EBIREEGH 4 - Bafia Nouveau Testament

¹ Nni cààmɛ̀n kìcèm ki yɛ̀ɛ ǹkàg wulɛ ɓum ɓɛɛ ɗiŋi ɓi rìfɔɔsɛ̀n ɗii wu kaka, tì ghɛ̀ɛ̀sɛɛ kì konaagh lɛ, ŋwaàdɛŋ ànɛ ɓi mìni kɛ̀ɛ ɓa ri fèg ànɛ lɛ nyii kpaŋi di cààmɛ̀n kaa ceè.

² Ɓisuulɛ Syeesyee à Ɓɔlɛ à mɛ kalɛn a lɔ̀ŋkis lɔŋ yɛ̀ɛ à kalɛ̀ngà a lɔ̀ŋkaa. Wɔ̀lɛ jɛ̀ɛ̀ ìnɛ ɓɛ wokà, ì ghɛɓsìghà ɓi com, ɓisuulɛ ɓɛ wokà yɔ̀, ɓɛ̀ kɛɛ̀ teɗ yɔ̀ ri rìgherɛ̀n.

³ Ɓi ɓɛg ànɛ a ɓìsiɓɛ tì gherɛɛ, tì rì ɓiì ɗiŋii ɓi rìfɔɔsɛ̀n ɗi Bɛ̀ll à kpaaghà lɛ: Mɛ̀ɛ ǹkànɛɛ bɛ̀ɗ ɓi bim inɛ mɛ̀ɛ nwoogh, ǹkpaa lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ. À kpaaghà fɔlɔɔ nsoò yɛ̀ɛ ki ri lɛ kìsay kii ki ɓaghà di ki mɛ lèg, à tumɛ̀n ɓi cààmɛ̀n ki à kìghà lɛ rì ɗyoo, rì zi.

⁴ Lɛ ki ri kìkaliyɛn jàŋ idɛŋ ɓi kìɓan ki ŋwos a kìtaàɓɛ̀ɛ̀ lɛ: Bɛ̀ll à fɔɔsɛ̀ngà kìsay kii kìcèm ɓi ŋwos a kìtaàɓɛ̀ɛ̀,

⁵ à kpaa tì fɛ lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ.

⁶ Nni yɛ̀ɛ ki ri kìsiŋdɛn lɛ, ɓum ɓɛdɛŋ ɓɛ ri ɓiì ɗiŋii ɓi rìfɔɔsɛ̀n ɗiǹ ki ki ɓa ti lɛ, ɓumɓɛ ɓɛ lokà kì terì Syeesyee à Ɓɔlɛ ànɛ̀n, ɓɛ rɔɓkà ɓɛ̀ kɛɛ̀ ɗiŋi wɔɔ lɛ ɓɛ ɓaghà kɛ̀ɛ̀ rìgherɛ̀n,

⁷ fɔɔnnɛ Bɛ̀ll à mɛ rɛsi ti bimiɗ à ŋwos adɛŋ lɛ: Gɛɛ̀nɛ, yɛ̀ɛ à kpaaghà ɓi ŋwɔm wu Davit di cààmɛ̀n kaa ghaàgh lɛɛ̀gwey ɓi jàŋ inɛ tyàa mɛ wog lɛ: Gɛɛ̀nɛ, i ɓì woogh jɛ̀ɛ̀ yìì. Kɛ̀ ɓi tèèsi mɛrem.

⁸ Ɓisuulɛ, i Yooswa a fa ɓɔ rìfɔɔsɛ̀n, di Bɛ̀ll à ɓaghà ɓi lɛ, à kàgtì ɓum ŋwos adɛŋ, ajɛ̀m ìnɛn.

⁹ Fɔlɔɔ nnɛ rìfɔɔsɛ̀n ɗi Bɛ̀ll à fɔɔsɛ̀ngà ɓi Saɓàt ɗi ri wɔɔ ɓisuu ɓum ɓɛ Bɛ̀ll.

