MƐ̀KÌKÌÌ MƐ ƁƐKƐ̀NÌ-FÌTOM 25 - Bafia Nouveau Testament

Pol à rɛlii ɓɛ̀yɔ̀m ɓi mis mɛ gɔmìnà ànɛ lɛ Fɛstus

¹ Wɔ̀lɛ ajɛ̀m ì mɛ̀ru mɛraa ànɛ gɔmìnà ànɛ lɛ Fɛstus à kpagà ɓi kìden ki zi ki à kɔ̀mɛ̀ngà, à pɛ̀sɛ̀ngà a Sezare, à ɓɔg a Yorisalɛm.

² Fɔɔnnɛ ɓɛ̀pìrɛɛtìrɛ̀ ɓɛgwey rì ɓìtèetèd ɓi ɓum ɓi a Ɓɛ̀yudɛ̀n, ɓɛ yughà nyi kìghɛɛ̀ lɛ ɓɛɛ sɔmɛn Pol.

³ Fɔɔnnɛ ɓɛ ɓɔŋzàkà Fɛstus lɛ, i à rì lɛ à gherɛ̀n lɛ ɓɛɛ yuiy rì Pol a Yorisalɛm, lɛ ɓɔɔ ɓaghà di ɓɛ mɛ tɔ̀kɛn lɛ, ɓɛ ri nyi ɓiì ɓoŋì ɓi bee lɛ ɓɛɛ wey.

⁴ Wɔ̀lɛ Fɛstus à pɛ̀ɛ̀zìghà ɓɔ lɛ Pol à rì ǹlɔlɔghɛn a Sezare, rì tì lɛ, nyimiɗ a ghɛ̀ɛ̀sɛɛ kì sugtii wɔɔ lɛ fyɛ̀ɗ.

⁵ Nni à ɓɔ̀ɓkà jɛ̀ɛ̀ lɛ: I ɓum ɓɛdɛŋ ɓɛ ɓi mìni ɓɛ ri rì bee, ɓɛɛ nɔɔ̀tiì mɛ̀, di ti sɛǹ a Sezare ǹɗaŋ, lɛ i ŋwaànɛ̀n à rì rì kìɓan kiɓeɓtɛn ki àa nkìi, ɓɛɛ sɔmɛn nyi.

⁶ Fɛstus à ghagsìghà ɓi mɛru mɛ ceeyɛn taàraa nsoò lɛ ǹtɛ̀ɗ a lɔ̀ŋkaa, fɔɔnnɛ à sugtìghà a Sezare. Ɓi ɗuri tana nnɛ à kɔ̀rìghà ɓi kìkpanà ki ɓɛyɔ̀m, à rom lɛ ɓɛɛ teɗ yì Pol.

⁷ Yɛ̀ɛ Pol à yùghày, Ɓɛ̀yudɛ̀n ɓɛ ɓɛ pɛsɛ̀ngày a Yorisalɛm, ɓɛ kɔmzɛ̀ngà nyi, ɓɛ kpaa ɓìɓan ɓi ɓeɓtɛn lɛɛ̀gwey ɓɛ raràɗ ɗi nyi, kìɓan kifog ɓɛ kpaakpààghà ɓìɓan ɓìn rì ŋwɔm kɛ̀ɛ̀ com ki ki resii lɛ ɓi ri saaɗ.

⁸ Pol à yɔ̀myɔ̀mgà lɛ: Ǹsɛ̀rii ɓi kiɓan kidɛŋ ki rarɛ̀n ɗì ɓìdɔ̀gsɛna ɓi Ɓɛ̀yudɛ̀n nsoò lɛ rì naà-Bɛ̀ll, nsoò rì Kaaza.

⁹ Yɛ̀ɛ Fɛstus à kɔ̀nkɔ̀ngà lɛ a puɓsi Ɓɛ̀yudɛ̀n mɛ̀rem nni à tɔkà Pol lɛ: Ù rì lɛ, ù gherɛ̀n lɛ, ù kɛǹ a Yorisalɛm ɓɛɛ yɔm̀ kìɓan kɔɔ wɔɔ di mɛ̀ ǹɗì ǹkɔ̀kɔriyɛn?

