EBIREEGH 10 - Bafia Nouveau Testament

¹ Ɓìdɔ̀gsɛna ɓi konaagh ɓi ki ɓaà syeesyee à kìfèèghrɛnà à ɓɛ̀kɔɔ̀kɔɔ̀ ɓɛ ɓyom, ɓi ri lɔŋ cììghziŋ ki ɓi ɓìrɔɔ ɓi ɓyɛɛ̀ yùyuiy; ɓi yin ɗi ìtèɗ wulɛ ɓi konàg kì tɛɛ̀zii ɓumɓɛ ɓɛ ti ɓɛ kɛ̀ngì Bɛ̀ll jàŋbog ɓi bee inɛ̀n, ɓi ki yin lɛ ɓi tɛɛ̀zì ɓɔ rì rìkuu ɗi ɓifùnà ɗi fɔlɔɔ, ɗi ɗi ri lɔŋ bèg yìcèm rìkuu ɗìfog, kɛ̀ɛ̀ rìlɔ̀gtɛ̀n.

² I ɓyɛɛ ɓa rì ìtèɗ wu tɛɛ̀ziyɛn mum, di ɓɛ mɛ lèkà rìwewèy ɗi ɓituwe ɓi rìsòòsòghɛ̀n ɗi ɓum, ɓisuulɛ ɓumɓɛ ɓɛɛ̀ ɓɔɔɓɔgsì Bɛ̀ll ɓi rìkuu ɗi riɓɔgsì ɗiǹ ɓɛ ɓaghà lɛ ɓɛ teɗ zòghɛ̀n gɛ̀n bog ɓi gɛ̀n yicèm, ɓɛ̀ kɛɛ̀ ɓa ti ri fèg ànɛ lɛ ɓɛ ri rì ɓìɓe.

³ Wɔ̀lɛ ɓi saaɗ à rìkpaa, ɓìtuwe ɓi ɓɛ ti ɓɛ weeyì ɓi zòghɛ̀n ì ɓum ɓi ti ɓi kilàg lɛ ɓum ɓɛɛ yiyiti ɓìɓe ɓyaa bèg yìcèm.

⁴ Lɛ bwaɓ yi ɓɛ̀lem ɓɛ ɓɛ̀sanìnya rì yi ɓipiì yi yin lɛ yi pisì ɓìɓe ŋwos adɛŋ.

⁵ Kìɓan kiǹ kɛɛ̀ki, yɛ̀ɛ Kiris à ɓaghà di à ti ɓiì yùu ɓi ziinɛ, à kpaaghà rì Bɛ̀ll lɛ: Ù kɔ̀ni ɓi kifùna, nsoò lɛ com ki mum à faa wɔ̀, kìɓan kifog, ù faghà mɛ̀ nyoo.

⁶ Ù ti kɔ̀ɔ wog kirɔɔ rì ɓìtuwe ɓi ɓɛ tɔni lɛ ɓɛɛ ɓɔgsi wɔ̀ rì ɓyɔ, nsoò ɓi ɓɛ funɛɛ ɓisuu zòghɛ̀n ì ɓìɓe.

⁷ Nni fɔɔnnɛ mɛ̀ɛ nkpaaghi lɛ: wɔ̀ Bɛ̀ll, mɛ̀ɛnɛ, ǹ-yùu lɛ nki rìkɔ̀n ɗyɔɔ, lɔŋ yɛ̀ɛ kìɓan kɛm̀ ki ri kìkànɛn ɓi kaàtà à ɓìdɔ̀gsɛna.

⁸ À loogh kìkpaa lɛ wɔ̀ɔ̀ kɔ̀ni ɓi nsoò ɓìfùna, nsoò mɛ̀fafàà mɛ zɛy, nsoò ɓìtuwe ɓi ɓɛ tɔni lɛ ɓɛɛ ɓɔgsi wɔ̀ rì ɓyɔ, nsoò ɓi ɓɛ funɛɛ ɓisuu zòghɛ̀n ì ɓìɓe, ɓyom ɓìn ɓìcèm ɓi rɔɔ ɓi wɔ, kɔlɛ ɓìfùna ɓìn ɓyɛɛ̀ kìikilɛ̀n lɔŋ yɛ̀ɛ ɓìdɔ̀gsɛna ɓyɛɛ̀ kpaakpàà.

⁹ À ki ɓɔ̀ɓti lɛ wɔ̀ Bɛ̀ll! Mɛ̀ɛnɛ, ǹ-yùu lɛ nki rìkɔ̀n ɗyɔɔ, fɔlɔɔ a rì lɛ, à pisii bee ì rìɓɔgsàg ɗi Bɛ̀ll ì ǹtonto, à rèsì bee ì nyɔn.

¹⁰ Ɓisuulɛ Yeesus Kiris à roòzìghà rìkɔ̀n ɗi Bɛ̀ll, fɔɔnnɛ ɓìsii ti rì zòghɛ̀n ìnɛ ɓi ɓìɓe ɓis lɛ rìfa ɗi à faghà nyoo yìì gɛ̀n bog ɓi gɛ̀n yicèm.

