KÒLÒSYƐŊ 1 - Bafia Nouveau Testament

Pol à tògsii ɓɔ

¹ Mɛ̀ Pol ànɛ ǹɗì ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll, rì Timote à geni wìs,

² tì kàni ɓɛ̀gherɛ̀n, rì ɓɔɔseŋi ɓis ɓɛ ɓi Kiris ɓɛ ɓɛ ri ɓum ɓɛ ntyweeyi, ɓɛ ɓɛ ri a Kolos. Bɛ̀ll à Seŋi wìs a fa mìni lɛ rì geesɛ̀n, rì fyòoog!

³ Tì ti tì fafà Bɛ̀ll à Seŋi Kan wìs Yeesus Kiris ɓìtògsɛ̀n, di tì ɓɔ̀ɔɓɔ̀ŋzì Bɛ̀ll ɓisu win, tyɛ̀ ki fɔy.

⁴ Lɛ tìi nwoogh di ɓɛɛ kpaakpaa lɛ, mìnii ri rì ǹtyweeyi ɓi Yeesus Kiris lɛɛ̀gwey, mìnii ki ɓa ri geesɛ̀n ɓi san ànɛ a ɓɛ̀gherɛ̀n ɓɛ̀cèm,

⁵ ɓisuu dyàɓɛn yiǹ ìnɛ ì ɓoŋɓoŋi mìni aɗyoo. Dyàɓɛn incèm yɛ̀ɛnɛ jɛ̀ɛ̀ ìnɛ ì rì jɛ̀ɛ̀ ì kɔɔ̀kɔɔ̀ à kìɓan, jɛ̀ɛ̀ ì Syeesyee à Ɓɔlɛ, ì wogsìghà mìni abɛ̀y.

⁶ Syeesyee à Ɓɔlɛ ànɛ̀n à kpagà foo a lɔ̀ŋkin fɛlɛ yɛ̀ɛ a wumwum ɓiɗùn à kɛ̀nkɛ̀n asu ɗì rìsààsàà zi bimiɗ; fɔlɔɔ nnɛ a kìki girig ɓi nyìinyìm wìn à tumɛ̀n ŋwos anɛ ɓì wokà, ɓì ki yi yɛ̀ɛ geesɛ̀n ì Bɛ̀ll ì rì a tààkaà,

⁷ lɔŋ yɛ̀ɛ Epafiras ànɛ à rì reŋkàŋ wìs a nɗem ànɛ ti kìki kisay ri nyi à rèsìghà mìni; à rì ǹkìì-kìsay a Kiris à ntyweeyi ɓisu wìn.

⁸ À kpaaghà ɓìsi rìkuu ɗi nkɔ̀nɛ̀n ɗi Ǹghay à faghà mìni.

Pol à rèsii lɛ à ti à ɓɔ̀ŋzàg Bɛ̀ll ɓisuu Ɓɛ̀kòlòsyɛŋ, rì tì lɛ, Kiris à cee ɓyom ɓìcèm

⁹ Kìɓan kiǹ kɛɛ̀ki ɓìsi girig, à tumɛ̀n ŋwos anɛ tì wokà fɔlɔɔ, tì fɔli ɓi riɓɔ̀ŋzì ɗi Bɛ̀ll ɓisu win, tì tɔtɔ̀g lɛ, a roòzi mìni rì rìyi ɗi ɓiɓan ɓi ɓyɛɛ̀ kɔ̀ngi nyi, à fa mìni ɗyomzɛ̀n ɗìcèm, rì syeesyee à rìwog ànɛ ɓi Nghay wìì.

¹⁰ Fɔɔnnɛ ghɛɓina cɛɓ ki kɛɛ̀ kɔ̀ngi Kan, ɓì kìkì ɓìɓan ɓi ɓi ri lɛ ɓi puɓsì nyi nɗem cààmɛ̀n kìcèm. Wumina ɓìɗùn ɓi ɓyɛɛ ghɛnɛn ɓi mɛ̀kìkìì mɛ syeesyee mɛ̀kuu mɛ̀kuu, ɓì ki tɔɔtɔɔ ɓi rìyi ɗi ɓì yii Bɛ̀ll.

