MƐ̀KÌKÌÌ MƐ ƁƐKƐ̀NÌ-FÌTOM 16 - Bafia Nouveau Testament

¹ Nni Pol à kɛ̀ngà kì kpaŋì a Dɛriɓɛ, rì a Listirɛ n-yilàg àdɛŋ à ɓaghà wɔɔ ɗii lɛ Timote, jɛɛ wìì a ɓaghà ǹgherɛ̀n, gɔ̀n ì Ɓɛ̀yudɛ̀n, seŋi muu Gìrɛg,

² ɓɛ̀gherɛ̀n ɓɛ a Listirɛ rì ɓɛ a Ikonyɔm ɓɛ sɛsɛ̀kà nyi.

³ Fɔɔnnɛ Pol à kɔ̀ngà lɛ a teɗ nyi, ɓɛɛ kɛǹ; yɛ̀ɛ à ki tekà nyi, à kɛ̀ɗ nyi, lɛ à rirìsìghà Ɓɛ̀yudɛ̀n ɓɛ ɓɛ ɓaghà wɔɔ, lɛ ɓɛ̀sɛ̀ɛ̀ ɓɛ̀cèm ɓɛ yighà lɛ seŋi Timote à ɓaghà muu Gìrɛg.

⁴ Ɓi bàn yìcèm yi Pol rì Silas ɓɛ ghaghìghà wɔɔ, ɓɛ ghaàghàgsìghà ɓìɓan ɓi ɓɛ̀kɛ̀nì-fìtom rì ɓɛ̀sɛ̀ɛ̀mɛn ɓɛ a Yorisalɛm ɓɛ rengà, ɓɛ ki kpaakpaa ɓum lɛ, ɓɛɛ ɓeŋ̀ ɓìɓan ɓiǹ.

⁵ Ɓìseŋi ɓi mɛ tetèkà ìtèɗ ɓi rìgherɛ̀n, bàlì ì ɓumɓɛ ɓɛ ɓaghà ɓɛ̀gherɛ̀n ì ɓɔɓɔ̀g m̀ɓɔɓɔghɛn ɓɛŋwos ɓɛ̀cèm.

⁶ Yɛ̀ɛ Kìtɛntɛ̀ɛ̀n ki Nghay kì rekà ɓɔ lɛ, ɓɛ̀ kɛɛ̀ ghagsi jɛ̀ɛ̀ ì Bɛ̀ll ɓi kìden ki zi ki a Azii fɔɔnnɛ ɓɛ ghaghìghà bàn ì Firizii, rì zi ì Ɓɛ̀gàlat rì mɛ̀kòò.

⁷ Yɛ̀ɛ ɓɛ kpagà jàŋbog rì Misii, nni ɓɛ kaaghà bee inɛ lɛ ɓɛɛ kɛǹ a Bitinii, kìɓan kifog Nghay à Yeesus kɛ̀ɛ gherɛ̀n.

⁸ Fɔɔnnɛ ɓɛ syaàghà min zi inɛ a Misii, ɓɛ kɛǹ a Tirowas.

⁹ Nni ɓìdɛ̀ndɛm̀ ɓi kighà Pol rì ìru lɛ à ghɛɛ ŋwaànɛ a Masedwan mɛ̀rɛy, à ɓɔ̀ɔ̀ɓɔ̀ŋzàg nyi lɛ: Yu a Masedwan, u ghɛɓsi ɓìsi.

¹⁰ Ajɛ̀m ì ɓìdɛ̀ndɛm ɓi Pol ɓiǹ, nnɛ tì ghàskà kì kaà bee ìnɛ lɛ ti kɛǹ a Masedwan, lɛ tì konàkà kì ghɛɛ̀ lɛ Bɛ̀ll yɛɛ regii ɓìsi lɛ, ti kɛǹ kì kalii Syeesyee à Ɓɔlɛ wɔɔ.

Pol ɓɛ kɛɛ̀ a Masedwan

¹¹ Yɛ̀ɛ tì tekà kìkɔm a Tirowas, tì kɛ̀n lɔŋ kilomì ɓi kìrìŋ ki riɓày ki lɛ, Samotiras, ɓi duri tana tì kɛ̀n a Neyapolis,

¹² wɔɔnnɛ tì pɛ̀sɛɛ, tì kɛ̀n a Filiɓ, ànɛ à rì ǹtonto à bàn ànɛ a Masedwan, à ki ɓa ti bàn ìnɛ ɓumɓɛ a Rom ɓɛ lamìì; tì kɔ̀rìghà ɓi bàn ìnɛn, bàlì ì mɛ̀ru.

