KÒLÒSYƐŊ 2 - Bafia Nouveau Testament

¹ Lɛ mɛ̀ɛ nkɔ̀nkɔn lɛ di ɓyàa yii coo wɛ̀y wu mɛ̀ɛ nɗùùɗuu ɓisu win, rì ɓisuu ɓumɓɛ a Lawodise, rì ɓum ɓɛ̀cèm ɓɛ ɓɛ yii ɓi mɛ ɓi-su.

² Nɗùùɗuu fɔlɔɔ ɓisuulɛ mɛ̀rem maa mɛɛ ɓa mɛ̀ronɛn ɗi ìtèɗ, rì tì lɛ ɓɛɛ ɓa ɓɛ̀ràrɛn ɓi nkɔ̀nɛ̀n, ɓɛ ki ɓa ti ɓɛronɛn ɗi kɔɔ̀kɔɔ̀ à ɗyomzɛ̀n, fɔɔnnɛ ɓɛ ri ɓiì yii fèg à Bɛ̀ll ànɛ à rì a rìnyam, yɛɛ lɔɔ lɛ Kiris.

³ Ɓi Kiris ànɛ̀n nnɛ ìkum wu ɗyomzɛ̀n wùcèm rì wu riyi ɗi ɓiɓan wu ri wù nyamɛn.

Pol à rɔ̀gsɛɛ ɓumɓɛ a Kolos lɛ ɓɛɛ konag rì ɓìɓeɓtàg ɓi dɔgtɛ̀n

⁴ Ǹkpaa kìɓan kiǹ ɓisuulɛ mum kɛ̀ɛ ɓɔ̀ŋ mini rì ɓìsyeesyee ɓi ɓitòkì.

⁵ Lɛ nsoò màa rì mìni fìràɓ ɓi rìɓa ɗi ɓi mɛ̀mùù, ǹɗem wɛ̀m wu ri lɔŋ foo ri mìni, ǹwowog kirɔɔ yɛ̀ɛ nseesee syeesyee à rìwòŋzàg ɗi ɓiɓan ɓi nyìinyìm wìn, rì yɛ̀ɛ rìgherɛ̀n ɗin ɗi ɓi Kiris, ɗi ri lɛ kpeg-kpeg.

⁶ Fɔlɔɔ nnɛ yɛ̀ɛ ɓì tekà Yeesus Kiris lɛ Kan wìn, ghɛɓina min cɛɓ ki ɓumɓɛ ɓɛ ri ɓɛ̀ ràrɛn ɗi nyi.

⁷ Ɓaana ɓɛ̀ɓaghɛn gàŋ ɓi nyi, ɓì toŋ cɛɓ kin ɓi nyi, ɓì sììrɛ̀n ɓi rìgherɛ̀n lɔŋ yɛ̀ɛ ɓɛ resìghà mìni, ɓì ki fafa Bɛ̀ll ɓìtògsɛ̀n lɛɛ̀gwey.

⁸ Ɓì konàg lɛ ŋwaàdɛŋ kɛ̀ɛ wɔɔsi mini ɓi fìram fi ɗyomzɛ̀n rì ǹ-yègsɛ̀n à zɛy, ɓyɛɛ ri ɓìtoŋɛn ɓi ɓìsyɔ̀ɔ̀ ɓi ɓum, rì mɛ̀tèɗ mɛ mɛghay mɛ ɓi ziinɛ, ɓyɛ̀ kɛɛ̀ ɓa ɓitoŋɛn ɓi Kiris.

⁹ Ɓisuulɛ rìɓa ɗìcèm ɗi Bɛ̀ll à rì ɗi yughà kì kɔ̀rii ɓi nyoo ì Kiris lɛ kɔɔ̀kɔɔ̀.

¹⁰ Fɔɔnnɛ ɓì mɛ teɗ ɓyom ɓìcèm kɔɔ̀kɔɔ̀ à rìteɗ ɓi Kiris ànɛ à rì rìfòm ɗi ɓɛ̀làmì ɓɛ̀cèm rì mɛ̀tèɗ mɛ mɛghay mɛ̀cèm.

¹¹ Ɓi nyi, ɓì kɛ̀rɛ̀ngà rìkuu ɗi kɛ̀rɛ̀n ɗi ɗi yin ɗi ɓum ɓɛɛ kɛri rì ɓyàg ɓyaa, kìɓan kifog, ɓì kɛ̀rɛ̀ngà kɛ̀rɛ̀n à Kiris ànɛ à rì lɛ mum a leg ɓi rìkpàn ɗi nyoo ì kìɓe.

¹² Ɓɛ ɓomgà mìni ǹɗaŋ ri nyi yɛ̀ɛ ɓì ɓàɓtɛ̀ngà, ɓì mɛ ghèmɓɛn girig ɓi nyi, ǹɗaŋ ɗi nyi lɛ rìgherɛ̀n ɗi ɓì gherɛɛ ìtèɗ wu Bɛ̀ll ànɛ à ghèmzìghày nyi a ɓìloŋ.

