MƐ̀KÌKÌÌ MƐ ƁƐKƐ̀NÌ-FÌTOM 7 - Bafia Nouveau Testament

Ɓìtòkì ɓi Ityɛn

¹ Fɔɔnnɛ ǹkɔmɛ̀n ɓɛ̀pìrɛɛtìrɛ̀ àgwey à tɔkà min lɛ: Ki ri nya saaɗ fɔlɔɔ yɛ̀ɛ ɓɛ kpaa?

² Ityɛn à ɓàg lɛ: Mìni ɓɛ̀geni ɓɛ̀m, rì ɓɛ̀seŋi ɓɛ̀m, ramina mɛ̀ree ɓi konag kìwoògh lɛ: Bɛ̀ll ànɛ à rì ǹkeŋkèmì à rèsɛ̀ngà yɛ̀ɛ Abiraham à seŋi wìs a ǹsɛ̀ɛ̀, cààmɛ̀n ki à ɓaghà a Mɛzopotamii, di à ka kɛn ɓi ki kɔ̀rii a Haraŋ.

³ À kpaa nyi lɛ: Pɛ̀sɛn ɓi kìlɔ̀ŋ kɔɔ, u ki ghasɛn ɗi naa yɔ̀ɔ̀ i ɓum, u kɛǹ kì kɔ̀rii ɓi kìlɔ̀ŋ ki ǹɗì wɔ̀ ɓiì rèsii.

⁴ Nni Abiraham à pɛsɛ̀ngà min ɓi kìlɔ̀ŋ ki lɛ Kalde, à kɛ̀n kì kɔ̀rii a Haraŋ. Wɔɔ nnɛ ki ɓaa lɛ, seŋi wìì à mɛ wu, Bɛ̀ll à kpaa nyi lɛ, a syaà yì ɓi kìlànà ki zi ki ɓì rì miì ki gɛɛ̀nɛ.

⁵ Kìɓan kifog, Bɛ̀ll à faghà ɓi nyi nsoò maa kìden à jàŋ ànɛ a woòghrɛn ɗì nyi ɓi jàŋ inɛ̀n, nsoò maa zyònà à zɛy rì zɛy, wɔ̀lɛ, à kàkà nyi lɛ, à ri faa gɛ nyi zi inɛ̀n, lɛ yɛ̀ɛ woòghrɛn rì nyì nsoò nyaa ki yiìdi, dòò yii yi rɔɓ rì yɔ̀; Bɛ̀ll à faghà Abiraham ǹkàg wiǹ fɔlɔɔ di à ka yin ri màn.

⁶ Bɛ̀ll à kpaaghà nyi lɛ: Dòò yɔɔ yi kɔ̀rii gɛ ɓi kìlɔ̀ŋ kidɛŋ, wɔɔnnɛ ɓɛ ghaasii gɛ yɔ ɓɛ̀kpàn, ɓɛ ki tɔɓ yɔ, bèg ɓɛ̀hɔnɗɛ̀ɗ ɓɛnin.

⁷ Kìɓan kifog kìlɔ̀ŋ ki ki ghaasii gɛ ɓɔ ɓɛ̀kpàn kiǹ, lɔŋ mɛ̀ yɛɛ yɔ̀mi gɛ kɔ; ajɛ̀m ìnɛn ɓɛ ri pɛ̀sɛɛ gɛ wɔɔ, ɓɛ yu mɛ̀ kìɓɔɔɓɔgsì fɛ ɓi jàŋ ìnɛ.

⁸ Fɔɔnnɛ Bɛ̀ll à faghà Abiraham kɛ̀rɛ̀n ɓi sìg à kìrèmzɛnà ki bee inɛ à rengà ɓɛɛ̀ nyi. Yɛ̀ɛ à yali min Isag, à kɛ̀ɗ nyi ɓi mɛ̀ru taàɓɛ̀ɛ̀. Isag à yay Yakɔɓ, à kɛ̀ɗ girig nyi, Yakɔɓ à kɛ̀ɗkì ɓɛ̀seŋi ɓis ɓɛ ɓɛsɛ̀ɛ̀mɛn ǹtɛ̀ɗ ɗì ɓɛɓɛɛ̀.

