MƐ̀KÌKÌÌ MƐ ƁƐKƐ̀NÌ-FÌTOM 27 - Bafia Nouveau Testament

Ɓɛ romi Pol a Rom

¹ Yɛ̀ɛ ɓɛ rengà lɛ tì ghɛ̀ɛ̀sɛɛ kì kɛ̀ɛ a Italii ɓi fìtimà, nni ɓɛ tekà lɛ rì Pol, rì ɓum ɓɛdɛŋ, ɓɛ fa ɓɔ rì ǹkɔmɛ̀n-ɓɛ̀sujàà àsàg ànɛ ɓi kìtuu ki ɓɛsujàà ki ɓɛ nɗegì lɛ, ɓɛ̀sujàà ɓɛ Kaaza ànɛ a Italii ɗii lɛ: Zyulyus.

² Nni tì ɓɔkà fìtimà fi a Adiramit, lɛ fyɔ yɛɛ ghɛɛ̀sɛ̀ngà kìsòrii bèn ì rìɓày ìnɛ a Azii, fɔɔnnɛ tì pɛ̀sɛ̀ngà rì rìkɛ̀ɛ̀, tì ɓaghà ǹɗaŋ ɗi Aristarikɛ, ŋwaànɛ a Tesalonika, ɓi kìden ki zi ki a Masedwan.

³ Yɛ̀ɛ tì rɛlìghà a Sidɔŋ ɓi duri tana fɔɔnnɛ Zyulyus ànɛ à ɓeŋɓèŋgà Pol rì syeesyee à ǹɗem, à gherɛ̀ngà lɛ Pol a kɛǹ ki ghɛɛ̀ mɛ̀ghan mii, mɛɛ fa nyi ɓyom ɓi ɓi kaàkààrɛ̀ngà nyi.

⁴ Yɛ̀ɛ tì pɛ̀sɛ̀ngà foo, nni tì narighà bèn ì rìɓày ìnɛ a Siipirɛ, ɓisuulɛ, bɛ̀ɓ ì ɓaghày ɓìsi asu, ì fɛɛ̀fɛ̀ɓsìì ɓìsi ɓi nyòò.

⁵ Yɛ̀ɛ tì syààghà rìɓày ànɛ à rì jàŋbog rì jàŋ yi lɛ Silisii, rì Paŋfilii, nni tì kɛ̀ngà kìrɛlii a Mira ànɛ ɓi jàŋ inɛ lɛ Lisii.

⁶ Wɔɔnnɛ ǹkɔ̀mɛ̀n-ɓɛ̀sujàà à ghɛngà fìtimà fidɛŋ fi a Alɛgsaŋdirii, fi fi kɛnkɛ̀ngà a Italii, à ɓɔgsì ɓìsi miì.

⁷ Fìtimà fi kɛɛ̀kɛ̀ɛ̀ghà lɛ tɛ̀tɛ̀rɛ̀ɛ̀, fɔɔnnɛ tì ghagsìghà mɛ̀ru lɛɛ̀gwey ɓi bee, tì ki kɛ̀n ki kpaŋì jàŋbog rì Kiniidɛ di tyàa ghɛn ntɔɓ. Yɛ̀ɛ bɛ̀ɓ ì faghà ɓi ɓisi bee inɛ lɛ ti kɛnkɛn beèbɛ̀y ɓi san ànɛ̀n, fɔɔnnɛ tì sòrìghà kìriŋ ki rìɓày ki lɛ Kirɛɗɛ, ɓi ɓɛg ànɛ a Salmone.

⁸ Yɛ̀ɛ tì kɛ̀nkɛ̀ngà lɔŋ asu rì rìkɛ̀ɛ̀ nni tì kpagà ɓi jàŋ idɛŋ ɗii lɛ: Bopɔɔr, di tyàa ghɛn ntɔɓ lɛɛ̀gwey; jàŋ incèm ì ɓaghà jàŋbog rì bàn ìnɛ lɛ Lasee.

⁹ Gàɓ ì mɛ̀ru ì ɓaghà di ì mɛ ghaàgh, fɔɔnnɛ ki ɓaghà di ki ti koŋnyòò lɛ mum a kɛɛ̀kɛɛ tì ɓi fìtimà, ɓisuulɛ ŋ̀wos ànɛ ɓɛ ncèlàg ɓìɗilàg à ɓaghà di à mɛ ghaàgh.