¹³ Mìni ɓɛ ɓì ɓaghà ɓìloŋ abɛ̀y lɛ ɓìɓe ɓin, ɗì rìɓa ɗi ɓì ɓaghà kɛ̀ɛ̀ kìkɛ̀rɛɛ, Bɛ̀ll à mɛ fati mini cɛɓ ǹɗaŋ ɗi Kiris, yɛ̀ɛ à cenɛ̀ngà ɓisi ɓìɓe ɓis ɓìcèm.

¹⁴ À pisighà sɔmìnà à m̀ɓeɓɛn ànɛ à ɓaghà ɓisi ɓi nyoo innɛ ɓìɓan ɓi miì ɓi nɔɔ̀nɔ̀ɔ̀tìghà ɓìsi; à pisìghà ɓìsi nyi yɛ̀ɛ à kpangà nyi ɓi kɔrɔs.

¹⁵ À dùŋzìghà ɓɛ̀làmì rì mɛ̀tèɗ mɛ mɛghay, à ghanì ɓɔ ɓi mis mɛ ɓum ɓɛ̀cèm yɛ̀ɛ à yagsàkà ɓɔ ɓi kɔrɔs aɗyòò.

¹⁶ Nni fɔɔnnɛ mum kɛ̀ɛ yɔ̀mdi mini ɓi ɓìɗilàg ɓi ɓì rì lɛ ɓì ɗi, rì com ki ɓì rì lɛ ɓì nɔ, nsoò ɓi kìɓan ki ticàɓ tidɛŋ nsoò lɛ ǹtaasi wu ŋwii, nsoò lɛ saɓàt.

¹⁷ Ɓyom ɓìn ɓìcèm ɓi ri lɔŋ cììziŋ ki ɓiɓan ɓi ɓi riì, wɔ̀lɛ kɔɔ̀kɔɔ̀ à kìɓan a rì lɔŋ ɓi Kiris.

¹⁸ Kɛ̀ ɓi càrɛn lɛ mɛ̀lèɓ mɛ ɓi mɛ̀ree mɛ ɓi ghɛghɛŋì ŋwaàdɛŋ a ɓatɛn mìni mɔ yɛ̀ɛ ki kɔni nyi, rì ìghèy lɛ à rì ǹsɛɛ̀dɛn nyimiɗ ɓi zi, rì tì lɛ, a ɓɔɔɓɔgsì ɓum ɓɛ titom; rìkuu ɗi mum ɗìn ɗi ti ɗi ɓiisàg kì kuughraagh ɓiɓan ɓi ɗi ghɛɛ fɛlɛ yɛ̀ɛ ɓìdɛ̀ndɛm̀; ɗi ki ɓalag ɗi ronɛn ɗi ɓìdaŋà ɓi kɛ̀ɛ̀-su, ɓi ɓɔɔ mɛyitì ɓii ɓɛ à rì rì ɓɔ, ɓi rìɓa ɗii ɗi lɛ mum.

¹⁹ Rìkuu ɗi mum ɗìn ɗi yin ɗi ràrɛn ri ǹto wu wu ɓanɓani nyoo bimiɗ, wu ki kì lɛ nyoo ìnɛ̀n yɛ̀ɛ rarag lɛ syeesyee ɓi jàŋ yi ì rì miì ǹwògakɛn ì ki tɔɔtɔɔ kitɔɔ ki Bɛ̀ll a fafa yɔ̀.

²⁰ I ɓì wughà ǹɗaŋ ri Kiris ɓi ɓɛg ànɛ a mɛ̀tèɗ mɛ mɛghay mɛ ɓi ziinɛ, ɓisuucɛ nnɛ ɓɛ kaŋkàŋ tì mìni rì ɓìɓan ɓiǹ yɛ̀ɛ ɓɛɛ̀ kali lɛ ɓì kaka ɓì ghɛghɛ̀ɓ ɓi ɓìsyɔ̀ɔ̀ ɓi ɓi ziinɛ?

²¹ Kɔ̀ɔ teɗ, kɔ̀ɔ ɓoɓti, kɔ̀ɔ kòm!

²² Ɓìcèlì ɓiǹ ɓìcèm ɓi koŋkomi ɓyom ɓi ɓi ti ɓi ɗyogì di ɓɛ kii kìsay miì gɛ̀mbog; ɓìɓan ɓiǹ ɓi ri lɔŋ ɓidɔ̀gsɛna rì mɛ̀rèsàg mɛ ɓum ɓɛɛ foŋi.

²³ Ki ri saaɗ lɛ ɓìcèlì ɓiǹ, ɓi rìseèsèèrɛ̀n ɗi ɓi mis, ɓi ri lɛ ɓɛ sɛg lɛ, ɗì rìɓɔgsàg ɗi Bɛ̀ll ɗi miì ɗi ɗi ri kìɓan ki ɓum ɓɛɛ ɓekii, ɗì rìsɛɛ̀dɛ̀n ɗi ɓi zi, rì kìɓan ki lɛ, mum a ki nyoo yìì rìgɛn; kìɓan kifog gɛ ɓìɓan anɛ̀n à ghɛɓsii ɓi bimiɗ à com, à rì lɔŋ ɓisuu kinyàà ki mɛmùù.