EBIREEGH 9 - Bafia Nouveau Testament

Rìɓɔgsì ɗi Bɛ̀ll ɗi ɓi fìɗyàɓ fi bee, rì ɗi ɓi nyɔɔnyɔn à bee

¹ Bee i ǹtonto ìnɛ lɛ rì Bɛ̀ll rì ɓum ì ɓaghà girig rì mɛ̀siŋdɛn mɛ mɛ seesee ɓìɓan ɓi riɓɔgsì, rì naà-Bɛ̀ll ìnɛ fɛ ɓi ziinɛ.

² Fɔɔnnɛ ɓɛ togà kìnuugh; ɓi kìden ki asu ki ɓɛ nɗegì lɛ jàŋ i kìcèlì; ɓyom ɓi ɓaghà wɔɔ lɛ: rì kìrɛsì ki lamɓà rì teɓèrè, rì bìrɛs yi ɓɛ fafaa ɓisuu riɓɔgsì ɗi Bɛ̀ll.

³ Ajɛ̀m ì kìlàà ki kiɓɛ̀ɛ̀, nnɛ kìden ki ɓɛ nkalàg lɛ jàŋ inɛ ì pɔ̀ɔ̀zii kì ɓaà kìcèlì ì ɓaghà.

⁴ Wɔɔ nnɛ jàŋ inɛ ɓɛ ntɔ̀ngì ɓyom ɓi nùnnumɛn i ɓaghà; jàŋ inɛ̀n ì ɓaghà gol rì gol; fìkɔrɔŋ fi riràrɛ̀n fi ɓaghà girig wɔɔ, fincèm fì pàmɛn ri gol; kìbɔkɔ̀ ki gol ki ɓaghà ɓi fìkɔrɔŋ fiǹ; ɓyom ɓi ɓaghà ɓi kìbɔkɔ̀, kiǹ lɛ: rì manà, rì kìgeŋ ki Arɔn ki ki sam̀gà, rì ɓìɓoŋ ɓi ɓi ɓaghà rì ɓìdɔ̀gsɛna ɓi ɓi bee inɛ lɛ, rì Bɛ̀ll rì ɓum.

⁵ Ɓum ɓɛ titom ɓɛ lɛ ɓɛ̀syèrùɓɛŋ ɓɛ ɓɛ ɓaghà rì rìgwey ɓi nyoo ɓɛ rɛrɛ̀lìghà ɓi fìkɔrɔŋ fi riràrɛ̀n aɗyoo, kìfìì kaa ki gheg jàŋ inɛ ɓɛ nti ɓɛ weeyì ɓìtuwe ɓi risòghɛ̀n ɗi ɓiɓe. Nni àa cààmɛ̀n ki kpaakpaayɛn ɓiɓan ɓiǹ lɛ tintɔ̀ɔ̀ŋ kɛɛ ri lɛ̀.

⁶ Yɛ̀ɛ ɓyom ɓìn ɓìcèm ɓi ɓaghà fɔlɔɔ ɓi woŋzakɛn, ɓɛ̀pìrɛɛtìrɛ̀ ɓɛɛ nti ɓɛ ɗiŋɗàg ɓɛ̀ŋwos ɓɛ̀cèm ɓi kìden ki asu lɛ ɓɛɛ ki kìsay kaa.

⁷ Ɓi kìden ki kiɓɛ̀ɛ̀, lɔŋ ǹlàmì ɓɛ̀pìrɛɛtìrɛ̀ nyi cɛ̀ncii yɛɛ nti à ɗigàg wɔɔ, gɛ̀n bog ɓi bèg; à ki ghɛ̀ɛ̀sɛɛ wɔɔ ki ɗiŋii ri bwaɓ yi kituwe ki à faa Bɛ̀ll ɓisu wii wu nyimiɗ rì ɓisuu ɓiɓe ɓi kilɔ̀ŋ kìcèm.

⁸ Kìtɛntɛ̀ɛ̀n ki Nghay ki kɔnkɔ̀ngà lɛ kɛɛ resi ɓi rìkì ɗiǹ lɛ, bee inɛ ɓi jàŋ inɛ ì pɔ̀ɔ̀zii kì ɓaà kìcèlì ì ɓaghà di ì ka yin kikpaŋ, cààmɛ̀n kìcèm ki yɛ̀ɛ kìnuugh ki abɛ̀y ki ɓaghà di ki kaka.

⁹ Rìkì ɗiǹ ɗi ɓaghà kìfèèghrɛnà ki ɓi cààmɛ̀n ki tì rì ki miì, ki resii lɛ: Ɓyom ɓi mum à faa, rì ɓìtuwe ɓi à cuusii ɓi rìɓɔgsì ɗi Bɛ̀ll, ɓi yin ɗi ìtèɗ wulɛ ɓi konàg kì tɛɛ̀zii nɗem wu ŋwaànɛ a ɓɔɔɓɔgsì Bɛ̀ll ɓi bee inɛ̀n.