¹⁰ Kìɓan kiǹ kɛɛ̀ki Pol à rɔ̀ɔ̀rɔ̀gsɛ̀ngà ɓɔ à kpaakpàà lɛ: Mɛ̀ ǹghɛɛ lɛ, rìkɛ̀ɛ̀ ɗi ɗyaa syɔn ɓi kɛ̀ɛ̀ kìɓan; ɓisuulɛ, fìtimà rì mɛ̀tɛ̀g mɛ mɛ ri miì, ɓi ɓiì ɗyàŋì, nsoò ɓìsiìɓɔmiɗ, tì rì ɓi koŋnyòò.

¹¹ Kìɓan kifog, ǹkɔ̀mɛ̀n-ɓɛ̀sujàà à ɓiisɛ̀ngà kì tyweeyii rikpaa ɗi ɓumɓɛ lɛ, rì ǹkɔ̀mɛ̀n-fìtimà, rì m̀pusì-fìtimà, à cee ɓìɓan ɓi Pol à kpaaghà.

¹² Yɛ̀ɛ jàŋ inɛ̀n ì ɓiisɛ̀ngà ɓi ki rɔɔtɛɛ lɛ ŋwaa ghagsi cààmɛ̀n à bùmà wɔɔ, nni kìgwey ki ɓum ki ɓi ɓɔ, ki gherɛ̀ngà lɛ ɓɛɛ ruɓtɛn tì ɗì rìkɛ̀ɛ̀, lɛ i bee i ɓaa, ɓɛɛ kɛǹ a Fenis, ɓi jàŋ idɛŋ ìnɛ a Kirɛɗɛ, ìnɛ tìtimà tyɛɛ̀ rɛlag wɔɔ, ìnɛ ì faa mis ɓi ɓɛg ànɛ ŋwos a kɛ̀ngi ki nɔ̀ŋii, lɛ ɓɛ kɔnkɔ̀ngà lɛ bɛɛ ghagsi cààmɛ̀n à bùmà wɔɔ.

¹³ Yɛ̀ɛ maa fɛ̀ɛ̀fɛ̀ɛ̀ à kìkìghày fɛlɛ duŋzi, ɓɛ fekì nya lɛ, ɓɛ ri ɓiì kpaŋzɛɛ fèg wàà anɛ lɛ ɓɛɛ kɛǹ a Fenis. Fɔɔnnɛ ɓɛ lɔmzìghày min fitimà, ɓɛ tumɛ̀n rìsòsòrì ɗi kirìŋ ki riɓày ki lɛ Kirɛɗɛ.

¹⁴ Wɔ̀lɛ yɛ̀ɛ maa cààmɛ̀n à mɛɛ̀ ghaghìghà ɓɛ sigmɛ̀n di coo bɛ̀ɓ ìnɛ ɓɛɛ regi lɛ Rakilon ki mɛ pɛ̀sɛn yi ǹkòkwey ɓi kìrìŋ ki riɓày.

¹⁵ Bɛ̀ɓ ìnɛn ì tumɛ̀n rìtyɔg ɗi fitimà, kɛ̀ɛ̀ bee inɛ lɛ fyɛɛ nɔɔnɔ̀ɔ̀tì tì bèn ì kìrìŋ ki rìɓày, fɔɔnnɛ ɓìsii càrɛ̀ngà lɛ fìtimà fyɛɛ ɓɛnɓɛn rì ɓìsi m̀ɓɛ̀mɓɛnɛn ɓi nyìinyìm à rìɓày.

¹⁶ Fɔɔnnɛ tì fyeeghà ajɛ̀m ì maa kìrìŋ; adɛŋ ɗii lɛ Koda, tì ràm tì rùnɛ̀n kìkɔm ki sàg rì ǹtɔɓ lɛɛ̀gwey.

