MƐ̀KÌKÌÌ MƐ ƁƐKƐ̀NÌ-FÌTOM 10 - Bafia Nouveau Testament

Kɔrinɛy à gherɛɛ Yeesus

¹ Ŋwaàdɛŋ à ɓaghà a Sezare ɗii lɛ Kɔrinɛy, à kɔ̀mɛ̀ngà ɓɛ̀sujàà mɛ̀tin mɛtaǹ ɓi ǹɗaŋ wu ɓɛsujàà wu a Italii.

² Ŋwaànɛ̀n à falɛ̀ngà ɓi ɓìɓan ɓi righerɛ̀n, àa nki risàg Bɛ̀ll lɛ rì nyi ɗì rìmɛɛ ɗii ɗicèm, à ki fafa Ɓɛ̀yudɛ̀n ɓɛ ɓɛ ɓaghà nyìighnyìg ɓyom lɛɛ̀gwey, à ɓɔ̀ɔ̀ɓɔ̀ŋzàg Bɛ̀ll ɓyààmɛ̀n ɓìcèm.

³ Ŋwos adɛŋ, di mɛ̀kɛ̀ɛ̀ mɛraa à ŋwos ǹkɛ̀nɛn à tiì, Kɔrinɛy à ghɛngà lɔŋ yɛ̀ɛ ɓìdɛ̀ndɛm di ŋwaà-fìtom a Bɛ̀ll à ɗiŋii yì a lɔ̀ŋkii, à kpaa nyi lɛ: Kɔrinɛy wɔ̀!

⁴ Nni à fiɓìghà ŋwaà-fìtom lɛ fyɛɛɛyi, à risì, à tɔg nyi lɛ: La yɛɛ ri Kan? Ŋwaàfìtom a ɓàg nyi lɛ: Bɛ̀ll àa ǹghàɓi lɛ, rì bɔ̀ŋzɛ̀n yɔɔ, rì gɛ ɓyom ànɛ ù ti ù fafà ɓum ɓɛ nyìighnyìg, fɔɔnnɛ à ɗimzɛɛ ɓi wɔ.

⁵ Rom ɓum a Zyope ɓigomìnɛ, lɛ ɓɛɛ kɛǹ kì terìì ŋwaàdɛŋ wɔɔ, ɗii lɛ Simɔn ànɛ ɓɛɛ kpɔgi tì lɛ Pyɛɛri.

⁶ À kɔ̀kɔrii yɛ̀ɛ ŋwaàdɛŋ lɛ Simɔn ǹkìì-gòò ànɛ à toŋi ɓi nwɔŋì wu rìɓày à kìkòn.

⁷ Lɔŋ yɛ̀ɛ ŋwaà-fìtom ànɛ à tòtòkà ɗì nyi à ghaghìghà, Kɔrinɛy à ghàs kì reŋii ɓɛ̀kìì-ɓìsay ɓii ɓɛɓɛɛ̀ rì kìbog ki ɓi ɓɛ̀sujàà ɓɛ à làmìghà, sujàà ànɛ̀n à ɓaghà ǹfalɛn ɓi rìgherɛ̀n;

⁸ fɔɔnnɛ à kpaaghà ɓɔ kìɓan kicèm ki ki ghaghìghà à ki rom min ɓɔ a Zyope.

⁹ Ɓi duri tana, yɛ̀ɛ ɓumɓɛ̀n ɓɛ kɛnkɛ̀ngà, di ɓɛ mɛ wuɓsɛn bànì Zyope, Pyɛɛri à ɓɔkà kì kìi bɔ̀ŋzɛ̀n ɓi mɛɛ aɗyoo di toroɓ à ti jàŋbog.

¹⁰ Nni zày ì kɔ̀ngà Pyɛɛri, à kɔ̀n lɛ a ɗi com; ɓi cààmɛ̀n ki ɓɛ kikìghà nyi ɓìɗilàg, nnɛ à sìgmɛ̀ngà di à mɛ cɛɛnɛn mis ɓìkpaŋ.