¹¹ Ɓaana rì ìtèɗ, ɓɛ̀ɓɛg ɓɛ̀cèm, ìtèɗ win wu ɓa wu ɓi rìkem ɗii, fɔɔnnɛ ɓì ɓiì ɓaà rì kìsììrì, ɓì ki yi rinìɗ ɗi nɗem lɛ kɔɔ̀kɔɔ̀.

¹² Faana Bɛ̀ll à Seŋi wìs ɓìtògsɛ̀n ɗì kìnyàà; lɛ nnyɛɛ kighà com ki lɛ, ɓi ɓa rì gàɓ ɓi ɓìrɔɔ ɓi ɓi ri ɓì pègsɛn ɓisuu ɓɛgherɛ̀n ɓi kìtɛɛtɛn ɓiɗùm.

¹³ À kwèɗkà ɓìsi ɓi rìkpàn ɗi mɛtèɗ mɛ birìm, à ceesì ɓìsi ɓi kìlɔ̀ŋ ki Man wiì à ǹɗem,

¹⁴ ànɛ tì rì ɓɛ̀kòrɛn lɛ nyi, ɓìɓe ɓis ɓi ki ɓa ɓi cenɛn.

¹⁵ À rì kìfèèghrɛnà ki Bɛ̀ll ànɛ ɓum ɓɛ ghɛɛ ɓi, nyi tì Man à ǹtonto ànɛ ɓi ɓyom ɓìcèm ɓi Bɛ̀ll à kìghà.

¹⁶ Ɓisuulɛ rì nyi nnɛ Bɛ̀ll à kìghà ɓyom ɓìcèm, lɛ rì aɗyoo, rì ɓi ziinɛ; ɓyom ɓi ɓɛɛ̀ seesèè, rì ɓi ɓɛ ghɛɛ ɓi, mɛ̀tèɗ mɛ mɛghay, rì mɛ̀làmì, rì mɛ̀tèɗ mɛm̀bog. Bɛ̀ll à kìghà ɓyom ɓìcèm rì nyi, rì ɓisu wìì.

¹⁷ Nnyɛɛ lokà kì ɓaà rì ɓyom ɓìcèm, fɔɔnnɛ ɓyom ɓìcèm ɓi rɛrɛlii lɛ nyi.

¹⁸ Nnyɛɛ ri nto wu ɓi nyoo ìnɛ ì rì lɛ kìseŋi kii; nnyɛɛ ri rìtumɛ̀n, à ki ɓa ti man à ǹtonto ànɛ à lokà kìghèmɓɛɛ a ɓìloŋ lɛ di a ɓa beèbɛ̀y ɓi ɓìɓan ɓìcèm.

¹⁹ Ɓisuulɛ ki kɔngà Bɛ̀ll lɛ a kɔri ɓi nyi, à rongì ɓi nyi lɛ kɔɔ̀kɔɔ̀.

²⁰ À ki kì lɛ ɓyom ɓìcèm ɓi ɓi ziinɛ, nsoò lɛ ɓi aɗyoo, ɓyɛɛ rarɛn tì rì nyi lɛ Man wiì, yɛ̀ɛ à kìghà lɛ fyòoog a ɓa lɛ bwaɓ yi Man ànɛ̀n yi yi kpagà ɓi kɔrɔs.

²¹ Fɔɔnnɛ mìni ɓɛ ɓì ɓaghà abɛ̀y ɓɛ̀ ràɓsɛn ri Bɛ̀ll, ɓì ki ɓa ɓɛ̀bènàbena ɓii, lɛ ɓìɓeɓtàg ɓi ɓiɓan ɓi ɓì kìkìghà,

²² ɓi cààmɛ̀n ki, lɛ rìwu ɗi Man wiì à wughà ɓi nyoo yìì i mɛ̀mùù, Bɛ̀ll à mɛ pɛ̀ɛ̀zi mini kì ràri ɗi nyimiɗ, lɛ di a ki com ki lɛ ɓi kpaŋ ɓi mis mii ɓɛtɛnɛn, kɛ̀ɛ̀ zɛ̀ɗ, kɛ̀ɛ̀ bɛ̀lɛn.