¹⁰ Bee i rìɓɔgsì ìnɛ̀n ì ɓiisɛ̀ngà kì kòmi ɓiɓan ɓi ɓiɗilàg, rì ɓyom ɓi nɔnɔyɛn, rì ɓìsyɔ̀ɔ̀ ɓi zòghɛ̀n mɛ̀kuu mɛ̀kuu; ɓìdɔ̀gsɛna ɓi miì ɓi komkòmgà lɔŋ ɓyom ɓi zɛy, fɔɔnnɛ ɓi ghɛɛ̀sɛ̀ngà kì ɓaà rì ìtèɗ à kpaŋ ɓi cààmɛ̀n ki rilɔ̀gtàg ɗi ɓiɓan.

¹¹ Wɔ̀lɛ Kiris à yùghà fɛlɛ yɛ̀ɛ ǹlàmì ɓɛ̀pìrɛɛtìrɛ̀ àgwey ànɛ ɓi ɓìɓan ɓi syeesyee ɓi ɓi ri ɓiì ɓaà; à syààghày kìnuugh ki ki kii lɛ, ki teghɛ̀n ki cee, ki ki rɔɔtɛn ki cee, kɛ̀ kɛɛ̀ ki ɓa kinuugh ki ɓum ɓɛɛ toŋi, yɛɛlɔɔ lɛ ki yin ɓi bàlì ì ɓyom ɓi ɓi kilɛ̀ngà ɓi ziinɛ.

¹² Fɔɔnnɛ à ɗiŋìghà gɛ̀n bog ɓi gɛ̀n yicèm, ɓi jàŋ inɛ ì pɔ̀ɔ̀zii kì ɓaà kìcèlì; à ɗiŋìghà ɓi wɔɔ ri bwaɓ yi ɓipiì, nsoò lɛ yi ɓɔn ɓɛ sanìnya, à ɗiŋìghà wɔɔ lɛ a ɓɔgsi Bɛ̀ll rì bwaɓ yii yi nyimiɗ, à ki fɔ̀n yi ɓìsi gòri ì fìɗyàɓ fikɔ̀ɔ̀.

¹³ Lɛ i bwaɓ yi ɓɛ̀lem ɓɛ sanìnya rì yi ɓipiì, rì kìɓu ki jɛɛ à sanìnya ànɛ ɓɛ tɔni, ɓɛ ɗyɛɛ ɓumɓɛ ɓɛ ri rì ɓìsyeg, ɓi ti ɓi pisàg ɓɔ ɓìsyeg ɓi nyoo,

¹⁴ bɔ̀ɓ yaŋ min ɗi bwaɓ yi Kiris ànɛ à falɛ̀ngà nyimiɗ ri Bɛ̀ll, kɛ̀ɛ̀ fìfin, ɓi Nghay ànɛ à ri fìɗyàɓ fikɔ̀ɔ̀. Bwaɓ yii yi ri ɓiì tɛɛ̀zii mɛrem mis ɓi ɓɛg ànɛ a ɓìɓan ɓi ɓi ri kɛ̀ɛ̀ gɛɓsɛ̀n, lɛ ti ki Bɛ̀ll ànɛ à rì cem kisay.

¹⁵ Kìɓan kiǹ kɛɛ̀ki Kiris à rɛrɛlii ɓi nyìinyìm ànɛ ɓi bee i nyɔn ìnɛ lɛ, rì ɓum rì Bɛ̀ll, lɛ di ɓumɓɛ Bɛ̀ll à mɛ reŋi ɓɛɛ teɗ ɓìrɔɔ ɓi fiɗyàɓ fikɔ̀ɔ̀, ɓi à kàkà ɓumɓɛ abɛ̀y; ɓɛ ri ɓyɔ ɓiì terì lɛ rìwu ɗi mum bog ɗyɛɛ mɛ kwèɗ ɓum ɓi ɓìɓe ɓìcèm ɓi ɓɛ kighà di ɓɛ kaka ɓi fìɗyàɓ fi bee.

¹⁶ Ɓisuulɛ jàŋ inɛ kaàtà ànɛ mum à reɓsàkà rìwu ɗii miì à rì, ki ghɛɛ̀sɛɛ lɛ ɓɛɛ yi lɛ mum nyimiɗ anɛ à reɓsàkà rìwu ànɛ̀n à mɛ wu.

¹⁷ Lɛ kaàtà ànɛ mum à reɓsaagh rìwu ɗii miì à rì rì ìtèɗ di mum àncèm à mɛ wu, ɓisuulɛ cààmɛ̀n kìcèm ki mum àncèm à kaka cem, kaàtà ànɛn à yin ɗi ìtèɗ wudɛŋ.