¹¹ Pìrɛɛtìrɛ̀ bimiɗ à ti à rɛlàg ɓɛ̀ŋwos ɓɛ̀cèm ɓi jàŋ yiì ì kìsay à kìkì mɛ̀kuu mɛ ɓifùna mɛ̀fog mɛ mɛ yin lɛ mɛ pisi ɓìɓe ŋwos adɛŋ.

¹² Wɔ̀lɛ Kiris à faghà kìfùna kifog ɓisuu ɓiɓe, à ki kɔ̀ri min ɓi weèlem à Bɛ̀ll fìɗyàɓ fikɔ̀ɔ̀.

¹³ Fɔɔnnɛ a ɓoŋɓoŋ ɓigomìnɛ lɛ ɓɛ̀bènàbena ɓii ɓɛɛ ɓa kìɓoŋ ki a rɛsag mɛ̀kòò mii miì.

¹⁴ Fɔlɔɔ nnɛ ɓi rìfa ɗìfog, à mɛ kì lɛ ɓɛ̀roɓɛ ɓɛ ri ɓɛ̀tɛɛ̀ziyɛn ɓɛɛ ɓa lɛ syeesyee ìsuùcèm kɛ̀ɛ̀ com ki ɓɛ ri lɛ ɓɛ fen a lɔ̀ŋkaa.

¹⁵ Kìɓan kiǹ kɛɛ̀ki Kìtɛntɛ̀ɛ̀n ki Nghay kɛɛ̀ rèresi girig ɓìsi; lɛ à loogh kì kpaà lɛ,

¹⁶ Kan lɛ: Bee inɛ ǹɗì ɓiì renì ɓi nyìinyìm ànɛ lɛ rì mɛ̀ rì ɓɔ, ajɛ̀m ì mɛ̀ru mɛ̀n ì rì ɓiì ɓaà fɛlɛ: Ǹɗì ɓiì foŋì ɓìdɔ̀gsɛna ɓyɛm̀ ɓi mɛ̀rem maa, ǹkàn ɓɔ ɓyɔ ɓi nto. À ɓɔ̀ɓ min lɛ:

¹⁷ Fɔɔnnɛ màa yititi ɓi ɓiɓe ɓyaa, nsoò mɛ̀nànì maa.

¹⁸ Ɓisuulɛ cààmɛ̀n kìcèm ki ɓìɓe ɓi ti ɓì cenɛn, ki ghɛɓsii tì ɓi com lɛ ɓɛɛ fa ɓìfùna ɓisuu risòghɛ̀n ɗi ɓiɓe ɓiǹ.

Ɓum ɓɛ ghɛɛ̀sɛɛ kì sììrɛɛ ɓi rìgherɛ̀n

¹⁹ Nni fɔɔnnɛ mìni ɓɔɔsoŋ̀, tì ti lɛ tì ɗiŋì ɓi jàŋ inɛ ì rì kìcèlì kɛ̀ɛ̀ ìris lɛ bwaɓ yi Yeesus.

²⁰ À nɛmgà ɓìsi nyɔɔnyɔn à bee, bee inɛ ì rì rì cɛɓ ɓi kìlàà ki ki ɓaghà ɓi naà-Bɛ̀ll, yɛɛlɔɔ lɛ ɓi nyoo yìì i nyimìɗ.

²¹ Tì rì rì ǹlàmì ɓɛ̀pìrɛɛtìrɛ̀ àgwey anɛ ɓɛ rɛsìghà ɓi naà-Bɛ̀ll.

²² Ti tyòŋdɛɛna min Bɛ̀ll jàŋbog rì ǹɗem wu wu ri lɛ sɛɛghi sɛɛghi, rì rìgherɛ̀n ɗi ɗi ri ɗìronɛn, ǹɗem wù tɛnɛn ɓi ɓɛg ànɛ a ɓìɓan ɓi ɓi ri lɛ ɓi fa wɔ̀ bɛ̀lɛn, nyoo ì ɓa ǹwùɓsiyɛn ɓi mɛ̀nig mɛ mɛ ri mɛ̀ tɛnɛn.

²³ Ti ɓèŋina dyàɓɛn inɛ ti làalam̀ɓɛ̀n, tì sììrɛ̀n ɓisuulɛ Bɛ̀ll ànɛ à faghà ǹkàg roòzag mɛkàg mii.

²⁴ Ti ɓèeghɓèŋɗɛɛna ɓìsi rì ɓìsi, tì feèfègsɛ̀n lɛ ti ɓa rì ǹkɔ̀nɛ̀n, tì ki kìki ɓiɓan ɓi syeesyee.

²⁵ Tyɛ̀ ki lèg rikɛ̀ngì ɗi a mɛ̀taŋzɛn mis yɛ̀ɛ ɓum ɓɛdɛŋ ɓɛ ti ɓɛ kilàg, ti faàfàlɛ̀n lɔŋ ɓìsiìɓɔmiɗ itèɗ, à ɓiisɛ̀n yɛ̀ɛ ɓi seesee lɛ ŋwos a Kan a kɛ̀ɛ̀kɛɛ yi.

