EBIREEGH 11 - Bafia Nouveau Testament

Rìgherɛ̀n ɗi ɓumɓɛ ɓi fìɗyàɓ fi bee

¹ Rìgherɛ̀n ɗi ri rìyi ɗi mum à yii saaɗ ànɛ ɓi ɓìɓan ɓi à tyweeyii, ɗi ɓa tì com ki kɛɛ̀ rèresi mum ɓɛ̀saaɗ ɓɛ ɓi ɓìɓan ɓi à ghɛɛ ɓì.

² Ɓumɓɛ abɛ̀y ɓɛ tekà mɛ̀sɛɛ̀ghsɛɛgh lɛ rìgherɛ̀n ɗyaa.

³ Lɛ rìgherɛ̀n nnɛ tì ti tì yilàg lɛ Bɛ̀ll à kìghà zi ri jɛ̀ɛ̀ yìì, ɓi lèg ànɛ lɛ ɓyom ɓìcèm ɓi ti seesee ɓi kilɛ̀ngà rì com ki ŋwaà ghɛɛ ɓì.

⁴ Lɛ rìgherɛ̀n nnɛ Aɓɛl à ɓɔgsìghà Bɛ̀ll rì ɓìfùna ɓi ɓi cee ɓi Kaɛŋ; lɛ rìgherɛ̀n ɗii, Bɛ̀ll à kpaaghà Aɓɛl lɛ à rì ŋwaà saaɗ, Bɛ̀ll nyimiɗ a sɛkà rìfa ɗii, ɗyɛɛ kii lɛ a ɓaɓa à tòtòg, nsoò yɛ̀ɛ à mɛ wu.

⁵ Lɛ rìgherɛ̀n nnɛ Enɔg à ɓɔkà yɛ̀ɛ Bɛ̀ll cem, kɛ̀ɛ yi com ki lɛ rìwu; ŋwaàdɛŋ à ghɛɛ̀dìghà ɓi nyi ɓisuulɛ Bɛ̀ll à ɓɔkà rì nyi aɗyoo; di ɓɛ ka ɓɔg ɓi ri nyi aɗyoo, Enɔg à kìghà lɛ Bɛ̀ll a wog kìrɔɔ rì nyi.

⁶ Wɔ̀lɛ i mum àrì kɛ̀ɛ̀ rìgherɛ̀n, à yin lɛ à rɔɔ Bɛ̀ll; ŋwaànɛ à tyɛ̀ɛ̀tɛɛ Bɛ̀ll jàŋbog, à ghɛ̀ɛ̀sɛɛ kì gherɛɛ lɛ Bɛ̀ll à rì wɔɔ, à ki gherɛn ti lɛ Bɛ̀ll à ti à lèɓkì ɓumɓɛ ɓɛ ti ɓɛ kaaghì nyi.

⁷ Lɛ rìgherɛ̀n nnɛ Nowe à kìghà lɛ, yɛ̀ɛ Bɛ̀ll à lokà nyi kì kpaa kìɓan ki ɓɛ ɓaghà di ɓɛ ka ghɛn ɓi, nni à risìghà, à wog rìkpaa ɗi Bɛ̀ll, à toŋ kìkɔm lɛ a ghɛɓsi naa yìì i ɓum; fɔlɔɔ nnɛ rìgherɛ̀n ɗi kighà Nowe lɛ a fa ziinɛ bɛ̀lɛn, à fɔ̀n rìɓa ɗi mum à rì lɛ à ɓa lɛ saaɗ ɓi mis mɛ Bɛ̀ll, lɛ rìgherɛ̀n.

⁸ Lɛ rìgherɛ̀n innɛ Abiraham à kìghà Bɛ̀ll mɛ̀wog yɛ̀ɛ à reŋìghà nyi, à pɛ̀sɛ̀n ɓi kìlɔ̀ŋ kii lɛ à kɛ̀ɛ ɓi jàŋ inɛ Bɛ̀ll à rì nyi ɓiì faà. À kɛ̀ngà fɔlɔɔ kɛ̀ɛ yi jàŋ inɛ à kɛ̀ɛ.

⁹ Lɛ rìgherɛ̀n, nnɛ à ghɛghɛ̀ɓkà fɛlɛ yɛ̀ɛ ǹkèn ɓi ziinɛ Bɛ̀ll à siŋdɛ̀ngà lɛ à rì nyi ɓiì faà. Àa nkɔ̀ràg ɓi ɓìlaa, lɔŋ yɛ̀ɛ ɓɛ̀-Isag ɓɛɛ̀ Yakɔɓ ɓɛ Bɛ̀ll à faghà girig ǹkàg wɔm wiǹ.

