EBIREEGH 5 - Bafia Nouveau Testament

¹ Lɛ ǹlàmì-ɓɛ̀pìrɛɛtìrɛ̀ ǹcèm ànɛ ɓɛ teri ɓi nyìinyìm à ɓum, à rì ǹrɛsɛn ɓisuu ɓum, lɛ a ki kìsay ki Bɛ̀ll, à fafà nyi ɓyom, à ki fùufunɛ̀n ɓìtuwe ɓisuu ɓiɓe ɓi ɓum.

² À rì lɛ à ɓa rì rìcenɛ̀n ɓisuu ɓumɓɛ ɓɛ ti ɓɛ nanàg lɛ kɛ̀ɛ̀ rìyi, lɛ nyimiɗ a rì mum ànɛ à rì lɛ à nànɛ̀n ɓa kɛ̀ɛ̀ ìtèɗ.

³ Rìɓa ɗi à rì ɗiǹ ɗì ìkɔ̀g, ɗyɛɛ̀ɗi à ghɛ̀ɛ̀sɛɛ kì lɛghii Bɛ̀ll lɛ, rì ɓi ɓìɓe ɓii ɓi nyimiɗ, rì ɓi ɓum ɓɛ kilɔ̀ŋ.

⁴ Mum à yin lɛ à falɛ̀n m̀ɓɔg wìn nyimiɗ, di Bɛ̀ll à reŋii ɓi nyi fɛlɛ yɛ̀ɛ à reŋìghà Arɔn.

⁵ Nsoò Kiris à falɛ̀ngà ɓi nyimiɗ rìgwey ɗi lɛ, a ɓa ǹlàmì-ɓɛ̀pìrɛɛtìrɛ̀. Kìɓan kifog à tekà ɗyɔ rì roànɛ à kpaaghà nyi lɛ: Ù rì Man wɛm̀, à tumɛ̀n gɛɛ̀nɛ ǹti wɔ̀ seŋi.

⁶ Fɛlɛ yɛ̀ɛ à kpaatìghà jàŋ idɛŋ lɛ: Ù rì pìrɛɛtìrɛ̀, rìɓa ɗi isuùcèm, ɓi nɗɛli wu Mɛlkisedɛg.

⁷ Yɛ̀ɛ Yeesus à ghɛghɛ̀ɓkà ɓi ziinɛ, à ɓɔ̀ɔ̀ɓɔ̀ŋzàkà Bɛ̀ll, à yɛ̀ɛ̀ghyɛ̀gsì nyi ɓyàg, rì ɓyoo ɓikiŋ, rì misì ɓi mɛ̀tam, lɛ Bɛ̀ll yɛɛ ɓaghà lɛ à ghɛɓsì nyi ɓi rìwu; nni Bɛ̀ll à wokà bɔ̀ŋzɛ̀n yii lɛ mɛ̀wog mɛ à ɓaghà rì mɔ.

⁸ Nsoò yɛ̀ɛ à ɓaghà Man à Bɛ̀ll, à yilàkà com ki lɛ mɛ̀wog, ɓi mɛ̀tɔɓ mɛ̀cèm mɛ à wokà;

⁹ fɔɔnnɛ à ɓaghà lɛ à mɛ teŋzi nyi ɓi nɗɛli wu kɛ̀ɛ ɓa ti ri kìɓan ki ɓɛ fen a lɔ̀ŋkii, nni à ghalà ǹfaà ɓum ɓɛ̀cèm ɓɛ ɓɛ woogh nyi, gòri ì fiɗyàɓ fikɔ̀ɔ̀,

¹⁰ lɛ Bɛ̀ll à làmìghà lɛ, ànɛ̀n à rì ǹlàmì-ɓɛ̀pìrɛɛtìrɛ̀ ɓi nɗɛli wu Mɛlkisedɛg.

¹¹ Tì tèghɛɛ ɓìɓan ɓi kpaayɛn ɓi kìɓan kiǹ wɔ̀lɛ rìrèsì ɗi ti resi mìni ɓyɔ lɛ tɛntɛ̀ɛ̀n lɛ ɓi konag kìwoògh ɗi yeesɛɛ ɓisuulɛ ɓì ti kɛ̀ ɓi wog ti kiɓan lɛ fyɛ̀ɗ.

¹² Lɛ mìniɓɛ ɓì ghɛ̀ɛ̀sɛ̀ngà kìɓaà ɓɛ̀rèsàg ɓɛ ɓìɓan ɓi fiɗyàɓ, ɓì kaka rì zày ìnɛ lɛ ɓɛɛ resag mìni mɛ̀to mɛ ɓiɓan mɛ beèbɛ̀y mɛ ɓi jɛ̀ɛ̀ ì Bɛ̀ll. Ɗi ɓyàa rì lɛ ɓì ɗi ɓìɗilàg ɓi tèɗ, ɓì kaka rì zày ìnɛ lɛ ɓi nyɔŋnyɔŋ mɛlì.

¹³ Kɔlɛ mum ǹcèm ànɛ à kaka ɓi mɛlì, à ka yi ɓi righasì lɛ, rì saaɗ, rì pwàà ɓisuulɛ à kaka man.

¹⁴ Wɔ̀lɛ, ɓìɗilàg ɓi tèɗ ɓi ri ɓisuu ɓumɓɛ ɓɛ mɛ sììrɛn ɓum, ɓɛɛ̀ɓɛ ɗyomzɛ̀n ɗi mɛ mɛ̀ɛ̀tɛn ɗi rìghasì ɗi lɛ, rì kìɓe rì kìrɔɔ.