¹³ Nni ŋwosì Saɓàt, tì pɛ̀sɛ̀ngà ɓi bàn, tì kɛ̀n ɓi bèn ì ǹsyòm, ɓi jàŋ inɛ tì fèfèkà lɛ Ɓɛ̀yudɛ̀n ɓɛ ɓaghà lɛ ɓɛ ɓa rì naà-bɔ̀ŋzɛ̀n wɔɔ. Yɛ̀ɛ tì kɔ̀rìghà ɓi zi, nni tì tòkàkà rì ɓɛ̀yiɓ ɓɛ ɓɛ ɓaghà wɔɔ ɓɛtaŋzɛn.

¹⁴ Giɓ àdɛŋ à ɓaghà wɔɔ ɗii lɛ Lidyaa àa m̀ɓɔgsàg Bɛ̀ll, à ɓaghà ǹkìì-dùne ì ɓìsyeesyee ɓi ɓilàà ɓi ɓàŋ ɓi bàn ì Tyatiir, à ramgà mɛ̀reè lɛ syeesyee lɛ a wog ɓìtòkì ɓis, fɔɔnnɛ Kan à nɛmgà nyi ǹɗem lɛ a konag kì woògh ɓìtòkì ɓi Pol.

¹⁵ Yɛ̀ɛ ɓɛ ɓaɓtìghà lɛ rì nyi, rì naa yìì i ɓum nni à tɔkà ɓìsi lɛ, ti kɛǹ a mɛɛ mii, à kpaa lɛ: I ɓì ghɛɛ lɛ ǹɗì ǹgherɛ̀n Kan, yùuna kì kɔ̀rii a mɛɛ mɛm̀. Fɔɔnnɛ à sììrɛ̀ngà lɛ ti gherɛn lɛ, ti kɔri à lɔ̀ŋkii.

Ɓɛ piigh Pol ɓɛɛ̀ Silas ɓi naà-zày

¹⁶ Yɛ̀ɛ tì kɛ̀nkɛ̀ngà ŋwos adɛŋ ɓi jàŋ i bɔ̀ŋzɛ̀n, nni tì tulɛ̀ngà rì gɔ̀n ì giɓ idɛŋ ìnɛ ì ɓaghà ɓiì sasali ɓum ɓɛdɛŋ; ì ɓaghà rì kìɓeɓtàg ki nghay, ki ki fafàghà yɔ̀ ìtèɗ wulɛ, yɛ̀ɛ log kì yiì ɓìɓan ɓi ɓi ri ɓiì kìlɛɛ. Fɔɔnnɛ ɓɛ̀masà ɓii ɓɛ fɔ̀nfɔ̀ngà lɛɛ̀gwey ɓi ɓìfyeŋ ɓii ɓiǹ.

¹⁷ Nni ì tumɛ̀ngà ɓìsi rìnɔ̀ɔ̀nɔ̀ɔ̀tì lɛ, rì ɓìsi rì Pol, di yɛ̀ɛ kpaakpaa jɛ̀ɛ̀ aɗyoo lɛ: Ɓumɓɛ ɓɛ ri ɓɛ̀kìì-ɓìsay ɓɛ Bɛ̀ll ànɛ à teŋmɛɛ à cee, ɓɛɛ̀ kakali mini ɓìɓan ɓi ɓi ri lɛ ɓi fa mìni cɛɓ.

¹⁸ Ɓàlì ì mɛ̀ru ì ghaghìghà lɛɛ̀gwey ŋwutyàà giɓ anɛ̀n à kɛ̀nkɛ̀n lɔŋ asu à kpaakpàà fɔlɔɔ. Fɔɔnnɛ bim ì ɓaghà lɛ ì mɛ naasag Pol, à lɔ̀ɔ̀ghrɛ̀n à kpaa kìɓeɓtàg ki nghay ki ki ɓaghà ɓi giɓ anɛ̀n lɛ: Ɓi ɗii ɗi Yeesus Kiris, ǹtɔɔgh wɔ̀ lɛ, u pɛsɛn ɓi giɓ ànɛ. Nni kìɓeɓtàg ki nghay ki ghàskà kì pɛ̀sɛɛ ɓi gom yɔ̀miɗ inɛ̀n.