¹⁰ Ɓisuulɛ Abiraham à ɓoŋɓòŋgà bàn ìnɛ Bɛ̀ll yɛɛ fekà yɛ̀ɛ ì rì lɛ ì toŋɗɛ̀n, nyimiɗ yɛɛ ki toŋ, yɔ̀ lɛ kpegkpeg.

¹¹ Lɛ rìgherɛ̀n innɛ, nsoò Sara à ɓaghà di à mɛ sɛ̀ɛ̀mɛ̀n, à ɓaghà rì ìtèɗ wulɛ a kiti boo ì mum, ɓisuulɛ à tyweeyàkà lɛ Bɛ̀ll à rì ɓiì roòzii nkàg wii.

¹² Kìɓan kiǹ kɛɛ̀ki kìbog ki mum ki ki ɓaghà di kaa tɔ̀gti kiǹ, ki kighà boo ìnɛ ì tèghɛɛ fɛlɛ yɛ̀ɛ tyɔɛy ti aɗyoo, nsoò lɛ yɛ̀ɛ sɛɛ̀sɛɛ anɛ ɓi bèn ì rìɓày à kìkòn ànɛ ɓɛ yin lɛ ɓɛ ɓay.

¹³ Lɔŋ ɓi rìgherɛ̀n innɛ ɓumɓɛ̀n ɓɛ̀cèm ɓɛ cuughà di ɓɛ ka teɗ ɓi ɓyom ɓi Bɛ̀ll à kàkà ɓɔ; kìɓan kifog ɓɛ ghɛngày ɓyɔ, ɓɛ ki nyààrɛn ri ɓyɔ di ɓi kakay fìràɓ, ɓɛ ki kpaa lɛ ɓɔɔ ri ɓɛ̀kèn ɓɛ ɓɛ ri ɓi rìghaàgh fɛ ɓi ziinɛ.

¹⁴ Ɓɛ̀roɓɛ ɓɛɛ̀ tòtog ɓɛǹ fɔlɔɔ, ɓɛɛ̀ rèresi lɛ tɛntɛ̀ɛ̀n lɛ: Ɓɛɛ̀ kaakaa kilɔ̀ŋ kidɛŋ.

¹⁵ I kɛɛ ɓa lɛ kìlɔ̀ŋ ki ɓɛ pɛsɛ̀ngày wɔɔ kɛɛ ɗiɗìghà ɓɔ ɓi nɗem, di ɓɛ ɓaghà lɛ ɓɛ ɓa rì cààmɛ̀n ki lɛ ɓɛɛ sugti wɔɔ.

¹⁶ Ɓi saaɗ à rìkpaa, kìlɔ̀ŋ ki ki cee kiǹ kɛɛ̀ki ɓɛ kɔnkɔ̀ngà, yɛɛlɔɔ lɛ, kìlɔ̀ŋ ki aɗyoo; kìɓan kiǹ kɛɛ̀ki Bɛ̀ll à yin lɛ à wog ǹtoòrìɗ lɛ ɓɛɛ reŋi nyi lɛ Bɛ̀ll wàà, ɓisuulɛ à pègsɛ̀ngà ɓɔ bimiɗ à bàn.

¹⁷ Lɛ rìgherɛ̀n innɛ Abiraham à fùnɛ̀ngà Isag di Bɛ̀ll à fèèghrɛɛ nyi; m̀bobog wìì a man nnɛ à fùnɛ̀ngà lɔɔ, kɔlɛ rì nyi nnɛ Bɛ̀ll à faghà ǹkàg.

¹⁸ À kpaa nyi lɛ: Ɓi Isag nnɛ ù ɓaagɛ rì boo ì mum ìnɛ ɓɛ ɓɛsàg rì wɔ̀.

¹⁹ Abiraham à ɓaghà rì fèg ànɛ lɛ Bɛ̀ll à rì rì ìtèɗ wulɛ, nsoò mum àa wii, à ghèmzì nyi, fɔɔnnɛ ɓɛ pɛɛ̀zìghà nyi man wiì; rìkuu ɗi kifèèghrɛnà ki righèmɓɛ̀n ɗi ɓiloŋ, kɛɛ ri lɔɔ.

²⁰ Lɛ rìgherɛ̀n innɛ Isag à màgà lɛ rì Yakɔɓ, rì Eso ɓisuu ɓiɓan ɓi ɓi mɛ̀ru mɛ beèbɛ̀y.