¹⁰ Ɓisuulɛ, ŋwaànɛ à ɗiŋii ɓi rìfɔɔsɛ̀n ɗi Bɛ̀ll, à mɛ fɔɔsɛn ɓisay ɓii fɛlɛ yɛ̀ɛ nyii fɔɔsɛ̀ngà girig ɓi nkìì.

¹¹ Ti tèèsiina nyoo lɛ ti ɗiŋi ɓi rìfɔɔsɛ̀n ɗiǹ, di fɔɔnnɛ ŋwaàdɛŋ kɛ̀ɛ ɓa lɛ à kpì, di à nɔ̀ɔ̀tii rìkuu ɗi ntoòtèɗ ɗi ɓumɓɛ ɓɛ ɓaghà ɓireɓ ɓɛ resìghà.

¹² Lɛ jɛ̀ɛ̀ ì Bɛ̀ll ì rì cencem, ì ki ɓa ri ìtèɗ, ì poo ì cee gàfàg ìnɛ ì rì ǹghɛliyɛn ɓɛɓɛg ɓɛ̀cèm. Yɛ̀ɛ ɗiɗiŋi mum ɓi nɗem à kpaŋ ɓi jàŋ inɛ cɛɓ ki mum rì nghay wii ɓi rarɛɛ; ì ɗiŋì ì kpaŋ ɓi rìràrɛ̀n ɗi gòga rì ɓɛ̀ɓɔ̀ŋ ɓɛ ɓiwoɓ. Yɛ̀ɛ rèresi nkòo rìkɔ̀n ɗi mum rì mɛ̀yitì mɛ mɛ ri nyi ɓi nɗem, ɓi ri lɛ syeesyee.

¹³ Ɓi ɓyom ɓi Bɛ̀ll à kìghà, com kidɛŋ ki yin nyi kìnyamɛn, ɓyom ɓìcèm ɓi ri ɓìghaniyɛn lɛ kpeènye-kpèènyèè ɓi mis mɛ roànɛ à ghɛ̀ɛ̀sɛɛ ɓìsi kì tɔɔ̀gh kìsay ki tì kìghà.

Yeesus à rì ǹlàmì-ɓɛ̀pìrɛɛtìrɛ̀ àgwey

¹⁴ Yɛ̀ɛ tì rì min ri nkɔ̀mɛ̀n-ɓɛ̀pìrɛɛtìrɛ̀ àgwey lɛ Yeesus ànɛ à rì Man à Bɛ̀ll ànɛ à ɓɔkà aɗyoo yɛ̀ɛ Bɛ̀ll, tì ghɛ̀ɛ̀sɛɛ kì sììrɛɛ lɛ syeesyee ɓi ɓìɓan ɓi tì gherɛɛ ɓyɛɛ̀ɓi tì ti tì kakàlì ɓum.

¹⁵ Ɓisuulɛ ǹlàmì ɓɛ̀pìrɛɛtìrɛ̀ wìs àgwey a yin rikuu ɗi ɗi ri lɛ, ɗi taŋ̀ ǹɗem wu nyìighnyìg ɓi rìɓa ɗi tì rì kɛ̀ɛ̀ ìtèɗ, lɛ à tulɛ̀ngà rì mɛ̀fèèghrɛn mɛkuu mɛ̀cèm lɔŋ yɛ̀ɛ ɓìsi, kìɓan kifog, à kìghà ɓi kiɓe.

¹⁶ Ti tyoŋdɛn min jàŋbog rì ìkɔ̀ɔ̀ wu rilàmì wu Bɛ̀ll, jàŋ inɛ geesɛ̀n ì rì, tì ɓa rì ǹtyweeyi, di fɔɔnnɛ ɓɛɛ wog ɓìsi nyìighnyìg, tì ki ghɛn geesɛ̀n ìnɛ ì rì ɓìsi ɓiì ghɛɓsii ɓi cààmɛ̀n ki ki ghɛɛ̀sɛɛ.