¹⁹ Yɛ̀ɛ ɓɛ̀masà ɓɛ giɓ anɛ̀n ɓɛ ghɛngà lɛ bee yaà ì rìfɔ̀n ìnɛn ì simɓɛɛ, nni ɓɛ ɓangà lɛ, rì Pol rì Silas, ɓɛ kɛǹ ɗì ɓɔ ɓi jàŋ ì ɓɛ̀yɔ̀m ɓi mis mɛ ɓɛyɔ̀mì-ɓìɓan.

²⁰ Fɔɔnnɛ ɓɛ rɛsìghà ɓɔ ɓi mis mɛ ɓɛyɔ̀mì-ɓìɓan ɓɛ ɓɛ ɓaghà Ɓɛ̀ròmɛŋ ɓɛ kpaa lɛ: Ɓumɓɛ ɓɛ yuu rì kìɓùùsì ɓi bàn yìs, ɓɛncèm ɓɛ ki rì Ɓɛ̀yudɛ̀n;

²¹ ɓɛɛ rèeresàg ɓum ɓìsyɔ̀ɔ̀ ɓidɛŋ, ɓi ɓìsi Ɓɛ̀ròmɛŋ tì yin ri ìtèɗ wulɛ, tì teɗ, nsoò lɛ tì ɗiŋì miì.

²² Fɔɔnnɛ gwìy ì ɓum ìnɛ ì ɓaghà wɔɔ, ì wokà bim ri Pol ɓɛɛ̀ Silas, ɓɛ̀yɔ̀mì-ɓìɓan ɓɛ kpaa lɛ, ɓɛɛ kori ɓɔ ɓìlàà ɓi nyoo ɓɛ ki ɓog ɓɔ kìtòn.

²³ Fɔɔnnɛ ɓɛ ɓaàgh lɛ, ɓɛ mɛ ɓog ɓɔ kìtòn fɔlɔɔ, ɓɛ piìg min ɓɔ ɓi naà-zày, ɓɛ kalì m̀ɓèŋì-naà-zày lɛ, a ɓeŋ ɓɔ, lèg ànɛ lɛ àdɛŋ kɛ̀ɛ ɗim.

²⁴ Yɛ̀ɛ m̀ɓèŋì naà-zày à wokà fɔlɔɔ, à pìg ɓɔ ɓi kìden ki naa ki ki ɓaghà lɔŋ wɔɔ ɓi naà-zày ɓi ɗùùm, à ki pùrag ɓɔ mɛ̀kòò ɓi ɓìɓèg.

²⁵ Di ǹɗem-irù wu ti jàŋbog, Pol rì Silas ɓɛ ɓɔɔ̀ɓɔ̀ŋzàkà Bɛ̀ll, ɓɛ kɛkɛ̀ɛ̀gh tyem ti lɛ ɓɛɛ ɓɔgsi Bɛ̀ll, ɓìmbùŋ ɓimbog ɓi wowòg yɛ̀ɛ ɓɛ kɛkɛ̀ghìghà.

²⁶ Nni zi i ghàskà kì nyɛ̀ŋɗɛɛ ri ìtèɗ lèg ànɛ lɛ mɛɛ mɛ naà-zày mɛ kpikɛ̀ngà, ɓìsìm ɓìcèm ɓi ghas kì ŋwàrɛɛ, bɛn yi ɓimbùŋ ɓìcèm yi fumɓàg.

²⁷ Yɛ̀ɛ m̀ɓèŋì-naà-zày à fòsɛ̀ngày ɓi fìlo, à ghɛn mɛ̀suuna mɛ naà-zày ɓìkpaŋ à sɔ̀ŋìì gàfàg yìì lɛ, a wolɛn ɓisuulɛ à fèfèkà lɛ, ɓìmbùŋ ɓìcèm ɓyaa làngii.

²⁸ Nni Pol à kpaaghà jɛ̀ɛ̀ aɗyoo lɛ: Kɔ̀ɔ kìlɛn com! tì rì fɛ ɓìsi ɓɛ̀sɛ̀ɛ̀ ɓɛ̀cèm.

²⁹ M̀ɓèŋì-naà-zày à tɔg min lɛ ɓɛɛ fa nyi ɗuu; à ɗiŋì rì mɛ̀ree ɓi kìden ki naa, di a nìighniŋdɛ̀n lɛ kpàg-kpàg-kpàg, à kpì Pol ɓɛɛ̀ Silas a mɛ̀kòò;

³⁰ fɔɔnnɛ à kpaŋzìghà ɓɔ, à tɔg ɓɔ lɛ: Ɓɛ̀kan ɓɛ̀m! Cɛ ǹghɛ̀ɛ̀sɛɛ kì kìi ɓisuulɛ mɓa rì cɛɓ?