²¹ Lɛ rìgherɛ̀n innɛ Yakɔɓ à màgà ɓɔn ɓɛ Yoosɛɓ ɓɛ̀cèm lɛ bog bòg bog, di à ti ɓiì wiì, à tuŋì ɓi nto wu kigeŋ ki àa mɓèmdàg miì, à ɓɔgsì Bɛ̀ll.

²² Lɛ rìgherɛ̀n innɛ Yoosɛɓ à ɓùgà kìɓan ki rìpɛ̀sɛ̀n ɗi ɓɔn ɓɛ Isirayɛl a Egiɓtɛn, di à ti jàŋbog rì rìwu, à ki reɓsɛn com ki ɓɛ ghɛɛ̀sɛ̀ngà kì kìi ri ɓìwoɓ ɓii.

²³ Lɛ rìgherɛ̀n innɛ ɓɛ̀yalì ɓɛ Moyis ɓɛ nyamgà nyi ɓi naa ɓɛ̀ŋwii ɓɛraa ajɛ̀m ì rìyalɛ̀n ɗii, ɓisuulɛ ɓɛ ghɛngà lɛ man ànɛ̀n à rɔɔtɛ̀ngà, fɔɔnnɛ ɓɛ risìghà ɓi kidɔ̀gsɛna ki rifòm ɗi faghà.

²⁴ Lɛ rìgherɛ̀n innɛ Moyis à ɓèngà lɛ ɓɛɛ regi nyi lɛ man à gɔ̀n ì Farawɔŋ di à ti ǹsɛ̀ɛ̀mɛn,

²⁵ à ɓiìsɛ̀n kìkɔ̀ni lɛ ɓɛɛ kiki nyi mɛ̀tɔɓ ǹɗaŋ ɗi ɓumɓɛ ɓi kìlɔ̀ŋ ki Bɛ̀ll à rɔ̀tɛ̀ngà, à cee lɛ a wog kìrɔɔ ɓi kìɓe ɓiɗùm maa cààmɛ̀n.

²⁶ À ghɛn lɛ ǹtoòrìɗ wu Kiris à ghɛ̀ɛ̀sɛɛ kì woògh wu cee coo ikum wu Egiɓtɛn kɛ̀ɛ̀ vèg ɓisuulɛ mis mii mɛ ɓaghà lɔŋ ri mɛ̀lèɓ mɛ mɛ ɓoŋɓòŋgà nyi asu.

²⁷ Lɛ rìgherɛ̀n innɛ à pɛ̀sɛ̀ngày a Egiɓtɛn, kɛ̀ɛ risi bim inɛ rìfòm ɗi ɓaghà lɛ ɗi wog, à sììrɛ̀ngà lɔŋ ɓi nɗɛli wii yɛ̀ɛ ɓɛɛ̀ kali lɛ, a seesee Bɛ̀ll ànɛ ɓaà ghɛn ɓi.

²⁸ Lɛ rìgherɛ̀n innɛ à kìghà Paskà, à tɔg lɛ ɓɛɛ misi bwaɓ ɓi mɛ̀suunaa di fɔɔnnɛ ŋwaà-fìtom anɛ à ghɛ̀ɛ̀sɛ̀ngà kì cuusii ɓɔn ɓɛ ǹtonto, a rɔɓ kɛ̀ɛ cuusi ɓɛroɓɛ a Isirayɛl.

²⁹ Lɛ rìgherɛ̀n innɛ ɓɔn ɓɛ Isirayɛl ɓɛ syaàghà rìɓày à m̀ɓàŋ lɔŋ yɛ̀ɛ zi i zɛy; yɛ̀ɛ ɓumɓɛ a Egiɓtɛn ɓɛ mɛɛ̀ fèèghrɛ̀ngà girig, mɛ̀nig mɛ ghaàgh rì ɓɔ.

³⁰ Lɛ rìgherɛ̀n innɛ gari ì Zyeriko ì kpìlàkà di ɓɔn ɓɛ Isirayɛl ɓaa cèŋzɛn yɔ̀ mɛru taàɓɛ̀ɛ̀.

³¹ Lɛ rìgherɛ̀n innɛ Rahaɓ ànɛ à ɓaghà giɓ a rìɓàmɓà à wughà ɓi nɗaŋ ri ɓumɓɛ ɓɛ kighà Bɛ̀ll ɓɛ̀lɔg ɓisuulɛ à ghàɓkà ɓumɓɛ ɓɛ kɛngà mɛ̀wooghrag, rì syeesyee à ǹɗem.