¹¹ À ghɛngà ɗyoo ɗì nɛmɓɛn à ki ghɛn di com ki riì wɔɔ fɛlɛ yɛ̀ɛ coo sànjà ànɛ à rì mɛ̀keɓ mɛsugakɛn, ki sɛnsɛ̀n yì ɓi zi.

¹² Ɓyom ɓi ɓaghà ɓi sànjà ànɛn lɛ: Nyàm yi kɛ̀ɛ̀kɛɛyɛn mɛkòò mɛnin mɛ̀kuu mɛ̀cèm, rì yi wɔwɔghɛn ɗì ɗùm, rì tììlì ti aɗyoo mɛ̀kuu mɛ̀cèm.

¹³ Pyɛɛri à wog di jɛ̀ɛ̀ ìdɛŋ yɛ̀ɛ kpaakpaa nyi lɛ: Pyɛɛri! Pɛ̀sɛn aɗyoo, ù wey nyam foo bog di u ɗi.

¹⁴ Nni Pyɛɛri à ɓàkà lɛ: Àg, Kan! Mɛ̀ ǹka ɗighà ɓi com ki ki ri ɓaa, nsoò ki ki ri kìsyeg ŋwos adɛŋ.

¹⁵ Fɔɔnnɛ jɛ̀ɛ̀ ìnɛn ì kpaatìghà nyi ɓi gɛ̀n i kìɓɛ̀ɛ̀ lɛ: Kɔ̀ɔ kì lɛ: Com ki Bɛ̀ll à kpaa lɛ ki ri kɛ̀ɛ̀ kìsyeg, wɔ̀ɔ̀ kpaa lɛ, ki ri rì kìsyeg.

¹⁶ Kìɓan kiǹ ki ɓiìtɛ̀ngà fɔlɔɔ gɛ̀n yiraa, ajɛ̀m ìnɛn nnɛ sànjà ànɛn à sugtìghà kì ɓɔɔ̀gh aɗyòò.

¹⁷ Cààmɛ̀n ki Pyɛɛri à kaakaa lɛ, a yi azi anɛ ɓi kìɓan ki à ghɛngà kiǹ, kɛɛ̀ki ɓumɓɛ Kɔrinɛy à romgày ɓɛ tɔtɔghiì mɛɛ mɛ Simɔn, ɓɛ yu, ɓɛ rɛlì asuunaa,

¹⁸ ɓɛ regì ɓum, ɓɛ tɔg ɓɔ lɛ: A mɛɛ mɛ innɛ Simɔn ànɛ ɓɛ ti ɓɛ kpɔgì lɛ Pyɛɛri à kɔ̀kɔrii wa?

¹⁹ Yɛ̀ɛ Pyɛɛri à ɓaghà lɔŋ ɓiì fèfeegh kìɓan ki à ghɛngà, nni Nghay à Bɛ̀ll à kpaaghà nyi lɛ: Wɛɛ̀ nnɛ ɓum ɓɛɛ tɔtɔg lɛ ɓɛ̀sɛ̀ɛ̀ ɓɛraa.

²⁰ Pɛ̀sɛn, u sɛn ɓi zi, ù kɛǹ rì ɓɔ, kɔ̀ɔ risi, ɓisuulɛ mɛ̀ yɛɛ nɗomiì ɓɔ.

²¹ Fɔɔnnɛ Pyɛɛri à sɛngà min, à tanɛ̀n ɓumɓɛ̀n, à kpaa ɓɔ lɛ: Ɓɔɔsoŋ̀! Mɛ̀ɛ nɛ lɛ, mɛ̀ yɛɛ rì ŋwaànɛ ɓi kaakàà, nni ɓì yùu yì fɛ ɓi ǹto wu kiɓan aɗi?

²² Nni ɓɛ ɓakà nyi lɛ: Tì yùu yì fɛ lɛ ǹkɔ̀mɛ̀n ɓɛ̀sujàà ànɛ lɛ Kɔrinɛy yɛɛ romiì ɓìsi a lɔ̀ŋkɔɔ, àncèm à rì saaɗ à mum ànɛ à ti à risàg Bɛ̀ll, à ki rì tì ŋwaànɛ Ɓɛ̀yudɛ̀n ɓɛ̀cèm ɓɛɛ̀ Sɛsɛ̀g; ŋwaà-fìtom a Bɛ̀ll àa ǹkpaa nyi lɛ a regiì wɔ̀ a mɛɛ mii, a wog jɛ̀ɛ̀ ìnɛ ù rì lɛ ù kpaa nyi.

