MƐ̀KÌKÌÌ MƐ ƁƐKƐ̀NÌ-FÌTOM 3 - Bafia Nouveau Testament

Lɛnlɛm ànɛ ɓɛ wɔ̀ɔ̀zìghà asuunaa wu naà-Bɛ̀ll

¹ Pyɛɛri ɓɛɛ̀ Zyaŋ ɓɛ ɓɔ̀ɓɔ̀kà a naà-Bɛ̀ll ɓi cààmɛ̀n à bɔ̀ŋzɛ̀n ì mɛ̀kɛ̀ɛ̀ mɛraa à ŋwos ǹkɛ̀nɛn.

² Fɔɔnnɛ ŋwaàdɛŋ ànɛ à yalɛ̀ngà rì ɓìlɛm, à ɓaghà wɔɔ. Ɓɛ̀ŋwos ɓɛ̀cèm, ɓɛ n-yùlàg nyi kì kɔ̀ɔ̀sii asuunaa wu naà-Bɛ̀ll wu ɓɛ ǹɗegì lɛ: Rɔɔrɔɔ, lɛ a lɔǹlɔn ɓumɓɛ ɓɛɛ̀ ɗiɗiŋi ɓi naà-Bɛ̀ll ɓyom.

³ Yɛ̀ɛ ŋwaànɛ̀n à ghɛngà lɛ rì Pyɛɛri rì Zyaŋ di ɓɛɛ̀ kɛ̀nkɛn lɛ ɓɛɛ ɗiŋi ɓi naà-Bɛ̀ll, fɔɔnnɛ à lɔngà ɓɔ mɔ̀ɔ̀ni.

⁴ Pyɛɛri rì Zyaŋ ɓɛ ruusìghà mis ɓi nyi ɓɛ fiɓì nyi lɛ fyɛɛɛyi, Pyɛɛri à kpaa nyi lɛ pɛɓsɛn ɓìsi.

⁵ Ŋwaànɛ̀n à seesèèghà ɓɔ lɛ tɔ̀ntɔ̀n à fèkì nya lɛ ɓɛ ri nyi ɓiì faà com.

⁶ Pyɛɛri à Kpaa min nyi lɛ: Mɛ̀ n-yin ɗi mɔ̀ɔ̀ni nsoò gol lɔŋ com ki ǹɗì rì kɔ kɛɛ̀ki ǹfaa wɔ̀: Ɓi ɗii ɗi Yeesus Kiris ànɛ a Nazarɛt pɛ̀sɛn aɗyoo u kɛɛ̀ghi!

⁷ Fɔɔnnɛ à ɓangà ŋwaànɛ̀n ɓi càg ki weèlem à pɛ̀sì nyi mɛ̀rɛy. Lɔŋ ɓi cààmɛ̀n kɔm̀ kiǹ, mɛ̀kòò mii, rì mɛ̀lèŋiɗ mii ɓi ghas kì terì ìtèɗ;

⁸ lɔŋ yɛ̀ɛ à lɛlà gɛ̀n bog lɛ doɓtà, à rɛli mɛ̀rɛy à ghagsɛ̀n ɗì rìkɛ̀ɛ̀. Nni à ɗiŋìghà rì ɓɛ̀-Pyɛɛri ɓi naà-Bɛ̀ll di a kɛ̀ɛ̀kɛ̀ɛ̀, à lɛɛ̀lɛ̀ɛ̀tɛ̀n, à ki keekemzì Bɛ̀ll.

⁹ Mum bimiɗ à ghɛngà yɛ̀ɛ à kɛ̀ɛ̀kɛ̀ɛ̀ghà di a ɓɔɔɓɔgsì Bɛ̀ll.

