MƐ̀KÌKÌÌ MƐ ƁƐKƐ̀NÌ-FÌTOM 9 - Bafia Nouveau Testament

Ŋwaàdɛŋ lɛ Sol à lɔ̀ɔ̀ghrɛɛ ǹɗem, à gherɛ̀n Kan Yeesus

¹ Yɛ̀ɛ sol à ɓaghà di à kaka rì coo ǹɗem wu rìgɛn wulɛ, a cuùcùùsì ɓɛ̀gherɛ̀n ɓɛ Kan, nni à kɛ̀ngà kì ghɛɛ̀ ǹkɔ̀mɛ̀n ɓɛ̀pìrɛɛtìrɛ̀ àgwey,

² à tɔg nyi ɓɛ̀kaàtà ɓɛ ɓɛ faa nyi Ìtèɗ wulɛ, a kɛǹ a Damas, i à tanɛɛ ɓum ɓi naa yi bɔ̀ŋzɛ̀n, nsoò, ɓɛ̀yiɓ nsoò ɓɛ̀baŋì ɓɛ ɓɛɛ̀ nɔ̀ɔnɔɔ̀tì bee i Kan, a ɓangiì ɓɔ a ki sug yi rì ɓɔ a Yorisalɛm ɓɛ̀kàgakɛn.

³ Yɛ̀ɛ à kɛ̀nkɛni a Damas, di à ti ɓiì wuuwuɓsɛ̀n bàn, nni à sìgmɛ̀ngà di kìtɛɛtɛn ki mɛ làn yi ɗyoo lɛ ŋwààɗ, ki ceŋzɛ̀n nyi.

⁴ Fɔɔnnɛ à kpìghà ɓi zi à wog di jɛ̀ɛ̀ yɛ̀ɛ kpaakpaa nyi lɛ: Sol, Sol wɔ̀, ɓisuucɛ nnɛ u tɔtɔɓ mɛ fɛlɛ̀?

⁵ Sol à tɔg lɛ: Kan, wɔ̀ ghɛn wɔ̀ yɛɛ ri? Jɛ̀ɛ̀ ì pɛ̀ɛ̀zì nyi lɛ: Mɛ̀ yɛɛ ri Yeesus ànɛ u tɔtɔ̀ɓ ki ri wɔ̀ ɓiì ɓaà ǹtɔɓ lɛ u ki ti ǹtoòtèɗ di mɛ̀kɔ̀ŋ mɛɛ̀ roorogì wɔ̀. Nni Sol à risìghà, à tumɛ̀n rìnììghnìŋdɛ̀n à kpaa lɛ: Kan nni wɔ̀ɔ kɔ̀ngi lɛ nki la? Kan à ɓàg min nyi lɛ:

⁶ Pɛ̀sɛn aɗyoo, u ɗiŋi ɓi bàn, wɔɔnnɛ ɓɛ ri wɔ̀ ɓiì kpaà com ki ù ghɛ̀ɛ̀sɛɛ kì kìi.

⁷ Ɓumɓɛ Sol à kɛ̀ɛ̀kɛ̀ɛ̀ghà ǹɗaŋ ri ɓɔ, ɓɛ rɛlìghà, ìris wu mamzì ɓɔ, ɓisuulɛ, ɓɛ wowɔkà jɛ̀ɛ̀ yɔ̀ ri yɔ̀, ɓɛ̀ kɛɛ̀ ghɛn ŋwaànɛ à tòtòkà.

⁸ Nni Sol à pɛ̀sɛ̀ngà aɗyoo, wɔ̀lɛ kɛ̀ɛ ghɛnɛnti nsoò yɛ̀ɛ mis mii mɛ ɓaghà mɛ̀ ŋwàrɛn. Fɔɔnnɛ ɓɛ ɓangà nyi ɓi càg, ɓɛ kɛɛ̀sì nyi à kpaŋ a Damas.

⁹ À kɔ̀rì mɛ̀ru mɛraa, kɛ̀ɛ ghɛnɛn, kɛ̀ɛ ɗi, kɛ̀ɛ nɔ.

¹⁰ Ǹgherɛ̀n àdɛŋ ɗii lɛ Ananyas à ɓaghà a Damas, nyi nnɛ Kan à reŋìghà fɛlɛ yɛ̀ɛ ɓìdɛ̀ndɛm à kpaa nyi lɛ: Ananyas wɔ̀! Roànɛ̀n à ɓàg nyi lɛ: Kan, mɛ̀ɛnɛ lɛ.

¹¹ Kan à kpaa tì nyi lɛ: Pɛ̀sɛn aɗyoo, u kɛǹ ɓi bee ì mɛ̀rɛy, u kpaŋ a mɛɛ mɛ Zyudas, u tɔg ŋwaàdɛŋ wɔɔ lɛ Sol, ànɛ à yalɛ̀ngà a Tarisi àncèm a kìki bɔ̀ŋzɛ̀n ɓigomìnɛ;

¹² nni ɓi bɔŋ̀zɛ̀n ìnɛn, ki kiì yì nyi fɛlɛ yɛ̀ɛ ɓìdɛ̀ndɛm lɛ à ghɛɛ yì mum ɗii lɛ Ananyas di à ɗiŋii yì ɓi naa yìì, à ki saagh nyi ɓyàg ɓi nyoo lɛ di a ghɛnɛn tì.

¹³ Ananyas à ɓàg lɛ: Kan, m̀mɛ wog di ɓum lɛɛ̀gwey ɓɛɛ sɛsɛg rigɛn ɗi ŋwaànɛ̀n àa nkìi ɓɛ̀gherɛ̀n ɓɛ a Yorisalɛm.

¹⁴ Nni ɓi ɗi à rì ɗi fɛ, ɓɛ̀pìrɛɛtìrɛ̀ ɓɛgwey ɓɛ nfaa nyi ìtèɗ wulɛ a ɓangi ɓum ɓɛ̀cèm ɓɛ ɓɛɛ̀ rereŋi ɗii ɗyɔɔ, à ki fogi ɓɔ ɓi ɓìsɔŋ.

¹⁵ Nsoò fɔlɔɔ, Kan à kpaatìghà Ananyas lɛ: Kɛ̀na lɔŋ ɓisuulɛ, Sol à rì mɛ̀ fɛlɛ yɛ̀ɛ com ki kisay ki ǹsɔnɛɛ. À rì ɓiì rèresii ɗii ɗyɛ̀m ɓi ɓìlɔ̀ŋ ɓi ɓɛ yii ɓi mɛ wɔɔ, rì a mɛ̀fòm, rì ɓi nyìinyìm à ɓɔn ɓɛ Isirayɛl.

¹⁶ Mɛ̀ɛmiɗ ǹɗì nyi ɓiì rèsii mɛtɔɓ mɛ̀cèm mɛ à ɓiì woògh ɓisu wɛ̀m.

¹⁷ Fɔɔnnɛ Ananyas à kɛ̀ngà min wɔɔ; nni yɛɛ̀ à ɗiŋìghà ɓi naa ìnɛ Sol à ɓaghà miì, à saagh nyi ɓyàg ɓi nyoo a ki kpaa nyi lɛ: Geni wɛ̀m Sol, Kan Yeesus ànɛ àa ǹɗèsɛɛ yì wɔ̀ ɓi bee di u yùyuiy fɛ, yɛɛ romiì mɛ̀ a lɔ̀ŋkɔɔ, lɛ mɛ̀ nsaagh wɔ̀ ɓyàg ɓi nyoo di wɔ̀ɔ ghɛnɛn tì, ù ki ɓa nɗonɛn ɗi Kìtɛntɛ̀ɛ̀n ki Nghay.

¹⁸ Lɔŋ ɓi gom yɔ̀miɗ inɛ̀n, ɓyom ɓidɛŋ fɛlɛ yɛ̀ɛ ɓìɓaaɓaa ɓi ɓìzɛn ɓi ɓaaghrɛ̀ngày ɓi mis mɛ Sol, ɓi kpi ɓi zi, à ghɛnɛ̀n tì min, fɔɔnnɛ à pɛ̀sɛ̀ngà aɗyoo, ɓɛ ɓaɓtì nyi.

¹⁹ Yɛ̀ɛ à ɗighà ɓìɗilàg, ìtèɗ wu yutì nyi ɓi nyoo. À kɔ̀rìghà tì gàɓ ì mɛ̀ru rì ɓɛ̀gherɛ̀n ɓɛ a Damas.

²⁰ Nni à ghagsɛ̀ngà lɔŋ wɔɔ foo ɗi rìkakàlì ɗi ɓum ɗii ɗi Yeesus ɓi naa yi bɔ̀ŋzɛ̀n, à lààlàmɓɛ̀n lɛ: Yeesus à rì Man à Bɛ̀ll.

²¹ Ɓum ɓɛ̀cèm ɓɛ ɓɛ wowòkà di a kpaakpaa fɔlɔɔ, ɓɛ Kuuràkà, ɓɛ tɔtɔ̀g lɛ: Àa ŋwaànɛ yɛɛ ǹ-yeèyèèsì ɓum ɓɛ̀cèm ɓɛ ɓɛɛ kpɔŋkpɔŋ ɗii ɗi Yeesus a Yorisalɛm? Àncèm aà n-yuyuu yì ɓi fɛ rì fèg ànɛ lɛ, a ɓangi bɔ, a fogi ɓɔ ɓi ɓìsɔŋ, di a kɛǹ ɗì ɓɔ a ɓɛ̀pìrɛɛtìrɛ̀ ɓɛgwey?

²² Kìɓan kifog Sol à kɛ̀nkɛ̀ngà lɔŋ asu, à ki sìisiìrɛ̀n ɓi rìrèrèsì ɗi ɓum lɛ ɓɛɛ yi saaɗ lɛ Yeesus à rì lɔŋ Kiris; Ɓɛ̀yudɛ̀n ɓɛ a Damas ɓɛ rɔɓkà kɛ̀ɛ̀ kìɓan ki ɓɛ ri lɛ ɓɛ pɛ̀ɛ̀zì Sol.

²³ Yɛ̀ɛ gàɓ ì mɛ̀ru ì ghaghìghà tì foo, Ɓɛ̀yudɛ̀n ɓɛ wɔrɛ̀n lɛ ɓɔɔ wey Sol.

²⁴ Kìɓan kifog, Sol à yighà kìtɔ̀kɔ̀ kaa ɓisuulɛ ɓɛ ramgàkà nyi a mɛ̀suunaa mɛ bàn lɛ ɓɛɛ wey nyi, ɓɛ beŋ̀ mɔ lɛ rì ìru rì ŋwos.

²⁵ Nni ɓɛ̀yilàg ɓii ɓɛ tekà nyi ɓi-ru wudɛŋ, ɓɛ kaŋ̀ nyi ɓi kìkpoŋ, ɓɛ ɓɔg gari ɗi nyi lɛ ɓɛɛ sɛɛ̀di nyi rì ǹɗig ɓɛg àmbog.

²⁶ Yɛ̀ɛ Sol à kpagà a Yorisalɛm, nni à kaaghà bee ìnɛ a rarɛn ɗì ɓɛ̀gherɛ̀n ɓɛ wɔ̀ɔ̀, kìɓan kifog ɓɛ̀roɓɛ̀n ɓɛ̀sɛ̀ɛ̀ ɓɛ̀cèm ɓɛ rirìsìghà nyi, lɛ ɓɛ ɓiisɛ̀ngà ɓi kigherɛɛ lɛ à ti ǹ-yilàg.

²⁷ Fɔɔnnɛ Ɓarinaɓas à tekà Sol à kɛ̀n ɗì nyi a ɓɛ̀kɛ̀nì-fìtom, à kpaa ɓɔ yɛ̀ɛ Sol à ghɛngà Kan ɓi bee ìnɛ a Damas rì yɛ̀ɛ Kan à tòòghrɛ̀ngà ɗì nyi, nni à kpaatìghà ɓɔ rìkuu ɗi ǹtyweeyi ɗi Sol àa ǹɗì rì ɗyɔ a Damas di a kakali ɓum ɗii ɗi Yeesus.

²⁸ À tumɛ̀n ɓi cààmɛ̀n kiǹ innɛ Sol à ɓasɛ̀ngà rì ɓɔ, ɓɛ kikì lɛ, ɓɛ ɓɔg, ɓɛ sɛn ǹɗaŋ di ɓɛɛ̀ rèresi ɓum ɗii ɗi Kan rì ǹtyweeyi ɓi nɗem.

²⁹ Sol à kuùkùrɛ̀ngà ɗì Ɓɛ̀yudɛ̀n ɓɛ ɓɛ ǹtòkì rìgìrɛg, à ki nyoonyolɛ̀n ɗì ɓɔ, wɔ̀lɛ ɓɛ̀roɓɛ̀n ɓɔɔ kaakàà bee inɛ lɛ ɓɛɛ wey nyi.

³⁰ Yɛ̀ɛ ɓɛ̀geni ɓɛ Sol ɓɛ righerɛn ɓɛ wokà fɔlɔɔ, fɔɔnnɛ ɓɛ kɛngà ɗì nyi a Sezare; yɛ̀ɛ ɓɛ kpagà wɔɔ, ɓɛ càɗ nyi lɛ a ghaàgh a Tarisi.

³¹ Kìseŋi ki ɓaghà lɛ fyòoog, ɓi zi ì Zyude bimiɗ, a Galile rì a Samari; kìseŋi ki tetèkà ìtèɗ, ki kikì Kan mɛ̀wog, ki ki tèeghteghɛ̀n rì ǹghɛɓsɛn wu Kitɛntɛ̀ɛ̀n ki Nghay.

Pyɛɛri à wɔ̀ɔ̀zii ŋwaàdɛŋ ɗii lɛ Enee

³² Pyɛɛri à rerènìghà kìlɔŋ kìcèm, nni nwos adɛŋ, à sɛngà a Lida lɛ a ghɛn ɓɛ̀gherɛ̀n ɓɛ ɓɛ ɓaghà wɔɔ.

³³ Fɔɔnnɛ à tanɛ̀ngà ŋwaàdɛŋ wɔɔ ɗii lɛ Enee ǹnɔ̀nɔŋiyɛn ɓi kon. Ki ɓaghà di ki ti bèg taàraa yɛ̀ɛ ŋwaànɛ̀n à kpìghà ɓi zi, lɛ à ɓaghà ǹwɔ̀ɔ̀ghrɛn.

³⁴ Nni Pyɛɛri à kpaaghà ŋwaànɛ̀n lɛ: Enee wɔ̀, Yeesus Kiris à wɔ̀ɔ̀zii wɔ̀, pɛ̀sɛn aɗyoo, u pegsɛn ɓyom ɓilɔ̀ŋ ɓyɔɔ. Fɔɔnnɛ ŋwaànɛ̀n à ghàskà kì pɛ̀sɛɛ aɗyoo.

³⁵ Yɛ̀ɛ ɓum ɓɛ̀cèm ɓɛ a Lida, rì ɓɛ ɓi-reɓ wu lɛ Sarɔn ɓɛ ghɛngà ŋwaànɛ̀n, nni ɓɛ gherɛ̀ngà Kan.

Pyɛɛri à ghèmzii giɓ adɛŋ ɗii lɛ Taɓita

³⁶ Giɓ adɛŋ yɛɛ ɓaghà ǹgherɛ̀n a Zyope ɗii lɛ Taɓita yɛɛ lɔɔ lɛ Dorikas; à kìkìghà kìrɔɔ lɛɛ̀gwey à ki ghɛɛghɛɓsì ɓum ɓɛ nyìighnyìg.

³⁷ Ɓi mɛ̀ru mɛ̀n, nni à roɓkà, à ki wu. Yɛ̀ɛ ɓɛ wuɓsìghà kìloŋ kii, ɓɛ kɛǹ kɔ kì nɔ̀ŋzii ɓi kìden ki naa ɓi mɛɛ mɛ aɗyoo.

³⁸ Yɛ̀ɛ ɓɛ̀gherɛ̀n ɓɛ a Zyope ɓɛ wokà lɛ Pyɛɛri à rì a Lida, Lida ànɛn à ràɓsɛ̀ngà ɓi loò rì Zyope, nni ɓɛ romgà ɓum ɓɛɓɛɛ̀ lɛ ɓɛɛ kɛǹ kì kpaà Pyɛɛri lɛ: Kùrùg yuis̀ a lɔ̀ŋkis, kɔ̀ɔ̀ lɛ̀mziì.

³⁹ Fɔɔnnɛ à pɛ̀sɛ̀ngà, à kɛ̀ɛ̀zɛ̀n ɗì ɓɔ. Yɛ̀ɛ à kpagà wɔɔ, ɓɛ ɓɔg ɗì nyi ɓi kìden ki naa ki ɓi mɛɛ aɗyoo, mɛ̀kpɔɓ mɛcèm mɛ tyoŋdɛ̀n nyi a nyoo di mɛɛ̀ rènɗèn ɓɛ rerèsì nyi lɛ, rì bùɓa rì ɓɛ̀kàɓà ɓɛ Dorikas à raràɗkà di à kaka cem.

⁴⁰ Nni Pyɛɛri à kpaŋzìghà min ɓum ɓɛ̀cèm ɓidan, à ɓag mɛ̀ɗu ɓi zi, à ɓɔ̀ŋzàg Bɛ̀ll, ajɛ̀m ìnɛn à lɔ̀ɔ̀ghrɛ̀n min ɓi ɓɛg à kìloŋ à kpaa lɛ: Taɓita wɔ̀, pɛ̀sɛn aɗyoo! Nni à ŋwàɗkà min mis à ghɛn Pyɛɛri, à pɛ̀sɛ̀n kìkɔ̀ɔ̀kɔ̀ɔ̀.

⁴¹ Pyɛɛri à ɓan nyi ɓi càg, à pɛ̀sì nyi mɛ̀rɛy. À regìì min lɛ, rì ɓɛ̀gherɛ̀n rì mɛ̀kpɔɓ, à rèsì ɓɔ nyi, ɓɛ ghɛn lɛ à ti cem.

⁴² Bàn ì Zyope bimiɗ ì wokà kìɓan kiǹ, ɓum lɛɛ̀gwey ɓɛ ki gherɛn Kan.

⁴³ Pyɛɛri à finɛ̀ngà a Zyope lèg àdɛŋ, à kɔ̀kɔ̀rì yɛ̀ɛ ŋwaàdɛŋ lɛ Simɔn ànɛ à ɓaghà ǹkìì-gòò.