²³ Nni Pyɛɛri à kpaaghà ɓɔ lɛ ɓɛɛ ɗiŋi ɓi naa, à reɓ ɓɔ jàŋ inɛ ɓɛɛ lày; ɓi duri tana nnɛ ɓɛ pɛsɛ̀ngà ǹɗaŋ rì ɓumɓɛ̀n, ɓɛ kɛǹ. Ɓɛ̀gèni ɓii ɓɛ righerɛ̀n ɓɛdɛŋ ɓɛ a Zyope ɓɛ kɛǹgà nyi kì foŋì.

²⁴ Nni ŋwos anɛ à ɓɔ̀ɓkà ànɛn nnɛ ɓɛ kpagà a Sezare, Kɔrinɛy à ɓoŋɓòŋgà ɓɔ lɛ rì naa yìì ì ɓum, rì mɛ̀ghan mii mɛ à reŋɗɛ̀ngà.

²⁵ Yɛ̀ɛ Pyɛɛri à kpagà wɔɔ, Kɔrinɛy à kɛ̀n nyi ki ghàɓi, à kpi nyi à mɛ̀kòò lɛ a fa nyi bɔgsɛ̀n.

²⁶ Nni Pyɛɛri à ɓangà nyi lɛ a pɛsi nyi aɗyoo di a kpaakpaa lɛ: Pɛ̀sɛn yì aɗyòò lɛ mɛ̀ ǹɗì girig romum yɛ̀ɛ wɔ̀.

²⁷ Fɔɔnnɛ à ɗiŋìghà ɓi naa di ɓɛɛ̀ tòtog lɔŋ lɛ rì nyi rì Kɔrinɛy, à tanɛ̀n ɓum lɛ kùnag kùnag,

²⁸ à kpaa ɓɔ lɛ: Ɓì yii lɛ Ɓɛ̀yudɛ̀n ɓɛ ri ɗì coo ǹsiŋdɛn wudɛŋ lɛ, mum waà kɛ̀ɛ ràrɛn ɗi muu cee-rìkuu, kɛ̀ɛ̀ ki ɗiŋi naa ì roànɛ̀n, nni ɓi ɓɛg ànɛ a lɔ̀ŋkɛm̀, Bɛ̀ll àa ǹɗèsii mɛ̀ lɛ, ǹghɛ̀ɛ̀sɛɛ tì ɓi ki ghɛɛ̀ ŋwaàdɛŋ lɛ à rì rì ɓìsyeg, kɛ̀ɛ nki cèli ti mum lɛ, à yin ntɛnɛn ɓi mis mɛ Bɛ̀ll.

²⁹ Fɔɔnnɛ ǹ-yùu yì miì kɛ̀ɛ̀ tìkàna ɓì ǹɗeèghreŋi wu wàa regii mɛ̀; nkɔ̀nkɔn lɛ, di màa yii ǹto wu kiɓan wu wàa regii mɛ̀ miì.

³⁰ Nni Kɔrinɛy à ɓàkà lɛ: Gɛɛ̀nɛ mɛ̀ru mɛraa nnɛ mɛ nkìkii bɔ̀ŋzɛ̀n ɓi kìden kɛ̀m ki naa cààmɛ̀n à mɛ̀kɛ̀ɛ̀ mɛraa à ŋwos. Nni mɛ̀ɛ ǹsìgmɛ̀ɛ di mum à mɛ rɛli mɛ asu, ɓìlàà ɓii ɓi lònlòm lɛ syaŋ̀syaŋ̀ à kpaa mɛ̀ lɛ:

³¹ Kɔrinɛy Bɛ̀ll àa nwoogh bɔ̀ŋzɛ̀n yɔ̀ɔ̀, à ki yiti gɛ ɓyom ànɛ ù ti ù fafà ɓum ɓɛ nyìighnyìg.