⁹ Yɛ̀ɛ ɓɛ̀seŋi ɓis ɓɛ ɓɛsɛ̀ɛ̀mɛn ɓɛ ɓaghà rì ǹɗem wu yàaka ri Yoosɛɓ à geni wàà, nni ɓɛ kàɓkà nyi a Egiɓtɛn.

¹⁰ Kìɓan kifog, Bɛ̀ll à ɓaghà gàm ɗì nyi, à kwèɗ nyi ɓi mɛ̀tɔɓ mii mɛcèm; à faghà nyi ɗyomzɛ̀n, à ki kì lɛ Farawɔŋ, rìfòm ɗi a Egiɓtɛn, ɗyɛɛ keèsi nyi, ɗi ki ɓɔgsi nyi gɔmìnà a Egiɓtɛn, rì ɓi naa yìì bimiɗ.

¹¹ Fɔɔnnɛ coo zày ì kìghà ɓi kìlɔ̀ŋ ki a Egiɓtɛn kìcèm rì ki a Kanaaŋ. Ntɔɓ wu ceeghà, ɓɛ̀seŋi ɓis, ɓɛ̀ kɛɛ ghɛɛ̀di com ki ɗiyɛn.

¹² Yɛ̀ɛ Yakɔɓ à wokà lɛ gèŋ ì rì a Egiɓtɛn, nni à romgà ɓɛ̀seŋi ɓis wɔɔ, ɓi gɛ̀n i ǹtonto.

¹³ Yɛ̀ɛ ɓɛ kɛɛdìghà wɔɔ ɓi gɛ̀n i kìɓɛ̀ɛ̀, Yoosɛɓ à kì lɛ ɓɛ̀geni ɓɛɛ remi nyi, fɔɔnnɛ Farawɔŋ à yighà min rìfuuyì ɗi Yoosɛɓ.

¹⁴ Nni Yoosɛɓ à romgà min lɛ ɓɛɛ teɗ yì, Yakɔɓ à seŋi, rì naa yìì i ɓum ìnɛ ì ɓaghà ɓum mɛ̀tin mɛraa rì ǹtɛ̀ɗ ɗì ɓɛtaǹ.

¹⁵ Fɔɔnnɛ Yakɔɓ à kɛ̀ngà min a Egiɓtɛn wɔɔnnɛ nyimiɗ, rì ɓɛ̀seŋi ɓis ɓɛ ɓɛsɛ̀ɛ̀mɛn, ɓɛ cuughà.

¹⁶ Nni ɓɛ tɛkà ɓìloŋ ɓyaa, ɓɛ kɛǹ ɗì ɓyɔ a Sikɛm, ɓɛ ɓom ɓyɔ ɓi zɔ̀ŋ ìnɛ Abiraham à làkà wɔɔ ǹlàghɛn, ri ɓɔn ɓɛ Emɔɔr.

¹⁷ Yɛ̀ɛ cààmɛ̀n ki lɛ Bɛ̀ll a roòzi ǹkàg wu à kàkà Abiraham ki kɛɛ̀kɛ̀ɛ̀ghày, bàlì ì ɓum ɓis ɓɛ ɓɛ ɓaghà a Egiɓtɛn ì tèèghtèghɛ̀ngà, ɓɛ ki yaayay ti

¹⁸ à kpaŋ yɛ̀ɛ rìfòm ɗiɗɛŋ ɗi ɗi yighà ɓi Yoosɛɓ ɗi tekà rìlàmì a Egiɓtɛn.

¹⁹ Rìfòm ɗiǹ ɗyɛɛ ɓeèɓèèzɛ̀ngà boo yìs ɓi mɛ̀ghèy ɗi ki tɔ̀ɓ ɓɔ lèg ànɛ lɛ, ɓɛ ǹkàgì ɓɔ lɛ, ɓɛɛ maàg ɓɔn ɓaa, lɛ ɓɛ̀ kɛɛ̀ ghɛɓ.

²⁰ Ɓi cààmɛ̀n kiǹ innɛ Moyis à yalɛɛ; à ɓaghà rɔɔrɔɔ à man ànɛ Bɛ̀ll à Keesìghà; ɓɛ̀yalì ɓii ɓɛ ɓegà nyi naa rì naa, à kpaŋ ɓɛ̀ŋwii ɓɛraa.