¹⁷ Yɛ̀ɛ tì rùnɛ̀ngà kɔ fɔlɔɔ, nni tì kaaghà bee inɛ lɛ, ti sugi mɛ̀ɗig ɓi fìtimà, lɛ tì risìghà lɛ tyɛ̀ ki kɛ̀n ki ɗiŋii ɓi sɛɛ̀sɛɛ anɛ ɓi bèn ì rìɓày ànɛ a Liɓii; nni ɓɛ fumìghà kìlàà ki fitimà; fìtimà fi rɔɓ ki ɓɛ̀nɓɛni fɔlɔɔ fyɔmiɗ.

¹⁸ Yɛ̀ɛ bɛ̀ɓ ì ɓaghà di ì mɛ yeesi ɓisi lɛɛ̀gwey, nni ɓɛ tumɛ̀ngà rìmàg ɗi gàɓ ì mɛ̀tɛ̀g ɓi rìɓày ɓi duri tana.

¹⁹ Ajɛ̀m ì mɛ̀ru mɛɓɛɛ̀rɛn, ɓɔmiɗ ɓɛ makì tì ɓyom ɓidɛŋ ɓi ɓɛ nkìlàg ɓìsay miì ɓi fìtimà.

²⁰ Gàɓ ì mɛ̀ru ì ghaghìghà, tyɛ̀ ki ghɛn nsoò kìsaa ki ŋwos, nsoò tyɔɛy, bɛ̀ɓ ì ki kɛ̀nkɛn lɔŋ asu rì ìtèɗ, ɓi lèg ànɛ lɛ, tì ɓatìghà ɓi ri ǹtyweeyi wulɛ, tì rì lɛ tì ghɛɓ.

²¹ Tì ɓaghà di tì mɛ ghagsi mɛru lɛɛ̀gwey, tyɛ̀ ki ɗi com. Fɔɔnnɛ Pol à pɛ̀sɛǹgà aɗyoo ɓi nyìinnyìm à ɓum, à kpaa ɓɔ lɛ: Ɓìi nghɛ̀ɛ̀sɛɛ kì woògh yɛ̀ɛ mɛ̀ɛ nkpaa lɛ, tyɛ̀ ki pɛ̀sɛn a Kirɛɗɛ, lɛ i ɓìi ǹwoogh rìkpaa ɗìn, di ɓì yin fɛlɛ ɓi koŋnyoo yɛ̀ɛ ɓì rì lɛ gɛɛ̀nɛ, ɓyɛ̀ ɓi ki ɗimzi ɓyom yɛ̀ɛ ɓi ɓì mɛ ɗimzi ɓi.

²² Nni m̀ɓɔŋzaagh mìni ɓigomìnɛ lɛ, ɓi siìri mɛ̀rem, lɛ nsoò wààdɛŋ, wàa wu ɓi, lɔŋ fìtimà fyɔrìfyɔ fyɛɛ ɓiì ɗyàŋì.

²³ Ɓi-ru wu gɛɛ̀nɛ, ŋwaà-fìtom a Bɛ̀ll ànɛ à làmii mɛ̀, Bɛ̀ll ànɛ nki ɓɔɔɓɔgsì, àa yùu mɛ̀ jaŋ̀bog,

²⁴ à kpaa mɛ̀ lɛ: Pol, kɔ̀ɔ risi, ki ghɛɛ̀sɛɛ lɛ, u kpaàsɛn ɓi mis mɛ Kaaza, wɔ̀lɛ Bɛ̀ll à ɓiì ki kàmɛɛ ri ɓyɛɓ ɓi ɓumɓɛ ɓi kɛ̀ɛ̀kɛɛ ri ɓɔ ɓi fìtimà ɓisu wɔ̀ɔ̀.

²⁵ Mìni ɓum! Fɔɔnnɛ ɓì ghɛ̀ɛ̀sɛɛ kì sììrii mɛrèm, ɓisuulɛ ǹtyweeyii Bɛ̀ll, fɔlɔɔ nnɛ kìɓan kiǹ ki ɓiì kìlɛɛ lɔŋ yɛ̀ɛ àa kpaa mɛ̀.

²⁶ Tì ghɛ̀ɛ̀sɛɛ kì ghaatɛɛ ɓi kìrìŋ ki rìɓày kidɛŋ.