¹⁰ Nni Pol à ɓàkà lɛ: Ǹɗɛrɛlii ɓi ɗi lɛ, nkpaŋ ɓi kìkpanà ki ɓɛyɔ̀m ki Kaaza, wɔɔnnɛ ɓɛɛ reǹ kìɓan kɛm̀; ǹkìi ɓi Ɓɛ̀yudɛ̀n nsoò maa kìɓan adɛŋ à m̀ɓeɓtɛn lɔŋ yɛ̀ɛ wɛ̀ɛmiɗ ù yii.

¹¹ Nkòo ki rì lɛ ǹɗì rì zɛ̀ɗ, nsoò lɛ i mɛ̀ɛ ǹkìi kìɓan ki lɛ ɓɛɛ wey mɛ̀ miì, màa ɓèn ɓi riwù, kìɓan kifog i ki ghɛnɛɛ lɛ saaɗ à yin ɓi ɓìɓan ɓi ɓɛ sɔmɛɛ mɛ̀ miì nsoò lɛsàg, mum à yin ri ìtèɗ wulɛ, à teɗ mɛ̀ à fa rì ɓɔ; ǹghagsii kìɓan kɛm̀ yɛ̀ɛ Kaaza.

¹² Yɛ̀ɛ Fɛstus à tɔkà ɗyomzɛ̀n ɗì ɓumɓɛ ɓɛ nɗeɓkì nyi, nni à ɓàkà min Pol lɛ: Yɛ̀ɛ ù ghagsii kìɓan kɔɔ yɛ̀ɛ Kaaza, ù rì ɓiì kɛ̀ɛ a lɔ̀ŋkii.

Pol à rɛlii ɓi mis mɛ rifòm ɗi lɛ Agiripa

¹³ Yɛ̀ɛ ɓɔɔ mɛru ɓɛ ghaghìghà, nni rìfòm ɗi lɛ Agiripa ɓɛɛ Berenis, ɓɛ yughày a Sezare lɛ ɓɛɛ togsi Fɛstus.

¹⁴ Yɛ̀ɛ ɓɛ ghɛ̀ɛ̀sɛ̀ngà kìghagsii gàɓ ì mɛ̀ru wɔɔ, fɔɔnnɛ Fɛstus à rèsìghà rìfòm kìɓan ki Pol à kpaa lɛ: Felis, àa ncàri ŋwaàdɛŋ fɛ ɓi naà-zày.

¹⁵ Nni yɛ̀ɛ mɛ̀ɛ ǹɗìì a Yorisalɛm, ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛ n-yùu nyi kìsɔmɛɛ, ɓɛ ki kpaa mɛ lɛ, mɛ̀ɛ nfa ànɛ̀n rìnàn.

¹⁶ Nni mɛ̀ɛ mɓàagh ɓɔ lɛ: Ɓɛ̀ròmɛŋ ɓɛ yin ɗi kìsyɔ̀ɔ̀ ki lɛ, i ɓɛ sɔmɛɛ mum ɓɛ gherɛ̀n lɛ ɓɛɛ wes̀ ŋwaànɛ̀n, di à ka rɛɛsɛn ɓi ri ɓumɓɛ ɓɛ sɔmɛɛ nyi, ɓɛ càɗ nyi cààmɛ̀n ki lɛ a kpaàsɛn ɓi ɓìɓan ɓi ɓɛ kpaakpaa ɓɛ raràɗ ɗì nyi.

¹⁷ Nni yɛ̀ɛ ɓɛ n-yùu yì fɛ, mɛ̀ mɓoŋi ɓi lɛ cààmɛ̀n kɛɛ ghaàgh, mɛ̀ɛ nkɔ̀rii ɓɛ̀yɔ̀m ɓi duri tana, ǹki rom lɛ ɓɛɛ teɗ yì ŋwaàncèm.

¹⁸ Yɛ̀ɛ ɓɛ nɗɛlii ɓɛ̀yɔ̀m, ɓum ɓɛ kiɓan ɓɛ ǹkpaa ɓi nsoò kìɓan kifog ɓi ɓìɓan ɓi ɓeɓtɛn ɓi mɛ̀ɛ ǹfèfeegh lɛ, à ɓaghà lɛ à kì.