²¹ Nni yɛ̀ɛ ɓɛ rinìghà nyi, fɔɔnnɛ gɔ̀n ì Farawɔŋ ì ɓadɛ̀ngà nyi, ì tɔɔsì nyi lɔŋ yɛ̀ɛ man wiì.

²² Ɓumɓɛ a Egiɓtɛn ɓɛ resàkà Moyis ɓìɓan ɓi ɓi kìlɔ̀ŋ kaa ɓìcèm, fɔɔnnɛ à ɓaghà kìtèetèɗ ki mum lɛ, rì ɓi ɓìtòkì ɓii, rì ɓi mɛ̀kìkìì mii.

²³ Nni yɛ̀ɛ à kpagà bèg mɛ̀tin mɛɓɛɛ̀ lɛ rinɗim, fɔɔnnɛ à ɓekà lɛ a kɛǹ kì ghɛɛ̀ ɓɔn ɓɛ Isirayɛl ɓɛ ɓɛgeni ɓii.

²⁴ Yɛɛ̀ Moyis à ghɛngà di muu Egiɓtɛn a yeeyeesì gèni wìì adɛŋ, nni à kàmgà geni ànɛ ɓɛ yeeyèèsìghà ànɛn; ɓi ɗi lɛ a rɔŋ̀ kìɓan kiǹ, à wolà muu Egiɓtɛn àncèm.

²⁵ À fèfèkà lɛ, ɓɔn ɓɛ Isirayɛl ɓɛ ɓɛgèni ɓɛ ri ɓiì ghɛɛ̀ ɓi rìkì ɗiǹ lɛ, nyi nnɛ Bɛ̀ll à romiì lɛ a ghɛɓsi ɓɔ, wɔ̀lɛ, ɓɔɔ ghɛngà ɓi kiɓan kiǹ fɔlɔɔ.

²⁶ Nni ɓi duri tana, Moyis à tanɛ̀ngà ɓɔn ɓɛ Isirayɛl ɓɛɓɛɛ̀, di ɓɛɛ̀ ɗùùɗùù, à kɛ̀n ɓɔ kì ghasii, à kpaa ɓɔ lɛ: Ɓɔɔsoŋ̀ cɛ kɛɛ ri ɓà lɛ, mìni ɓi rìgeni, ɓì ki ciiciìzɛ̀n tì mìni rì mìni?

²⁷ Fɔɔnnɛ roànɛ à ciìcììzìghà gèni àmbog à fengàkà Moyis, à ki tɔg nyi lɛ: Ghɛn yɛɛ nkpaa kɔm wɔ̀ lɛ, u yu ɓìsi kìlàmii, ù ki yɔ̀myɔm ɓiɓan ɓis?

²⁸ U kɔ̀nkɔn lɛ u wey mɛ̀ yɛ̀ɛ wɔ̀ɔ ǹwoli muu Egiɓtɛn rìŋkò?

²⁹ Yɛ̀ɛ Moyis à wokà fɔlɔɔ, nni à ghɛŋìghà, à kɛ̀n kì nyamzɛɛ ɓi kìlɔ̀ŋ ki lɛ Maɗyaŋ, wɔɔnnɛ à yalà ɓɔn ɓɛɓɛɛ̀.

³⁰ Ajɛ̀m ì bèg mɛ̀tin mɛɓɛɛ̀, nnɛ ŋ̀waàfìtom à resɛ̀ngà nyi ɓi-reɓ wu dòn ì Sinayi ì rì wɔɔ; à ɓaghà fɛlɛ yɛ̀ɛ ǹɗòò wu ɗuu wu wɛɛ̀ ròòroo ɓi kìtywìɗ.

