MƐ̀KÌKÌÌ MƐ ƁƐKƐ̀NÌ-FÌTOM 11 - Bafia Nouveau Testament

Pyɛɛri a tɛɛ̀zii ɓɛ̀gherɛ̀n ɓɛ a Yorisalɛm ɓisuucɛ nnɛ à kɛ̀ngà a Sezare

¹ Ɓɛ̀kɛ̀nì-fìtom rì ɓɛ̀geni ɓaa ɓɛ righerɛ̀n ɓɛ ɓɛ kɔkɔ̀rìghà a Zyude ɓɛ wokà lɛ, ɓumɓɛ ɓi mɛ̀kuu mɛm̀bog ɓɛ ǹghàɓi girig jɛ̀ɛ̀ ì Bɛ̀ll.

² Yɛ̀ɛ Pyɛɛri à sugtìghà kì ɓɔɔ̀gh a Yorisalɛm, ɓɛ̀gherɛ̀n ɓɛ ɓɛ ɓaghà Ɓɛ̀yudɛ̀n ɓɛ tumɛ̀n nyi rìɓɛ̀ɓɛ̀y.

³ Ɓɛ kpaakpàà lɛ: Wɔ̀ɔ nɗiŋii ɓi naa yi ɓumɓɛ ɓɛ yin Ɓɛ̀yudɛ̀n, ù ki ɗi ǹɗaŋ ri ɓɔ?

⁴ Fɔɔnnɛ Pyɛɛri à tumɛ̀ngà ɓɔ rìtɛɛ̀zì ɗi kiɓan ki à ghɛngà kìcèm, à kpaa ɓɔ lɛ:

⁵ Yɛ̀ɛ mɛ̀ɛ ǹɗì ɓi bàn ì Zyope di nkìki bɔ̀ŋzɛ̀n, nni ki nkìi mɛ̀ yɛ̀ɛ ɓìdɛ̀ndɛm lɛ: ǹghɛɛ rìkuu ɗi coo sànjà kì sugakɛn ɓi mɛ̀keɓ mɛ kinìn aɗyoo, ki yuyùy mɛ̀ a nyòò.

⁶ Nni yɛ̀ɛ ǹkonaagh kì sìŋii sànjà àncèm, ǹghɛn miì ɓi ɗùm lɛ: Rì nyàm yi ɓi ziinɛ yi yi ri mɛ̀kòò mɛnin, rì nyàm yi ɓi cog, rì yi wɔwɔghɛn ɗì ɗùm, rì tììlì ti aɗyòò.

⁷ Nni nwokì, di jɛ̀ɛ̀ ìdɛŋ yɛ̀ɛ kpaakpaa mɛ lɛ: Pyɛɛri wɔ̀! Pɛ̀sɛn aɗyoo, u wey nyàm bogtɛ̀n ɓi nyàm yi, u ɗi.

⁸ Fɔɔnnɛ m̀pɛ̀ɛ̀zìghà lɛ, àg! Kan, ɓi cɛɓ kɛ̀m kìcèm, ǹka fogà ɓi com ki ki ri kìcèlì, nsoò lɛ ki ki ri kìsyeg ɓi ŋwɔm wɛ̀m.

⁹ Nni jɛ̀ɛ̀ ìnɛn i kpaatìghà ɓi gɛ̀n i kìɓɛ̀ɛ̀ lɛ, com kìcèm ki Bɛ̀ll à kpaa lɛ ki rì kìtɛnɛn, wɔ̀ kɔ̀ɔ kpaa lɛ, ki ri rì kìsyeg.

¹⁰ Yɛ̀ɛ ki ɓiìtɛɛ fɔlɔɔ gɛ̀n yiraa, nni sànjà à sugtìghà kìɓɔɔ̀gh aɗyoo rì ɓyom ɓìn.

¹¹ Ajɛ̀m ìnɛn nnɛ ɓumɓɛ a Sezare ɓɛ̀sɛ̀ɛ̀ ɓɛraa ɓɛ peetɛ̀ngày a mɛɛ mɛ m̀ɓaghà wɔɔ, lɛ ɓɛ romiì ɓɔ a lɔ̀ŋkɛm̀.