²⁷ Yɛ̀ɛ nyìinyìm à-ru à ɓaghà di à tiì, ɓi rìràɗ mɛru ǹtɛ̀ɗ ɗì mɛnin ànɛ bɛ̀ɓ ì tumɛ̀ngà ɓɔ rìyeèyèèsì ɓi rìɓày à kìkòn, ànɛ lɛ Mediterane nni ɓɛ̀kɛ̀ɛ̀sì-fìtimà ɓɛ wokà yɛ̀ɛ fìtimà fì ti ɓiì wuɓsɛɛ zi ì zɛy.

²⁸ Fɔɔnnɛ ɓɛ pikà ǹɗig wu wu ɓaghà wùsuŋɛn gɔ̀g miì ɓi rìɓày, lɛ ɓɛɛ ghɛǹ rìrim ɗi mɛnig, nni ɓɛ ghɛngà lɛ rìrim di mɛnig ɗi ri ɓɛ̀mità rìtin ɗì ǹtɛ̀ɗ ɗì taàɓɛ̀ɛ̀. Yɛ̀ɛ ɓɛ kɛɛdìghà lɛsàg, ɓɛ ghɛn ɓɛ̀mità rìtin ɗì taàraa.

²⁹ Yɛ̀ɛ ɓɛ risìghà lɛ fìtimà fyɛ̀ kɛɛ̀ ki kɛ̀n ki roŋɗɛɛ ɓi mɛ̀ɓan, nni ɓɛ pikà bɔŋ yi yɛɛ̀ rɛsag fitimà yinin ɓi rìɓày, ɓɛ ɓoŋ lɛ duri yɛ̀ɛ taǹ.

³⁰ Yɛ̀ɛ ɓɛ̀pusì-fìtimà ɓɛ mɛɛ̀ fyèèrɛ̀ngà lɛ, ɓɛɛ naŋ̀ fìtimà ɓɛɛ ghaagh, di ɓɛ mɛ pìg maa kìkɔm àsàg ànɛ ɓɛ ɓaghà rì nyi ɓi mɛ̀nig rì ǹkpaà lɛ: Ɓɔɔ kɛɛ kì suŋì bɔŋ yi yɛɛ̀ rɛsag fitimà ɓi ǹto wu fitimà,

³¹ Pol à kalì ǹkɔ̀mɛ̀n-ɓɛ̀sujàà lɛ: I ɓumɓɛ ɓɛ rɔɓi ɓi fɛ ɓi fìtimà, di ɓyàa ghɛɓ ɓi.

³² Fɔɔnnɛ ɓɛ̀sujàà ɓɛ rengàkà mɛ̀ɗig mɛ mɛ ɓanɓàngà maa kìkɔm ànɛ̀n ɓɛ caɗ lɛ, a ɓɛǹ.

³³ Yɛ̀ɛ ɓɛ ɓoŋɓòŋgà lɛ duri yɛ̀ɛ taǹ, nni Pol à cààsìghà ɓum ɓɛ̀cèm nyoo lɛ ɓɛɛ ɗi com à kpaa lɛ: Mɛ̀ru ǹtɛ̀ɗ rì mɛnin yɛɛ ti lɛ gɛɛ̀nɛ yɛ̀ɛ ɓi ɓoŋɓoŋ risyɔn, kɛ̀ ɓi ki ɗi nsoò maa com.

³⁴ Fɔɔnnɛ m̀ɓɔ̀ŋzaagh mìni lɛ, ɓi ɗi ɓìɗilàg lɛ ɓi ri mìni rì gɛɓsɛ̀n, wààdɛŋ wàa ɗimzi ɓi nsoò fyòŋ fìfog fi wɔ̀ ɓi ǹto.

³⁵ Yɛ̀ɛ à kpaaghà fɔlɔɔ, nni à tekà bìrɛs à fa Bɛ̀ll ɓìtògsɛ̀n ɓi mis mɛ ɓum ɓɛ̀cèm, à ɓɛg yɔ̀, à tumɛ̀n rìɗi.

³⁶ Fɔɔnnɛ ìtèɗ wu yughà min ɓɛro ɓɛm̀bog ɓɛ̀cèm ɓi nyoo, ɓɛ ɗi girig.

