MƐ̀KÌKÌÌ MƐ ƁƐKƐ̀NÌ-FÌTOM 20 - Bafia Nouveau Testament

Pol à kɛ̀ɛ̀dii a Masedwan, rì ɓi kìlɔ̀ŋ ki Gìrɛg

¹ Yɛ̀ɛ kìyoòyòò kiǹ ki lekà, Pol à taŋzɛ̀n ɓɛ̀gherɛ̀n, fɔɔnnɛ à ɓaa lɛ à mɛ reɓ ɓɔ, à ghesɛ̀n min ɓɔ, à kɛ̀n a Masedwan.

² A renìghà kìlànà ki zi kiǹ di a fafa ɓɛgherɛ̀n deɓ lɛɛ̀gwey, ajɛ̀m ìnɛn nnɛ à kɛ̀ɛ min ki kpaŋì ɓi kìlɔ̀ŋ ki Gìrɛg.

³ A kɔ̀rìghà wɔɔ ɓɛ̀ŋwii ɓɛraa, yɛ̀ɛ à mɛɛ̀ tekà fìtimà lɛ a kɛǹ a Sirii, nni à wokà lɛ Ɓɛ̀yudɛ̀n ɓɛ mɛ tɔ̀kɛn nyi, fɔɔnnɛ à tekà min nɗɛli lɛ, a sugti a Masedwan.

⁴ Ɓumɓɛ Pol à ɓaghà ǹɗaŋ ɗi ɓɔ, ɓɛ ɓaghà lɛ: Sopatɛr, ànɛ à ɓaghà man à Pirus ànɛ a Bere, rì Aristarikɛ ɓɛɛ̀ Sekunɗus ɓumɓɛ a Tesalonika, Gayus ànɛ à ɓaghà ŋwaànɛ a Dɛriɓɛ, rì Timote, rì Tisig, rì Tirofim ɓɛ̀roɓɛ̀n ɓɛ̀sɛ̀ɛ̀ ɓɛ̀cèm ɓɛ ɓaghà ɓumɓɛ a Azii.

⁵ Ɓumɓɛ̀n ɓɛ lokà kì kɛ̀ɛ asu, ɓɛ Kɛǹ ɓìsi kì ɓoŋì a Tirowas.

⁶ Ɓi ɓɛg ànɛ a lɔ̀ŋkis, ɓìsii ɓɔkà kìkom a Filiɓ di mɛ̀ru mɛ ɓɛ nkìlàg ɓìrɛsì kɛ̀ɛ̀ nwìɗ mɛ mɛ ghaàgh, fɔɔnnɛ tì kɛ̀ngà ɓɔ kì tanɛɛ a Tirowas ɓi mɛ̀ru mɛtaǹ, tì ki kɔ̀ri wɔɔ mɛru taàɓɛ̀ɛ̀.

Pol à ghèmzii dɛlì ì mum ɗii lɛ Etig, a Tirowas

⁷ Ɓi ŋwos a ǹtonto ànɛ ɓi rìtumɛ̀n ɗi sɔnɗì nnɛ tì ɓaghà ɓɛ̀taŋzɛn lɛ ti teɗ ɓìɗilàg ɓi Bɛ̀ll. Pol nyii ghɛɛ̀sɛ̀ngà kì ghaghii ɓi duri tana, nni à tòkàkà rì ɓɛ̀gherɛ̀n, à ki ràɓsi ɓitòkì à kpaŋ nyìinyìm à-ru.

⁸ Ɓɛ̀lamɓà ɓɛ ɓaghà lɛɛ̀gwey ɓi kìden ki naa ki tì taŋzɛ̀ngà miì ɓi mɛɛ mɛ aɗyòò.