³¹ Moyis à kuughràkà rìkuu ɗi com ɗi à ghɛngà ɗiǹ nni yɛ̀ɛ à mɛɛ̀ tyòŋdɛ̀ngà wɔɔ, à wog di jɛ̀ɛ̀ ì Kan ì tòòghrɛɛ, ì kpaa lɛ:

³² Mɛ̀ yɛɛ rì Bɛ̀ll à ɓɛ̀seŋi ɓɔɔ, Bɛ̀ll à Abiraham, Bɛ̀ll à Isag, Bɛ̀ll à Yakɔɓ, nni Moyis à risìghà, kɛ̀ɛ ghɛɛsi ti rìseesèè wɔɔ.

³³ Fɔɔnnɛ Kan à kàlìghà Moyis lɛ: Sɔ̀ŋi ɓɛ̀siripàs ɓɔɔ, ɓisuulɛ jàŋ inɛ ù rɛrɛrii miì ìnɛ̀n, ì rì kìcèlì.

³⁴ Mɛ̀ɛ ǹghɛɛ mɛ̀tɔɓ mɛ kilɔ̀ŋ kɛm̀ ki ki ri a Egiɓtɛn, ǹki wog bemeg yaa, fɔɔnnɛ ǹsɛnii lɛ ǹghɛɓsì ɓɔ. Nni ɓi cààmɛ̀n ki, yu, ǹɗom wɔ̀ a Egiɓtɛn.

³⁵ Moyis nyimiɗ ànɛ ɓɔn ɓɛ Isirayɛl ɓɛ ɓengà, rì jɛ̀ɛ̀ inɛ lɛ: Ghɛn yɛɛ m̀ɓɔgsii wɔ̀ rìfòm ɗi yɔ̀myɔmɛn ɓisi? Innɛ Bɛ̀ll à romgà lɛ, a lami ɓɔ, à ki kwèɗ ɓɔ ɓi rìkpàn, lɔŋ yɛ̀ɛ ŋwaà-fìtom ànɛ à ghɛngà ɓi kìtwìɗ à kpaaghà nyi.

³⁶ Nnyɛɛ kpaŋzìghày ɓɔn ɓɛ Isirayɛl a Egiɓtɛn di a kìki ɓɛ̀koŋnyoo ɓɛ ɓiɓan rì dàm yi ɓiɓan à tumɛ̀n a Egiɓtɛn à kpaŋ ɓi rìɓày à m̀ɓàŋ rì ɓi reɓ bèg mɛ̀tin mɛɓɛɛ̀.

³⁷ Lɔŋ Moyis ànɛ̀n yɛɛ kpaaghà ɓɔn ɓɛ Isirayɛl lɛ: Bɛ̀ll à romiì gɛ ŋwaàdɛŋ ànɛ ɓi boo yìn i ɓum, lɛ a ɓa ǹkpaŋzì-ɓìɓan fɛlɛ yɛ̀ɛ mɛ̀.

³⁸ Yɛ̀ɛ kìlɔ̀ŋ ki taŋzɛ̀ngà ɓi-reɓ, Moyis yɛɛ ɓaghà ɓi nyìinyìm ànɛ lɛ, rì ɓɛ̀seŋi ɓis rì ŋwaà-fìtom anɛ à tòtòkà ɗì nyi ɓi dòn ì Sinayi. Nnyɛɛ ghaɓkà jɛ̀ɛ̀ yi Bɛ̀ll yi yi ri cem lɛ a ghagsi mìni yɔ.

³⁹ Kìɓan kifog ɓɛ̀seŋi ɓis ɓɛ nɔɔ̀tìghà ɓi deɓ yii, ɓɛ ɓengà yɔ, ɓɛ kɔǹ lɛ, di ɓaa sugtii a Egiɓtɛn:

⁴⁰ Lɛ ɓɛ kpaaghà Arɔn lɛ: Syagha ɓìsi bɛ̀ll yi yɛɛ syogi ɓìsi bee ɓisuulɛ, ɓìsii yii ɓi com ki ki ǹkìi Moyis ànɛ àa ǹkpaŋzii yì ɓìsi a Egiɓtɛn.

⁴¹ Nni ɓɛ syakà min man à sanìnya ɓi cààmɛ̀n kiǹ ɓɛ funɛ̀n ɓìtuwe ɓi rìɓɔgsì ɗi kìfèèghrɛnà kiǹ, ɓɛ ki nyààrɛn lɛɛ̀gwey ri com ki ɓɔmiɗ ɓɔ yɛɛ syakà rì ɓyàg ɓyaa.