¹⁰ Yɛ̀ɛ ɓum ɓɛ ghɛngà lɛ ŋwaànɛ̀n yɛɛ nti à kɔ̀ràg asuunaa wu naà-Bɛ̀ll wu lɛ Rɔɔrɔɔ à lɔnlɔ̀n ɓum ɓyom, nni ɓɛ risìghà ɓɛ ki kuurag kiɓan ki ki kilɛ̀ngà kiǹ bi cɛɓ ki ŋwaànɛ̀n, yɛ̀ɛ mɛ̀nɔ̀ɓɔ̀.

¹¹ Yɛ̀ɛ Ŋwaàncèm ànɛn à nɔ̀ɔ̀nɔ̀ɔ̀tɛ̀ngà ɓɛ̀-Pyɛɛri ɓɛɛ̀ Zyaŋ, nni ki yeesìghà ɓum rìwog ɓɛ ghɛŋmɛ̀n ɓɔ a nyoo ɓi tuùtuu anɛ ɓɛ nɗegì lɛ tuùtuu à Salomɔŋ.

Ɓìtòkì ɓi Pyɛɛri ɓi ɓi naà-Bɛ̀ll rì ɓum ɓɛ kilɔ̀ŋ

¹² Yɛ̀ɛ Pyɛɛri à ghɛngà fɔlɔɔ, nnɛ à kalìghà ɓumɓɛ̀n lɛ: Mìni ɓumɓɛ a Isirayɛl, ɓi cɛ nnɛ ɓì rì ri mɛ̀kuùkuugh ɓi kìɓan ki? Ɓisuucɛ nnɛ ɓi fifiɓi ɓisi lɔŋ yɛ̀ɛ ɓɛɛ̀ kali lɛ tì kɛ̀ɛ̀sii ŋwaànɛ rì ìtèɗ wis, nsoò lɛ ɗì rìfalɛ̀n ɗis ɗi ɓi rìgherɛ̀n?

¹³ Bɛ̀ll à Abiraham, Bɛ̀ll à Isag, Bɛ̀ll à Yakɔɓ, Bɛ̀ll à ɓɛ̀seŋi ɓis yɛɛ faa ǹkìì-kìsay wiì ànɛ lɛ Yeesus rìkem. Yeesus ànɛn nnɛ ɓìi nkàɓi, ɓi ki roòzɛn nyi ɓi mis mɛ Pilat ànɛ àa m̀mɛɛ̀ kì lɛ di àa càri nyi.

¹⁴ Ɓìi nɗoòzɛɛ roànɛ àa nɗì ǹtɛnɛn à ki ɓa ti lɛ saaɗ, ɓi tɔg Pilat lɛ a caɗ roànɛ àa nɗì ǹwolì-ɓum.

¹⁵ Ɓìi kìi lɛ ɓɛɛ wey ŋwaànɛ à làmii cɛɓ, nyi nnɛ Bɛ̀ll àa ǹghèmzii yì a ɓìloŋ; tìrì ɓɛ̀wusìnɛ̀ɗ ɓɛ ɓi rìghèmɓɛ̀n ɗii.

¹⁶ Ǹtyweeyi wu tì rì rì wɔ ɓi ɗii ɗi Yeesus wɛɛ kii lɛ, ɗii ɗìn ɗyɛɛ fa mɛ̀kòò mɛ ŋwaànɛ ɓi yii ànɛ ìtèɗ yɛ̀ɛ ɓi seesèè, fɔɔnnɛ ǹtyweeyi wu ɓi Yeesus wɛɛ kii lɛ, a wɔǹ lɛ kɔɔ̀kɔɔ̀ lɔŋ yɛ̀ɛ ɓi seesee lɔɔ ɓɛsɛ̀ɛ̀ ɓɛ̀cèm.

¹⁷ Nni ɓigomìnɛ, ɓɛ̀geni ɓɛ̀m, ǹ-yii lɛ ɓìi ǹkìi fɔlɔɔ lɛ, rì mìni rì ɓɛ̀làmì ɓin ɓìi n-yii ɓì.

