MƐ̀KÌKÌÌ MƐ ƁƐKƐ̀NÌ-FÌTOM 14 - Bafia Nouveau Testament

Pol ɓɛɛ̀ Ɓarinaɓas a Ikonyɔm

¹ A Ikonyɔm, Pol ɓɛɛ̀ Ɓarinaɓas ɓɛ ɗiŋìghà girig ɓi naà-bɔ̀ŋzɛ̀n ì Ɓɛ̀yudɛ̀n, ɓɛ kurɛ̀n rì ɓum, lèg ànɛ lɛ Ɓɛ̀yudɛ̀n lɛɛ̀gwey rì ɓumɓɛ ɓɛ ɓaghà ɓi Ɓɛ̀yudɛ̀n ɓɛ gherɛ̀ngà Bɛ̀ll.

² Kìɓan kifog, ɓɛ ɓɛ ɓengà dɔgtɛ̀n ì Pol, ɓɛ toosìghà ɓum ɓɛ zɛy lɛ ɓɛɛ ɓa rì ɓìɓeɓtàg ɓi mɛyitì ɓi ɓɛg ànɛ a ɓɛ̀geni ɓis ɓɛ righerɛ̀n.

³ Pol ɓɛɛ̀ Ɓarinaɓas ɓɛ finɛ̀ngà a Ikonyɔm lɛɛ̀gwey, ɓɛ ɓaghà rì coo ǹtyweeyi ri Kan ɓi ɓìɓan ɓi ɓɛ kpaakpààghà, fɔɔnnɛ à fafàghà ɓɔ ìtèɗ wulɛ, ɓɛɛ, kiki lɛ rì dàm, rì ɓɛ̀koŋnyoo ɓɛ ɓiɓan, à kì fɔlɔɔ lɛ a siìrag ɓìɓan ɓi ɓɛ kpaakpààghà ɓi komkòm geesɛ̀n yìì.

⁴ Fɔɔnnɛ ɓumɓɛ ɓi bàn ìnɛn ɓɛ lanɛ̀ngà gàɓ yiɓɛɛ̀ lɛ, ɓɛ̀roɓɛ ɓɛ sug jɛ̀m ɗì Ɓɛ̀yudɛ̀n, ɓɛmbog ɓɛ sug jɛ̀m ɗi ɓɛ̀kɛ̀nì-fìtom ɓɛ Yeesus.

⁵ Nni yɛ̀ɛ ɓumɓɛ zɛy, rì Ɓɛ̀yudɛ̀n, rì ɓɛ̀làmì ɓaa ɓɛ peèghpègsɛ̀ngà lɛ ɓɛɛ ki ɓɔ ǹtɔɓ, ɓɛ rogì ɓɔ gɔ̀g,

⁶ Pol ɓɛɛ̀ Ɓarinaɓas ɓɛ ɓaghà lɛ ɓaa ghɛn fɔlɔɔ, ɓɛ kaa bee inɛ lɛ ɓɛɛ ghɛŋi kì nyàmzɛɛ a Likawonii rì a Listirɛ, rì a Dɛriɓɛ rì ɓi jàŋ yidɛŋ yi yi ɓaghà wɔɔ jàŋbog.

⁷ Fɔɔnnɛ ɓɛ ghagsìghà Syeesyee à Ɓɔlɛ wɔɔ ɓi jàŋ yiǹ.

Pol ɓɛɛ̀ Ɓarinaɓas ɓi bàn ìnɛ lɛ, Listirɛ

⁸ Ŋwaàdɛŋ yɛɛ ɓaghà kìwɔ̀g a Listirɛ. A rɔ̀ɓkà kìsɛkɛ̀rɛ̀ à tumɛn a rìyalɛ̀n ɗii, nsoò ŋwos adɛŋ, ŋwaànɛ̀n à fèèghrɛ̀ngà ɓi kirɛlii mɛrɛy, à ɓày ìkòò.

⁹ Nni ŋwos adɛŋ ànɛ ŋwaànɛ̀n à wowòkà di Pol à tòtòg, fɔɔnnɛ Pol à pɛɓsɛ̀ngà nyi, à fiɓì nyi lɛ fyɛɛɛyi à ghɛn lɛ ŋwaànɛ̀n à ɓaghà ɗì ǹtyweeyi lɛ a wɔɔ̀zi nyi.