⁴² Fɔɔnnɛ Bɛ̀ll à lɔ̀ghìghà ɓɔ jɛ̀m, à càɗ ɓɔ lɛ, ɓɛɛ ɓɔɔ̀ɓɔ̀gsì tyɔɛy ti aɗyoo, fɛlɛ yɛ̀ɛ ɓɛ̀kpaŋzì-ɓìɓan ɓɛ kangà lɛ: Mìni ɓɔn ɓɛ Isirayɛl, ɓi bèg mɛ̀tin mɛɓɛɛ̀ yi ɓì kɔ̀rìghà ɓi-reɓ, mɛ̀ɛnɛ ɓì ɓɔɔ̀ɓɔ̀gsìghà nya lɛ rì ɓìtuwe rì ìkum?

⁴³ Èe èe kìcùmà ki bɛ̀ll ìnɛ lɛ Mɔlɔg rì kìfèèghrɛnà ki fyɛy fi bɛ̀ll yìn ìnɛ lɛ Refan ɓyɛɛ̀ɓi ɓì tɛ̀kà, ɓì syag ɓìnùn ɓiǹ lɛ ɓyɛɛ̀ɓi ɓi ɓɔɔ̀ɓɔ̀gsì; kìɓan kiǹ kɛɛ̀ki ǹɗì mìni ɓiì kɛ̀ɛ ki naŋì fìràɓ, Baɓilon à rɔ̀ɓ fɛ ajɛ̀m.

⁴⁴ Ɓɛ̀seŋi ɓis ɓɛ ɓaghà rì kìcùmà ki ki ɓaghà kìrèmzɛnà ki lɛ, Bɛ̀ll à rì ɓi nyìinyìm wàà. Bɛ̀ll ànɛ à tòtòkà rì Moyis à kpaaghà nyi lɛ ɓɛǹ ɓɛ ghɛɛ̀sɛɛ kì toŋì kìcùmà lɔŋ yɛ̀ɛ rìkuu ɗi nyii resìghà ànɛn.

⁴⁵ Ajɛ̀m ìnɛn, ɓɛ̀seŋi ɓis ɓɛ ɓɛ rɔɓkà rì kìcùmà kiǹ ɓɛ tekà kɔ, ɓɛ ɗiŋì rì kɔ ɓi zi ìnɛ ɓɛ ɓatɛ̀ngà rì ɓìlɔ̀ŋ ɓi Bɛ̀ll à sansàngà ɗi ɓɔɔ tiì yɛ̀ɛ Yooswa à kɛ̀ɛ̀kɛ̀ɛ̀sìghà ɓɔ; kìcùmà kiǹ ki kɔrìghà wɔɔ à kpaŋ ɓi cààmɛ̀n ki Davit à ɓɔkà rìfòm.

⁴⁶ Davit ànɛ̀n yɛɛ ghɛngà lɛ Bɛ̀ll à keesii nyi fɔɔnnɛ à tɔkà Bɛ̀ll à Yakɔɓ ìtèɗ wulɛ nyi Davit nyii toŋ̀ ànɛ̀n mɛɛ.

⁴⁷ Kìɓan kifog, Salomɔŋ yɛɛ togà Bɛ̀ll mɛɛ.

⁴⁸ Wɔ̀lɛ Bɛ̀ll ànɛ à teŋmɛɛ à cee, a maà kɔ̀ri ɓi kɔmiɗ ɓi mɛɛ mɛ ɓum ɓɛɛ toŋi.

⁴⁹ Ɓisuulɛ Kan a kpaaghi lɛ, ɗyoo ɗyɛɛ ri ìkɔ̀ɔ̀ wɛm̀ wu rilàmì, ziì ɓa jàŋ i rìrɛsàg ɗyɛm̀ ɗi mɛkòò, nni rìkuu ɗi mɛɛ aɗi ɗyɛɛ̀ɗi ɓì rì mɛ̀ ɓiì toŋì? Nsoò lɛ rìkuu ɗì jàŋ ɗi la ɗyɛɛ̀ɗi mɛ̀ ǹɗì lɛ ǹfɔɔsàg wɔɔ?

