MƐ̀KÌKÌÌ MƐ ƁƐKƐ̀NÌ-FÌTOM 22 - Bafia Nouveau Testament

¹ Mìni ɓɛ̀geni ɓɛ̀m rì ɓɛ̀seŋi ɓɛ̀m, ɓigomìnɛ ramina mɛ̀reè, ɓi wog com ki ǹɗì lɛ ǹɗèsì mìni.

² Yɛ̀ɛ ɓɛ wokà di Pol à toòghrɛɛ ɓi rì ebìreegh ɓɛ mam lɛ kpaɗ; nni Pol à kpaghà lɛ:

³ Ǹɗì muu Ɓɛ̀yudɛ̀n, ǹ-yalɛ̀ngà a Tarisi ɓi kìlànà ki zi ki a Silisii. Kìɓan kifog, fɛ ɓi bàn ìnɛ nnɛ ǹtɔɔ, ǹki yilag ɓisyɔ̀ɔ̀ ɓi ɓɛseŋi ɓis yɛ̀ɛ ki ghɛɛ̀sɛɛ, a mɛ̀kòò mɛ Gamalyɛl; m̀ɓaghà girig ǹfalɛn ɗi Bɛ̀ll lɔŋ fɛlɛ yɛ̀ɛ mìni girig ɓì rì ɓɛ̀falɛn ɓɛsɛ̀ɛ̀ ɓɛ̀cèm gɛɛ̀nɛ.

⁴ Ǹɗùùɗùùsìghà ɓumɓɛ ɓɛ nɔɔ̀nɔ̀ɔ̀tìghà bee ì Kan, wɛ̀y à kpaŋ yɛ̀ɛ ǹwowòlà ɓɛ̀ro ɓɛdɛŋ, ǹki ɓanɓan lɛ, rì ɓɛ̀yiɓ rì ɓɛ̀baŋì ǹfogì ɓɔ ɓi ɓìsɔŋ, ǹki pìki ɓɔ ɓi naà-zày.

⁵ Ǹlàmì ɓɛ̀pìrɛɛtìrɛ̀ àgwey rì ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛ ri mɛ̀ ɓɛ̀wusìnɛ̀ɗ lɛ, ɓɛ faghà kɔm̀ mɛ̀ ɓɛ̀kaàtà ɓisuu ɓɛgherɛ̀n ɓɛ a Damas. Nni ǹkɛ̀ngà wɔɔ lɛ, ǹsug yì rì ɓɛ̀roɓɛ ǹtanɛɛ, a Yorisalɛm, ɓɛ̀kàgakɛn ɓi ɓìsɔŋ di ɓɛɛ pɔnɔ̀si ɓɔ.

Pol à rèsii yɛ̀ɛ à lɔ̀ɔ̀ghrɛ̀ngà ǹɗem

⁶ Yɛ̀ɛ m̀ɓaghà di ǹkaka ɓi bee ɓi rìkɛ̀n kì kpaŋì a Damas, nni ǹsìgmɛ̀ngà di Coo kìtɛɛtɛn ki mɛ kì yi aɗyoo lɛ ŋwààɗ, ki yu ki ceŋzɛ̀n mɛ̀.

⁷ Fɔɔnnɛ ǹkpìghà ɓi zi, ǹwog di jɛ̀ɛ̀ yɛ̀ɛ kpaakpaa mɛ lɛ: Sol! Sol wɔ̀, u yeeyeèsì mɛ̀ lɛ cɛ yɔ?

⁸ Nni m̀ɓàkà lɛ: Kan, wɔ̀ yɛɛ ri ghɛn? Jɛ̀ɛ̀ ì ɓàg mɛ̀ lɛ: Mɛ̀ yɛɛ ri Yeesus ànɛ a Nazarɛt ànɛ ù ti, ù yeèyèèsì.

⁹ Ɓumɓɛ m̀ɓaghà ǹɗaŋ ɗi ɓɔ, ɓɛ ghɛngà kìtɛɛtɛn, kìɓan kifog jɛ̀ɛ̀ ìnɛ ì tòòghrɛ̀ngà rì mɛ̀ yɛ̀ɛnɛ ɓɛ wokà ɓi.

¹⁰ Fɔɔnnɛ ǹtɔkà min lɛ: Kan, cɛ kɛɛ̀ki ǹghɛ̀ɛ̀sɛɛ kì kìi? Kan à ɓàg mɛ̀ lɛ: Pɛ̀sɛn aɗyoo, u kɛǹ a Damas, wɔɔnnɛ ɓɛ ri wɔ̀ ɓiì rèsii com ki ù ghɛ̀ɛ̀sɛɛ kì kìi.

