EBIREEGH 7 - Bafia Nouveau Testament

¹ Mɛlkisedɛg ànɛ̀n à ɓaghà rìfòm ɗi kilɔ̀ŋ ki lɛ Salɛm, nyi tì pìrɛɛtìrɛ̀ à Bɛ̀ll ànɛ à rì ǹteŋmɛn à cee, nnyɛɛ kɛngà kì tulɛɛ ri Abiraham, di roànɛ̀n a susug yi wɛ̀y wu à yakày mɛ̀fòm mɛdɛŋ miì à ki màŋ nyi.

² Rì nyi nnɛ Abiraham à faghà gàɓ ì kìntɛ̀ɗ ìnɛ ɓi ɓyom ɓii ɓìcèm. Ɗii ɗi lɛ Mɛlkisedɛg àncèm ɗi ka rèsii lɛ à rì rìfòm ɗi saaɗ, à ki ɓa ti lɛ rìfòm ɗi Salɛm yɛɛlɔɔ lɛ rìfòm ɗi fyòoog.

³ À rì kɛ̀ɛ̀ seŋi, kɛ̀ɛ̀ jɛɛ, kɛ̀ɛ̀ rìfuuyì; ɓɛ ɓuŋi ɓi kiɓan ki riyalɛ̀n ɗii, nsoò ki riwù ɗii jàŋ idɛŋ, à pisɛɛ Man à Bɛ̀ll ànɛ à rì lɔŋ pìrɛɛtìrɛ̀ fìɗyàɓ fikɔ̀ɔ̀.

⁴ Ɓì rì lɛ ɓì ghɛn lɛ, à ɓaghà coo gìn i mum, Abiraham à seŋi wìs ànsɛ̀ɛ̀ a faghà nyi gàɓ ì kìntɛ̀ɗ ìnɛ ɓi ɓyom ɓi à sukày wɛ̀y ri ɓyɔ.

⁵ Ɓɛ̀pìrɛɛtìrɛ̀ ɓɛ ɓi boo ì Levi ɓɛɛ ri rì ìtèɗ wu lɛ ɓɛɛ tɔki ɓumɓɛ a Isirayɛl gàɓ ì kìntɛ̀ɗ ìnɛ ɓi ɓyom ɓìcèm lɔŋ yɛ̀ɛ ɓìdɔ̀gsɛna ɓyɛɛ̀ kpaakpàà. Yɛɛlɔɔ lɛ ɓɛ ti ɓɛ tɔkì gàɓ ì kìntɛ̀ɗ ìnɛn rì ɓɛ̀geni ɓaa, ɓɛ ɓɛ ki rì girig lɛ dòò yi Abiraham.

⁶ Mɛlkisedɛg à ɓaghà ɓi ɓi boo ì mum ì Levi kìɓan kifog à tekà gàɓ ì kìntɛ̀ɗ ìnɛ ɓi ɓyom ɓi Abiraham à ɓaghà rì ɓyɔ, à ki màŋ roànɛ Bɛ̀ll à faghà mɛ̀kàg.

⁷ Kɔlɛ mum bimiɗ à yii lɛ, rìɓa ɗi ŋwaànɛ ɓɛ maŋi ɗi wuɓsɛɛ ɓi ɗi ŋwaànɛ à màŋi nyi.

⁸ Ɓumɓɛ ɓɛ ti ɓɛ tekì gàɓ ì kìntɛ̀ɗ fɛ, ɓɛ ri ɓumɓɛ ɓɛ ti ɓɛ wulàg; kìɓan kifog ɓi ɓɛg ànɛ yɛ̀ɛ Mɛlkisedɛg, nyii ri ŋwaànɛ kìntɛ̀ɗ, kaàtà à Bɛ̀ll à sììraagh kì kpaà lɛ à rì cem.

⁹ Nni tì rì lɛ tì kpaa lɛ: Levi ànɛ dòò yii yi ti yi tekì gàɓ ì kìntɛ̀ɗ à faghà girig gàɓ ì kìntɛ̀ɗ ɓi cààmɛ̀n ki Abiraham à faghà gàɓ ì kìntɛ̀ɗ.

¹⁰ Ɓisuulɛ nsoò Levi à ɓaghà di à ka yalɛn ɓi, tì rì lɛ tì kpaa lɛ à ɓaghà di à kakay ɓi bwaɓ yi seŋi ànsɛ̀ɛ̀ anɛ lɛ Abiraham, cààmɛ̀n ki Mɛlkisedɛg à kɛ̀ngà kì tulɛɛ ri nyi.