⁹ Nni dɛlì ì mum ìdɛŋ ɗii lɛ Etig ìnɛ ì kɔ̀kɔ̀rìghà ɓi wonɗò ì ghaghìghà rì fìlo lɛ kɔɔ̀kɔɔ̀ di Pol a ka ràaraɓsì lɔŋ ɓitòkì ɓii, yɛ̀ɛ fìlo fi teri nyi fɔlɔɔ, nni à kɔ̀sɛ̀ngày ɓi dɛg ì kìraa, à kpì azi; yɛ̀ɛ ɓɛ mɛɛ̀ pɛ̀sìghà nyi, ɓɛ ghɛn lɛ, à mɛ wu.

¹⁰ Fɔɔnnɛ Pol à sɛngà min à kɛ̀n mɛ̀ree à pɛ̀sì dɛlì ìnɛn, à kpaa ɓum lɛ: Kɔ̀riina lɛ fyòoog, à rì cem.

¹¹ Nni à sugtìghà kìɓɔɔ̀gh, à ɓɛg bìrɛs à ɗi ajɛ̀m ìnɛn nnɛ à kɛ̀ɛ̀dìtìghà lɔŋ ri ɓìtòkì ɓii asu, duri ì ràm ì tan, fɔɔnnɛ à ki ghaghìghà min.

¹² Ɓɛ sukà rì mutyàà dɛlì ànɛn, di à rì cem, kìɓan kiǹ ki ki lɛ, mɛ̀rem mɛɛ kpi ɓum ɓi mùm.

Pol à pɛ̀sɛɛ a Tirowas à kɛ̀n a Milɛ

¹³ Fɔɔnnɛ ɓìsii lolòkà kì kɛ̀ɛ beèbɛ̀y ɓi fìtimà fi fi kɛnkɛ̀ngà a Asɔs, wɔɔnnɛ tì ghɛ̀ɛ̀sɛ̀ngà kì teetii Pol, ɓisuulɛ nyii kɔnkɔ̀ngà lɛ, a kpaŋ wɔɔ ɓi zi.

¹⁴ Nni yɛ̀ɛ à tanɛ̀ngà ɓìsi a Asɔs, tì teɗ nyi ɓi fìtimà lɛ, ti kɛǹ a Mitilɛn.

¹⁵ Yɛ̀ɛ tì Pɛ̀sɛɛ wɔɔ, tì ghagsì lɔŋ rikɛ̀ɛ̀ ɗis ɓi fìtimà, tì kɛ̀n kìkpaŋì a Siyos ɓi duri tana, ŋwos anɛ à ɓɔ̀ɓkà foo, tì syaàghà a Samos, ɓi ànɛ à ɓɔ̀ɓtìtìghà nnɛ tì kpagà a Milɛ.

¹⁶ Pol à ɓaghà ǹsììrɛn lɛ kɛ̀ɛ rɛli a Efɛɛzɛ lɛ, cààmɛ̀n ki ri nyi ɓiì cee a Azii. À ɓòòɓòòzɛ̀ngà lɛ, a ɓa a Yorisalɛm ɓi ŋwosi Pàŋtèkot, di bee i ɓaa.

Pol à ghesɛɛ̀ ɓɛ̀sɛ̀ɛ̀mɛn ɓɛ kiseŋì ɓɛ a Efɛɛzɛ, di à rì a Milɛ

¹⁷ Pol à pɛ̀sìghà ɓum a Milɛ, à rom lɛ ɓɛɛ regiì nyi ɓɛ̀sɛ̀ɛ̀mɛn ɓɛ kiseŋì ɓɛ ɓi kìseŋi ki a Efɛɛzɛ.

¹⁸ Yɛ̀ɛ ɓɛ̀roɓɛ̀n ɓɛ yughày, à kpaa ɓɔ lɛ: Ɓì yi yɛ̀ɛ mɛ̀ɛ ǹghɛghɛɓi rì mìni cààmɛ̀n kìcèm ki mɛ̀ɛ nɗì rì mìni, à tumɛ̀n lɔŋ ɓi ŋwos à ǹtonto ànɛ ǹkpagà ɓi kìlànà ki zi ki a Azii.