¹⁸ Kìɓan kifog, ɓi bee inɛ̀n nnɛ Bɛ̀ll àa ǹdoòzii kìɓan ki à lokà ki kpaà ɓi myɔm mɛ ɓɛkpaŋzì-ɓìɓan ɓɛ̀cèm ɓɛ ɓi mɛ̀ru mɛ ajɛ̀m lɛ: Kiris à ghɛ̀ɛ̀sɛɛ gɛ kì woògh rìkɛŋ.

¹⁹ Nni lɔ̀ɔ̀ghrɛɛna min mɛrem, ɓi sugtiì yɛ̀ɛ Bɛ̀ll, di fɔɔnnɛ a tiìsi ɓìɓe ɓin.

²⁰ Fɔlɔɔ nnɛ Kan à rì ɓiì romìì ɓyààmɛ̀n ɓi rifɔɔsɛ̀n yɛ̀ɛ à rì mìni ɓiì romìì ǹghɛɓsì-ɓum, ànɛ à pègsɛ̀ngà ɓisu wìn. Nnyɛɛ rì Yeesus Kiris.

²¹ Yeesus ànɛ à ka ghɛ̀ɛ̀sɛɛ kì kɔ̀kɔrii aɗyoo, à kpaŋ ɓi cààmɛ̀n ki ɓɛ ri ɓiì pɛ̀ɛ̀zii ki rɛsii ɓyom ɓìcèm ɓi mɛ̀rɛli mɛ ɓyɔ, lɔŋ yɛ̀ɛ Bɛ̀ll à kpaaghà fìɗyàɓ ɓi myɔm mɛ ɓɛkpaŋzì-ɓìɓan ɓii ɓɛ ɓɛ ɓaghà ɓɛ̀ tɛnɛn.

²² Fɔɔnnɛ Moyis à kalìghà lɛ: Kan Bɛ̀ll wìn à romiì gɛ mìni ǹkpaŋzì-ɓìɓan ànɛ à ɓaa gɛ yɛ̀ɛ mɛ̀, à kì ɓa ŋwaànɛ ɓi kìlɔ̀ŋ kin, ɓì ghɛ̀ɛ̀sɛɛ kì woògh com kìcèm ki à kalii gɛ mìni.

²³ Ŋwaànɛ à sɛɛtii gɛ jɛ̀ɛ̀ ì ǹkpaŋzì-ɓìɓan anɛ̀n, ɓɛ pisii gɛ nyi ɓi bàlì ì ɓum ɓɛ kilɔ̀ŋ, ɓɛ ki wey nyi.

²⁴ Ɓɛ̀kpaŋzì-ɓìɓan ɓɛ ɓɛ ɓɔɔ̀ɓɔ̀ɓsɛ̀ngà, à tumɛ̀n yì ɓi Samuɛl, ɓɛ ɓugà kìɓan ki ɓi mɛ̀ru mɛ̀n, ɓɛ̀sɛ̀ɛ̀ ɓɛ̀cèm.

²⁵ Mìni yɛɛ ri ɓɔn ɓɛ ɓɛkpaŋzì-ɓìɓan, ɓì ki ɓa ti ɓɔn ɓɛ ɓi ɓee ìnɛ Bɛ̀ll à rengà rì ɓɛ̀seŋi ɓìn, yɛ̀ɛ à kalìghà Abiraham lɛ: M̀màŋi gɛ naa yi ɓum yìcèm yi ɓi ziinɛ ɓi jɛ̀m ì dòò yɔɔ.

²⁶ Mìni yɛɛ ri ɓumɓɛ asu ɓɛ Bɛ̀ll à ɓɔ̀ngà ǹkìì-kìsay wiì ɓisu waa, à rom yì nyi, lɛ a maŋ̀ mìni, di a ki lɛ mum bimiɗ ànɛ ɓi mìni a càɗ ɓìɓeɓtàg ɓii ɓi mɛkìkìì.