MƐ̀KÌKÌÌ MƐ ƁƐKƐ̀NÌ-FÌTOM 18 - Bafia Nouveau Testament

Pol a Kɔrɛŋt

¹ Ajɛ̀m ìnɛn, Pol à pɛ̀sɛ̀ngà à Atɛn à kɛ̀n a Kɔrɛŋt.

² A tuusɛ̀ngà wɔɔ ri muu Ɓɛ̀yudɛ̀n àdɛŋ ɗii lɛ Akilas; ŋwaànɛ̀n à yalɛ̀ngà ɓi kìlànà ki zi ki lɛ Pɔŋ. A pɛ̀sɛ̀ngày a Italii ɓɛɛ̀ Pirisilya à giy, ɓisuulɛ rìfòm ɗi lɛ Kiloodɛ ɗi rengà lɛ Ɓɛ̀yudɛ̀n ɓɛ̀cèm ɓɛ a Rom ɓɛɛ pɛsɛn wɔɔ. Fɔɔnnɛ Pol à ràrɛ̀ngà rì ɓɔ.

³ Yɛ̀ɛ ɓɛ ɓaghà rìkuu ɗi kisay ɗifog, kìsay ki toŋtoŋɛn ɓilaa rì tàpot, nni Pol à kɔ̀rìghà a lɔ̀ŋkaa ɓɛ sasày ǹɗaŋ.

⁴ Gòn yi Saɓàt yìcèm, Pol àa ǹtòòghraagh ɓi naà-bɔ̀nzɛ̀n lɛ à kaakààghà bee lɛ a syoŋ̀ lɛ rì Ɓɛ̀yudɛ̀n rì Gìrɛg.

⁵ Wɔ̀lɛ yɛ̀ɛ Silas rì Timote ɓɛ kpagà a Kɔrɛŋt di ɓɛ pɛsɛɛ yì a Masedwan, Pol à nagà ɓɔɔ ɓisay ɓimbog, à rɔ̀ɓ lɔŋ lɛ a kpaàkpaa ɓum ɓìɓan ɓi Bɛ̀ll, à kakàlì Ɓɛ̀yudɛ̀n à ki sììrɛn lɛ, Yeesus yɛɛ ri Kiris.

⁶ Yɛ̀ɛ Ɓɛ̀yudɛ̀n ɓɛ ɓeèdɛ̀ngà ɓìɓan ɓi Pol à kpaakpààghà, ɓɛ ki sɛmgi nyi, fɔɔnnɛ à sàɗkà kùrùɓu ànɛ à ɓaghà nyi ɓi ɓìlàà à kpaa ɓɔ lɛ: Ì ɓì ɗyaŋi ŋwos yɛ̀ɛ gɛɛ̀nɛ, di zɛ̀ɗ yiǹ ì mìniìɓɔmiɗ, mɛ̀ ǹ-yiìdi miì rì bɛ̀lɛn. Fɔɔnnɛ à tumɛ̀n ɓigomìnɛ, ǹ-yùu kì kɛ̀ɛ a ɓɛ̀roɓɛ ɓɛ yin Ɓɛ̀yudɛ̀n.

⁷ Nni à pɛ̀sɛ̀ngà foo à kɛ̀n a mɛɛ mɛ ŋwaàdɛŋ ànɛ àa ǹɗisàg Bɛ̀ll ɗii lɛ Tityus-Yustus, mɛɛ mii mɛ ɓaghà jàŋbog ɗì naà-bɔ̀ŋzɛ̀n.

⁸ Nsoò fɔlɔɔ, rìfòm ɗi naà-bɔ̀ŋzɛ̀n, ɗii lɛ Kirispus ɗi gherɛ̀ngà Kan, rì rìmɛɛ ɗii ɗicèm, fɔlɔɔ nnɛ ɓumɓɛ a Kɔrɛŋt lɛɛ̀gwey ɓɛ ɓɛ wokà ɓìɓan ɓi Pol ɓɛ gherɛ̀ngà girig, ɓɛ ki ɓàɓtag.

⁹ Ɓi-ru wudɛŋ, Kan à kpaaghà Pol a ɓìdɛ̀ndɛm lɛ: Kɔ̀ɔ risi, kɛ̀na asu rì rìkakàlì ɗi ɓɔlɛ, kɔ̀ɔ mam.