¹⁹ Mɛ̀ɛ nkìi Kan kìsay kɛ̀ɛ m̀ɓɔgsɛn mɛ̀ɛmiɗ nsoò lɛsàg, rì misì ɓi mɛ̀tam ɓi nyìinyìm à mɛ̀tɔɓ mɛ mɛ̀ɛ nghɛɛ lɛ ɓìtɔ̀kɔ̀ ɓi Ɓɛ̀yudɛ̀n ɓɛ ntɔɔ̀tɔ̀kɛ̀n mɛ̀.

²⁰ Ɓì yii lɛ, ǹnyamgà ɓi mini kìɓan kidɛŋ ki ki ri lɛ, ki ghɛɓsì mìni, kɛ̀ɛ ǹki risi mini rìkpaakpàà, ɗì rìrèèrèsàg ɗi ɓiɓan ɓi Bɛ̀ll ɓi gwìy ì ɓum, nsoò lɛ a ɓɛ̀mɛɛ ɓin.

²¹ Ǹɗerèŋìghà lɛ, rì Ɓɛ̀yudɛ̀n rì Gìrɛg lɛ ɓɛɛ lɔɔ̀ghrɛn mɛ̀rem, ɓɛ gherɛ̀n Bɛ̀ll, ɓɛ ki tyweeyi Yeesus à Kan wìs.

²² Nni ɓigominɛ, ǹkɛ̀ɛ a Yorisalɛm lɔŋ yɛ̀ɛ Nghay a titini mɛ lɛ nkɛǹ, ǹ-yii ɓi com ki kɛɛ̀ ɓoŋɓoŋ mɛ wɔɔ.

²³ Kìɓan kifog, ǹ-yii lɛ ɓi bàn bimiɗ ìnɛ ǹkpaŋi wɔɔ, Kìtɛntɛ̀ɛ̀n ki Nghay ki ti ki resàg mɛ̀ lɛ, rì naà-zày, rì ǹkulɛ̀n ɓyɛɛ̀ ɓoŋɓoŋ mɛ wɔɔ.

²⁴ Mɛ̀ m̀ɓiisɛɛ gì ɓi ki foŋì ǹto ɓi cɛɓ kɛ̀m ki mɛ̀ɛmìɗ, com ki nfɔmfɔ̀m ki ri lɛ, nkɛnkɛn asu rì rìkɛ̀ɛ̀ ɗyɛm̀ yɛ̀ɛ ki ghɛɛ̀sɛɛ, ǹki kì kisay ki Kan Yeesus à faghà mɛ̀, kɛɛ ri lɛ, ǹghagsi Syeesyee à Ɓɔlɛ à geesɛ̀n ì Bɛ̀ll.

²⁵ Mìni ɓɛ̀sɛ̀ɛ̀ ɓɛ̀cèm ɓɛ ǹghaghìghà a lɔ̀ŋkin di nkakali Ɓɔlɛ à kìlɔ̀ŋ ki Bɛ̀ll, ǹ-yii lɛ syeesyee lɛ, ɓyàa ghɛɛ̀di ɓi ìsu wɛ̀m à tumɛ̀n ɓigomìnɛ.

²⁶ Kìɓan kiǹ kɛɛ̀ki ǹkalii mìni gɛɛ̀nɛ lɛ: Bwaɓ yi wààdɛŋ yi yìn lɛ, yi kɛǹ mɛ̀ ɓi ǹto.

²⁷ Ɓisuulɛ, ǹkpàkàkà mìni dwìɗ i Bɛ̀ll bimiɗ, kɛ̀ɛ nnyam mini nsoò maa kìɓan adɛŋ.

²⁸ Fɔɔnnɛ, ɓèŋina mìniìɓɔmiɗ, ɓì ki ɓèŋ di kituu ki jɔ̀ɔ̀ yi Bɛ̀ll, yi Kìtɛntɛ̀ɛ̀n ki Nghay ki rɛsìghà mìni lɛ ɓi ɓeŋ̀ɓeŋ. Mɛniina kìseŋi ki Bɛ̀ll lɛ syeesyee, lɛ à làkà kɔ rì bwaɓ yii.

²⁹ Mɛ̀ ǹ-yii lɔŋ lɛ ɓum ɓɛdɛŋ ɓɛ ɓɛ rì yɛ̀ɛ ɓìmonɗo, ɓɛ ri ɓiì ɗiŋii ɓi nyìinyìm wìn ajɛ̀m yɛ̀m, ɓumɓɛ̀n ɓaa kèŋi ɓi kituu ki jɔ̀ɔ̀.

³⁰ Nsoò ɓi nyìinyìm wìn, ɓum ɓɛdɛŋ ɓɛ tumɛɛ gɛ rìrèrèsì ɗi ɓum ɓìɓan ɓi ɓi ghɛɛ̀sɛɛ ɓi, lɛ, ɓɛɛ syoŋ̀ ɓɛ̀gherɛ̀n ɓi bee yaà.

³¹ Fɔɔnnɛ ɓaana cem, ɓì ki yiti lɛ, ǹɗeɓi mìni bèg yiraa, yɛ̀ɛ ìru yɛ̀ɛ ŋwos kɛ̀ɛ nfɔɛy, rì misì ɓi mɛ̀tam.

³² Nni ɓi cààmɛ̀n ki, ǹɗeɓsɛɛ mìni rì Bɛ̀ll ǹki reɓsɛnti mìni rì ɓɔlɛ à geesɛ̀n yìì; ɓɔlɛ ànɛ̀n yɛɛ ri lɛ, à kì lɛ ɓi ɓa rì ìtèɗ, à ki fati mini ɓyom ɓi à nyamgà ɓisuu ɓumɓɛ ɓɛ ri ɓɛŋkii.

³³ M̀ɓaghà ɓi ri zày ìnɛ lɛ, mum a fa mɛ̀ mɔ̀ɔ̀ni, nsoò gol, nsoò ɓìlàà.

³⁴ Mìniìɓomiɗ ɓì yii lɛ, ǹsasàlà rì ɓyàg ɓyɛm̀ ɓi, lɛ ǹtanɛn ɓyom ɓi ti ghɛɓ miì lɛ rì mɛ̀, rì ɓumɓɛ ǹkɛ̀ɛ̀kɛ̀ɛ̀ghà rì ɓɔ.

³⁵ Mɛ̀ɛ ǹɗèsii mìni bee yicèm lɛ, cààmɛ̀n ki ɓi sasay fɔlɔɔ, kɛɛ̀ki ɓì rì ɓiì ghɛɓsii ɓɛ̀roɓɛ ɓɛ yin ɗi ìtèɗ, ɓì ki yiti jɛ̀ɛ̀ ìnɛ Kan à kalìghà ɓi ŋwɔm wii lɛ: Rì ŋwaànɛ à faa, rì ŋwaànɛ ɓɛ faa com roànɛ à faa yɛɛ ti à ɓiisàg kì woògh kìrɔɔ.

³⁶ Yɛ̀ɛ à lègsìghà ɓìtòkì ɓiǹ fɔɔnnɛ à ɓakà mɛ̀ɗu ɓi zi, à ɓɔ̀ŋzì Bɛ̀ll ǹɗaŋ rì ɓɔ.

³⁷ Fɔɔnnɛ mum bimiɗ ànɛ ɓi ɓɔ à kpusɛ̀ngà rì ǹkɛ̀gh, à ki fyuŋ Pol ɓi kìmììgh lɛ a lɔɛɗ nyi.

³⁸ Kìɓan ki ki ɓiisɛ̀ngà ɓɔ kì faà ǹɗemi-kɛŋɛn ki ɓaghà jɛ̀ɛ̀ ìnɛ Pol à kpaaghà ɓɔ lɛ, ɓaa ghɛɛ̀di ɓi ìsu wii ŋwos adɛŋ. Nni ɓɛ kɛ̀ngà min nyi ki foŋì a fìtimà.