²³ Kìɓan kifog, ki ghɛɛ̀sɛɛ lɛ, ɓi ɓeŋ̀ rìgherɛ̀n, ɓì sììrɛ̀n, ɓì ki rɛli lɛ kpegkpeg, kɛ̀ ɓi càrɛn lɛ ɓɛɛ syoŋ mìni fìràɓ ɗi dyàɓɛn ìnɛ ɓì rì rì yɔ̀ ɓi Syeesyee à Ɓɔlɛ ànɛ ɓì wokà. Syeesyee à Ɓɔlɛ ànɛ̀n yɛɛ kalɛ̀ngà a ɓum ɓɛ̀cèm ɓɛ ɓɛ ri ɓi ɗyoo azi; innɛ mɛ̀ Pol ǹti ǹkìì-kìsay anɛ miì.

Ɓìsay ɓi Pol à rì rì ɓyɔ, rì wɛ̀y wu a ɗùùɗuu ɓisuu ɓɛgherɛ̀n

²⁴ Ǹɗì rì kìnyàà ɓi cààmɛ̀n ki, ɓi mɛ̀tɔɓ mɛ nwowog ɓisu win, fɔɔnnɛ com ki kɛɛ̀ kaakaàrɛ̀n ɓi mɛ̀tɔɓ mɛ Kiris, mɛ̀ɛ nɗàaratɛ̀n kɔ kì woògh ɓi nyoo yɛ̀m ɓisuu nyoo yìì ìnɛ ì rì kìseŋi kii.

²⁵ Mɛ̀ ǹtighà ǹkìì-kìsay anɛ ɓi kìseŋi ki Kiris, lɛ ǹtɛ̀g wu Bɛ̀ll à tɛ̀gsìghà mɛ̀ lɛ nghagsi mìni jɛ̀ɛ̀ ì Bɛ̀ll lɛ kɔɔ̀kɔɔ̀,

²⁶ yɛ̀ɛ ri kìɓan ki Bɛ̀ll à ɓègà a rìnyam fìɗyàɓ fikɔ̀ɔ̀, lɛ gbàà yi ɓum yìcèm yɛ̀ kɛɛ̀ yi, wɔ̀lɛ kɛɛ̀ki à mɛ rèsi ɓum ɓii ɓi cààmɛ̀n ki,

²⁷ ɓisuulɛ Bɛ̀ll àa nkɔ̀ni lɛ a resi ɓɔ fèg wìì anɛ a rìnyam, ànɛ à kìi lɛ, à fɔm à ki rɔɔtɛn yɛ̀ɛ mɛ̀nɔ̀ɓɔ̀; fèg ànɛn à rì ɓisuu ɓilɔ̀ŋ ɓìcèm ɓi ɓi yii ɓi Bɛ̀ll, nnyɛɛ lɔɔ lɛ: Kiris à rì ɓi mìni, à ki fa mini dyàɓɛn inɛ lɛ ɓì ɓiì ɓaà rì gàɓ ɓi rìkem ɗi Bɛ̀ll.

²⁸ Kiris ànɛ̀n nnɛ ɓìsii ghaaghagsì ɓum ɓɛ̀cèm, tì rɔ̀ɔ̀rɔ̀gsɛ̀n ɓɔ, tì ki rèsag ɓɔ rì ɗyomzɛ̀n ɗìcèm, lɛ ti ki lɛ mum bimiɗ a kpaŋ ɓi mis mɛ Bɛ̀ll, di à ti ǹsììrɛn lɛ kɔɔ̀kɔɔ̀ ɓi Kiris.

²⁹ Kìsay kiǹ kɛɛ̀ki nkìkì, ǹɗùùɗùù rì nghɛɓsɛn wu ìtèɗ wii wu wɛɛ̀ kìki kisay ɓi mɛ̀ rì ìtèɗ.