¹⁰ Ɓisuulɛ, ǹɗì wɔ̀ ajɛ̀m, ŋwaàdɛŋ à yin lɛ à saàgh wɔ̀ càg ɓi nyoo lɛ a ki wɔ̀ kìɓe ɓisuulɛ ɓum ɓɛm ɓɛ ronɛɛ fɛ ɓi bàn ìnɛ.

¹¹ Pol à kɔ̀rìghà a Kɔrɛŋt bèg bog rì kìden di a rèresi ɓum ɓìɓan ɓi Bɛ̀ll.

¹² Ɓi mɛ̀ru mɛ Galyɔŋ à ɓaghà gɔmìnà ànɛ ɓi kìlànà ki zi ki lɛ Akayi, Ɓɛ̀yudɛ̀n ɓɛ wɔrɛ̀ngà ɓɔɔ̀cèm, ɓɛ ɓigtì paàzì rì Pol ɓɛ kɛǹ ɗì nyi ɓi naà-ɓɛ̀yɔ̀m.

¹³ Ɓɛ kpaa lɛ: Ŋwaànɛ a tootoòsì, ɓum lɛ ɓɛɛ ɓɔgsi Bɛ̀ll ɓi rìkuu ɗi riɓɔgsì ɗi ɓìdɔ̀gsɛna ɓi reègh.

¹⁴ Lɔŋ yɛ̀ɛ Pol à mɛɛ kìghà lɛ a pini ŋwɔm a toòghrɛn, Galyɔŋ à kpaa Ɓɛ̀yudɛ̀n ɓɛǹ lɛ: Mìni Ɓɛ̀yudɛ̀n! I kaa rì lɛ Pol à woliì mum nsoò lɛ à sɛ̀raaghiì coo kiɓan kidɛŋ, di ǹɗì lɛ ǹkɔ̀rì lɛ fyòoog ǹkonàg tì kì woògh sɔmìnà wìn yɛ̀ɛ ki ghɛɛ̀sɛɛ.

¹⁵ Nni yɛ̀ɛ ki rì lɛ ɓi nyoonyolɛ̀n ɓi dɔgtɛ̀n ìdɛŋ rì ɓi mii mɛdɛŋ, rì ɓi ɓìdɔ̀gsɛna ɓin, mìniìɓɔmiɗ yɛɛ ghɛɛ̀sɛɛ kìpègsɛɛ kiɓan kin; mɛ̀ ǹ-yin lɛ ǹ-yɔ̀m ɓìɓan ɓi fɔlɔɔ.

¹⁶ Fɔɔnnɛ à kpaŋzìghà ɓɔ ɓi naà-ɓɛ̀yɔ̀m.

¹⁷ Nni Ɓɛ̀yudɛ̀n ɓɛǹ ɓɛ̀sɛ̀ɛ̀ ɓɛ̀cèm ɓɛ sɛngà ɓi Sostɛn ànɛ à ɓaghà ǹlàmì naà-bɔ̀ŋzɛ̀n, ɓɛ tumɛ̀n nyi rìɓog ɓi mis mɛ ɓɛyɔ̀mì-ɓìɓan, wɔ̀lɛ rìkì ɗiǹ ɗyɛ̀ kɛɛ̀ yeesi Galyɔŋ nsoò lɛsàg.

Pol à sugtii a Aŋtyos

¹⁸ Pol à kɔ̀rìghà tì a Kɔrɛŋt gàɓ, fɔɔnnɛ à ghesɛ̀ngà ɓɛ̀geni ɓɛ righerɛ̀n, à teɗ min kikɔm lɛ a kɛǹ a Sirii. À kɛ̀ɛ̀zɛ̀ngà rì Pirisilya ɓɛɛ̀ Akilas. Pol à kɛ̀ŋɗɛ̀ngà ǹto à Saŋkire ɓisuulɛ, à càrɛ̀ngà tyòŋ ɓi bɛ̀ɗ idɛŋ ìnɛ ɓɛ ǹɗegi lɛ bɛ̀ɗ i nàziryià.

¹⁹ Yɛ̀ɛ ɓɛ kpagà a Efɛɛzɛ Pol à càɗ Pirisilya wɔɔ ɓɛɛ̀ Akilas, à kɛ̀n ɓi naà-bɔ̀ŋzɛ̀n à tòkì rì Ɓɛ̀yudɛ̀n.

