MƐ̀KÌKÌÌ MƐ ƁƐKƐ̀NÌ-FÌTOM 28 - Bafia Nouveau Testament

Pol à ti ɓi kìrìŋ ki riɓày lɛ Maltɛ

¹ Yɛ̀ɛ tì ghɛɓkàkà fɔlɔɔ lɛ soghàsogha, nni ɓɛ kalìghà ɓìsi lɛ, kìrìŋ ki riɓày kiǹ ki ɓaghà ɗii lɛ Maltɛ.

² Ɓumɓɛ ɓi kìrìŋ kiǹ ɓɛ ghaɓkà ɓìsi rì geesɛ̀n lɛɛ̀gwey; yɛ̀ɛ bwey ì sɛngà, kìfɛɓ ki ki kìki lɛɛ̀gwey, ɓɛ ghɛŋzɛ̀ngà coo kikaŋì ki ɗuu, ɓɛ reŋì ɓìsi lɛ, ti kɛǹ kì woògh ɓìsiìcèm.

³ Pol à raɓkà ǹkun wu tìcaàgh lɛ a foŋ̀ ɓi ɗuu, nni kìgòm ki faŋìghày ɓi ǹkun wu tiwon wìn yɛ̀ɛ ɗuu ɗi komgày kɔ, ki fyuŋ Pol ɓi càg.

⁴ Yɛ̀ɛ ɓumɓɛ ɓi kìrìŋ ki riɓày kiǹ ɓɛ ghɛngà di nyoo ìnɛ̀n ì fyufyuŋii Pol fɔlɔɔ ɓi càg, nni ɓɛ tumɛ̀ngà rìkpaakpàà lɛ: Ki ri lɔŋ saaɗ lɛ ŋwaànɛ à rì ǹwolì-ɓum. Ɓisuulɛ, rìren ɗi ɓiɓan ɗi Bɛ̀ll ɗi ghɛɛ lɛ, kɛ̀ɛ ɓati ɓi cɛɓ, nsoò yɛ̀ɛ à ghɛɓiì rìwu ɓi rìɓày.

⁵ Wɔ̀lɛ, yɛ̀ɛ Pol à sàɗkà càg, nyoo ì kpì ɓi ɗuu, kɛ̀ɛ ki wog nsoò maa rìkɛŋ.

⁶ Nni ɓumɓɛ̀n ɓɛ pɛɛ̀zìghà mis, lɛ ɓɛɛ ghɛn yɛ̀ɛ Pol à ɓiì mìkii, nsoò lɛ yɛ̀ɛ à biì nàrɛɛ à wu; kìɓan kifog, yɛ̀ɛ coo cààmɛ̀n ki ghaghìghà ɓɛ̀ kɛ̀ɛ ghɛn kirèmzɛna ki ɓeɓtɛn, ɓɛ lɔɔ̀gh jɛ̀ɛ̀, ɓɛ tumɛ̀n rìkpaakpàà lɛ, à rì bɛ̀ll ìdɛŋ.

⁷ Rìfòm ɗi ɓi kìrìŋ ki riɓày kiǹ ɗi ɓaghà wɔɔ ri fyòomà jàŋbog; rìfòm diǹ ɗi ɓaghà ɗii lɛ Puɓilyus; ɗi ghaɓkà ɓìsi a mɛɛ mii lɛ syeesyee, tì lay wɔɔ mɛru mɛraa.

⁸ Seŋi Puɓilyus à ɓaghà ǹnɔ̀nɔŋiyɛn ɓi zi, lɛ à ɓaghà rì bàɓ-bàɓ ɓi nyoo, ɗùm ɗi bwaɓ ɗi ki kìki nyi. Nni Pol à ɗiŋìghà ɓi naa yɛ̀ɛ tààta ànɛ̀n, à ɓɔ̀ŋzì Bɛ̀ll, à saghì nyi ɓyàg ɓi nyoo, à wɔ̀ɔ̀zì nyi.

⁹ Ajɛ̀m ìnɛn nnɛ ɓɛ̀roroɓ ɓɛdɛŋ ɓɛ ɓi kìrìŋ ki riɓày ɓɛ yughày, à wɔ̀ɔ̀zì girig ɓɔ.

¹⁰ Ɓumɓɛ̀n ɓɛ nyaasìghà ɓìsi lɛɛ̀gwey; yɛ̀ɛ tì ɓaghà di tì ti ɓiì pɛ̀sɛɛ, ɓɛ faghà ɓyom ɓìcèm ɓi ɓi kaarɛ̀ngà ɓìsi bisuu rikɛ̀ɛ̀ ɗis.

