MƐ̀KÌKÌÌ MƐ ƁƐKƐ̀NÌ-FÌTOM 4 - Bafia Nouveau Testament

Pyɛɛri ɓɛɛ̀ Zyaŋ ɓi naà-ɓɛ̀yɔ̀m

¹ Ɓɛ̀pìrɛɛtìrɛ̀, rì ǹkɔ̀mɛ̀n ɓɛ̀ɓèŋì naà-Bɛ̀ll, rì Ɓɛ̀sàdùsyɛŋ ɓɛ yughày di ɓɛ̀-Pyɛɛri ɓɛɛ̀ Zyaŋ ɓɛɛ̀ ka tòtog ri ɓum ɓɛ kilɔ̀ŋ.

² Nni ɓɛ wokà bim yɛ̀ɛ ɓɛ tanɛ̀ngà lɛ ɓɛ̀-Pyɛɛri ɓɛɛ̀ rèresi ɓum ɓìɓan ɓi Bɛ̀ll, ɓɛ ɓuŋɓùŋ kìɓan ki rìghèmɓɛ̀n ɗi Yeesus, ɗì rìghèmɓɛ̀n ɗi ɓiloŋ.

³ Fɔɔnnɛ ɓɛ ɓangà ɓɔ ɓɛ pig ɓɔ ɓi naà-zày lɛ ɓɛɛ kɔri wɔɔ à kpaŋ ɓi duri-tana, lɛ cɛŋkò ki ɓaghà di ki ti.

⁴ Nsoò fɔlɔɔ, kìgwey ki ɓi ɓumɓɛ ɓɛ wokà jɛ̀ɛ̀ ì Bɛ̀ll ki gherɛ̀ngà, fɔɔnnɛ bàlì ì ɓɛ̀gherɛ̀n ì kpagà nunùg ɓum ɓɛ̀tɔɔsìm ɓɛtaǹ.

⁵ Ɓi duri-tana, ɓɛ̀lànlam ɓɛ Ɓɛ̀yudɛ̀n rì ɓɛ̀sɛ̀ɛ̀mɛn ɓaa, rì ɓɛ̀rèsàg-ɓìdɔ̀gsɛna ɓɛ taŋzɛ̀ngà a Yorisalɛm

⁶ ɗì ǹkɔ̀mɛ̀n-ɓɛ̀pìrɛɛtìrɛ̀ ɓɛgwey ànɛ̀ lɛ Ann, rì Kayif, rì Zyaŋ, rì Alɛgsaŋdirɛ ri ɓum ɓɛ̀cèm ɓɛ ɓi naà-ɓum ì ɓɛ̀pìrɛɛtìrɛ̀ ɓɛgwey.

⁷ Fɔɔnnɛ ɓɛ rɛsìghà ɓɛ̀-Pyɛɛri ɓɛɛ̀ Zyaŋ ɓi nyìinyìm wàà, ɓɛ tɔg ɓɔ lɛ: Ɓi-tèɗ aɗi, ǹsoò lɛ̀ ɓi ɗii ɗì ghɛn innɛ ɓìi nwɔ̀ɔ̀zii ŋwaànɛ̀n?

⁸ Nni Pyɛɛri, ǹɗonɛn ri Kìtɛntɛ̀ɛ̀n ki Ǹghay, à ɓàkà ɓɔ lɛ: Mìni ɓɛ̀làmì kìlɔ̀ŋ rì ɓɛ̀sɛ̀ɛ̀mɛn ɓɛ a Isirayɛl,

⁹ yɛ̀ɛ ɓɛ mɛ tɔg ɓisi gɛɛ̀nɛ, kìɓan ki ɓi kìrɔɔ ki kìsɛkɛ̀rɛ̀ ki mum ki ntanɛɛ rì kɔ, lɛ ti resi yɛ̀ɛ ki mɓaa lɛ a wɔǹ,

¹⁰ ɓì ghɛ̀ɛ̀sɛɛ kì yiì ɓɛ̀sɛ̀ɛ̀ ɓɛ̀cèm, kìlɔ̀ŋ ki Isirayɛl ki yi girig lɛ, ŋwaànɛ à rɛrɛlii mìni asu fɛlɛ lɛ syeesyee ɓi nyoo yìì, lɛ ìtèɗ wu ɗii ɗi Yeesus Kiris ànɛ a Nazarɛt, ànɛ ɓìi nkpani ɓi kɔrɔs aɗyoo, nyi nnɛ Bɛ̀ll àa ǹghèmzii yì a ɓìloŋ.

