EBIREEGH 2 - Bafia Nouveau Testament

Gɛn à gòri

¹ Kìɓan kiǹ kɛɛ̀ki tì ghɛ̀ɛ̀sɛɛ kì ɓiisɛɛ ki ɓaà ɓɛ̀ sììrɛn ɓi ɓìɓan ɓi tì wokà di tì kɔ̀ni ɓi lɛ, ti ɗyaŋ.

² Ɓisuulɛ kìɓan ki ɓum ɓɛ titom ɓɛ kpaaghà ki kilɛ̀ngà; fɔɔnnɛ mum bimiɗ ànɛ à fogà ɓi nɗem rì kìɓan kiǹ nsoò lɛ, à ɓèn kìwoògh com ki ɓɛ kpaaghà, à tekà deɓ inɛ ì ghɛ̀ɛ̀sɛ̀ngà rì rìkì ɗii.

³ Nni lannɛ tì rì ɓiì kìi lɛ tyɛ̀ ki teɗ deɓ di tì sɛɛtii coo gòri yɛ̀ɛ ìnɛ? Kan nyimiɗ a lokà kìkpaà kìɓan ki gòri ìnɛ̀n, fɔɔnnɛ ɓumɓɛ ɓɛ wokà di a kpaakpàà ɓɛ siìràkà ɓìsi kì rèsii saaɗ ànɛ miì.

⁴ Bɛ̀ll à ki sìisiìràg rìkalì ɗyaa lɛ rì ɓìrèmzɛnà, rì ɓɛ̀koŋnyoo ɓɛ ɓiɓan rì dàm mɛ̀kuu mɛ̀kuu, rì mɛ̀fafàà mɛ Kitɛntɛ̀ɛ̀n ki Nghay mɛ a kàakàɓsì lɔŋ yɛ̀ɛ ki kɔni nyi.

⁵ Ɓisuulɛ, àa ɓum ɓɛ titom ɓɛɛ̀ɓɛ Bɛ̀ll à faghà nyɔnyɔn à zi anɛ a yùyuiy lɛ ɓɛɛ lami; nyɔnyɔn à zi anɛ̀n nnɛ tì kpaakpàà.

⁶ Kɔlɛ ŋwaàdɛŋ à kpaaghà jàŋ idɛŋ ɓi kaàtà à Bɛ̀ll lɛ: Mum innɛ cɛ, ɓi ɗi lɛ wɔ̀ Bɛ̀ll u yitag nyi? Nsoò man à mum, à rì cɛ lɛ u teki ntɔɓ ɓisu wìì?

⁷ Ù sɛɛ̀dìghà rìɓa ɗii ɓi maa cààmɛ̀n, lɛ ɗyɛ̀ kɛɛ̀ kpaŋdi yɛ̀ɛ ɗi ɓum ɓɛ titom, ù waasì nyi lɛ, rì rìkem, rì nnyaasɛ̀n fɛlɛ yɛ̀ɛ tàm à mɛ̀fòm.

⁸ Ù fogà nyi ɓyom ɓìcèm a mɛ̀kòò lɛ a lami ɓyɔ̀. Yɛ̀ɛ ɓɛɛ̀ kalag lɛ: À faghà nyi ìtèɗ wulɛ, a lami ɓyom ɓìcèm fɔlɔɔ a rèsii lɛ: À faghà mum ìtèɗ wulɛ a lami ɓyom ɓìcèm kɛ̀ɛ̀ ki ki lɔɔ̀sɛɛ. Nsoò fɔlɔɔ, ɓìsii ka ghɛn ɓi ɓigomìnɛ lɛ, ɓyom ɓìcèm ɓi ti ɓi rìlàmì ɗi mum.

⁹ Kìɓan kifog, roànɛ ɓɛ sɛɛ̀dìghà rìɓa ɗii ɓi maa cààmɛ̀n lɛ ɗyɛ̀ kɛɛ̀ kpaŋdi yɛ̀ɛ ɗi ɓum ɓɛ titom yɛɛ ri Yeesus, nyi nnɛ ti seesee yɛ̀ɛ ɓɛ mɛ waasi rìkem, rì ǹnyaasɛ̀n ɓisuu riwù ɗi à wughà; lɛ à wughà ɓisuu ɓum ɓɛ̀cèm lɛ geesɛ̀n ì Bɛ̀ll.

¹⁰ Ɓisuulɛ Bɛ̀ll ànɛ à kìghà ɓyom ɓìcèm, ànɛ à ki rì rì ɓyom ɓìcèm, nnyɛɛ̀ ki kìghà lɛ ɓɔn lɛɛ̀gwey ɓɛɛ teɗ gàɓ ɓi rìkem ɗii, ɓi bee ì rìkɛŋ, a ki lɛ Yeesus ànɛ à rì ǹto wu gòri yàà, a kpaŋ ɓi nɗɛli wu, kɛ̀ɛ ɓa ri kìɓan ki fenɛn a lɔ̀ŋkii.

¹¹ Ɓisuulɛ rì ǹtɛɛ̀zì ɓum, rì ɓumɓɛ à tɛɛ̀zii ɓɛ fuu yì yɛ̀ɛ mum bog, ɓisu wìn miì nnɛ ki yeesii ɓi nyi lɛ a regi ɓɔ lɛ, ɓɛ̀geni ɓii,

¹² yɛ̀ɛ à kpaaghà lɛ: Ǹɗì ɓiì ghagsii ɓɛgeni ɓɛ̀m ɗii ɗyɔɔ, ǹkemzì wɔ̀ ɓi nyìinyìm à ǹtaŋzɛ̀n.

¹³ Rì tì lɛ: Ǹɗì ɓiì faà ǹtyweeyi wɛm̀ ɗì nyi. Rì tì lɛ: Rì mɛ̀ rì ɓɔn ɓɛ Bɛ̀ll à faghà mɛ̀, ɓìsi ɓɛɛ̀ ɓɛ lɛ̀.

¹⁴ Nni fɔlɔɔ nnɛ yɛ̀ɛ ɓɔn ɓɛ ri lɛ, rì nyoo ì mɛ̀mùù, rì bwaɓ, nyi girig à tekà nyoo ìnɛ̀n lɛ, di a ghaàsi Satàn ànɛ à rì rì ìtèɗ wu riwù com ki zɛy, ɓi rìwu ɗi à wughà

¹⁵ à ki ghɛɓsi ɓum ɓɛ̀cèm ɓɛ ìris wu riwù wu fogà ɓi rìkpàn cɛɓ kaa kicèm.

¹⁶ Ɓisuulɛ, àa ɓum ɓɛ titom ɓɛɛ̀ɓɛ à yùu ɓà kìghɛɓsii, lɔŋ dòò yi Abiraham.

¹⁷ Kìɓan kiǹ kɛɛ̀ki à ghɛ̀ɛ̀sɛ̀ngà kì pisɛɛ ɓɛgeni bee yicèm lɛ, di a ɓa rìfòm ɗi ɓɛpìrɛɛtìrɛ̀ ɗi ɗi ri rì nɗem wu nyìighnyìg, ɗi kikì kìsay ki Bɛ̀ll lɔŋ yɛ̀ɛ ki ghɛɛ̀sɛɛ, lɛ ɗyɛɛ soò ɓìɓe ɓi ɓum ɓɛ kilɔ̀ŋ.

¹⁸ Lɛ yɛ̀ɛ nyimiɗ a tulɛ̀ngà rì mɛ̀fèèghrɛn, à wog rìkɛŋ à rì lɛ à ghɛɓsì ɓumɓɛ ɓɛ ri ɓi mɛ̀fèèghrɛn.