²⁰ Ɓɛ̀roɓɛ̀n ɓɛ tɔg nyi lɛ a kɔri gàɓ ì mɛ̀ru rì ɓɔ, à ɓèn.

²¹ Kìɓan kifog à ghasɛ̀ngà rì ɓɔ, à ki kàg ɓɔ lɛ, à rì ɓiì sugtii yi a lɔ̀ŋkaa ŋwos adɛŋ di Bɛ̀ll à kɔ̀ni. Fɔɔnnɛ à kpaghà lɛ: Ki ghɛɛ̀sɛɛ lɛ, nɗi tìcàɓ ti ti riì ti a Yorisalɛm nsoò kaa ɓaa la. Nni à pɛ̀sɛ̀ngà a Efɛɛzɛ ɓi fìtimà.

²² Yɛ̀ɛ à sɛni fìtimà à Sezare, à ɓɔg kitògsii ǹɗaŋ wu ɓɛgherɛ̀n wu a Yorisalɛm, fɔɔnnɛ à sɛngà min a Aŋtyos.

²³ Yɛ̀ɛ à kɔ̀rìghà wɔɔ gàɓ, nni à pɛ̀sɛ̀ngà tì, à reni zi ì Galasi bimiɗ, à ghaàgh min a Firizii, di a sìisiìràg ɓɛ̀yilàg ɓɛ̀cèm ɓi rìgherɛ̀n.

Rìkɛ̀ɛ̀ ɗi Pol ɗi kiraa ɓi rìghaàghàgsì ɗi Ɓɔlɛ

²⁴ Muu Ɓɛ̀yudɛ̀n àdɛŋ ɗii lɛ Apolos, ànɛ à yalɛ̀ngà a Alɛgsaŋdirii, à kpagà a Efɛɛzɛ. Ŋwaànɛ̀n à kìghà lɛ, à yi rìlɛ̀ŋì ɗi ɓitòkì, à ki yi ɓiɓan ɓi ɓi kaàtà à Bɛ̀ll lɛɛ̀gwey.

²⁵ Ɓɛ ɓaghà di ɓɛ mɛ rèsi nyi bee ì Kan ǹɗem wii wu ki falɛn miì lɛɛ̀gwey. A kakàlìghà ɓum, à ki rèresi ɓɔ ɓìɓan ɓi Yeesus yɛ̀ɛ ki ghɛɛ̀sɛɛ, kìɓan kifog, bàɓtis ì Zyaŋ yɛɛ̀nɛ nyii yighà yɔ̀riyɔ̀.

²⁶ Nni Apolos à tumɛ̀ngà rìtòtòg ɓi naà-bɔ̀ŋzɛ̀n kɛ̀ɛ̀ ìris, yɛ̀ɛ Pirisilya rì Akilas ɓɛ wokà ɓìtòkì ɓii, nni ɓɛ tekà nyi, ɓɛ konàg nyi kì tɛɛ̀zaagh bee inɛ yɛ̀ɛ Bɛ̀ll.

²⁷ Ajɛ̀m ìnɛn, Apolos à fèkà lɛ a kɛǹ a Akayi, ɓɛ̀geni ɓii ɓɛ righerɛ̀n ɓɛ teèsì nyi nyoo lɛ a kɛǹ, ɓɛ ki kàn ɓɛgherɛ̀n ɓɛ wɔɔ lɛ, ɓɛɛ ghaɓ nyi lɛ syeesyee. Yɛ̀ɛ à kpàgà wɔɔ, à ɓaghà rì ǹghɛɓsɛn ɓisuu ɓum ɓɛ̀cèm ɓɛ geesɛ̀n ì Bɛ̀ll ì kìghà lɛ, ɓɛɛ ɓa ɓɛ̀gherɛ̀n,

²⁸ lɛ àa ǹti à ciìzàg Ɓɛ̀yudɛ̀n lɛ kɔɔ̀kɔɔ̀ di ɓɛɛ̀ ǹyoonyolɛ̀n ɓi gwìy. À rèrèsì ɓɔ, di a ɓaaɓaàzì rì kaàtà à Bɛ̀ll lɛ, Yeesus à rì Kiris.