¹¹ Yeesus à rì yɛ̀ɛ gɔ̀g ìnɛ ɓɛ̀toŋì-mɛɛ ɓɛ makà, yɛ̀ɛ ki ghalà kìlèmì ki ǹtɔn à mɛɛ.

¹² Mum à rì lɔŋ ɓiì ɓaà rì cɛɓ lɛ nyi, ɓisuulɛ Bɛ̀ll à faghà ɓi ɓum ɗii ɗidɛŋ fɛ ɓi ziinɛ ɗi ɗi ri rì ìtèɗ wulɛ, ɗi fa ɓìsi cɛɓ.

¹³ Ɓumɓɛ ɓɛ yɔɔ̀yɔ̀mzìghà ɓɛ̀-Pyɛɛri, ɓɛ kuuràkà lɛ, ɓɛ ghɛngà lɛ, Pyɛɛri rì Zyaŋ ɓɛɛ̀ ɓàɓag ɓɔ, kɛ̀ɛ̀ ìris ɓi ǹɗem, ɓɛ ghɛɛ̀dì lɛ, ɓɛ ɓaghà ɓum ɓɛ zɛy ɓɛ ɓɛ yighà ɓi sùkurù, ɓɛ yi min lɛ, ɓɛ ɓaghà ɓumɓɛ ɓɛ kɛɛ̀kɛ̀ɛ̀ghà ǹɗaŋ ɗi Yeesus.

¹⁴ Nni yɛ̀ɛ ŋwaànɛ à wɔ̀ngà ànɛn à ɓaghà ɓɔ ɓi nwɔŋì, fɔɔnnɛ ɓɛ rɔɓkà ɓɛ kɛɛ̀ yi com ki ɓɛɛ pɛɛ̀zi ɓɛ̀-Pyɛɛri.

¹⁵ Nni ɓɛ tɔkà lɛ ɓɛɛ ka kpaŋzi ɓɔ ɓi ɗyɔ̀m di ɓɔɔ rɔ̀ɓ kìnyolɛɛ ɓɔrìɓɔ, lɛ ɓɛɛ teɗ bimiɗ à ǹɗɛli ɓi kìɓan kiǹ.

¹⁶ Ɓɛ tɔɔ̀tɔ̀ɔ̀ghrɛ̀ngà lɛ: Ti ki la ri ɓumɓɛ? Lɛ, ɓum ɓɛ̀cèm ɓɛ a Yorisalɛm ɓɛ mɛ yi lɛ tɛntɛ̀ɛ̀n lɛ, ɓɔ yɛɛ nkìi dàm ì kìɓan ìnɛ, wɔ̀lɛ ɓìsii ki yin lɛ tì teɗ nyoey lɛ ɓɔ yɛɛ nkìi kìɓan kiǹ.

¹⁷ Nni ɓi ɗi lɛ ɓɔlɛ ànɛ kɛ̀ɛ ɓiisɛn ki sàa, ti rɔ̀gsɛɛna ɓɔ lɛ, i ɓɛ kpaatii mum kìɓan ki ki rarɛ̀n ɗì ɗii ɗi Yeesus di ɓɛ ri ɓiì ghɛɛ̀.

¹⁸ Fɔɔnnɛ ɓɛ reŋìghà tì min ɓɔ, ɓɛ reèg ɓɔ ìsuùcèm lɛ, ɓɛ̀ kɛɛ̀ ɓùŋdi ɗii ɗi Yeesus, ɓɛ kɛɛ̀ ki rèresiti ɓum ɗii diǹ.

