EBIREEGH 13 - Bafia Nouveau Testament

Ɓìɓan ɓi ɓyɛɛ̀ kɔ̀ngi Bɛ̀ll

¹ Sììrɛɛna ɓi nkɔ̀nɛ̀n à rìgeni.

² Kɛ̀ ɓi ɗimzɛn kiɓan ki lɛ ɓi ghaɓki ɓɛ̀kèn lɛ syeesyee; ɓisuulɛ ɓum ɓɛdɛŋ ɓɛ laasìghà ɓum ɓɛ titom ɓɛ̀ kɛɛ̀ yi ɓi kìsyɔ̀ɔ̀ kiǹ.

³ Ɓì yitàg ɓìmbùŋ yɛ̀ɛ ɓɛɛ̀ kali lɛ ɓì rì ɓi naà-zày ǹɗaŋ ri ɓɔ; ɓì yitàg girig ɓɛ̀roɓɛ ɓum ɓɛɛ̀ tɔtɔ̀ɓ, ɓisuulɛ mìni girig ɓì rì rì nyoo.

⁴ Ɓum ɓɛ̀cèm ɓɛ ghɛɛ̀sɛɛ kì kuughraagh riwɛy; naa ì rìwɛy ì ɓa kɛ̀ɛ̀ ɓìɓan ɓi tifin ɓisuulɛ Bɛ̀ll à rì ɓìi yɔ̀mi ɓum ɓɛ kitɔɓi rì ɓɛ̀kìì-tìsɔ̀mɔ̀g.

⁵ Kìsee ki mɔ̀ɔ̀ni kɛ̀ kɛɛ̀ làmì ɓyɛɓ ɓin; nyààrɛɛna rì gàɓ ì ɓyom inɛ ɓì rì rì yɔ̀, ɓisuulɛ Bɛ̀ll nyimiɗ a kpaaghi lɛ: Màa càɗ ɓi wɔ, kɛ̀ɛ nki rini wɔ.

⁶ Fɔɔnnɛ tì rì min lɛ tì kpaa rì ǹtyweeyi lɛ: Kan à rì roànɛ à ti à ghɛɓsàg mɛ̀, ǹ-yin lɛ ǹɗisì com, mum à rì lɛ à kì mɛ̀ cɛ?

⁷ Yitiina ɓumɓɛ ɓɛ lokà mìni kì kɛ̀ɛkɛɛ̀sì, ɓɛɛ wogsìghà mìni jɛ̀ɛ̀ ì Bɛ̀ll, ɓì fiɓì rìsyɔn ɗi cɛɓ kaa, ɓì nɔ̀ɔ̀tì ìkòò waa wu righerɛ̀n.

⁸ Yeesus Kiris à rì lɔŋ com kìfog, yɛ̀ɛ rìŋkò, yɛ̀ɛ gɛɛ̀nɛ, à kpaŋ fìɗyàɓ fikɔ̀ɔ̀.

⁹ Kɛ̀ ɓi càrɛn lɛ mɛ̀rèsàg mɛ̀kuu mɛ̀kuu mɛ mɛ riì tìràɓ, mɛɛ ɗimzi mìni bee, lɛ ki rɔɔtɛɛ lɛ ǹɗem wɛɛ teɗ ìtèɗ lɛ geesɛ̀n ì Bɛ̀ll, à cee ɓìsyɔ̀ɔ̀ ɓi ɓi komi ɓìɗilàg ɓi ɓi ghɛɓsìghà ɓi ɓumɓɛ ɓɛ falɛ̀ngà miì nsoò ɓi bee idɛŋ.

¹⁰ Ɓɛ̀pìrɛɛtìrɛ̀ ɓɛ ɓɛɛ̀ kìki kisay ɓi kìnuugh ɓɛ yin ɗi ìtèɗ wulɛ ɓɛ ɗi ɓyom ɓi ɓɛ funɛɛ ɓi jàŋ yis ì rìtɔ̀ngì ɗi ɓyom.

¹¹ Nlàmì ɓɛ̀pìrɛɛtìrɛ̀ àgwey à ti à kɛ̀ngì rì bwaɓ yi ɓituwe ɓi jàŋ inɛ ì pɔ̀ɔ̀zii kì ɓaà kìcèlì, lɛ yɛɛ ɓa yɛ̀ɛ com ki à faa ɓisuu ripisì ɗi ɓiɓe; wɔ̀lɛ ɓɛ nti ɓɛ tɔngì ɓìloŋ ɓi ɓituwe ɓiǹ fìràɓ ri jàŋ inɛ ɓum ɓɛ ɓaghà.

¹² Kìɓan kiǹ kɛɛ̀ki Yeesus à wughà girig fìràɓ ɗi bàn, lɛ a tɛɛ̀zi ɓum ɓɛ kilɔ̀ŋ rì bwaɓ yii yɔmìɗ.

¹³ Nni ti kɛ̀ɛna min a lɔ̀ŋkii, tì kpaŋdɛ̀n daŋdarààŋ rì jàŋ inɛ ɓum ɓɛ ri, tì ki kàɓɓɛn ntoòrìɗ wii.

¹⁴ Ɓisuulɛ tì yin fɛ rì bàn ì fìɗyàɓ fikɔ̀ɔ̀ ɓi ziinɛ, ti kaakaa lɔŋ bàn ìnɛ ì ri yù.

¹⁵ Ti faana min Bɛ̀ll rìkem ɓi sìg à ɓyom ɓi tì fùnɛɛ ɓi Yeesus, fɔlɔɔ yɛɛ ri rìfa ɗi ɗyɛɛ̀ rèeresɛ̀n ɓi myɔm mɛ mɛɛ̀ kpaakpagsɛ̀n nyi lɛ à rì Kan wìs.

¹⁶ Kɛ̀ ɓi ɗimzɛn rikì ɗi kirɔɔ rì rìghɛɛ̀ghɛ̀ɓsɛ̀n ɗi ɓi nyìinyìm wìn, lɛ rìkì ɗiǹ ɗyɛɛ ti ɗi rɔɔghì Bɛ̀ll, ɗi ɓa ɓi bàlì ì ɓyom ɓi ɓì faa nyi.

¹⁷ Kìina ɓumɓɛ ɓɛɛ̀ kɛ̀ɛkɛɛ̀sì mìni mɛ̀wog ɓì fa ɓɔ bɔgsɛ̀n, ɓisuulɛ ɓɛɛ̀ ɓɔmɓɔm kirɔɔ ki ɓi mɛ̀ghay miǹ, lɛ ɓɛ ri ɓàaghgɛ kìɓan ki miì ɓi mis mɛ Bɛ̀ll; kìina lɛ ɓɛɛ kiki kìsay kiǹ ɗì kìnyàà, àa rì bemeg lɛ fɔlɔɔ àa ghɛɓsi ɓi mini bimiɗ à com.

Ɓìtògsɛ̀n, rì rìmàŋ ɗi siitòn

¹⁸ Ɓì ɓɔ̀ŋzàg ɓisu wis, lɛ tì konaagh kì yiì lɛ mɛ̀rem mis mɛ ri lɛ sɛɛghi sɛɛghi, rì rìkɔ̀n ɗi lɛ ti ghɛghɛɓ ɓi ɓɛ̀saaɗ ɓi ɓìɓan ɓìcèm.

¹⁹ Ǹtɔɔgh mìni kìɓan kiǹ, ǹsììrɛ̀n miì lɛ di fɔɔnnɛ Bɛ̀ll a pɛɛ̀zi mɛ̀ a lɔ̀ŋkin lɛ fyɛ̀ɗ.

²⁰ Bɛ̀ll à fyòoog ànɛ à ghèmzìghày coo mɓèŋì-jɔ̀ɔ̀ ànɛ lɛ Kan wìs Yeesus a ɓìloŋ rì bwaɓ yi riràrɛ̀n ɗi fiɗyàɓ fikɔ̀ɔ̀,

²¹ a fa mìni ìtèɗ wulɛ ɓi kiki ɓìɓan ɓi syeesyee lɛ ɓi roòzi rikɔ̀n ɗii; a ki lɛ, ɓìɓan ɓi ɓyɛɛ̀ rɔɔghi nyi ɓyɛɛ ghɛnɛn ɓi ɓìsi lɛ Yeesus Kiris ànɛ à ghɛ̀ɛ̀sɛɛ ɗì rìkem fìɗyàɓ fikɔ̀ɔ̀ ri fìɗyàɓ fikɔ̀ɔ̀ Ààmɛ̀n.

²² Ɓɔɔsoŋ̀, ǹtɔɔgh mìni lɛ ɓi niɗ mɛ̀rem, ɓì teɗ ɓìɓan ɓi ɓyɛɛ fa mìni ìtèɗ ɓi mɛ̀rem ɓisuulɛ kaàtà ànɛ ǹkàniì mìni à ràɓi ɓi.

²³ Yiina lɛ, ɓɛ ncàri Timote à geni wìs anɛ àa nɗì m̀ɓamɓanɛn, i à fyaŋzii fɛ kì kpaŋì, di tì rì mìni ɓiì yùu ki ghɛɛ̀ ǹɗaŋ lɛ rì mɛ̀ rì nyi.

²⁴ Ɓìtògsàg ɓɛ̀rɛlì asu ɓiǹ, rì ɓɛ̀gherɛ̀n ɓɛ̀cèm; ɓɛ̀roɓɛ a Italii ɓɛ togsaaghi mìni.

²⁵ Geesɛ̀n ì Bɛ̀ll yɛ̀ɛ ɓa rì mìni ɓɛ̀sɛ̀ɛ̀ ɓɛ̀cèm.