¹¹ Yɛ̀ɛ ǹɗɔ̀ɓkà kɛ̀ nghɛnɛn ti lɛ kìtɛɛtɛn kìn ki ɗiŋzìghà mɛ̀ tìɗyaŋ, nni ɓumɓɛ m̀ɓaghà rì ɓɔ ɓɛ ɓangà mɛ̀ ɓi càg, ɓɛ kɛǹ ɗì mɛ̀ a Damas.

¹² Ŋwaàdɛŋ à ɓaghà wɔɔ ɗii lɛ Ananyas, à ɓaghà ŋwaànɛ à falɛ̀ngà ɓi rìgherɛ̀n à ki nɔ̀ɔnɔɔ̀tì ɓìdɔ̀gsɛna ɓis, Ɓɛ̀yudɛ̀n ɓɛ̀cèm ɓɛ ɓɛ ɓaghà a Damas, ɓɛ sɛsɛ̀kà nyi.

¹³ Nni à yùghà mɛ̀ kì ghɛɛ̀, à kpaa mɛ̀ lɛ: Geni wɛ̀m Sol, ghɛnɛn tì, ɓi cààmɛ̀n kɔm̀ kiǹ nnɛ mis mɛ̀m mɛ ghaskà kì ŋwàrɛɛ, ǹtumɛ̀n tì rìghɛnɛ̀n ǹki ghɛn nyi.

¹⁴ Nni Ananyas à kpaaghà mɛ̀ lɛ: Bɛ̀ll à ɓɛ̀seŋi ɓis à lokà wɔ̀ kì ɓɔ̀ni lɛ, u yi rìkɔ̀n ɗii, ù ghɛn m̀bobog à mum ànɛ à rì lɛ saaɗ ù ki wog jɛ̀ɛ̀ ìnɛ ì kpaŋiì ɓi ŋwɔm wìì;

¹⁵ ɓisuulɛ ù rì ɓiì ɓaà wusìnɛ̀ɗ wìì, lɛ u ghagsi ɓum ɓɛ̀cèm ɓìɓan ɓi ù kìghà lɛ, ù ghɛn, ù ki wog.

¹⁶ Nni ɓigomìnɛ, kɔ̀ɔ lɛ̀mziti, pɛ̀sɛn aɗyoo u teɗ bàɓtis ɓi ɗii ɗi Kan, di ɓiɓe ɓyɔɔ ɓyɛɛ ɓa ɓìsòòyɛn.

¹⁷ Yɛ̀ɛ ǹsugtìghày a Yorisalɛm, nni ǹghay wɛ̀m wu faŋìghà di m̀ɓɔ̀ɔɓɔŋzàg ɓi naà-Bɛ̀ll,

¹⁸ fɔɔnnɛ ǹghɛngà Kan, à kpaa mɛ̀ lɛ: Kìya lɛ fyɛ̀ɗ, u fyaŋzi kì pɛ̀sɛɛ a Yorisalɛm lɛ ɓumɓɛ wɔɔ ɓaa gherɛn ɓi ɓiban ɓi ù rì ɓɔ ɓiì ghagsii ɓi rarɛ̀n ɗì mɛ̀.

¹⁹ Nni ǹkpaaghà lɛ: Kan, ɓɔmiɗ ɓɛ yii lɛ, mɛ̀ɛ nkɛ̀ngì ɓi naa yi bɔ̀ŋzɛ̀n, di mɓanɓan yi ɓumɓɛ ɓɛ gherɛɛ wɔ̀, m̀pìpìg ɓɔ ɓi naà-zày, ǹki reereɓsì lɛ ɓɛɛ ɓog ɓɔ kìtòn.

²⁰ Yɛ̀ɛ ɓɛ wowɔlà wusìnɛ̀ɗ wɔ̀ɔ̀ ànɛ lɛ Ityɛn mɛɛ̀miɗ m̀ɓaghà wɔɔ, mɛ̀ m̀ɓaghà girig ɓijɛ̀m ì ɓɛ̀roɓɛ ɓɛ wolà nyi ɓɛ̀n, mɛ̀ yɛɛ ki ɓèŋɓèŋgà ɓìlàà ɓyaa.

²¹ Nni Kan à kpaaghà min mɛ lɛ: Kɛ̀na ɓisuulɛ, ǹɗì wɔ̀ ɓiì romi fìràɓ, ɓi ɓìlɔ̀ŋ ɓi ɓumɓɛ ɓɛ yin Ɓɛ̀yudɛ̀n.