²⁶ Ɓisuulɛ, i tì kɛ̀nkɛni asu tì kìkì kìɓe ɓi rìfee, di tì mɛ yi saaɗ, kìfùna kidɛŋ ki yiìdi ɓisuu zòghɛ̀n ì ɓìɓe.

²⁷ Tì rì ɓiì rɔ̀ɓi lɔŋ lɛ ti ɓoŋɓoŋ lɛ rì ɓɛ̀yɔ̀m ɓɛ Bɛ̀ll, rì ɗuu ɗi ɗi ghɛɛ̀sɛɛ kì ɗigsii ɓumɓɛ ɓɛɛ̀ kìki Bɛ̀ll ǹtoòtèɗ ri coo iris ɓi nɗem.

²⁸ Ɓɛ ti ɓɛ weeyì mum ǹcèm ànɛ à yogsii ɓìdɔ̀gsɛna ɓi Moyis, ɓɛ̀ kɛɛ̀ wog nyi nyìighnyìg di ɓum ɓɛɓɛɛ̀, nsoò lɛ ɓɛraa ɓɛ resii rìnàn ɗii.

²⁹ Ɓì rì lɛ ɓì fèg lɛ rìkuu ɗi ntɔɓ aɗi ɗyɛɛ ghɛɛ̀sɛɛ rì ŋwaànɛ à kìi lɛ à sɛɛtì Man à Bɛ̀ll, à ghɛn bwaɓ yi riràrɛ̀n ɗi lɛ rì Bɛ̀ll rì ɓum, yi yi kii lɛ a ɓa ǹtɛnɛn, yɛ̀ɛ zɛy rì zɛy à com, à ki fen Nghay à geesɛ̀n.

³⁰ Ɓisuulɛ ɓìsii yii roànɛ à kpaaghà lɛ: Mɛ̀ yɛɛ ghɛɛ̀sɛɛ kì rɔ̀ŋi mɛ̀ yɛɛ ghɛɛ̀sɛɛ kì lèɓi à kpaa tì lɛ: Kan à rì ɓiì yɔ̀mzii ɓum ɓii.

³¹ Ki ri koŋnyoo lɛ Bɛ̀ll ànɛ à rì cem, a raɗ mum ɓi ɓyàg ɓii.

³² Yitiina lɔŋ cɛɓ ki ɓì ghɛɓkà ɓi mɛ̀ru mɛ ǹtonto mɛ ɓì tekà kìtɛɛtɛn ki Bɛ̀ll; ɓì wokà mɛ̀tɔɓ lɛɛ̀gwey ɓi mɛ̀ru mɛ̀n; wɔ̀lɛ ɓì ki càrɛ̀ngà ɓi ɓi zàà ìnɛn.

³³ Ki mɓalàg lɛ ɗi ɗi yii, ɓɛ sɛɛ̀sɛ̀mgì mìni, nsoò lɛ ɓɛ yeeyeèsì mìni ɓi nyìinyìm à ɓum, ɗi ɗi yii, ɓì sug ɓi gàm ì ɓumɓɛ ɓɛ yeèyèèsìghà fɔlɔɔ.

³⁴ Ɓì kàɓɓɛ̀ngà mɛ̀tɔɓ mɛ ɓimbùŋ, ɓì ki woki kirɔɔ cààmɛ̀n kìcèm ki ɓɛ nti ɓɛ ɓatàg mìni ɓyom, ɓisuulɛ ɓì yighà lɛ ɓì ɓaghà rì ɓyom ɓi ɓi cee ɓiǹ lɛ, ɓyɔɔ ri ɓi ɓi ri cààmɛ̀n kìcèm.

³⁵ Fɔɔnnɛ kɛ̀ ɓi càɗ ntyweeyi win ɓisuulɛ wu ri rì ɓyoo mɛlèɓ.

³⁶ Ki ghɛɛ̀sɛɛ lɛ ɓi ɓa rì kìsììrì, di fɔɔnnɛ ɓi roòzi rìkɔ̀n ɗi Bɛ̀ll, ɓì teɗ min com ki à kàkà mìni.

³⁷ Lɛ cààmɛ̀n kaa rɔ̀ɓ kiden lɔŋ lɛsàg lɛ roànɛ à ghɛ̀ɛ̀sɛɛ kì yùu a kpaŋ, àa lɛ̀mzii ɓi.

³⁸ Kìɓan kifog ŋwaànɛ à rì lɛ saaɗ ɓi mis mɛ̀m à rì ɓiì ghɛɓì lɛ rìgherɛ̀n, wɔ̀lɛ i à sugtii rì jɛ̀m, ǹɗem wɛ̀m wɛ̀ kɛɛ̀ wogti kirɔɔ rì nyi.

³⁹ Ɓìsii yin ɓɛroɓɛ ɓɛ ti ɓɛ sugtàg rì jɛ̀m lɛ ɓɛɛ ɗyaŋ, ɓìsii ri ɓɛ̀roɓɛ ɓɛ gherɛɛ lɛ ɓɛɛ ghɛɓsi ɓyɛɓ ɓyàà.