¹⁹ Paàzì wàà àa nɗì ɓi kìɓan ki ki seesee rìgherɛ̀n ɗyaa, à ɓiìɓììsɛ̀n ɓi kìɓan ki ŋwaàdɛŋ lɛ Yeesus, ànɛ à wughà, wɔ̀lɛ Pol nyii kalàg lɛ, ànɛn à rì cem.

²⁰ Ɓi ɓɛg wɛ̀m, com ki mɛ̀ɛ nɗi lɛ ǹkpaa ɓi kìɓan kiǹ ki ǹ-yeesii mɛ̀. Fɔɔnnɛ mɛ̀ɛ m̀mɛɛ̀ kpaa nyi lɛ, i à kɔ̀ni a kɛǹ a Yorisalɛm, ɓɛɛ yɔm̀ kìɓan kii wɔɔ.

²¹ Wɔ̀lɛ Pol àa ntɔɔgh lɛ kìɓan kii kɛɛ ghaàgh yɛ̀ɛ Kaaza. Fɔɔnnɛ mɛ̀ɛ nkalii lɛ, ɓɛɛ ka ɓèŋ nyi ɓi naà-zày à kpaŋ ŋwos anɛ ǹɗì nyi ɓiì romì yɛ̀ɛ Kaaza.

²² Nni Agiripa à kpaaghà Fɛstus lɛ: Mɛ̀ɛ nkɔ̀nkɔn lɛ nwog ǹkpaà wu ŋwaànɛ̀n. Fɛstus à ɓàg nyi lɛ, ù rì ɓiì woògh rìduri.

²³ Yɛ̀ɛ duri i tangà Agiripa ɓɛɛ̀ Berenis ɓɛ yughày ri coo rìgwey ɓɛ ɗiŋì ɓi naà-ɓɛ̀yɔ̀m, ɓɛ̀kɔ̀mɛ̀n ɓɛ̀sujàà ɓɛgwey, rì ɓɛ̀lem ɓɛ ɓum ɓɛ ɓi bàn ɓɛ nɔɔ̀nɔ̀ɔ̀tìghày ɓɔ. Fɔɔnnɛ Fɛstus à romgà min lɛ ɓɛɛ yuis̀ rì Pol.

²⁴ Nni Fɛstus à kpaaghà lɛ: Rìfòm Agiripa rì mìniìcèm ɓɛ ɓì rì fɛ rì ɓìsi, ǹwaànɛ ɓi seesee anɛ Ɓɛ̀yudɛ̀n ɓɛ̀cèm ɓɛ yughà mɛ̀ kìghɛɛ̀ lɛ rì a Yorisalɛm rì fɛfɛ bisu wii, ɓɛ tɔtɔ̀g mɛ̀ jɛ̀ɛ̀ aɗyoo lɛ, ɓɛɛ wey nyi.

²⁵ Wɔ̀lɛ ɓi mɛ̀, mɛ̀ɛ nghɛɛ ɓi kiɓan kiɓeɓtɛn ki à kìi ki ɓɛ ri lɛ ɓɛ wey nyi miì, nni yɛ̀ɛ nyimiɗ yɛɛ ntɔɔgh lɛ kìɓan kii kɛɛ ghaàgh yɛ̀ɛ Kaaza, nni mɛ̀ɛ nkpaa lɛ, ǹɗi nyi ɓiì romì wɔɔ.

²⁶ Wɔ̀lɛ ǹka yin ɗi bimiɗ à kìɓan anɛ ǹɗì lɛ ǹkàn Kaaza ɓi kìɓan ki ǹwaànɛ, fɔlɔɔ nnɛ ǹɗɛsii nyi fɛ ɓi mis min, a ɓiisɛ̀n ɓi mis mɔɔ, wɔ̀ rìfòm Agiripa lɛ i tyàa mɔ̀ɔmɔmgì kìɓan kii, fɔɔnnɛ mɛ̀ ǹ-yi cɛ kɛɛ̀ki ǹɗì lɛ ǹkàn Kaaza;

²⁷ lɛ ki ri ɓiì ɓaà kìdìmìdimi ki kiɓan, di ǹɗomi kìmbùŋ yɛ̀ɛ Kaaza kɛ̀ɛ ǹɗèsi ɓiɓeɓtàg ɓi ɓiɓan ɓi ki nsɛ̀raagh lɛ tɛntɛ̀ɛ̀n.