²² Yɛ̀ɛ Ɓɛ̀yudɛ̀n ɓɛ ɓɛ ka kɔ̀rìghà lɛ fyòoog lɛ ɓɛɛ wog ɓìtòkì ɓii ɓɛ mɛɛ̀ wokà jɛ̀ɛ̀ ì siitòn inɛ̀n, nni ɓɛ tumɛ̀ngà rìsyan jɛ̀ɛ̀ aɗyoo lɛ: Pisi ɓìsi ŋwaànɛ bììbiì, ki ghɛ̀ɛ̀sɛɛ tì ɓi lɛ a ghɛghɛɓ.

²³ Yɛ̀ɛ ɓɛ syansyàngà fɔlɔɔ di ɓɛɛ̀ màmag ɓilàà ɓyaa, ɓɛ raràɓ kùrùɓu ɓɛ pampàm aɗyòò.

²⁴ Nni ǹkɔ̀mɛ̀n ɓɛ̀sujàà à kpaaghà lɛ ɓɛɛ ɗiŋzi Pol ɓi gari, ɓɛ ki ɓog nyi kìtòn lɛ a kpaà cɛ kɛɛ kiì lɛ ɓumɓɛ̀n ɓɛɛ wog bim fɔlɔɔ ri nyi, ɓɛ syansyàn ɓi lèg ànɛn.

²⁵ Yɛ̀ɛ ɓɛ mɛɛ̀ kuɓsìghà Pol lɛ ɓɛɛ ɓog nyi kìtòn, nni à tɔkà ǹkɔ̀mɛ̀n ɓɛ̀sujàà àsàg lɛ: Ɓì rì lɛ ɓì ɓog muu Ròmɛŋ di ɓɛ ka yɔ̀mzi ɓi nyi?

²⁶ Yɛ̀ɛ ǹkɔ̀mɛ̀n ɓɛ̀sujàà àsàg ànɛn à wokà fɔlɔɔ, nni à kɛ̀ngà yɛ̀ɛ ǹkɔ̀mɛ̀n àgwey lɛ a kpaa nyi lɛ: Ù yii com ki u kɔ̀nkɔn lɛ u ki? Ŋwaànɛnii à rì muu Ròmɛŋ.

²⁷ Fɔɔnnɛ ǹkɔ̀mɛ̀n ɓɛ̀sujàà àgwey a yughà kì tɔɔ̀gh Pol lɛ: Ki ri saaɗ lɛ ù rì muu Ròmɛŋ? Pol à gherì lɛ: Ki ri saaɗ fɔ̀lɔ̀ɔ̀.

²⁸ Nni ǹkɔ̀mɛ̀n ɓɛ̀sujàà àgwey à kpaatìghà min lɛ: Mɛ̀ ǹsùùghràkà ɓyoo mɔ̀ɔ̀ni a ɓɛ̀làmì lɛ m̀ɓa ɓi nɗɛli wu muu Ròmɛŋ. Pol à kpaa lɛ: Mɛ̀ ǹɗì muu Ròmɛŋ à tumɛ̀n a rìyalɛ̀n.

²⁹ Fɔɔnnɛ ɓumɓɛ ɓɛ mɛɛ̀ ɓokà nyi kìtòn lɛ di a toòghrɛn ɓɛ ghaskà kì ghaaghraagh, nsoò ǹkɔ̀mɛ̀n ɓɛ̀sujàà àgwey à risìghà yɛ̀ɛ à wokà lɛ, Pol à rì muu Ròmɛŋ ɓisuulɛ, nnyɛɛ reɓsìghà lɛ ɓɛɛ kaŋ̀ nyi bɛn.

Pol à rɛlii ɓi nyìinyìm à Sànèdìrɛŋ

³⁰ Ɓi duri tana, yɛ̀ɛ ǹkɔ̀mɛ̀n ɓɛ̀sujàà àgwey à kɔ̀nkɔ̀ngà lɛ, a konag kì yiì kìɓan ki Ɓɛ̀yudɛ̀n ɓɛ sɔmɛ̀ngà Pol miì nni à kpaaghà lɛ ɓɛɛ fumi nyi bɛn, à ki tɔg ɓɛpìrɛɛtìrɛ̀ ɓɛgwey rì ɓumɓɛ ɓi Sànèdìrɛŋ lɛ ɓɛɛ taŋzɛn, fɔɔnnɛ à yùghày rì Pol à rɛsì ɓɔ nyi asu.