¹⁰ Nni à kpaaghà ŋwaànɛ̀n jɛ̀ɛ̀ aɗyoo lɛ: Pɛ̀sɛn aɗyoo, u rɛli mɛrɛy wɛ̀ɛmiɗ. Fɔɔnnɛ ŋwaànɛ̀n à pɛ̀sɛ̀ngà aɗyoo lɛ fàtweɗ, à ghagsɛ̀n ɗì rìkɛ̀ɛ̀.

¹¹ Yɛ̀ɛ gɛ ɓum ànɛ à ɓaghà wɔɔ a ghɛngà kìɓan ki Pol à kìghà kiǹ, nni ɓɛ làmɓɛ̀ngà jɛ̀ɛ̀ aɗyoo ɓi kìtòkì ki ɓumɓɛ a Likawonii lɛ ɓɛ̀y yidɛŋ yɛɛ yuù yì a lɔ̀ŋkaa, ɓi nghay wu ɓum.

¹² Nni ɓɛ roòghà Ɓarinaɓas ɗii ɗi ɓɛ̀y ìnɛ lɛ Zes, ɓɛ ròò Pol ɗii lɛ Ɛrmɛs, ɓisuulɛ nnyɛɛ totòkà.

¹³ Nni pìrɛɛtìrɛ̀ à ɓɛ̀y ìnɛ lɛ Zes, inɛ naa yìì i ɓaghà ɓi rìɗigì ɗi ɓi bàn, à yughà rì ɓɛ̀lem ɓɛ ɓɛ̀sanìnya ɓɛ̀rɛ̀gakɛn ri zyònà yi ɓilàà lɛ ɓɛ ɓaghà jɛ̀ɛ̀ bog rì ɓum ɓɛmbog ɓɛ̀cèm lɛ ɓɛɛ funɛn ɓìtuwe ɓiǹ, ɓɛɛ ɓɔgsi ɓɛ̀y yi yi yughà a lɔ̀ŋkaa, yi lɛ rì Ɓarinaɓas rì Pol.

¹⁴ Yɛ̀ɛ ɓɛ̀kɛ̀nì-fìtom ɓɛ lɛ, rì Pol rì Ɓarinaɓas ɓɛ ghɛngà fɔlɔɔ, nni ɓɛ ghaskàkà ɓìlàà ɓyaa ɓɛ tɔy ɓi gwìy di ɓɛɛ̀ kpaakpaa jɛ̀ɛ̀ aɗyoo lɛ:

¹⁵ Ɓi kìki fɔlɔɔ lɛ la? Ɓìsii ri girig ɓum lɔŋ yɛ̀ɛ mìni. Syeesyee à Ɓɔlɛ ànɛ ti ghaaghagsì mìni à ri lɛ, ɓi caɗ rìɓɔgsì ɗi ɓinùn ɓi zɛy rì zɛy, ɓi lɔɔ̀ghrɛn yɛ̀ɛ Bɛ̀ll ànɛ à rì cencem, ànɛ à kìghà lɛ rì ɗyoo rì zi, rì rìɓày à kìkòn ɗì ɓyom ɓìcèm ɓi ɓi ri miì.

¹⁶ Ɓi gbàà yi ajɛ̀m, Bɛ̀ll à càɗkà lɛ ɓìlɔ̀ŋ ɓìcèm ɓyɛɛ nɔɔ̀nɔ̀ɔ̀tì bee yi ɓi kɔni lɛ ɓyɛɛ nɔɔ̀ti.

¹⁷ Nsoò fɔlɔɔ, à rèrèsìghà lɔŋ riɓa ɗii, ɓi ɓìrɔɔ ɓi à kìkìghà ɓum, à ti à nɔsàg mìni bwey, à kì lɛ, ɓìɗilàg ɓyɛɛ ɗiŋi mìni, à fa mìni ɓyom ɓiɗiyɛn lɛɛ̀gwey, à ki roòzi mɛrem min ɗi kìnyàà.

¹⁸ Rì ǹtɔɓ lɛɛ̀gwey ìnnɛ rìkpaa ɗyaa ɗiǹ ɗi ki rèkà gwìy ì ɓum ìnɛ̀n lɛ, yɛ̀ kɛɛ̀ fùnɛn ɓìtuwe ɓisu waa.