Pol à kpaŋi a Rom

¹¹ Yɛ̀ɛ tì ghagsìghà ɓɛ̀ŋwii ɓɛraa wɔɔ, nni tì ɓɔkà fìtimà fidɛŋ fi a Alɛgsaŋdirii, fi fi ghagsìghà bùmà wɔɔ ɓi kìrìŋ ki riɓày kiǹ. Fìtimà fiǹ fi ɓaghà ɗii lɛ, bɛ̀ll yi rifas.

¹² Yɛ̀ɛ fìtimà fiǹ fi rɛlìghà ɓi bàn ìnɛ lɛ Sirakuuzɛ, nni tì kɔ̀rìghà wɔɔ mɛ̀ru mɛraa.

¹³ Yɛ̀ɛ tì pɛ̀sɛ̀ngà foo, tì sòrì bèn ì rìɓày, tì kɛ̀n kìkpaŋì a Regyo. Bi duri tana, bɛ̀ɓ ì tumɛ̀ngà rìfɛɓsìì duŋzi, ɓìsii kɛǹ min kikpaŋì a Puzɔl ɓi mɛ̀ru mɛɓɛɛ̀.

¹⁴ Tì tanɛ̀ngà ɓɛ̀geni ɓis ɓɛ righerɛ̀n wɔɔ ɓi jàŋ inɛ̀n, ɓɛ tɔg ɓìsi lɛ ti lay mɛ̀ru taàɓɛ̀ɛ̀ a lɔ̀ŋkaa, fɔɔnnɛ tì ki kɛ̀ngà a Rom.

¹⁵ Yɛ̀ɛ ɓɛ̀geni ɓis ɓɛ righerɛ̀n ɓɛ a Rom ɓɛ wokà lɛ tì kpaŋi, ɓɛ yughà ɓìsi kì ɓoŋì a fyèè fi Apiyus, rì ɓi jàŋ inɛ ì ɓaghà ɗii lɛ: Naa yi ɓɛ̀kèn yiraa. Yɛ̀ɛ Pol à ghɛngà ɓɔ, à tògsàg Bɛ̀ll, nyoo yìì i tèèsɛ̀n.

¹⁶ Yɛ̀ɛ tì kpagà a Rom, ǹkɔ̀mɛ̀n ɓɛ̀sujàà à sɛdɛ̀ngà ɓimbùŋ rì ǹkɔ̀mɛ̀n àgwey, wɔ̀lɛ ɓɛ caɗ Pol lɛ a kɔri cɛ̀ncii, rì sujàà ànɛ à ɓèŋɓèŋgà nyi.

Pol à kalii Syeesyee à Ɓɔlɛ a Rom

¹⁷ Ajɛ̀m ì mɛ̀ru mɛ̀ra, Pol à lààghràkà ɓɛ̀sɛ̀ɛ̀mɛn ɓɛ Ɓɛ̀yudɛ̀n. Yɛ̀ɛ ɓɛ taŋzɛ̀ngà, nni Pol à kpaaghà ɓɔ lɛ: Ɓɔɔsoŋ̀, ǹkìi ɓi ɓumɓɛ ɓi kìlɔ̀ŋ kis kiɓan kiɓeɓtɛn, kɛ̀ɛ nki yogsi ɓìsyɔ̀ɔ̀ ɓi ɓɛseŋi ɓis. Nsoò fɔlɔɔ, ɓɛ ɓangà mɛ̀ a Yorisalɛm, ɓɛ kaàɓ mɛ̀ rì Ɓɛ̀ròmɛŋ.

¹⁸ Yɛ̀ɛ Ɓɛ̀ròmɛŋ ɓɛ tɔkàkà mɛ̀ mɛ̀tɔɔ̀tɔɔgh ɓɛ̀ kɛɛ̀ ghɛn kiɓan kiɓeɓtɛn kì ǹkìi, ki ki ghɛɛ̀sɛɛ rì ǹwolɛ̀n, fɔɔnnɛ ɓɛ mɛɛ̀ kìghà lɛ, ɓɛɛ caɗ mɛ̀,

¹⁹ kìɓan kifog Ɓɛ̀yudɛ̀n ɓɛ ɓeǹ lɛ ɓɛ̀ kɛɛ̀ càɗ mɛ, fɔlɔɔ nnɛ mɛ̀ɛ ǹɗì ǹtiniyɛn lɛ nghagsiì kìɓan kɛm̀ yɛ̀ɛ Kaaza. Ǹki yin rì fèg ànɛ lɛ, ǹsɔmɛn ɓumɓɛ ɓi kilɔ̀ŋ kɛm̀.

²⁰ Kìɓan kiǹ kɛɛ̀ki mɛ̀ɛ ntɔɔgh lɛ di màa ghɛɛ mìni, ǹkalì mìni lɛ bɛn yi ǹɗì yi rì yɔ, yi ri ɓisuu ǹtyweeyi wu Isirayɛl a rì rì wɔ.

²¹ Nni ɓɛ ɓakà nyi lɛ: Ɓìsii ghɛɛ ɓi kaàtà àdɛŋ ànɛ à rìì a Zyude à ɓùŋ kìɓan kɔɔ nsoò ŋwaàdɛŋ à yùu ɓi fɛ, à kpaa kìɓan à ràɗ rì wɔ̀.

²² Ɓìsiì kɔ̀nkɔn lɛ ti wog ɓi ŋwɔm wɔɔ com ki wɔ̀ɔ fèfèg, ɓisuulɛ tì yii lɛ bee inɛ̀n, ɓum ɓɛɛ̀ ɗùùɗuu ri yɔ̀ jàŋbimiɗ.

²³ Fɔɔnnɛ ɓɛ faghà nyi ǹkàg wulɛ ɓɛɛ ghɛnɛn, nni ɓɛ yughày kìtuu lɛ ɓɛɛ ghɛǹ nyi a mɛɛ mii. Ɓi ɓìtòkì ɓii, Pol à kalìghà ɓɔ kìɓan ki ki taataa kìlɔ̀ŋ ki Bɛ̀ll, à ki kaakaa bee lɛ rì ɓi ɓìdɔ̀gsɛna ɓi Moyis, rì ɓi ɓɛ̀kpaŋzì-ɓìɓan, lɛ a ki lɛ ɓɛ̀ kɛɛ̀ teeti nyoey ɓi kìɓan ki Yeesus. A tòkàkà rì ɓɔ fɔlɔɔ à tumɛ̀n sariwa à kpaŋ cɛŋkò.

²⁴ Gàɓ ìdɛŋ ì gherɛ̀ngà ɓìɓan ɓi à kpaakpààghà, wɔlɛ ɓɛ̀ro ɓɛmbog ɓɛ teɗ nyoey.

²⁵ Nni yɛ̀ɛ ɓɛ pɛsɛ̀ngà rìsug, di ɓɛ mɛ rɔ̀ɓ kɛ̀ ɓɛɛ̀ wooghrɛn jɛ̀ɛ̀, com ki Pol à kpaatìghà ɓɔ ki ɓaghà lɛ: Kìtɛntɛ̀ɛ̀n ki Nghay ki kpaghà lɔŋ saaɗ yɛ̀ɛ ki kalìghà rì ɓɛ̀seŋi ɓin ɓi ŋwɔm wu ǹkpaŋzì-ɓìɓan Ezayii lɛ:

²⁶ Kɛ̀na u kpaà kìlɔ̀ŋ kiǹ lɛ: Ɓì ɓiì ɓaà lɛ ɓì soo woogh lɛ syeesyee kɛ̀ ɓi yì, ɓì ri ki seesèè lɛ syeesyee kɛ̀ ɓi ghɛn

²⁷ ɓisuulɛ mɛ̀rem mɛ ɓumɓɛ ɓi kìlɔ̀ŋ ki, mɛ tɔgtii ɓi, ɓɛ mɛ simgi dɔm ɓi mɛ̀reè ɓɛ ki ɓuusag mis lɛ ɓɛ̀ kɛɛ̀ ghɛnɛn, ɓɛ̀ kɛɛ̀ yi kiɓan ɗi nɗem, lɛ i ɓɛ lɔɔ̀ghrɛɛ mɛ̀rem ǹwɔ̀ɔ̀zì ɓɔ.

²⁸ Nni yiina min lɛ, ɓɔlɛ̀ à gòri ì Bɛ̀ll ìnɛ, à mɛ romɓɛn a ɓumɓɛ ɓɛ yin Ɓɛ̀yudɛ̀n. Nsoò ɓɔ, ɓɛ ri nyi ɓiì ghàɓi.

²⁹ Yɛ̀ɛ Pol à kpaghà fɔlɔɔ, Ɓɛ̀yudɛ̀n ɓɛ pɛsɛ̀ngà ɗì rìghaàgh di ɓɛɛ̀ nyoonyolɛ̀n ɓɔrìɓɔ rì ìtèɗ.

³⁰ Pol à kɔ̀rìghà ɓɛ̀bimiɗ ɓɛ bèg ɓɛɓɛɛ̀ ɓi naa ìnɛ à rɛntìghà. Ɓum ɓɛ̀cèm ɓɛ ɓɛ yuyùghày nyi kìghɛɛ̀ à tetèkà ɓɔ rì kìnyàà.

³¹ A lààlàmɓɛ̀n kìlɔ̀ŋ ki Bɛ̀ll, à ki rèresi ɓum ɓìɓan ɓi ɓi seesee Kan Yeesus Kiris lèg bimiɗ ànɛ ki ɓaghà lɛ ki kɔ̀n nyi, kɛ̀ɛ̀ ntɔɓ.