EBIREEGH 3 - Bafia Nouveau Testament

Yeesus Kiris à cee lɛ rì Moyis, rì Yooswa

¹ Nni fɔlɔɔ nnɛ, mìni ɓɛ̀geni ɓɛ̀m ɓɛ ɓi rìgherɛ̀n ɓɛ ɓi rì rì gàɓ ɓi nɗeèghreŋi wu Bɛ̀ll, seeseena Yeesus ànɛ Bɛ̀ll à romgày lɛ a ɓa rìfòm ɗi ɓɛpìrɛɛtìrɛ̀ ɗi ɓi rìgherɛ̀n ɗi ɓìsiì làalam̀ɓɛ̀n.

² Yeesus à kìghà Bɛ̀ll ànɛ à faghà nyi kìsay kiǹ mɛ̀wog, lɔŋ yɛ̀ɛ Moyis à kighà, ɓi naà-Bɛ̀ll bimiɗ.

³ Lɛ ɓɛ ghɛngà lɛ, à ghɛ̀ɛ̀sɛɛ kì terì rìkem ɗi ɗi cee ɗi Moyis, fɔɔnnɛ ŋwaànɛ à toŋi mɛɛ, à ti à kemgì à cee mɛɛ mɔmiɗ mɛ à toŋi.

⁴ Mɛɛ mɛcèm mɛ ri rì ŋwaànɛ à toŋi mɔ, nni ǹtoŋì ɓyom ɓìcèm yɛɛ ri lɛ Bɛ̀ll.

⁵ Ɓi ɓɛg ànɛ yɛ̀ɛ Moyis, à kìghà mɛ̀wog yɛ̀ɛ ki ghɛɛ̀sɛɛ, ɓi naà-Bɛ̀ll bimiɗ, à ɓaghà ǹkìì-kìsay anɛ à ghɛ̀ɛ̀sɛ̀ngà kì ghagsii ɓiɓan ɓi ɓi ghɛɛ̀sɛ̀ngà kì kalɛɛ.

⁶ Wɔ̀lɛ Kiris à rì rì mɛ̀wog fɛlɛ yɛ̀ɛ Man ànɛ àrì beèbɛ̀y ɓi naa yìì; naa ìnɛ̀n yɛ̀ɛ ri lɛ ɓìsi, i tì ɓèŋi à kpaŋ a rìsugtɛ̀n lɛ rì kɔɔ̀kɔɔ̀ à ǹtyweeyi rì dyàɓɛn inɛ ti saasanɛ̀n.

⁷ Kìɓan kiǹ kɛɛ̀ki, i ɓì woogh jɛ̀ɛ̀ yìì gɛɛ̀nɛ fɛlɛ yɛ̀ɛ Kìtɛntɛ̀ɛ̀n ki Nghay ki ti ki kalàg,

⁸ kɛ̀ ɓi tèèsi mɛrem min fɛlɛ yɛ̀ɛ ɗi ɓì kìghà nyi ntoòtèɗ ŋwos anɛ ɓì fèèghrɛ̀ngà nyi ɓireɓ,

⁹ jàŋ inɛ ɓɛ̀seŋi ɓin ɓɛ feèghrɛ̀ngà mɛ̀ lɛ ɓɛɛ ghɛǹ com ki ǹɗì lɛ ǹkì, nsoò yɛ̀ɛ ɓɛ ghɛngà ɓìɓan ɓìcèm ɓi ǹkìghà ɓi bèg mɛ̀tin mɛɓɛɛ̀.

¹⁰ Fɔɔnnɛ ǹwokà bim ri gbàà ì ɓum ìnɛ̀n, ǹkpaa lɛ: mɛ̀rem maa mɛɛ̀ pwààpwaa ɓɔ cààmɛ̀n kìcèm, ɓɛ wokà ɓi ɓiɓan ɓi ǹtɔtɔ̀kà ɓɔ lɛ ɓɛɛ ki.

¹¹ Fɔɔnnɛ ǹkànɛ̀ngà bɛ̀ɗ ɓi bim inɛ ǹwokà, ǹkpaa lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ, nsoò ŋwos.

¹² Ɓɛ̀geni ɓɛ̀m, konaaghna lɛ, ŋwaàdɛŋ ànɛ ɓi mìni kɛ̀ɛ ɓa ri nɗem wu ɓeɓtɛn, wu wu ri kɛ̀ɛ̀ rìgherɛ̀n ɓi lèg ànɛ a ghasɛn ɗì Bɛ̀ll ànɛ à rì cem.

¹³ Kìɓan kifog, reerèɓɓɛɛna ɓɛ̀ŋwos ɓɛ̀cèm à kpaŋ cààmɛ̀n kìcèm ki ɓɛ ri lɛ ɓɛ kalì lɛ gɛɛ̀nɛ, di fɔɔnnɛ kìbog ki ɓi mìni kɛ̀ kɛɛ̀ càrɛn lɛ nɗem wii wɛɛ teɗ ɓiɗùm di kìɓe kaa yègsi nyi.

¹⁴ Lɛ tì rì ɓum ɓɛ ɓɛɛ̀ kɛ̀ɛ̀kɛɛ nɗaŋ ri Kiris, di tì sììrɛɛ lɛ, ti ɓeŋ̀ ǹtyweeyi wu tì ɓaghà rì wɔ a rìtumɛ̀n.

¹⁵ Lɔŋ yɛ̀ɛ ki ri kìkaliyɛn lɛ: I ɓì woogh jɛ̀ɛ̀ yìì gɛɛ̀nɛ, kɛ̀ ɓi tèèsi mɛrem fɛlɛ yɛ̀ɛ ɗi ɓì kìghà nyi ǹtoòtèɗ.

¹⁶ Ɓɛ̀ghɛn ɓɛɛ wokà kɔm jɛ̀ɛ̀ ì Bɛ̀ll ɓɛ ki kì nyi ntoòtèɗ? Lɔŋ ɓum ɓɛ̀cèm ɓɛ Moyis à kpaŋzighày a Egiɓtɛn.

¹⁷ Ɓɛ̀roɓɛ be ɓɛɛ̀ɓɛ à wokà bim ri ɓɔ à kpaŋ bèg mɛ̀tin mɛɓɛɛ̀? À wokà bim ɗi ɓumɓɛ ɓɛ kighà kìɓe, ɓɔ yɛɛ wuwùghà di ɓɛɛ̀ kpìkpi wɔɔ ɓireɓ.

¹⁸ Ɓɛ̀ghɛn ɓɛɛ̀ɓɛ à kànɛ̀ngà bɛ̀ɗ lɛ ɓaa ɗiŋi ɓi ɓi jàŋ inɛ à pègsɛ̀ngà lɛ ɓɛ ri fɔɔsɛn wɔɔ? Lɔŋ ɓumɓɛ ɓɛ kighà nyi ǹtoòtèɗ ɓɛɛ̀ɓɛ à kpaaghà.

¹⁹ Ɓìsii ghɛɛ gì lɛ, ɓɛ ɓaghà ɓi lɛ ɓɛ ɗiŋì ɓi jàŋ i rìfɔɔsɛ̀n ìnɛ̀n ɓisuulɛ ɓɛ ɓaghà ɓi ri rìgherɛ̀n.