³¹ Ɓɛ ɓaàg nyi lɛ: Gherɛn Kan Yeesus, fɔɔnnɛ ù rì ɓiì ghɛɛ̀ cɛɓ lɛ rì wɔ̀, rì naa yɔ̀ɔ̀ ì ɓum.

³² Nni ɓɛ kalìghà min nyi Ɓɔlɛ à Kan Yeesus, lɛ rì nyi rì rìmɛɛ ɗii.

³³ Ɓi cààmɛ̀n kɔm̀ kiǹ, nnɛ, m̀ɓèŋì-naà-zày à kɛ̀ngà rì ɓɔ lɛ a soò ɓɔ beŋ yi ɓɛ ɓaghà rì yɔ, fɔɔnnɛ ɓɛ ghàskà kì ɓàɓtii lɛ rì ŋwaànɛ̀n, rì ɓum ɓii ɓɛ̀cèm.

³⁴ Ajɛ̀m ìnɛn nnɛ m̀ɓèŋì-naà-zày à tekà lɛ rì Pol rì Silas, à ɓɔg rì ɓɔ a mɛɛ mii, à fa ɓɔ ɓyom ɓiɗiyɛn, ŋwaànɛ̀n rì naa yìì i ɓum, ɓɛ wokà kìrɔɔ lɛɛ̀gwey, yɛ̀ɛ ɓɛ gherɛ̀ngà Bɛ̀ll.

³⁵ Yɛ̀ɛ duri i tangà, ɓɛ̀yɔ̀mì-ɓìɓan ɓɛ rom yì ɓum lɛ ɓɛɛ kali m̀ɓèŋì-naà-zày lɛ, à caɗ ɓɛ̀-Pol ɓɛɛ ghaàgh.

³⁶ Nni m̀ɓèŋì-naà-zày à kpaaghà Pol lɛ: Ɓɛ̀làmì ɓɛ romiì ɓum lɛ, mɛ̀ ncaɗ mìni, mìnii ghaàgh, nni ɓi cààmɛ̀n ki, kpaŋina min, ɓi kɛǹ lɛ fyòoog.

³⁷ Nni Pol à kalìghà ɓumɓɛ ɓɛ romgày ɓɛǹ lɛ: Ɓɛ̀làmì ɓɛ mɛ kì lɛ, ɓɛ ɓog ɓìsi kìtòn ɓi nyìinyìm à ɓum, di ɓɛ ka yɔmzi ɓi ɓisi, kɔlɛ tì rì girig Ɓɛ̀ròmɛŋ, ɓɛ ki pìg ɓisi ɓi naà-zày nni ɓɛ ti ɓigomìnɛ lɛ, ɓɛɛ kpaŋzi ɓìsi ɓi naà-zày; a rìnyam, èe èe, ɓìsii ɓenì, ɓɔmiɗ ɓɛɛ yu ɓìsi kì kpaŋzii.

³⁸ Nni ɓumɓɛ ɓɛ romgày ɓɛǹ ɓɛ sugtìghà kì kalii ɓɛyɔ̀mì-ɓìɓan jɛ̀ɛ̀ ì Pol ìnɛ̀n, fɔɔnnɛ ìris wu ɓangà ɓɔ yɛ̀ɛ ɓɛ wokà lɛ ɓɛ̀-Pol ɓɛ ri Ɓɛ̀ròmɛŋ.

³⁹ Nni ɓɛ yughà ɓɔ kì tɔɔ̀gh rìcenɛ̀n, ɓɛ kpaŋzì ɓɔ ɓì naà-zày, ɓɛ ki ɓɔ̀ŋzag ɓɔ lɛ ɓɛɛ pɛsɛn ɓi bàn ìnɛn.

⁴⁰ Yɛ̀ɛ Pol rì Silas ɓɛ kpagày naà-zày ɓɛ kɛǹ yɛ̀ɛ Lidyaa, ɓɛ ghɛn ɓɛ̀geni ɓaa ɓɛ rìgherɛ̀n, ɓɛ teèsì ɓɔ nyoo, ɓɛ ghaàgh min.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan