MƐ̀KÌKÌÌ MƐ ƁƐKƐ̀NÌ-FÌTOM 19 - Bafia Nouveau Testament

Pol à kpaŋdii a Efɛɛzɛ

¹ Cààmɛ̀n ki Apolos à ɓaa a Kɔrɛŋt, kɛɛ̀ki Pol à kìi lɛ, à mɛ rereniì ɓìlɔ̀ŋ ɓi ɓi dòn, à yù kì kpaŋì a Efɛɛzɛ, à tanɛn gàɓ ì ɓɛ̀yilàg wɔɔ, à tɔg ɓɔ lɛ:

² Ɓì tekà nya Kìtɛntɛ̀ɛ̀n ki Nghay yɛ̀ɛ ɓi gherɛ̀ngà? Ɓɛ̀roɓɛ̀n ɓɛ ɓaàg nyi lɛ: Ɓìsii ka wokà ɓì gi di ɓɛ ɓuŋi com kidɛŋ lɛ Kìtɛntɛ̀ɛ̀n ki Nghay.

³ Nni Pol à tɔkà min ɓɔ lɛ: Rìkuu ɗi bàɓtis ɗibe ɗyɛɛ̀ɗi ɓɛ ɓaɓtìghà mìni? Ɓɛ ɓaàg nyi lɛ: Bàɓtis ì Zyaŋ.

⁴ Fɔɔnnɛ Pol à kpaaghà ɓɔ lɛ: Zyaŋ à ɓààɓàɓtìghà ɓumɓɛ ɓɛ lɔɔ̀ghrɛ̀ngà mɛ̀rem, à kakàlì ɓumɓɛ ɓi kìlɔ̀ŋ ki Isirayɛl lɛ, ɓɛ ghɛɛ̀sɛɛ kì gherɛɛ roànɛ à rì nyi ɓiì ɓɔ̀ɓiì, yɛɛlɔɔ lɛ Yeesus.

⁵ Yɛ̀ɛ ɓɛ wokà jɛ̀ɛ̀ ìnɛn, nni ɓɛ ɓaɓtìghà ɓɔ ɓi ɗii ɗi Kan Yeesus.

⁶ Fɔɔnnɛ Pol à saghìghà ɓɔ ɓyàg ɓi nyoo, Kìtɛntɛ̀ɛ̀n ki Nghay ki sɛn yì ɓi ɓɔ, ɓɛ tumɛ̀n ɗìtòg ɗi ɓìkènekènè ɓi ɓitòkì di ɓɛɛ̀ kpaakpaa ɓiɓan ɓi Bɛ̀ll à rèrèsìghà ɓɔ lɛ, ɓɛɛ kpaà.

⁷ Ɓumɓɛ̀n ɓɛ ɓaghà nunùg ɓɛ̀sɛ̀ɛ̀ ǹtɛ̀ɗ ɗì ɓɛɓɛɛ̀.

⁸ Nni Pol à ɗiŋìghà ɓi naà-bɔ̀ŋzɛ̀n, à tòòghrɛ̀n wɔɔ lɛ tɛntɛ̀ɛ̀n, à kurɛ̀ngà rì ɓɔ ɓɛ̀ŋwii ɓɛraa ɓi ɓìɓan ɓi ɓi seesee kìlɔ̀ŋ ki Bɛ̀ll, à kaakàà bee inɛ a ki lɛ ɓumɓɛ ɓɛ wowòkà ɓìtòkì ɓii, ɓɛɛ gherɛn ɓìɓan ɓi à kpaakpààghà.

⁹ Nni yɛ̀ɛ ɓɛ̀ro ɓɛdɛŋ ɓɛ ɓaghà mɛ̀rem mɛ̀tèɗkakɛn ɓɛ̀ kɛɛ̀ kɔ̀n lɛ di ɓaa gherɛɛ, ɓɛ ki feefengì bee ì Kan ɓi mɛ̀reè mɛ ɓum, fɔɔnnɛ Pol à pɛ̀sɛ̀ngà ɓi nyìinyìm wàà, à teɗ ɓɛ̀yilàg à kɛ̀n ɗì ɓɔ jàŋ ìdɛŋ, à kuùkùrɛ̀n ɗì ɓɔ ɓɛ̀ŋwos ɓɛ̀cèm ɓi naà-sùkurì ì Tiranus.

¹⁰ Kìɓan kiǹ ki finɛ̀ngà bèg yiɓɛɛ̀, kɛɛ kighà lɛ, ɓum ɓɛ̀cèm ɓɛ a Azii, à tumɛ̀n lɛ Ɓɛ̀yudɛ̀n à kpaŋ lɛ Gìrɛg, ɓɛ wokà jɛ̀ɛ̀ ì Kan.

¹¹ Fɔɔnnɛ Bɛ̀ll à faghà Pol ìtèɗ wulɛ a kiki dàm yi ɓiɓan yi kuurakɛn,

¹² lèg ànɛ lɛ, ɓum ɓɛ ntekì zyònà yi ɓilàà rì ɓìden ɓi ɓilàà ɓi ɓi komgà nyoo ì Pol, ɓɛ ɓaɓàɓì ɓɛ̀roroɓ miì, tìroɓ tyaa ti wɔnwɔ̀n, ɓìɓeɓtàg ɓi mɛghay ɓi ki kpaŋkpaŋ ɓi ɓumɓɛ̀n.

¹³ Ɓɛ̀yudɛ̀n ɓɛdɛŋ ɓɛ ɓɛ kɛɛ̀kɛ̀ɛ̀ghà jàŋ bimiɗ lɛ ɓɛ ri ɓɛ̀nàɓì-ɓìɓeɓtàg ɓi mɛghay ɓɛ mɛɛ̀ fèèghrɛ̀ngà kì nàɓi ɓìɓeɓtàg ɓi mɛghay rì ɗii ɗi Kan Yeesus, ɓɛ kpaa ɓìɓeɓtàg ɓi mɛghay ɓìn lɛ: Mɛ̀ ǹkpaa mìni ɓi ɗii ɗi Yeesus ànɛ Pol à ti à lààlàmɓɛ̀n lɛ, ɓi kpaŋ̀!

¹⁴ Ɓumɓɛ ɓɛ kikìghà kìɓan kiǹ ɓɛ ɓaghà ɓɔn ɓɛ pìrɛɛtìrɛ̀ àgwey àdɛŋ, muu Ɓɛ̀yudɛ̀n ɗii lɛ, Seva; ɓɛ ɓaghà ɓɛ̀sɛ̀ɛ̀ taàɓɛ̀ɛ̀.

¹⁵ Kìɓeɓtàg ki nghay ki ɓaàg ɓɔ lɛ: Mɛ̀ ǹ-yii Yeesus, ǹki yi ghɛn yɛɛ rì lɛ Pol; nni mìniìɓɔmiɗ, mìnii ri ɓɛ̀ghɛn?

¹⁶ Fɔɔnnɛ ŋwaànɛ à ɓaghà ànɛ̀n rì kìɓeɓtàg ki nghay à sɛngà ɓi ɓɔɔ̀cèm, à cee ɓɔ ɓi-tèɗ, à kì ɓɔ lèg ànɛ lɛ, ɓɛ faŋɗàkày ɓi naa ìnɛ̀n di ɓɛ ti nyoo zɛ̀y, beŋ jàŋ bimiɗ.

¹⁷ Ɓɛ̀yudɛ̀n ɓɛ̀cèm rì Gìrɛg bimiɗ ɓɛ ɓɛ ghɛghɛ̀ɓkà a Efɛɛzɛ, ɓɛ wokà kìɓan kiǹ, ìris wu ɓan ɓɔ ɓɛ̀sɛ̀ɛ̀ ɓɛ̀cèm, fɔɔnnɛ ɓɛ keèkèmzìghà ɗii ɗi Kan Yeesus.

¹⁸ Ɓum lɛɛ̀gwey ɓɛ ɓɛ gherɛ̀ngà ɓɛ yuyùghà kì kpàkpaagh ɓì mis mɛ ɓum, ɓɛ ki rèresi ɓiɓan ɓi ɓeɓtɛn ɓi ɓɛ kighà.

¹⁹ Fɔɔnnɛ kìgwey ki ɓum ki ki kikìghà majìg abɛ̀y, ki yughày rì ɓɛ̀kaàtà ɓaa ɓɛ majìg, ɓɛ tɔ̀n ɓɔ ɓi mis mɛ ɓum ɓɛ̀cèm. Ɓɛ ɓalà lɛ, ɓɛ̀kaàtà ɓɛǹ ɓɛ kpagà bàlì ì mɔ̀ɔ̀ni ɓɛ̀tɔɔsìm mɛ̀tin mɛɓɛɛ̀ rì ǹtɛ̀ɗ.

²⁰ Fɔlɔɔ nnɛ jɛ̀ɛ̀ ì Bɛ̀ll ì kɛ̀nkɛ̀ngà beèbɛ̀y ɗì rìsààsàà ɓi-tèɗ wu Kan.

²¹ Ajɛ̀m ì ɓìɓan ɓiǹ, Pol à ɓekà lɛ a kɛǹ a Yorisalɛm, à ghɛ̀ɛ̀sɛ̀ngà kì syàa zi ì Masedwan rì zi ì Akayi, fɔɔnnɛ à kpaaghà lɛ: Ki ghɛɛ̀sɛɛ lɛ i m̀ɓaa wɔɔ, ǹkɛ̀n girig kì ghɛɛ̀ Rom.

²² Nni à romgà min ɓɔɓti ɓii ɓɛ kisay ɓɛɓɛɛ̀ lɛ, rì Timote rì Erast a Masedwan, nyimiɗ a rɔ̀ɓtì kì ghagsii gàɓ ì mɛ̀ru ɓi kìlànà ki zi ki a Azii kiǹ.

²³ Ɓi cààmɛ̀n kiǹ, ɓɛ ɓigtìghà coo kiyoòyòò ɓi kìɓan ki ki seesee bee ì Kan.

²⁴ Ǹsyaàgh-ìrɛm adɛŋ ɗii lɛ Demetiriyus àa ǹti à syakì ɓɔɔ ɓifèèghrɛnà ɓɛ mɛɛ mɛ bɛ̀ll ìnɛ lɛ Aritemis rì rìkuu ɗi swiɗ ɗi ɓɛɛ̀ kìlag mɔ̀ɔ̀ni mɛ tiraŋ̀ miì, fɔlɔɔ nnɛ à lèlèɓkà ɓɛ̀kìì-ɓìsay ɓii lɛ syeesyee.

²⁵ Nni à taŋzɛ̀ngà lɛ, rì ɓɛ̀kìì-ɓìsay ɓii, rì ɓum ɓɛdɛŋ ɓɛ ɓɛ kikìghà rìkuu ɗi kisay ɗiǹ, à kpaa ɓɔ lɛ: Ɓɔɔsoŋ̀! Ɓì yii lɛ, dìgdìg wìs a rìɓa, à rìì ɓi-rɛm wu ti syasyag wu.

²⁶ Nni ɓi seesèè ɓì ki wowog, yɛ̀ɛ ŋwaànɛ lɛ Pol ànɛ à mɛ kì lɛ, à rèsàg, à ki syoŋ̀ ɓum lɛɛ̀gwey, àa fɛ a Efɛɛzɛ nyi rì nyi, ɓaàyiɓi ɓi ziì Azii bimiɗ. À kpaakpàà lɛ, bɛ̀ll yi ɓum ɓɛɛ kii rì ɓyàg ɓyaa, yi yin Bɛ̀ll.

²⁷ Kìɓan ki ki ɓeɓtɛɛ miì, ki yin lɔŋ lɛ, kìsay kis ki ri ɓiì sòo, ki ri girig lɛ mɛɛ mɛ coo bɛ̀ll yìs i giɓ inɛ lɛ Aritemis mɛ rì ɓiì ghalì com ki zɛy, nsoò rìgwey ɗi bɛ̀ll ìnɛn, ìnɛ ɓɛɛ̀ ɓɔɔɓɔgsì ɓi ziì Azii bimiɗ, rì ziinɛ ǹcèm ɗi ri ɓiì lèegh.

²⁸ Yɛ̀ɛ ɓumɓɛ̀n ɓɛ wokà fɔlɔɔ, bim i kì ɓɔ lɛɛ̀gwey, ɓɛ tumɛ̀n ɗìlààlàmɓɛ̀n jɛ̀ɛ̀ aɗyoo lɛ: Aritemis ànɛ à Efɛɛzɛ à rì mɛ̀nɔ̀ɓɔ̀.

²⁹ Fɔɔnnɛ kìyoòyòò ki kpighà ɓi bàn bimiɗ ɓum ɓɛ̀cèm ɓɛ suùrɛ̀n ɓi naa ìnɛ ɓɛ ǹkìlàg tìcàɓ miì, di ɓɛ mɛ ɓan ɓumɓɛ a Masedwan lɛ rì Gayus, ri Aristarikɛ ɓɛ ɓɛ ǹkɛ̀ɛ̀ghàg ɗì Pol.

³⁰ Pol à kɔ̀nkɔ̀ngà lɛ a rɛli ɓi mis mɛ ɓum wɔ̀lɛ, ɓɛ̀gherɛ̀n ɓɛ reèg lɛ kɛ̀ɛ kì fɔlɔɔ.

³¹ Mɛ̀fòm mɛdɛŋ mɛ a Azii mɛ mɛ ɓaghà mɛ̀ghan mɛ Pol, mɛ romgà nyi jɛ̀ɛ̀ lɛ: Kɛ̀ɛ fèèghrɛn ki yùu ɓi naà-tìcàɓ.

³² Kì ɓaghà lɛ, rì ɓɛ̀roɓɛ ɓɛ syansyàn ɓi rìsyansyàn ɗyaa, ɓɛ̀roɓɛmbog, ɓɔɔ syansyàn ɓi ɗiŋkàà; kìyoòyòò ki ɓaghà lɛɛ̀gwey ɓi gwìy ìnɛn, fɔɔnnɛ kìgwey ki ɓum ki yighà ɓi gi ɓisuucɛ nnɛ ɓɛ taŋzɛ̀ngà.

³³ Nni ɓɛ sɔŋìghày ŋwaàdɛŋ ɓi gwìy inɛn ɗii lɛ Alɛgsaŋdirɛ, lɛ ŋwaànɛ̀n innɛ Ɓɛ̀yudɛ̀n ɓɛ tyɔtyɔ̀kày asu. Fɔɔnnɛ Alɛgsaŋdirɛ ànɛn à maasìghà ɓum rì càg lɛ a toòghrɛn.

³⁴ Wɔ̀lɛ yɛ̀ɛ ɓɛ ghɛngà lɛ muu Ɓɛ̀yudɛ̀n yɛɛ ri, ɓɛ̀sɛ̀ɛ̀ ɓɛ̀cèm lɔŋ jɛ̀ɛ̀ bog, ɓɛ tumɛ̀n rìkpaakpàà jɛ̀ɛ̀ aɗyoo lɛ: Aritemis ànɛ a Efɛɛzɛ à rì mɛ̀nɔ̀ɓɔ̀, ɓɛ ɓiìtàkà kìɓan kìn fɔlɔɔ à kpaŋ nunùg ɓɛ̀hawò ɓɛɓɛɛ̀.

³⁵ Yɛ̀ɛ ǹkanì-ɓɛ̀kaàtà à gɔmìnà à maasìghà ɓum, nni à kpaaghà ɓɔ lɛ: Mìni ɓumɓɛ a Efɛɛzɛ, ghɛn yɛɛ nani lɛ ɓi bàn ì Efɛɛzɛ ìnnɛ mɛɛ mɛ coo bɛ̀ll ì giɓ inɛ lɛ Aritemis mɛ ri, rì kìfèèghrɛnà ki bɛ̀ll ìnɛn ki ki kpighày aɗyòò?

³⁶ Nni yɛ̀ɛ nyoey yi yin ɓi kìɓan kiǹ, ɓì ghɛ̀ɛ̀sɛɛ kì kɔ̀rii lɛ fyòoog, kɛ̀ ɓi swèɗ kiɓan kidɛŋ.

³⁷ Ɓisuulɛ, ɓumɓɛ ɓyàa yùu yì fɛ rì ɓɔ ɓɛ, ɓɛ komi ɓi com ɓi ɓyom ɓi ɓi ri ɓi naà-bɛ̀ll yìs i giɓ, ɓɛ̀ kɛɛ̀ ki tòg yɔ̀ kiɓè.

³⁸ Nni i Demetiriyus rì ɓɛ̀kìì-ɓìsay ɓii ɓɛ ri rì kìɓan kidɛŋ ki ɓɛɛ seèghkɛn ɓɛ raɗ rì ŋwaàdɛŋ, gòn yi ɓɛyɔ̀m yi ri wɔɔ, ɓɛ̀gɔmìnà girig wɔɔ, ŋwaànɛ à rì rì kìɓan ki sɔmɛn, à ghɛ̀ɛ̀sɛɛ kì sɔmɛɛ!

³⁹ I ɓì rì tì rì ɓìɓan ɓidɛŋ ɓi ɓì rì lɛ ɓi tɔg, ɓi ri lɛ ɓɛ pegsɛ̀n ŋwos anɛ ɓɛ̀gɔmìnà ɓɛ taŋzɛɛ kìlɔ̀ŋ.

⁴⁰ Ɓɛ ki rì lɛ ɓɛ sɔmɛ̀n ɓìsi lɛ ti syòŋsyoŋ yi kìyoòyòò ɓi rìtaŋzɛ̀n ɗi tyàa taŋzɛɛ ɗi gɛɛ̀nɛ ɓisuulɛ, tì yin ɗi com ki tì rì lɛ ti kpaa lɛ, ti resi azi anɛ tì rì fɛ miì ɓɛ̀taŋzɛn; lɔŋ yɛ̀ɛ à kpaaghà fɔlɔɔ à kpaa ɓum lɛ ɓɛɛ suki.