¹¹ Kìsay ki pìrɛɛtìrɛ̀ ki ɓɔn ɓɛ Levi kɛɛ̀ki ɓìdɔ̀gsɛna ɓi ɓɛ faghà kìlɔ̀ŋ ki Isirayɛl ɓi sasàghìghà miì; i ɓɛ̀pìrɛɛtìrɛ̀ ɓɛ ɓi boo ì Levi ɓɛɛ ki kìsay ki kɛɛ rɔɔtɛn, kɛ̀ kɛɛ̀ ɓa ri kìɓan ki fenɛn, di ki ghɛɓsìghà tì ɓi com lɛ rìkuu ɗi pìrɛɛtìrɛ̀ ɗidɛŋ ɗyɛɛ ghɛnɛn ɗi ɗi ɓa ɓi nɗɛli wu Mɛlkisedɛg, ɗyɛ̀ kɛɛ̀ ɓa ti ɓi nɗɛli wu Arɔn.

¹² Ɓisuulɛ i kìsay ki pìrɛɛtìrɛ̀ ki ti kì cenɗɛn, ɓìdɔ̀gsɛna ɓi ghɛɛ̀sɛɛ girig lɛ ɓi koɓsɛ̀n.

¹³ Nni roànɛ kìɓan kii ki ri kìkànɛn ɓi jàŋ inɛ ti kpaakpaa inɛ, à rì ŋwaànɛ ɓi rìpwìɗ ɗidɛŋ, ɗi mum à ka ɓaghà ɓi pìrɛɛtìrɛ̀ miì.

¹⁴ Lɛ ɓɛ yii lɛ tɛntɛ̀ɛ̀n lɛ Kan wìs a rì ŋwaànɛ à yalɛɛ ɓi rìpwìɗ ɗi Zyuda ɗyɛɛ̀ɗi Moyis à ɓùgà ɓi ɓi kìsay ki pìrɛɛtìrɛ̀.

¹⁵ Kìɓan kiǹ ki konaagh tì kì ghɛnɛɛ fɔlɔɔ, yɛ̀ɛ pirɛɛtìrɛ̀ adɛŋ ànɛ à rì ɓi kìpisɛn ki Mɛlkisedɛg à mɛ kpaŋ.

¹⁶ À tekà ɓi ikɔ̀ɔ̀ wu Pìrɛɛtìrɛ̀ ɓi rìkpaa ɗì ɓidɔ̀gsɛna ɓi ɓum ɓɛɛ faa, à ɓɔkà lɔŋ rì ìtèɗ wu cɛɓ ki ki ri kɛ̀ɛ̀ sugtag.

¹⁷ Kìɓan kiǹ kɛɛ̀ki kaàtà à Bɛ̀ll a kalag lɛ: Ù rì pìrɛɛtìrɛ̀ ɓi nɗɛli wu Mɛlkisedɛg fìɗyàɓ fikɔ̀ɔ̀.

¹⁸ Fɔɔnnɛ ɓɛ mɛ pisi kidɔ̀gsɛna ki abɛ̀y lɛ ki ɓaghà kɛ̀ɛ̀ ìtèɗ, kɛ̀ kɛɛ̀ ki ghɛɓsi com.

¹⁹ Lɛ ɓìdɔ̀gsɛna ɓi Moyis ɓi kighà ɓi lɛ com kidɛŋ kɛɛ kpaŋ ɓi nɗɛli wulɛ kìɓan ki fenɛn miì kɛ̀ kɛɛ̀ ɓa ti, kìɓan kifog dyàɓɛn inɛ ì cee ì mɛ ɗiŋì, yɛ̀ɛ ti ì kìlàg lɛ ti kɛǹ Bɛ̀ll jàŋbog.

²⁰ Ki kɛɛ̀dì kì ɓaà lɛ Bɛ̀ll à kànɛ̀ngà bɛ̀ɗ ɓi kìɓan kiǹ,

²¹ kɔlɛ, yɛ̀ɛ ɓumɓɛ ɓi boo ì Levi ɓɛ mɓɔkaagh ɓɛ̀pìrɛɛtìrɛ̀, Bɛ̀ll àa nkànaagh ɓi bɛ̀ɗ fɔlɔɔ; kìɓan kifog ɓi rìɓɔg ɗi Yeesus à ɓɔkà Pìrɛɛtìrɛ̀, Bɛ̀ll à kànɛ̀ngà bɛ̀ɗ, à kpaa nyi lɛ: Kan àa ǹkànɛɛ bɛ̀ɗ, àa ki lɔ̀gti ɓi jɛ̀ɛ̀: Ù rì ɓiì ɓaà Pìrɛɛtìrɛ̀ fìɗyàɓ fikɔ̀ɔ̀.