³⁷ Ɓìsi ɓɛ̀sɛ̀ɛ̀ ɓɛ̀cèm ɓɛ tì ɓaghà ɓi fìtimà, tì ɓaghà ɓɛ̀hɔnɗɛ̀ɗ ɓɛ ɓum ɓɛɓɛɛ̀, rì ɓum mɛ̀tin mɛraa rì ǹtɛ̀ɗ rì taàfog.

³⁸ Yɛ̀ɛ ɓɛ ɗighà gàɓ ìnɛ ì ghɛ̀ɛ̀sɛɛ, fɔɔnnɛ ɓɛ makàkà fàriǹ ɓi rìɓày, lɛ fìtimà fyɛɛ ki yɛ̀ɛ fi fɛmɓɛɛ.

³⁹ Yɛ̀ɛ duri i tangà, ɓɛ̀pusì-fìtimà ɓɛ ghɛɛ̀dìghà ɓi kipisɛn ki zi; yɛ̀ɛ ɓɛ pìkà mis, ɓɛ ghɛn yɛ̀ɛ rìɓày à ɗiŋii ɓi kìrìŋ ki riɓày, bèn ì kìrìŋ kiǹ ì seèsèèrɛ̀ngày gìrig; nni ɓɛ kɔngà lɛ ɓɛɛ kɛǹ kì rɛsii fitimà wɔɔ di bee i ɓaa.

⁴⁰ Fɔɔnnɛ ɓɛ fumɓàkà bɔŋ yi yɛɛ̀ rɛsag fitimà, ɓɛ càɗ yɔ wɔɔ ɓi rìɓày, ɓɛ fumɓàg girig mɛ̀ɗig mɛ kikɛ̀ɛ̀sì-fìtimà; yɛ̀ɛ ɓɛ kighà fɔlɔɔ, nni ɓɛ kagà min maa kìlàà ànɛ asu wu fitimà, lɛ bɛ̀ɓ yɛ̀ kɛɛ̀ tyɔg fyɔ, fɔɔnnɛ ɓɛ kɛngà min ɓi bèn ì rìɓày.

⁴¹ Wɔ̀lɛ, ɓɛ kɛngà ki roŋɗɛɛ ɓi sɛɛ̀sɛɛ, ɓi nyìinyìm à mɛ̀nig. Wɔɔnnɛ fìtimà fi kaɓkà; jàŋ ìnɛ asu ì ɗiŋì ɓi sɛɛ̀sɛɛ, kɛ̀ɛ̀ bee inɛ ì ɓatìghà lɛ ì nyɛ̀ŋɗɛ̀n tì, jaŋ ìnɛ ajɛ̀m ì siitɛ̀n kì wààrɛɛ, lɛ ɓìkus ɓi riɓày ɓi roòròŋɗɛ̀ngà miì rì ìtèɗ.

⁴² Fɔɔnnɛ ɓɛ̀sujàà ɓɛ wooghrɛ̀ngà jɛ̀ɛ̀ lɛ ɓɔɔ cuùsi ɓìmbùŋ ɓìcèm, ɓisuulɛ kidɛŋ ki ɓaghà lɛ ki wɔg ki ki làn.

⁴³ Kìɓan kifog yɛ̀ɛ ǹkɔ̀mɛ̀n-ɓɛ̀sujàà à kɔ̀nkɔ̀ngà lɛ a ghɛɓsi Pol, nni à rèkà ɓɛ̀sujàà ɓɛǹ lɛ ɓɛ̀ kɛɛ̀ kì fɔlɔɔ. Fɔɔnnɛ à reɓsìghà min ɓɛroɓɛ ɓɛ yighà kìwɔg lɛ, ɓɛɛ log kì kpìi ɓi rìɓày ɓɛɛ wɔg ɓɛɛ kpaŋ̀ a cɛɗ.

⁴⁴ Ɓɛ̀ro ɓɛm̀bog ɓɛ ghɛɛ̀sɛ̀ngà ɓɔ kì nɔ̀ɔ̀tii di ɓɛ kɔraagh ɓi mɛ̀ɓam, nsoò ɓi ɓìlànà ɓi fitimà. Fɔlɔɔ nnɛ ɓum ɓɛ̀cèm ɓɛ kɛngà kìkpaŋì a cɛɗ lɛ soghàsogha.