MƐ̀KÌKÌÌ MƐ ƁƐKƐ̀NÌ-FÌTOM 8 - Bafia Nouveau Testament

ǹ-yeesɛ̀n ànɛ ɓɛ yeeyèèsìghà ɓɛ̀kìristɛ̀n

¹ Sol à ghɛngà lɛ rìwey di ɓɛ wolà Ityɛn ɗi ɓaghà syeesyee à kìɓan. Ŋwos àǹcèm ànɛn, wɛ̀y wu pɛsɛ̀ngày ɓisuu kiseŋi ki ki ɓaghà a Yorisalɛm, fɔɔnnɛ ɓɛ̀gherɛ̀n ɓɛ̀cèm ɓɛ saàtɛ̀ngà ɓi ɓɔɔ bàn ɓɛ a Zyude, rì ɓɛ a Samari, lɔŋ ɓɛ̀kɛ̀nì-fìtom cɛ̀ncaa ɓɛɛ rɔɓkà a Yorisalɛm.

² Ɓumɓɛ ɓɛ ɓaghà ɓɛ̀falɛn ɓi rìgherɛ̀n ɓɛ ɓomgà Ityɛn, ɓɛ ki rèn nyi lɛɛ̀gwey.

³ Wɔ̀lɛ, ɓi ɓɛg ànɛ yɛ̀ɛ Sol nyii kɛnkɛ̀ngà lɔŋ asu à tɔtɔ̀ɓ ɓɛ̀gherɛ̀n; à ɗiɗìŋìghà ɓi ɓɛ̀naa, di a Kpaakpàŋzìì lɛ, rì ɓɛ̀yiɓ ɗì ɓɛ̀baŋì ɓi-tèɗ à ki foŋfoŋ ɓɔ ɓi naà-zày.

⁴ Ɓɛ̀gherɛ̀n ɓɛ ɓɛ Saàtɛ̀ngà ɓɛǹ, ɓɛ Kɛɛ̀kɛ̀ɛ̀ghà jàŋ lɛ jàŋ di ɓɛɛ̀ ghaaghagsì ɓum Syeesyee à Ɓɔlɛ.

Filiɓ a ghaaghagsì Syeesyee à Ɓɔlɛ a Samari

⁵ Fɔɔnnɛ Filiɓ à Sɛngà ɓi bàn ìdɛŋ ìnɛ a Samari à kakàlì ɓumɓɛ wɔɔ kiɓan ki ǹghɛɓsì ɓum.

⁶ Ɓìtuu ɓi ɓum lɔŋ ǹɗem wùfog, ɓi siìrɛ̀ngà ɓi rìwog ɗi ɓiɓan ɓi Filiɓ à Kpaakpààghà, ɓisuulɛ ɓɛ wowòkà, ɓɛ Ki seesee dàm yi ɓiɓan yi à kìkìghà.

⁷ Ɓi Saaɗ ɓìɓeɓtàg ɓi mɛghay lɛɛ̀gwey ɓi Kpaŋkpàŋgà ɓi ɓumɓɛ ɓi ɓaghà miì di ɓyɛɛ̀ Syaasyaàdɛ̀n jɛ̀ɛ̀ aɗyoo, ɓìsɛkɛ̀rɛ̀ lɛɛ̀gwey, rì ɓɛ̀lɛnlɛm ɓɛ wɔngàkà.

⁸ Fɔɔnnɛ ɓumɓɛ ɓi bàn ìnɛn ɓɛ nyaàrɛ̀ngà lɛɛ̀gwey.

⁹ Ŋwaàdɛŋ lɛ Simɔn à ɓaghà ɓi bàn ìnɛn abɛ̀y, à ɓaghà ǹkìì-majìg; à kìkì ɓìɓan ɓi lɛ ɓumɓɛ a Samari ɓɛɛ Kuukùùràg, à ki yèeghyegsì ɓum lɛ nyii ri kìtèetèɗ ki mum.