¹² Nni Nghay à Bɛ̀ll à kpaaghà mɛ̀ lɛ: Sugtɛn ɗì ɓɔ, kɔɔ̀ foŋ tikàna. Ɓɛ̀geni ɓɛ̀m ɓɛ ɓɛ ri ɓɛ, ɓɛ kɛǹ mɛ̀ kìfoŋì a Sezare, tì ɗiŋì ɓi naa ì Kɔrinɛy.

¹³ Kɔrinɛy à tumɛ̀n ɓìsi rìkpaa yɛ̀ɛ à ghɛngà di ŋwaà-fìtom a Bɛ̀ll à yùu a mɛɛ mii, à kpaa nyi lɛ: Rom ɓum a Zyope, lɛ ɓɛɛ reŋiì Simɔn ànɛ ɓɛ ti ɓɛ kpɔgì lɛ Pyɛɛri

¹⁴ nyɛɛ ri wɔ̀ ɓiì kpaa ɓìɓan ɓi ɓi ri ɓiì ghɛɓsii lɛ, rì wɔ̀, rì naa yɔ̀ɔ̀ ì ɓum bimiɗ

¹⁵ Lɔŋ yɛ̀ɛ m̀mɛɛ̀ pinìghà ŋwɔm lɛ ǹtoòghrɛn, Kìtɛntɛ̀ɛ̀n ki Nghay ki sɛn yì ɓi ɓɔ, lɔŋ yɛ̀ɛ ki sɛngày girig ɓi ɓìsi a rìtumɛ̀n.

¹⁶ Fɔɔnnɛ mɛ̀ɛ ǹ-yitii min jɛ̀ɛ̀ ìnɛ Kan à kàlìghà lɛ: Zyaŋ à ɓàtìghà rì mɛ̀nig, wɔ̀lɛ ɓi ɓɛg ànɛ a lɔ̀ŋkin, ɓì rì ɓiì ɓàɓtɛɛ ri Kìtɛntɛ̀ɛ̀n ki Nghay.

¹⁷ Yɛ̀ɛ Bɛ̀ll à mɛ fa ɓɔ com ki à faghà ɓìsi ɓɛ tì gherɛ̀ngà Yeesus Kiris, nni mɛ̀ɛnɛ ghɛn anɛ ǹɗì lɛ, ǹkì rìkì ɗidɛŋ?

¹⁸ Yɛ̀ɛ ɓɛ wokà ɓitòkì ɓiǹ, nnɛ ɓɛ kɔrìghà lɛ fyòoog, ɓɛ tumɛ̀n ɗìkemzì ɗi Bɛ̀ll di ɓɛɛ̀ kpaakpaa lɛ: Bɛ̀ll à mɛ nɛm girig ɓumɓɛ ɓi mɛ̀kuu mɛm̀bog bee inɛ lɛ, ɓɛɛ lɔɔ̀ghrɛn mɛ̀rem, di ɓɛɛ ɓa rì cɛɓ.

Ɓɛ̀gherɛ̀n ɓɛ ɓi bàn ìnɛ lɛ Aŋtyos

¹⁹ Ǹtɔɓ wu ɓɛ tɔtɔ̀ɓkà ɓɛ̀gherɛ̀n ɓi cààmɛ̀n ki ɓɛ wolà Ityɛn, wu kìghà lɛ ɓɛ̀gherɛ̀n ɓɛɛ saàtɛn. Fɔɔnnɛ gàɓ ìdɛŋ ì kɛ̀ngà a Fenisii, rì ɓi kìrìŋ ki riɓày ki lɛ Siipirɛ, rì a Aŋtyos, kìɓan kifog, lɔŋ Ɓɛ̀yudɛ̀n ɓɔ rì ɓɔ ɓɛɛ̀ɓɛ ɓɛ kpaakpààghà jɛ̀ɛ̀ ì Bɛ̀ll.