¹⁹ Ɓɛ̀yudɛ̀n ɓɛdɛŋ ɓɛ pɛsɛ̀ngày a Aŋtyos ànɛ a Pisidii rì a Ikonyɔm, ɓɛ syoŋ gwìy ì ɓum ɓi gàm yàà, ɓɛ rogì Pol gɔ̀g ɓɛ syòŋ nyi, ɓɛ kɛǹ nyi kì naŋì ɓi nwɔŋì wu bàn lɛ ɓɛ fefèkà lɛ à mɛ wu.

²⁰ Wɔ̀lɛ yɛ̀ɛ ɓɛ̀yilàg ɓɛ taŋzɛ̀ngà nyi à nyoo, à pɛ̀sɛ̀n aɗyoo, à sugtì kì ɗiŋii ɓi bàn. Ɓi duri tana, ɓɛ kɛ̀ngà a Dɛriɓɛ ɓɛɛ̀ Ɓarinaɓas.

Ɓɛ̀-Pol ɓɛ sugtii a Aŋtyos ànɛ a Sirii

²¹ Yɛ̀ɛ Pol ɓɛɛ̀ Ɓarinaɓas ɓɛ ghagsìghà Syeesyee à Ɓɔlɛ ɓi bàn ìnɛ lɛ Dɛriɓɛ, ɓɛ ki syòŋ ɓum wɔɔ lɛɛ̀gwey, fɔɔnnɛ ɓɛ sugtìghà a Listirɛ, rì a Ikonyɔm, rì a Aŋtyos ànɛ a Pisidii.

²² Ɓɛ fafàghà ɓɛ̀gherɛ̀n ɓɛ wɔɔ itèɗ ɓi ǹɗem ɓɛ rerèɓ ɓɔ lɛ, ɓɛɛ siìrɛn ɓi rìgherɛ̀n, di ɓɛɛ̀ kpaakpaa lɛ: Ki ghɛɛ̀sɛɛ lɛ, ti ka wog mɛtɔɓ lɛɛ̀gwey ɓi ɗi lɛ ti ɗiŋi ɓi kìlɔ̀ŋ ki Bɛ̀ll.

²³ Nni ɓɛ rɛsàkà ɓɛ̀sɛ̀ɛ̀mɛn ɓi naa yi Bɛ̀ll yìcèm yi wɔɔ. Fɔɔnnɛ ɓɛ ɓaghà lɛ, i ɓaa cèli ɓiɗilàg, ɓɛ ɓɔŋzì Bɛ̀ll, ɓɛ reɓsɛ̀n min ɓɔ rì Kan ànɛ ɓumɓɛ̀n ɓɛ saghìghà ǹtyweeyi waa ɓi nyi.

²⁴ Fɔɔnnɛ ɓɛ ceeghà ɓi kiden ki zi ki lɛ Pisidii, ɓɛ kɛǹ kì kpaŋì a Paŋfilii.

²⁵ Ɓɛ mɛ ghagsi Ɓɔlɛ à Bɛ̀ll a Pɛrizɛ, ɓɛ sɛn min a Atalii.

²⁶ Wɔɔnnɛ ɓɛ teri min kikɔm lɛ, ɓɛɛ kɛǹ a Aŋtyos ànɛ ɓɛ pɛsɛ̀ngày wɔɔ, jàŋ inɛ ɓɛ reɓsɛ̀ngà ɓɔ rì Bɛ̀ll à geesɛ̀n, ɓisuu kisay ki ɓɛ kighày kiǹ.

²⁷ Yɛ̀ɛ ɓɛ kpagà a Aŋtyos, ɓɛ taŋzɛ̀n ɓɛ̀gherɛ̀n ɓɛ ɓi kìseŋi ki wɔɔ, ɓɛ kpaa ɓɔ ɓìɓan ɓìcèm ɓi Bɛ̀ll à faghà ɓɔ ìtèɗ wulɛ ɓɛɛ kikì, à ɓiisɛ̀n rìnɛm ɗi à nɛmgà ɓum ɓɛ zɛy bee inɛ ɓɛɛ gherɛn girig nyi.

²⁸ Fɔɔnnɛ ɓɛ kɔrìghà gàɓ ì mɛ̀ru rì ɓɛ̀gherɛ̀n.