¹⁰ Fɔɔnnɛ ɓum ɓɛ̀cèm ɓɛ Kuuràkà ɗì nyi, à tumɛ̀n ɓi ɓɔɓti ɓɛsàg à Kpaŋ ɓi ɓɛ̀sɛ̀ɛ̀mɛn di ɓɛɛ̀ kpaakpaa lɛ: Roànɛ yɛɛ ri ìtèɗ wu Bɛ̀ll wu ɓɛɛ̀ regi lɛ, ìtèɗ wugwey.

¹¹ Ɓɛ kuuràkà fɔlɔɔ ri nyi lɛ, ki ɓaghà di kaa finɛn yɛ̀ɛ ɓìɓan ɓii ɓi majìg ɓi keèghkègsìghà ɓum.

¹² Wɔ̀lɛ, yɛ̀ɛ ɓum ɓɛ gherɛ̀ngà Syeesyee à Ɓɔlɛ ànɛ Filiɓ à kpaakpààghà ɓɔ, Syeesyee à Ɓɔlɛ à kìlɔ̀ŋ ki Bɛ̀ll, rì à ɗii ɗi Yeesus Kiris, fɔɔnnɛ ɓum ɓɛ ɓaɓtàkà lɛ, rì ɓɛ̀yiɓ, rì ɓɛ̀baŋì.

¹³ Ǹsoò Simɔn nyimiɗ, à gherɛ̀ngà girig, à ki ɓàɓtɛn, à nɔ̀ɔ̀nɔ̀ɔ̀tìghà Filiɓ, à kuùkùùghràg dàm ɗì ɓɛ̀koŋnyoo ɓɛ ɓiɓan ɓɛ à seesèèghà di roànɛ̀n a kìkì.

¹⁴ Yɛ̀ɛ ɓɛ̀kɛ̀nì-fìtom ɓɛ ɓɛ rɔɓkày a Yorisalɛm, ɓɛ wokà lɛ ɓum ɓɛ a Samari ɓɛ ghaɓi jɛ̀ɛ̀ ì Bɛ̀ll lɛ syeesyee, nni ɓɛ romgà lɛ rì Pyɛɛri rì Zyaŋ wɔɔ.

¹⁵ Yɛ̀ɛ ɓɛ̀roɓɛ̀n ɓɛ kpagà a Samari, ɓɛ ɓɔŋzàkà ɓisuu ɓɛgherɛ̀n ɓɛ wɔɔ, lɛ Bɛ̀ll a fa ɓɔ Kìtɛntɛ̀ɛ̀n ki Nghay.

¹⁶ Ɓisuulɛ, Kìtɛntɛ̀ɛ̀n ki Nghày ki ɓaghà di ki ka sɛn yi ɓi nsoò ɓi kìbog ki ɓi ɓɔ; ɓɛ ɓaghà lɔŋ yɛɛri di ɓɛ ti ɓɛ̀ɓàɓtakɛn ɓi ɗii ɗi Kan Yeesus.

¹⁷ Fɔɔnnɛ ɓɛ̀-Pyɛɛri ɓɛɛ̀ Zyaŋ ɓɛ tumɛ̀ngà ɓɔ rìsasààgh ɗi ɓyàg ɓi nyoo, ɓɛ teɗ min Kitɛntɛ̀ɛ̀n ki Nghày.

¹⁸ Nni yɛ̀ɛ Simɔn à ghɛngà lɛ ɓɛ̀kɛ̀nì-fìtom ɓɛ ti lɛ i ɓɛ saghii mum ɓyàg ɓi nyoo, à ɓa rì Kìtɛntɛ̀ɛ̀n ki Nghày, fɔɔnnɛ à sɔ̀ŋìghà mɔ̀ɔ̀ni lɛ a fa ɓɔ.

¹⁹ Rì jɛ̀ɛ̀ a nwɔm lɛ: Faana mɛ̀ girig ìtèɗ wulɛ, ŋwaànɛ ǹsaghii ɓyàg ɓi nyoo, à ɓa rì Kìtɛntɛ̀ɛ̀n ki Nghày.