⁵⁰ Àa mɛ̀ɛmiɗ yɛɛ kìghà ɓyom ɓiǹ ɓìcèm?

⁵¹ Mìni ɓum ɓɛ ǹtoòtèɗ ɓɛ ɓì rì lɛ, mìni kɛ̀ɛ̀ mɛ̀rem, mìni rì ɓɛ̀lɔg, fɔɔnnɛ ɓi ɗùùɗuu cààmɛ̀n kìcèm ɗì Kìtɛntɛ̀ɛ̀n ki Nghay, ɓì rì lɔŋ yɛ̀ɛ ɓɛ̀seŋi ɓin ɓɛ ɓɛsɛ̀ɛ̀mɛn.

⁵² Ǹkpaŋzì-ɓìɓan abe nnɛ ɓɛ̀seŋi ɓin ɓɛ rɔɓkà lɛ ɓɛ tɔɓi ɓì? Ɓɛ cuusìghà kɔm̀ ɓɛ̀roɓɛ ɓɛ woòwògsìghà ɓum rìyù ɗi m̀bobog à mum ànɛ à rì lɛ saaɗ. Nni ɓigomìnɛ, ŋwaàncèm ànɛn innɛ ɓì mɛ kì lɛ, ɓì tɔ̀kɛ̀n, ɓi ki wey.

⁵³ Mìni ɓɛ ɓi ghàɓkà ɓìdɔ̀gsɛna ɓi Bɛ̀ll ɓi ɓyàg ɓi ɓum ɓɛ titom kɛ̀ ɓi ki ɓèŋ ɓyɔ.

Ɓɛ woli Ityɛn

⁵⁴ Yɛ̀ɛ ɓumɓɛ ɓi Sànèdìrɛŋ ɓɛ wokà ɓìtòkì ɓi Ityɛn ɓiǹ bim i naasàg ɓɔ, ɓɛ tum rìŋààŋààdì ɗi min lɛ bim inɛ ɓɛ wokà rì Ityɛn.

⁵⁵ Wɔ̀lɛ Ityɛn à ɓaghà ǹɗonɛn ɗi Kìtɛntɛ̀ɛ̀n ki Nghay, nni yɛ̀ɛ à pɛɓsɛ̀ngà aɗyoo, à ghɛn kìtɛɛtɛn ki rigwey ɗi Bɛ̀ll rì Yeesus ǹɗɛrɛliyɛn ɓi weèlem à Bɛ̀ll,

⁵⁶ fɔɔnnɛ a kalìghà lɛ: Ɓì ghɛɛ! Mɛ̀ɛ ntaataa ɗyoo ɗì nɛmɓɛn, Man à Mum à rɛrɛ̀lì ɓi weèlem à Bɛ̀ll.

⁵⁷ Fɔɔnnɛ ɓɔɔ̀cèm ɓɛ kuùghà jɛ̀ɛ̀ aɗyoo, ɓɛ simgì ɓyàg ɓi mɛ̀reè, ɓɛ suùrɛ̀n Ityɛn ɓi nyoo.

⁵⁸ Ɓɛ kɛǹ ɗì nyi fìràɓ ɗi bàn, ɓɛ tumɛ̀n nyi rìrogì ɗi gɔ̀g lɛ ɓɛɛ wey nyi. Ɓɛ̀wusìnɛ̀ɗ ɓɛ ɓi kìɓan kiǹ ɓɛ reɓsɛ̀ngà ɓìlàà ɓyaa ri dɛlìì mum ìdɛŋ ɗii lɛ Sol.

⁵⁹ Ɓi cààmɛ̀n ki ɓɛ roòrògàkà Ityɛn gɔ̀g mii, nyii ɓɔɔ̀ɓɔ̀ŋzàkà lɛ: Kan Yeesus, tera nghay wɛ̀m.

⁶⁰ Fɔɔnnɛ à kpìghà ɓi zi rì mɛ̀ɗu, à nyam jɛ̀ɛ̀ aɗyoo lɛ, Kan, cenɛn ɓɔ kìɓe ki! Yɛɛ̀ à kpaaghà fɔlɔɔ, nni à maasìghà.