²⁰ Nni gàɓ ì ɓɛ̀gherɛ̀n ìdɛŋ ìnɛ ì ɓaghà lɛ, rì ɓumɓɛ a Siipirɛ, rì ɓumɓɛ a Sirɛn, ɓɛ kɛngà a Aŋtyos, ɓɔɔ totòkà girig rì ɓumɓɛ ɓɛ ɓaghà Gìrɛg, ɓɛ kpaakpaa ɓɔ Syeesyee à Ɓɔlɛ à Kan Yeesus.

²¹ Ìtèɗ wu Kan wu ɓaghà rì ɓɔ, kɛɛ kighà ɓum lɛɛ̀gwey lɛ ɓɛɛ lɔɔ̀ghrɛn mɛ̀rem, ɓɛɛ gherɛn Kan.

²² Yɛ̀ɛ ɓumɓɛ ɓi kìseŋi ki a Yorisalɛm ɓɛ wokà gom ì kìɓan kiǹ, fɔɔnnɛ ɓɛ romgà Ɓarinaɓas a Aŋtyos.

²³ Nni yɛ̀ɛ à kpagà wɔɔ, à ghɛn yɛ̀ɛ geesɛ̀n ì Bɛ̀ll ì rèsɛ̀ngà a ɓɛ̀gherɛ̀n ɓɛǹ, à nyààrɛ̀n, à ki toni ɓɔ lɛ: Sììrɛɛna lɔŋ ɓi Kan Yeesus, rì mɛ̀rem min mɛcèm.

²⁴ Ɓi saaɗ, Ɓarinaɓas à ɓaghà syeesyee à mum, ǹɗonɛn ɗi Kìtɛntɛ̀ɛ̀n ki Nghay, à ki gherɛn Bɛ̀ll lɛɛ̀gwey, fɔɔnnɛ ɓàlì ì ɓum lɛɛ̀gwey ì nɔ̀ɔ̀tìghà Kan.

²⁵ Nni Ɓarinaɓas à kɛ̀ngà min a Tarisi, à teɗ yì Sol.

²⁶ Yɛ̀ɛ à tanɛ̀ngà nyi wɔɔ, ɓɛ kɛǹ a Aŋtyos ɓɔɔ̀cèm ɓɛ kɔrì wɔɔ bimiɗ à bèg, ɓɛ sasày bas rì kìseŋi ki wɔɔ, ɓɛ ki rèrèsàkà coo bàlì ì ɓum ɓìɓan ɓi Bɛ̀ll. Nni wɔɔ a Aŋtyos nnɛ ɓɛ tɔmgà kì ròo ɓɛ̀yilàg ɗii ɗi lɛ ɓɛ̀kìristɛ̀n.

Agaɓus à kalii kìɓan ki zày ìnɛ ìrì ɓiì kìi

²⁷ Ɓi cààmɛ̀n kiǹ, ɓɛ̀kpaŋzì-ɓìɓan ɓɛ pɛsɛ̀ngày a Yorisalɛm, ɓɛ sɛn a Aŋtyos.

²⁸ Fɔɔnnɛ, kìbog ki ɓi ɓɔ, ɗii lɛ Agaɓus, ki pɛsɛ̀ngà aɗyoo, ki kalì ɓum rì ìteɗ wu Kitɛntɛ̀ɛ̀n ki Nghay lɛ, coo zày ì rì ɓiì kìi ɓi zi bimiɗ wɔ̀lɛ ì ki kìghà, ɓi cààmɛ̀n ki Kiloodɛ à ɓaa rìfòm.

²⁹ Nni ɓɛ̀gherɛ̀n ɓɛ rengà lɛ, mum bimiɗ ànɛ ɓi ɓɔ, a syɔɔ̀ gàɓ ì com ìnɛ à rì lɛ à ghɛn, lɛ ɓɛɛ ghɛɓsi ɓɛ̀geni ɓaa ɓɛ ɓɛ ɓaghà a Zyude miì.

³⁰ Yɛ̀ɛ ɓɛ kighà fɔlɔɔ, nni ɓɛ romgà min Sol ɓɛɛ̀ Ɓarinaɓas rì ɓyom ɓìn lɛ, ɓɛɛ kɛǹ ɓyɔ kì faà rì ɓɛ̀sɛ̀ɛ̀mɛn ɓɛ a Zyude.