Bìoball air-loidhne

KÒLÒSYƐŊ 4 - Bafia Nouveau Testament

¹ Mìni ɓɛ̀masà ɓɛ ɓì rì rì ɓɛ̀kìì-ɓìsay, kìina ɓɔ ɓìɓan ɓi saaɗ yɛ̀ɛ ki ghɛɛ̀sɛɛ, ɓì yitì lɛ mìnii ri girig rì masà aɗyòò.

Ɓìɓan ɓidɛŋ ɓi Pol à siŋɗaagh ɓɔ, rì ɓìtɔkì

² Sììrɛɛna ɓi bɔ̀ŋzɛ̀n; ɓì ɓa cem miì ɓi rìfafà ɗi Bɛ̀ll ɓìtògsɛ̀n.

³ Ɓì ɓɔ̀ŋzàg girig Bɛ̀ll ɓisu wis lɛ a nɛm̀ ɓìsi bee inɛ ti lamɓɛn jɛ̀ɛ̀ yìì, di fɔɔnnɛ mɛ̀ɛ nghagsi ɓum dwìɗ inɛ ì seesee Kiris, lɛ kiɓan kiǹ kɛɛ̀ki ǹɗì miì nkàgakɛn bɛn.

⁴ Ɓì ɓɔ̀ŋzàg girig lɛ nkakali kìɓan kiǹ lɛ tɛntɛ̀ɛ̀n lèg ànɛ ki ghɛɛ̀sɛɛ lɛ nkpaà.

⁵ Ɓaanà rì ɗyomzɛ̀n ɓi rìghɛghɛ̀ɓ ɗin ɗi rì ɓumɓɛ ɓɛ yin ɓɛ̀kìristɛ̀n, kɛ̀ ɓi yogsi cààmɛ̀n ki ɓì rì rì kɔ.

⁶ Ɓìtòkì ɓin ɓi ghɛɛ̀sɛɛ kì ɓalaagh ɓitòkì ɓi geesɛ̀n, ɓi yɛyɛ̀y yɛ̀ɛ kìkòn; fɔɔnnɛ ɓì ɓiì yiì lannɛ ɓì ghɛ̀ɛ̀sɛɛ lɛ ɓì ɓàg mum ǹcèm ànɛ ɓi ɓɔ, di à tɔɔgh mìni kìɓan.

⁷ Ɓi kìɓan ki ki seesee rìɓa ɗyɛ̀m, Tisig à geni wɛ̀m à nɗem, ànɛ à rì ǹkìì-kìsay a Kan à ǹtyweeyi, ànɛ ti kìki kisay ki Kan ɗì nyi nɗaŋ, à rì mìni ɓiì kalii ɓiɓan ɓìcèm.

⁸ Nɗomiì mìni nyi rì azi lɛ, ɓi yi rìɓa ɗis, à ki fɔɔsi mini mɛ̀rem.

⁹ Ɓɛ riì nɗaŋ ri Onezim, geni wìs a ǹɗem, ànɛ à rì mum à ǹtyweeyi, nyi tì maaseŋi wìn. Ɓɛ ri mìni ɓiì wogsii ɓiɓan ɓìcèm ɓi ɓyɛɛ̀ kìikilɛ̀n fɛ.

¹⁰ Aristarikɛ ànɛ à rì ɓi naà-zày rì mɛ̀ à tògsii yì mìni, nsoò Marikus ànɛ ɓɛ ri ɓɔn rì ɓɔn ɓɛɛ̀ Ɓarinaɓas. Marikus ànɛ̀n innɛ tì mɛ kpaa mini lɛ i à yùu foo a lɔ̀ŋkin, ɓì ghàɓ nyi lɛ syeesyee.

¹¹ Yeesus ànɛ ɓɛɛ̀ regi lɛ Yustus, à tògsii yì girig mìni; lɔŋ kìraa ki ɓum kìn kɔ rì kɔ, kɛɛ ri Ɓɛ̀yudɛ̀n ɓɛ ɓɛɛ̀ sasay nɗaŋ ri mɛ̀ ɓisuu kilɔ̀ŋ ki Bɛ̀ll, ɓɛ ki rì ɓumɓɛ ɓɛ fatìghà mɛ̀ ìtèɗ ɓi nɗem.

¹² Epafiras à maaseŋi wìn à tògsii yì mìni, à rì ǹkìì-kìsay a Yeesus Kiris ànɛ à fɔli ɓi riɗùù ɓi bɔ̀ŋzɛ̀n ɓisu wìn, lɛ ɓi ɓa ɓɛ̀sììrɛn, ɓì ɓa ɓɛ̀syeesyee ɓɛ ɓum, ɓì ki gherɛn rikɔ̀n ɗi Bɛ̀ll syeesyee à rìgherɛ̀n.

¹³ Ǹɗì nyi wusìnɛ̀ɗ lɛ a woowolɛ̀n lɛɛ̀gwey ɓisu win, rì ɓisuu ɓumɓɛ a Lawodise rì ɓɛ a Iyerapolis.

¹⁴ Lukas à reŋkàŋ wìs a nɗem, ànɛ à rì dɔgtà ɓɛɛ̀ Demas ɓɛ togsii yì mìni.

¹⁵ Ɓì tògsàg ɓɛ̀geni ɓis ɓɛ ɓɛ ri a Lawodise, rì Nɛmfa, rì kìseŋi ki Kiris ki ki ri ɓi naa yìì.

¹⁶ I ɓɛ mɛ ɓày kaàtà ànɛ foo a lɔ̀ŋkin, ɓì ghɛ̀ɛ̀sɛɛ kì kìi lɛ ɓɛɛ ɓay girig kìseŋi ki a Lawodise nyi; fɔɔnnɛ mìni girig ɓì ghɛ̀ɛ̀sɛɛ kì ɓàli kaàtà ànɛ à rì ɓiì ɓaà yì mìni a Lawodise.

¹⁷ Kaliina Arisip lɛ: Ù konàg rì kìsay ki Kan à faghà wɔ̀, tèèsi nyoo lɛ u konag kɔ kì kìi.

¹⁸ Mɛ̀ɛmiɗ Pol yɛɛ kaniì mìni ɓìtɔkì rì càg kɛm̀, kɛ̀ ɓi ɗimzɛn lɛ ǹɗì ɓi naà-zày. Geesɛ̀n ì Bɛ̀ll yɛ̀ɛ ɓa rì mìni!

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan