìsi ɓɛ tì lokà kì foŋì dyàɓɛn yis ɓi Kiris, ti ki com ki lɛ rìkem ɗi Bɛ̀ll ɗyɛɛ nyaà.

¹³ Ɓi Kiris, mìni girig ɓì kìghà lɛ, yɛ̀ɛ ɓì wokà jɛ̀ɛ̀ ìnɛ ì rì saaɗ, yɛ̀ɛ ri Syeesyee à Ɓɔlɛ ànɛ à ɓaghày rì gòri yìn, nni ɓì gherɛ̀ngà Kiris, Bɛ̀ll à foŋ min kirèmzɛnà kii ɓi mìni, yɛ̀ɛ à faghà mìni Kìtɛntɛ̀ɛ̀n ki Nghay ki à kàkà.

¹⁴ Nghay ànɛ̀n yɛɛ̀ kìki lɛ, tyɛ̀ ki ɓa ri nyoey ɓi kìrɔɔ ki Bɛ̀ll à nyamgà ɓisuu ɓum ɓii, à ki kì lɛ ti yi syeesyee à rìyi lɛ, tì rì ɓiì terì ɓyom ɓi syeesyee ɓi à nyamgà ɓiǹ, di gòri yìs i mɛ ron. Tì rì ɓumɓɛ Bɛ̀ll à tekà ɓisuulɛ ti nyaànyààsì rìkem ɗii.

Bɔ̀ŋzɛ̀n ì Pol ɓisuu ɓɛgherɛ̀n ɓɛ a Efɛɛzɛ

¹⁵ Kìɓan kiǹ kɛɛ̀ki, yɛ̀ɛ mɛ̀ɛ nwoogh girig di ɓɛɛ̀ sɛsɛg lèg ànɛ ɓì gherɛɛ Kan Yeesus, rì nkɔ̀nɛ̀n ànɛ ɓì rì rì nyi ɓi san à ɓɛ̀gherɛ̀n ɓɛ̀cèm,

¹⁶ nni ǹti ǹfafà lɔŋ Bɛ̀ll ɓìtògsɛ̀n kɛ̀ɛ̀ cààmɛ̀n ɓisu win, ǹki ɓùŋɓuŋ mini ɓi bɔ̀ŋzɛ̀n yɛm̀,

¹⁷ ǹtɔtɔ̀g Bɛ̀ll à Kan wìs Yeesus Kiris, ànɛ à rì ǹkeŋkèmì wìs a Seŋi lɛ a fa mìni ǹghay à ɗyomzɛ̀n ànɛ a rèsag ɓum ɓìɓan ɓi a rìnyam lɛ a ki lɛ ɓi yi nyi.

¹⁸ À lòm mìni kìtɛɛtɛn ɓi mɛ̀rem, lɛ ɓi yi rìkuu ɗi dyàɓɛn ɗi à reŋìghà mìni lɛ ɓi ɓa rì ɗyɔ, ɓì ki yi lèg ànɛ yɛ̀ɛ ɓyom ɓi syeesyee ɓi à nyamgà ɓisuu ɓɛgherɛ̀n ɓi ri ɓì tèghɛn.

¹⁹ Ɓì yi girig lɛ, à ti à rèsàg ìtèɗ wu kuurakɛn ɓisuu ɓisi ɓɛ̀gherɛ̀n. Ìtèɗ wiǹ wɛɛ̀wu à rèsìghà lɛ wu laŋi mɛ̀tèɗ mɛcèm.

²⁰ Wɛɛ̀wu à kìghà kìsay ri wɔ, yɛ̀ɛ à ghèmzìghày Kiris a ɓìloŋ, à kɔ̀ɔ̀sì nyi ɓi weèlem wìì ɓi ɗyoo ɓi ɗùm.

²¹ Wɔɔ, Kiris à rì ɓi-kɔ̀ɔ̀ wu wu teŋmɛɛ wu cee mɛ̀kɔ̀ɔ̀ mɛ mɛfòm mɛcèm, rì ɓɛ̀làmì ɓɛ̀cèm, rì mɛ̀tèɗ mɛcèm, rì ɓɛ̀kemì ɓɛ̀cèm; ɗii ɗii ɗi cee mii mɛ ɓɛri lɛ ɓɛ reŋì ɓigomìnɛ nsoò lɛ ɓi cɛɓ ki fiɗyàɓ fikɔ̀ɔ̀.

²² À fogà ɓyom ɓìcèm a mɛ̀kòò mɛ Kiris, à rɛsì nyi rìfòm ɗi gol ɓi Kìseŋi kii

²³ ki ki ri nyoo yìì, miì nnɛ Kiris à rì ǹɗonɛn lɛ pisa, nyi ànɛ à mɛ ron zi bimiɗ à sòsòɓ.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan