EBIREEGH 12 - Bafia Nouveau Testament

¹ Nni fɔɔnnɛ ɓìsi girig, yɛ̀ɛ tì ti ɓɛ̀rìɓiyɛn ri ǹkun wu ɓɛwusìnɛ̀ɗ yɛ̀ɛ wu, tì ghɛ̀ɛ̀sɛɛ min ki càri com kìcèm ki ki ri ɓìsi ǹtɛ̀g, rì kìɓe ki ki ti kɛ̀ kɛɛ̀ tɔg ɓisi kìlaataagh, tì sììrɛ̀n ɓi mɛ̀ree mɛ ɓɛɛ̀ tɔtɔg ɓisi lɛ ti ghɛŋì.

² Tì seesèè lɔŋ Yeesus ànɛ rìgherɛ̀n ɗis ɗi sasaghii nto ɓi nyi, à tumɛ̀n a rìtumɛ̀n à kpaŋ a rìsugtɛ̀n. Yeesus ànɛ̀n yɛɛ cenɛ̀ngà rìwu ɗi ɓi Kɔrɔs, kɛ̀ɛ tɔg com rì ntoòrìɗ wu à wokà, lɛ à seesèèghà kìrɔɔ ki ki ɓoŋɓòŋgà nyi; ɓi gomìnɛ, à kɔ̀kɔrii ɓi weèlem à ìkɔ̀ɔ̀ wu rilàmì wu Bɛ̀ll.

Kìsììrì ki ɓi rìgherɛ̀n

³ Terina kìrèmzɛnà ɓi roànɛ à cenɛ̀ngà lɛ ɓɛ̀kìì-kìɓe ɓɛɛ̀ ɗuù fɔlɔɔ ri nyi, di fɔɔnnɛ ɓi ɓa kɛ̀ ɓi càrɛn lɛ kìfɔlìmùm kɛɛ teɗ mìni mɛ̀rem.

⁴ Ɓi wɛ̀y win wu rì kìɓe, ɓì ka ɗuù ɓi à kpaŋ ɓi jàŋ inɛ lɛ ɓi wu,

⁵ ɓì mɛ ɗimzɛn jɛ̀ɛ̀ yi mɛfegsɛn yi Bɛ̀ll a kpaaghi mini fɛlɛ yɛ̀ɛ ɓɔn ɓii lɛ: Man wɛm̀ kɔ̀ɔ sɛɛti zàà ìnɛ Kan à ɓoogh wɔ̀, kìfɔlìmùm kɛ̀ kɛɛ̀ ɓan wɔ di à fwààdɛɛ wɔ̀.

⁶ Ɓisuulɛ Kan à tì à falàg ŋwaànɛ à keesii ǹtɔɓ à ki ɓoki roànɛ à yii lɛ à rì nyi man.

⁷ Cenɛɛna mɛ̀tɔɓ, Bɛ̀ll a kìki mini fɔlɔɔ lɛ ɓì rì ɓɔn ɓii. Man àbe nnɛ seŋi à ti kɛ̀ɛ ɓog?

⁸ I à kuli ɓi mini yɛ̀ɛ à ti à kwiiyì ɓɔn ɓii ɓɛ̀cèm, di ɓì yin ɓɛkɔɔ̀kɔɔ̀ ɓii ɓɛ ɓɔn, ɓɛ à yali ɓi ɓɛ̀y.

⁹ Yɛ̀ɛ ɓɛ̀seŋi ɓis ɓɛ ɓi mɛ̀mùù ɓɛ mɓokì ɓìsi tì ki kìki ɓɔ mɛ̀wog, tì ghɛ̀ɛ̀sɛɛ min lɛ tì pɔ̀ɔ̀zì kì woògh Seŋi ànɛ ɓi mɛ̀ghay, lɛ ti ɓa rì cɛɓ.

¹⁰ Ɓɛ̀seŋi ɓis ɓɛ ɓɛ yaayii ɓìsi ɓɛ nti ɓɛ falàg ɓìsi ǹtɔɓ ɓi maa cààmɛ̀n lɔŋ yɛ̀ɛ ɓɛ nghɛngì lɛ ki ghɛɛ̀sɛɛ, wɔ̀lɛ Bɛ̀ll à ti à ɓokì ɓìsi ɓi kìrɔɔ kis lɛ di ti ɓa rì gàɓ ɓi rìɓa ɗii ɗi à rì ǹtɛnɛn.

¹¹ Ki ri lɔŋ saaɗ lɛ ǹtɔɓ wucèm wu ti wu lokì kìghɛnɛɛ yɛ̀ɛ kìɓan ki kɛɛ wogsi mum bim, wɛ̀ kɛɛ̀ ɓa kiɓan ki kinyàà, kìɓan kifog, wu ti wu siitàg kì faà ɓìɗùn ɓi cɛɓ ki fyòoog, rì ki saaɗ.

¹² Kìɓan kiǹ kɛɛ̀ki ɓì ghɛ̀ɛ̀sɛɛ kì tèèsii ɓyàg ɓin ɓi ɓyaa nyɔŋì, rì mɛ̀ɗu min mɛ maa kpɔ̀gtì.

¹³ Mɛ̀kòò min mɛɛ nɔɔ̀ti lɔŋ bee yi yi ri lɛ saaɗ di fɔɔnnɛ ìkòò wucèm wu wu ri rì kìlɛm wɛ̀ kɛɛ̀ nìmɓɛn, wɛɛ wɔǹ lɔŋ nwɔ̀nɛn.

¹⁴ Kaana lɛ ɓi ghɛɓ lɛ fyòoog rì ɓum ɓɛ̀cèm, ɓì ki ɓa ri cɛɓ ki ki ri kìtɛnɛn; lɛ ŋwaànɛ cɛɓ kìn ki ri ɓiì kaarɛɛ a lɔ̀ŋkii, àa ghɛn ɓi Kan.

¹⁵ Ɓì konàg lɛ ŋwaàdɛŋ kɛ̀ɛ ɓa lɛ à rèèghrɛ̀n geesɛ̀n ì Bɛ̀ll, nsoò lɛ gàŋ i ǹlòlolɛn yɛ̀ kɛɛ̀ ròò ǹɗuŋ, lɛ yɛ̀ɛ ɓuùsi jàŋ, ì ki yeesi ɓum lɛɛ̀gwey ri ìrɔ̀g wu yɔ̀.

¹⁶ Ɓì konàg lɛ ŋwaàdɛŋ kɛ̀ɛ ɓa ri cɛɓ ki tɔɔtɔɓki, nsoò lɛ a ɓa rì zɛɛtɛn ɓi ɓyom ɓi ɓi ri kìcèlì fɛlɛ yɛ̀ɛ Eso ànɛ à kàɓkà ìkɔ̀ɔ̀ wii wu risɛ̀ɛ̀mɛn ɓisuu càà ki ɓiɗilàg.

¹⁷ Ajɛ̀m ìnɛn, yɛ̀ɛ à mɛɛ̀ kaaghà lɛ seŋi a maŋ nyi, nni à nàɓkà nyi lɛ bee inɛ à ɓaghà lɛ à lɔ̀gtì tì kìɓan ki à kìghà ì ɓaghà ɓi. Nsoò yɛ̀ɛ à kaakààghà bee fɔlɔɔ di a rènɗèn.

¹⁸ Lɛ àa dòn ìnɛ mum à rì lɛ à kòm yɛɛ̀nɛ ɓì tyòŋdɛ̀ngà jàŋbog rì yɔ̀, dòn ì Sinayi ìnɛ ì ɓaghà rì ɗuu, rì tìfììfìnà, rì birìm ì ɓìɓɓìɓ, rì bɛ̀ɓ

¹⁹ rì gom ì ɗyam, rì gom ì jɛ̀ɛ̀; ɓumɓɛ ɓɛ wokà gom ìnɛ̀n, ɓɛ ɓeèdɛ̀ngà lɛ ɓɛɛ kɛǹ asu rì rìwowòg ɗi jɛ̀ɛ̀ ìnɛn.

²⁰ Ɓisuulɛ ɓɛ ɓaghà ɓi lɛ ɓɛ cenɛ̀n ǹsiŋdɛn wulɛ: Nsoò nyàm yàa kòmi dòn ìnɛn, ɓɛ ghɛɛ̀sɛɛ yɔ̀ ki rogii gɔ̀g, ɓɛ wey yɔ̀.

²¹ Kìɓan kiǹ ki koŋɗɛ̀ngà nyoo lɛɛ̀gwey ɓi rìseesèè ɓi lèg ànɛ lɛ Moyis à kpaghà lɛ ǹɗisii, ǹki nìŋdɛn lɛ kpàg kpàg kpàg.

²² Wɔ̀lɛ, ɓìi nkɛ̀ɛ jàŋbog rì dòn ì Siyon, jàŋbog rì bàn ì Bɛ̀ll ànɛ à rì cem, Yorisalɛm ànɛ aɗyoo, rì ɓum ɓɛ titom ɓìtuu ɓìtuu,

²³ ɓìi nkɛ̀ɛ jàŋbog rì ǹtaŋzɛn wu ɓɔn ɓɛ Bɛ̀ll ɓɛ ǹtonto, ɓɛ mii maa mɛ ri mɛ̀ kànɛn ɓi ɗyoo ɓi ɗùm; ɓìi nkɛɛ̀ jàŋbog rì Bɛ̀ll ànɛ à rì ɓiì yɔ̀mi ɓum ɓɛ̀cèm; ɓìi nkɛ̀ɛ jàŋbog rì mɛ̀ghay mɛ mɛ ri lɛ saaɗ, mɛ mɛ ti lɛ syeesyee, kɛ̀ɛ̀ com ki ɓɛ ri lɛ ɓɛ fen ɓi mɔ.

²⁴ Ɓìi nkɛɛ̀ jàŋbog rì Yeesus ànɛ à rì ɓi nyìinyìm à nyɔɔnyɔn à rìràrɛ̀n ànɛ lɛ rì Bɛ̀ll rì ɓum, ànɛ bwaɓ yii yi yi kpagà yɛɛ̀ tòtòg yi cee yi Aɓɛl.

²⁵ Ɓì konàg lɛ kɛ̀ ɓi ɓèn kiwoògh jɛ̀ɛ̀ ì roànɛ a tòtòg, ɓisuulɛ i ɓɛ̀roɓɛ ɓɛ ɓengà kì woògh jɛ̀ɛ̀ ì roànɛ à rɔ̀ɔ̀rɔ̀gsɛ̀ngà ɓumɓɛ ɓi ziinɛ, ɓɛ rɔmɛ̀ngà ɓi deɓ, gɛ̀n yaŋ ri ɓìsi, cààmɛ̀n ki tì lɔ̀ghii ɓyàs rì roànɛ a rɔɔrɔgsɛ̀n yì ɓìsi ɓi ɗyoo ɓi ɗùm.

²⁶ Nyi ànɛ jɛ̀ɛ̀ yìì i nyɛ̀ŋzìghà zi ɓi mɛ̀ru mɛ̀n, nnyɛɛ mɛ fa nkàg ɓi gomìnɛ lɛ: Àa lɔŋ zi yɔ̀ ri yɔ̀ yɛɛ̀nɛ ǹɗì ɓiì nyɛ̀ŋzii, m̀ɓiì nyɛ̀ŋzii ti girig gɛ̀n bogtɛ̀n lɛ rì ɗyoo miì.

²⁷ Jɛ̀ɛ̀ ìnɛ lɛ: Gɛ̀n bogtɛ̀n inɛ̀n ì rèsii lɛ: ɓyom ɓi Bɛ̀ll à kìghà ɓi ɓiì nyɛ̀ŋɗɛɛ, ɓi silàg, fɔɔnnɛ ɓyom ɓi ɓi yin lɛ ɓi kpig ɓyɛɛ ri rɔ̀ɓ.

²⁸ Nni ti faana min Bɛ̀ll ɓìtògsɛ̀n yɛ̀ɛ tì teri kìlɔ̀ŋ ki ki yin lɛ ki kpig, tì ɓɔgsì nyi rìɓɔgsì ɗi ɗi ri lɛ ɗi rɔɔ nyi, rì mɛ̀wog, rì ìris.

²⁹ Ɓisuulɛ Bɛ̀ll wìs a rì girig yɛ̀ɛ ɗuu ɗi ɗyɛɛ̀ ɗiighɗigsì lɛ lɛɛ̀ lɛɛ̀.