³² Nkpaati ɓà cɛ? Cààmɛ̀n ki ri lɛ ki kaarɛ̀n mɛ̀ di ǹkpaa lɛ, nkali ɓìɓan ɓi ɓɛ-Zyedeyɔŋ, ɓɛ̀-Ɓarag, ɓɛ̀-Samsɔn, ɓɛ̀-Yɛfte, ɓɛ̀-Davit, ɓɛ̀-Samuɛl rì ɓɛ̀kpaŋzì-ɓìɓan.

³³ Ɓɛ kighà lɛ ɓɛ yagsàg ɓìlɔ̀ŋ ɓi mɛ̀y, ɓɛ kikì ɓìɓan ɓi ɓi ri lɛ saaɗ, ɓɛ ki ghɛn yɛ̀ɛ mɛ̀kàg mɛ ɓɛ ɓaghà rì mɔ mɛ rongà, ɓɛ simdì ɓìmonɗo myɔm, lɛ rìgherɛ̀n;

³⁴ ɓɛ ɓuɓsì ìtèɗ wu ɗuu, ɓɛ ki lɛg lɛ, ɓɛ̀ kɛɛ̀ wey ɓɔ rì gàfàg, ɓɛ wɔngì tìroɓ ti ɓɛ ɓaghà rì tyɔ, ɓɛ ɓa rì kìghɛɛsii a wɛ̀y, ɓɛ ki sansan mɛraŋ mɛ wɛ̀y mɛ ɓi ɓìlɔ̀ŋ ɓidɛŋ.

³⁵ Lɛ rìgherɛ̀n innɛ ɓɛ̀yiɓ ɓɛdɛŋ ɓɛ ghɛɛdìghà tì yɛ̀ɛ ɓum ɓaa ɓɛdɛŋ ɓɛ ɓɛ ɓaghà di ɓaa wu ɓɛ ghem̀ɓɛ̀ngà tì, ɓɛ ɓa tì rì ɓɔ. Ɓum ɓɛdɛŋ ɓɛ tulɛ̀ngà rì ɓìtèetèɗ ɓi mɛtɔɓ, ɓɛ̀ kɛɛ̀ ki gherɛn lɛ ɓɛɛ pisi ɓɔ ɓi mɛ̀tɔɓ mɛ̀n, lɛ di fɔɔnnɛ ɓɛɛ syɔɔ̀dɛn rì rìghèmɓɛ̀n ɗi ɓiloŋ ɗi ɗi rɔɔtɛɛ ɗi cee.

³⁶ Ɓɛ fengàkà tì ɓɛ̀ro ɓɛdɛŋ, ɓɛ bog ɓɔ kìtòn rì gbaǹ, ɓɛ kagì ɓɔ bɛǹ, ɓɛ ki pìki ɓɔ ɓi naà-zày.

³⁷ Ɓɛ rogàkà ɓɔ gɔ̀g lɛ ɓɛɛ wey ɓɔ ɓɛ rengì ɓɛ̀ro ɓɛdɛŋ ɓìden ɓiɓɛɛ̀ rì ɓìghàg ɓɛ wewèy ɓɛm̀bog rì gàfàg, ɓɛ rerènìghà jàŋ, ɓɛ waatàg lɛ rì gòò yi jɔ̀ɔ̀, rì yi bwiy, ɓɔ kɛ̀ɛ̀ com, ɓɛ yeèyèèsì ɓɔ, ɓɛ ki tɔtɔɓ ɓɔ,

³⁸ ɓɔ ɓɛ ɓɛ ɓaghà mɛ̀kuu mɛ ɓum mɛ ziinɛ ì ghɛ̀ɛ̀sɛ̀ngà gì ɓi lɛ ì ɓa rì mɔ, ɓɔ yɛɛ deŋdèŋgà lɛ rì ɓi mɛ̀reɓ, rì ɓi dòn aɗyoo, ɓɛ ghɛghɛ̀ɓ lɛ rì ɓi bagsɛn yi dòn rì ɓi ɓìbùgsɛnà.

³⁹ Nni ɓumɓɛ̀n ɓɛ̀cèm ɓɛ Bɛ̀ll à sɛkà rìgherɛ̀n ɗyaa ɓɛ tekà ɓi com ki Bɛ̀ll à kàkà ɓɔ

⁴⁰ ɓisuulɛ ɓɛ peèghpègsɛ̀ngà bimid à com àdɛŋ ànɛ à cee ɓisu wis, lɛ ɓɛ̀ kɛɛ̀ kpaŋ ɓi nɗɛli wulɛ kìɓan ki fenɛn kɛ̀ kɛɛ̀ ɓa ti a lɔ̀ŋkaa, di ɓìsii ka yiǹ.