²⁰ Nni Pyɛɛri à ɓàkà nyi lɛ: Kɔ̀ɔ̀ ɓa gi la rì mɔ̀ɔ̀ni mɔɔ mɛncèm, yɛ̀ɛ ù fèegh lɛ ù rì lɛ ù làg rìfa ɗi Bɛ̀ll rì mɔ̀ɔ̀ni,

²¹ lɛ ù yin gi rì gàɓ nsoò rì ìkɔ̀ɔ̀ ɓi kìsay ki, lɛ nɗem wɔɔ wu yin lɛ saaɗ ɓi mis mɛ Bɛ̀ll.

²² Koɓsɛn fèg à m̀ɓeɓtɛn anɛ ùrì ànɛn ɗì nyi, ù ki ɓɔ̀ŋzi Bɛ̀ll lɛ, a cenɛn wɔ̀ kìɓan ki ù mɛɛ̀ fèg kiǹ di à kɔ̀ni.

²³ Ɓìɓeɓtàg ɓi mɛyitì ɓi roni wɔ̀ ǹɗem lɛ pisa, kìɓe ki ki ghaasii wɔ̀ ǹkpàn.

²⁴ Nni Simɔn à ɓàkà ɓɔ lɛ: mìniìɓɔmiɗ ɓɔ̀ŋzaghna Bɛ̀ll ɓisu wɛ̀m lɛ, ɓìɓan ɓi ɓì kalii ɓìn ɓyɛ̀ kɛɛ̀ kpaŋ a lɔ̀ŋkɛm̀.

²⁵ Yɛ̀ɛ ɓɛ̀-Pyɛɛri ɓɛɛ̀ Zyaŋ ɓɛ ɓaghà di ɓaa rèsag ɓum ɓìɓan ɓi ɓɔɔ yighà, ɓi rarɛ̀n rì Yeesus, ɓɛ ki kali ti ɓɔ Syeesyee à Ɓɔlɛ à Kan, fɔɔnnɛ ɓɛ Sugtìghà a Yorisalɛm di ɓɛɛ̀ kakali ɓumɓɛ ɓi ɓìlɔ̀ŋ ɓi a Samari Syeesyee à Ɓɔlɛ.

Filiɓ rì ŋwaànɛ a Etyopii ànɛ à ɓaghà ŋwɛg

²⁶ Ŋwaàfìtom a Kan à kpaaghà Filiɓ lɛ: Pɛ̀sɛn aɗyoo, u nɔɔ̀ti bee inɛ ì pɛ̀sɛɛ yì a Yorisalɛm ì sɛn a Gaza, ɓum ɓɛ ti ɓɛ̀ kɛɛ̀ fyee ti ɓi bee incèm.

²⁷ Nni Filiɓ à pɛ̀sɛ̀ngà, à ghàs kì kɛ̀ɛ, nni à pìkà mis, à ghɛn ŋwaàdɛŋ nyi asu, ŋwaànɛ̀n à ɓaghà ŋwɛg, nyi tì coo ǹsasàlì à Kaŋɗas giɓ anɛ à ɓaghà rìfòm a Etyopii, nyi tì baŋ-masà à giɓ anɛ̀n. A ɓaghày kìɓɔgsii Bɛ̀ll a Yorisalɛm.

²⁸ Ŋwaànɛ̀n yɛɛ susùkà ǹkɔ̀kɔriyɛn ɓi calig di a ɓàɓay kaàtà à ǹkpaŋzì-ɓìɓan Ezayii.

²⁹ Fɔɔnnɛ Kìtɛntɛ̀ɛ̀n ki Nghay ki kalìghà Filiɓ lɛ: Pìgha mɛ̀kòò, ù tanɛn calig kinii.

³⁰ Nni Filiɓ à Cɛ̀ɓtìghà mɛ̀ree, à tanɛ̀n calig kìn, à wog min yɛ̀ɛ muu Etyopii ànɛ̀n à ɓàɓàlà kaàtà à ǹkpaŋzì-ɓìɓan Ezayii. Filiɓ à tɔg nyi lɛ: Tɛɛnɛ, u wowog nya com ki u ɓàɓay kiǹ?

³¹ Nni ŋwaànɛ̀n à pɛ̀ɛ̀zìghà Filiɓ lɛ: Lannɛ ǹɗì lɛ ǹwog com ki mɓàɓày di ɓɛ tɛɛ̀zii ɓi mɛ kɔ? Nni à kpaaghà Filiɓ lɛ a ɓɔg yì ɓi calig, a kɔri nyi ɓi nwɔŋì.

³² Kìden ki à ɓàɓàlà ɓi kaàtà ànɛn ki ɓaghà lɛ: À rɔ̀ɓkà lɔŋ yɛ̀ɛ kìtuwe ki ɓɛɛ kɛ̀nkɛn ɗi kɔ lɛ ɓɛɛ gheg̀ ɓoŋ, à ki maarag lɔŋ yɛ̀ɛ man à jɔ̀ɔ̀ ànɛ ɓɛɛ̀ caacaa nyùŋ. Fɔɔnnɛ à rɔ̀ɓkà fɔlɔɔ, kɛ̀ɛ pini nsoò ŋwɔ̀m.

³³ Ɓɛ sootìghà nyi, ɓɛ ki ǹyuŋzag nyi, kɛ̀ɛ̀ ŋwaànɛ lɛ à lòèy kìɓan kii; ɓɛ̀ghɛn ɓɛɛ ri ɓùŋ lɛ à càri boo ì mum, yɛ̀ɛ cɛɓ kii ki ti kìtììsiyɛn ɓi ziinɛ?

³⁴ Fɔɔnnɛ ŋwaànɛ̀n à tɔkà Filiɓ lɛ: Kùrùg, kali ɓà mɛ, ɓìɓan ɓi ǹkpaŋzì-ɓìɓan a kpaa ɓìn ɓi seesee ghɛn, nyimiɗ gìn ŋwaàdɛŋ?

³⁵ Nni Filiɓ à pɛ̀sìghày min kitòkì ɓi jàŋ inɛ ŋwaànɛ̀n à ɓàlà, à kpaŋ yɛ̀ɛ à konàkà nyi kìtɛɛ̀zii Syeesyee à Ɓɔlɛ à Yeesus.

³⁶ Yɛ̀ɛ ɓɛ kɛɛdìghà tì beèbɛ̀y, nni ɓɛ kpagà ɓi kìràà, ŋwaànɛ̀n à tɔg Filiɓ lɛ: Mɛ̀nig mɛɛ̀mɛ, cɛ kɛɛ regtii lɛ kɔ̀ɔ ɓàɓti mɛ?

³⁷ Filiɓ à ɓàg nyi lɛ: I ù gherɛɛ rì ǹɗem wɔɔ wucèm ǹɗi lɛ m̀ɓàɓtì wɔ̀; ŋwaànɛ̀n à ɓàg nyi lɛ: Ɛ̀ɛ̀, ǹgherɛɛ lɛ Yeesus Kiris à rì Man à Bɛ̀ll.

³⁸ Nni ŋwaànɛ̀n à tɔkà m̀pusì calig lɛ a rɛli. Ɓɛ sɛn min ɓɛɛ̀ Filiɓ, ɓɛ ɗiŋì ɓi kìràà, Filiɓ à ɓàɓtì min nyi.

³⁹ Yɛ̀ɛ ɓɛ kpagày a cɛɗ, Nghay à Bɛ̀ll à tɛ̀g Filiɓ à kɛ̀n ɗi nyi, ŋwaànɛ̀n kɛ̀ɛ ghɛɛ̀di nyi; nsoò fɔlɔɔ, muu Etyopii ànɛ̀n à ghagsìghà rìkɛ̀ɛ̀ ɗii di a nyàànyàà.

⁴⁰ Filiɓ à sìgmɛ̀ngà di à ti a Azɔt, à pɛ̀sɛ̀n wɔɔ, à kɛ̀n a Sezare, à kakàlì ɓum Ɓɔlɛ à Bɛ̀ll, ɓi bàn yìcèm yi à ghaghìghà ɓi bee.