¹⁹ Ɓɛ̀-Pyɛɛri ɓɛɛ̀ Zyaŋ ɓɛ ɓaàg ɓɔ lɛ: Ghɛɛna mìniìɓɔmiɗ, ǹkòo ki ri lɛ saaɗ ɓi mis mɛ Bɛ̀ll lɛ, ti ki mìni mɛ̀wog à cee Bɛ̀ll.

²⁰ Lɛ ɓìsii yin lɛ tì rɔ̀ɓ lɛ tì kpaa ɓi kiɓan ki ti ghɛngà, tì ki wog.

²¹ Fɔɔnnɛ ɓɛ̀yɔ̀mzì-ɓɔ, ɓɛ sagɛ̀ngà tì ɓɔ, ɓɛ ki caɗ min ɓɔ, di ɓɛ mɛ rɔɓ ɓɛ̀ kɛɛ̀ yi yɛ̀ɛ ɓɛɛ pɔnɔ̀si ɓɔ ɓisuulɛ, kìlɔ̀ŋ kìcèm ki keèkèmzìghà Bɛ̀ll ɓisuu dàm ì kìɓan inɛ̀n.

²² Ŋwaànɛ à wɔ̀ngà dàm ì rìwɔ̀n ànɛn, à ɓaghà di a mɛ cee bèg mɛ̀tin mɛɓɛɛ̀.

Ɓɔ̀ŋzɛ̀n ìnɛ ɓɛ̀kìristɛ̀n ɓɛ kighà

²³ Yɛ̀ɛ ɓɛ caɗkày ɓɛ̀-Pyɛɛri ɓɛɛ̀ Zyaŋ, ɓɛ kɛngà kì tanɛɛ ɓɛgeni ɓaa, ɓɛ kali ɓɔ ɓìɓan ɓi ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ ɓi kìlɔ̀ŋ ɓɛ rɔgsɛ̀ngà ɓɔ lɛ, ɓɛ̀ kɛɛ̀ kì ti.

²⁴ Yɛ̀ɛ ɓɛ wokà ɓìɓan ɓiǹ nni ɓɔɔ̀cèm ɓɛ pɛsìghà jɛ̀ɛ̀ ǹɗaŋ ɓɛ ɓɔŋzì Bɛ̀ll lɛ: Kan, wɔ̀ yɛɛ kighà lɛ rì ɗyoo, rì zi, rì rìɓày à kìkòn, rì ɓyom ɓìcèm ɓi ɓi ri miì;

²⁵ wɔ̀ yɛɛ kpaaghà rì ìtèɗ wu Kitɛntɛ̀ɛ̀n ki Nghay, ɓi ŋwɔm wu seŋi wìs Davit ànɛ à ɓaghà ǹkìì-kìsay wɔɔ̀ lɛ: Ɓisuucɛ nnɛ ɓɛ̀nyùùghnyùùgh ɓɛ ri fɛlɛ ɓi ɓìlɔ̀ŋ? Ɓisuucɛ nnɛ ɓìlɔ̀ŋ ɓi taŋzɛɛ ɓìtɔ̀kɔ̀ ɓi zɛy rì zɛy?

²⁶ Mɛ̀fòm mɛgwey mɛ ɓi ziinɛ mɛ ramiì wɛ̀y, mɛ̀fòm mɛ sàgsàg mɛ ɓasɛ̀n yì kìbyɔg kìfog lɛ mɛɛ ɗuù rì Kan, rì Mèsii wiì.

²⁷ Ɓi saaɗ, ɗì Eroodɛ rì Pɔŋs-Pilat ɓɛ mɓasɛɛ rì ɓɛ̀kèn, ri mɛ̀kuu mɛ a Isirayɛl ɓi ban ìnɛ, lɛ ɓɛɛ ɗuù rì Yeesus ànɛ à rì ǹkìì-kìsay wɔɔ̀ à ǹtɛnɛn ànɛ ù rɛsìghà.

²⁸ Ɓìɓan ɓi ù lokà kì fèegh ɓi-tèɗ wɔɔ, rì ɓi rìkɔ̀n ɗyɔɔ lɛ ɓi ri ɓiì kìlɛɛ, ɓyɛɛ̀ɓi ɓɛ nɗoòzii lɔ̀ɔ̀.