²² Jɛ̀ɛ̀ ìnɛn ì rèsii lɛ: Yeesus à rì roànɛ à kìi lɛ, Bɛ̀ll a ren bee ìnɛ ì rɔɔtɛɛ ì cee ìnɛ abɛ̀y rì ɓìsi.

²³ Ki ki ɓa ti lɛ ɓumɓɛ ɓaà ɓɔɓɔ̀g ɓɛ̀pìrɛɛtìrɛ̀ ɓɛ teghɛɛ; rìwu ɗyɛɛ rekà ɓɔ rìkɛ̀nkɛ̀n ɗi rì kìsay asu, cààmɛ̀n kìcèm.

²⁴ Wɔ̀lɛ ɓi ɓɛg ànɛ yɛ̀ɛ Yeesus, nyiì ghɛghɛɓ fiɗyàɓ fikɔ̀ɔ̀, fɔɔnnɛ à yin lɛ à ceesì kìsay kii ki pìrɛɛtìrɛ̀ rì ŋwaàdɛŋ.

²⁵ Fɔlɔɔ nnɛ à rì rì ìtèɗ wulɛ à ghɛɓsì lɛ kɔɔ̀kɔɔ̀ ɓumɓɛ ɓɛ tyoŋdɛɛ Bɛ̀ll jàŋbog, di ɓɛ fyee a lɔ̀ŋkii ɓisuulɛ, à rì lɔŋ cem cààmɛ̀n kìcèm, à ki ɓɔ̀ɔɓɔŋ̀zàg Bɛ̀ll ɓisu wàà.

²⁶ Rìkuu ɗi nlàmì-ɓɛ̀pìrɛɛtìrɛ̀ àgwey ɗi ɗi ghɛɛ̀sɛɛ rì ɓìsi ɗyɛɛ ri Yeesus, lɛ à rì ǹtɛnɛn, kɛ̀ɛ̀ tìfin, kɛ̀ɛ̀ rìnàn, ɓɛ ghasìghà nyi rì ɓɛ̀kìì-kìɓe, à ki teŋmɛɛ à cee ɗyoo.

²⁷ Ɓɛ̀làmì ɓɛ̀pìrɛɛtìrɛ̀ ɓɛgwey ɓɛ ghɛɛ̀sɛ̀ngà kì fùnɛɛ ɓituwe ɓɛŋwos ɓɛ̀cèm ɓi rìlɛɛghràg ɗi Bɛ̀ll ɓisuu ɓiɓe ɓyaa ɓi ɓɔmiɗ, rì ɓisuu ɓiɓe ɓi ɓum ɓɛ kilɔ̀ŋ. Wɔ̀lɛ Yeesus à ghɛ̀ɛ̀sɛɛ ɓi ki kìkii yɛ̀ɛ ɓɔ, ɓisuulɛ nyii lɛɛghràkà Bɛ̀ll gɛ̀n bog ɓi gɛ̀n yicèm yɛ̀ɛ à faghà nyimiɗ ɓi sìg à kìtuwe ki mɛlɛɛ̀ghlɛɛgh.

²⁸ Ɓumɓɛ ɓìdɔ̀gsɛna ɓi Moyis ɓi nfalàg ìkɔ̀ɔ̀ wu ǹlàmì-ɓɛ̀pìrɛɛtìrɛ̀ àgwey, ɓɛ ɓaghà lɔŋ ɓumɓɛ ɓɛ ri lɛ ɓɛ ki kìɓe; wɔ̀lɛ jɛ̀ɛ̀ ìnɛ ì rì ɓi bɛ̀ɗ inɛ Bɛ̀ll à kànɛ̀ngà ajɛ̀m ì ɓìdɔ̀gsɛna ɓi Moyis, ì ɓɔgsìghà Man à Bɛ̀ll ǹlàmì-ɓɛ̀pìrɛɛtìrɛ̀ àgwey ànɛ à ti ɓi nɗɛli wulɛ kɛ̀ɛ nààdi isuùcèm.