¹⁸ Kìɓan kiǹ kɛɛ̀ki nsoò bee i ǹtonto ìnɛ Bɛ̀ll à rengà rì ɓum, ì tumɛ̀ngà ɓi kɛ̀ɛ̀ bwaɓ yi yi kpaŋì;

¹⁹ lɛ Moyis à kìghà lɛ, à mɛ làmɓɛn mɛsiŋdɛn mɛcèm mɛ mɛ ri ɓi kaàtà à ɓìdɔ̀gsɛna ɓi mis mɛ kilɔ̀ŋ kìcèm, à teɗ min bwaɓ yi ɓɔn ɓɛ ɓɛ̀sanìnya, rì yi ɓipiì, rì mɛ̀nig, à mìsì lɛ, rì ɓi kaàtà à ɓìdɔ̀gsɛna, rì ɓi ɓum ɓɛ̀cèm, rì kìvùree ki kite ki lɛ ìzoɓ, rì ɓi ǹfìŋga wu ɓàŋ lɛ pɔɔŋ.

²⁰ À kpaa lɛ: Bwaɓ yi yi siìraagh bee inɛ Bɛ̀ll àa ǹsiŋ̀dɛɛ mìni lɛ, ɓi ɓeŋ yɛ̀ɛ ri lɛ.

²¹ Fɔɔnnɛ Moyis à mìsìghà girig bwaɓ ɓi kìnuugh, rì ɓi ɓyom ɓìcèm ɓi ɓɛ nkìlàg kìsay miì ɓi rìɓɔgsì ɗi Bɛ̀ll.

²² Ɓi ɗi yɛ̀ɛ ɓìdɔ̀gsɛna ɓyɛɛ̀ kpaakpàà, ɓɛ ti ɓɛ soghàg ɓyom ɓìcèm rì bwaɓ, nsoò ɓìɓe, ɓi ti ɓi ɓalàg ɓìcenɛn di bwaɓ yi kpaŋi.

²³ Ki ghɛɛ̀sɛ̀ngà min lɛ, ɓìfèèghrɛnà ɓi ɓɛkɔɔ̀kɔɔ̀ ɓɛ ɓyom ɓi ɓi ri aɗyoo ɓyɛɛ teɗ rìkuu ɗi zòghɛ̀n ɗiǹ, rì tì lɛ, nsoò ɓɛ̀kɔɔ̀kɔɔ̀ ɓɛ ɓyom ɓɛ aɗyoo ɓɛncèm ɓɛ ghɛɛ̀sɛ̀ngà kì terì zòghɛ̀n rì ɓìfùna ɓi ɓi cee ɓiǹ.

²⁴ Ɓisuulɛ Kiris à ɗiŋìghà ɓi ɓi naà-Bɛ̀ll ìnɛ ɓum ɓɛɛ toŋi, ìnɛ ì rì lɛ ì ɓa kìfèèghrɛnà ki naà-Bɛ̀ll ì kɔɔ̀kɔɔ̀, à ɗiŋìghà lɔŋ ɓi ɗyoo ɗyɔmiɗ lɛ di a rɛli ɓi cààmɛ̀n ki, ɓi mis mɛ Bɛ̀ll ɓisu wis.

²⁵ À ɗiŋìghà ɓi wɔɔ lɛ di a funɛn nyimiɗ gɛ̀n lɛ gɛ̀n fɛlɛ yɛ̀ɛ nlàmì ɓɛ̀pìrɛɛtìrɛ̀ àa nti à ɗigàg bèg bimiɗ rì bwaɓ yi nyàm.

²⁶ I kɛɛ ɓa fɔlɔɔ, di ki ghɛɛ̀sɛ̀ngà min lɛ Kiris a wog rìkɛŋ gɛ̀n lɛ gɛ̀n à tumɛ̀n yɛ̀ɛ zi i kìlɛ̀ngà. Wɔ̀lɛ ɓi cààmɛ̀n ki, à yùghà gɛ̀n bog ɓi gɛ̀n yicèm, di mɛ̀ru mɛ siitòn mɛɛ̀ kɛ̀ɛ̀kɛɛ yi lɛ a legsi kìɓe di à fùnɛɛ nyimiɗ.

²⁷ Nni yɛ̀ɛ ki ri kìsiŋdɛn lɛ mum à ghɛ̀ɛ̀sɛɛ kì wii gɛ̀n bog, ajɛ̀m ìnɛn innɛ Bɛ̀ll à yɔ̀mzì nyi,

²⁸ fɔlɔɔ nnɛ Kiris ànɛ à falɛ̀ngà nyimiɗ gɛ̀n bog ɓi gɛ̀n yicèm lɛ a tɛg ɓìɓe ɓi ɓum lɛɛ̀gwey à rì ɓiì ɓììtii ti kìrèsɛɛ ɓi gɛ̀n i kìɓɛ̀ɛ̀ kɛ̀ɛ̀ kìɓe a ɓumɓɛ ɓɛɛ̀ ɓoŋɓoŋ nyi lɛ a kweɗ ɓɔ.