²⁹ Nni ɓigomìnɛ, Kan, ghɛna yɛɛ̀ ɓɛɛ̀ sàasagɛ̀n ɓìsi, dì u fa ɓɛ̀kìì-ɓìsay ɓɔɔ ìtèɗ wulɛ, ɓɛɛ ghagsi jɛ̀ɛ̀ yɔ̀ɔ̀ rì kìghɛɛsii kicèm.

³⁰ Nàmas̀ càg kɔɔ lɛ ɓum ɓɛɛ̀ wɔ̀nwɔn tìroɓ, ɓɛ̀koŋnyoo ri dàm yi ɓiɓan ɓi kiìkìlɛ̀n ɓi ɗii ɗi Yeesus ànɛ àrì ǹkìì-kìsay wɔɔ à ntɛnɛn.

³¹ Yɛ̀ɛ ɓɛ legsìghà bɔ̀ŋzɛ̀n yàà inɛ̀n, mɛɛ mɛ ɓɛ ɓaghà wɔɔ ɓɛtaŋzɛn mɛ nyɛŋɗɛ̀ngà, fɔɔnnɛ ɓɛ̀sɛ̀ɛ̀ ɓɛ̀cèm ɓɛ rongà rì Kìtɛntɛ̀ɛ̀n ki Nghay, ɓɛ ki ghaaghagsì Ɓɔlɛ à Bɛ̀ll rì ntyweeyi ɓi ǹɗem.

Rìɓa ɗi ɓɛ̀kìristɛ̀n ɓɛ ɓaghà ǹɗem wùfog rì ǹkɔ̀nɛ̀n

³² Ǹɗaŋ wu ɓɛgherɛ̀n wu ɓaghà ǹɗem wùfog, ɓɛ̀fèg ɓɛ̀fog, kɛ̀ɛ̀ ŋwaàdɛŋ ànɛ ɓi ɓɔ ànɛ à ɓaghà lɛ à kalì lɛ ɓyom ɓi à rì ɗì ɓyɔ ɓi ri ɓiŋkii cɛ̀ncii, wɔ̀lɛ ɓyom ɓyaa ɓi ɓaghà ɓisu waa ɓɛsɛ̀ɛ̀ ɓɛ̀cèm.

³³ Ɓɛkɛ̀nì-fìtom ɓɛ kpaakpààghà ɓum kìɓan ki righèmɓɛ̀n ɗi Kan Yeesus rì ìtèɗ lɛɛ̀gwey, fɔɔnnɛ coo geesɛ̀n ì Bɛ̀ll ì rongà a ɓɔɔ̀cèm.

³⁴ Ŋwaàdɛŋ à yɛɓɛ̀ngà ɓi com ɓi nyìinyìm wàà lɛ, ɓɛ̀roɓɛ ɓɛ ɓaghà rì dɛm, rì ɓɛ ɓɛ ɓaghà rì mɛɛ ɓɛ kakàɓkà ɓyom ɓìn, ɓɛ yuyù rì mɔ̀ɔ̀ni mɛ miì

³⁵ ɓɛ fafà mɔ rì ɓɛ̀kɛ̀nì-fìtom, ɓɛ kaɓsàg mɔ yɛ̀ɛ mum bimiɗ a teɗ gàɓ ìnɛ ì ghɛ̀ɛ̀sɛɛ ɗi nyi...

³⁶ Yoosɛɓ ànɛ à ɓaghà ɓi boo ì ɓum ì Levi ìnɛ ɓi ban ìnɛ lɛ Siipirɛ, nyi nnɛ ɓɛ̀kɛ̀nì-fìtom ɓɛ nkpɔgì lɛ Ɓarinaɓas, yɛɛ lɔɔ lɛ ŋwaà-mɛ̀fegsɛn,

³⁷ à kàɓkà dɛm inɛ à ɓaghà rì yɔ̀, à yù kì faà mɔ̀ɔ̀ni mɛ miì rì ɓɛ̀kɛ̀nì-fìtom.