³² Nni rom ɓum a Zyope ɓɛɛ regiì Simɔn ànɛ ɓɛ ti ɓɛ kpɔgì lɛ Pyɛɛri a yuiy; à kɔ̀kɔrii yɛ̀ɛ Simɔn à m̀pègsɛ̀n-gòò ɓi bèn ì rìɓày à kìkòn.

³³ Fɔɔnnɛ mɛ̀ɛ nghàsi kì romìì ɓum lɛ ɓɛɛ yu wɔ̀ kì reŋii. Ù konaagh yɛ̀ɛ ù yùu yì. Nni ɓigomìnɛ tì rì yɛɛ lɛ ɓi mis mɛ Bɛ̀ll, lɛ ti wog com kìcèm ki Kan àa kpaa lɛ wɔ̀ɔ kali ɓìsi.

Ɓìɓan ɓi Pyɛɛri à kpaaghà yɛ̀ɛ Kɔrinɛy

³⁴ Pyɛɛri à pɛ̀sìghà min ɓitòkì, à kpaa lɛ: Ɓi saaɗ ǹkonaagh kì ghɛɛ̀ gɛɛ̀nɛ lɛ, Bɛ̀ll à yin ɗi ǹɗèè wu ǹɗem

³⁵ ǹki ghɛɛ̀di lɛ, mum bimiɗ ànɛ à risii Bɛ̀ll à ki kìki ɓiɓan ɓi saaɗ, Bɛ̀ll à rì nyi ɓiì keesii àa soo rì ŋwaànɛ ɓi kìlɔ̀ŋ ki be.

³⁶ Fɔɔnnɛ Bɛ̀ll à romgày jɛ̀ɛ̀ a ɓɔn ɓɛ Isirayɛl lɛ ɓɛɛ yi lɛ, fyòoog à rì ɓiì ɓaà ɓi nyìinyìm ànɛ lɛ rì nyi rì ɓum, ɓi jɛ̀m ì Yeesus Kiris ànɛ à rì rìfòm ɗi ɓum ɓɛ̀cèm;

³⁷ ɓì yii kìɓan ki ki nkìlɛɛ ɓi ziì Zyude bimiɗ, à tumɛ̀n yì a Galile ajɛ̀m ì bàɓtis ìnɛ Zyaŋ à lààlàmɓɛ̀ngà.

³⁸ Ɓì yii lɔŋ yɛ̀ɛ Bɛ̀ll à ɓɔ̀ngà Yeesus ànɛ a Nazarɛt à rom yì nyi Kitɛntɛ̀ɛ̀n ki Nghay kii, à ki fa nyi ìtèɗ wucèm, fɔɔnnɛ Yeesus ànɛ̀n à kɛ̀ɛ̀kɛ̀ɛ̀ghà jàŋ bimiɗ à kìkì ɓum kìrɔɔ, di a wɔ̀ɔwɔɔ̀zì ɓum ɓɛ̀cèm ɓɛ ɓɛ ɓaghà ɓi rìkpàn ɗi Satàn ɓisuulɛ Bɛ̀ll à ɓaghà ɗì nyi.

³⁹ Ɓìsii ri ɓɛ̀wusìnɛ̀ɗ ɓi ɓìɓan ɓi à kìghà ɓi zi ì Ɓɛ̀yudɛ̀n rì a Yorisalɛm, nni Yeesus ànɛ̀n innɛ ɓɛ ǹwoli di ɓɛ kpani ɓi kɔrɔs.

⁴⁰ Kìɓan kifog, Bɛ̀ll, à ghèmzì nyi ɓi ŋwos a kìraa, à ki fa nyi ìtèɗ wulɛ, a resɛn a ɓum.

⁴¹ Wɔ̀lɛ àa ɓum a ɓɛ̀cèm nnɛ à rèsɛ̀ngà, lɔŋ a ɓɛ̀wusìnɛ̀ɗ ɓɛ Bɛ̀ll à lokà kì ɓɔ̀ni. A ɓìsi ɓumɓɛ ti kìghà lɛ, tì ɗi, tì ki nɔ nɗaŋ ɗì nyi di à mɛ ghemɓɛn yi a ɓìloŋ.

⁴² Nni Yeesus à reɓsìghà ɓìsi lɛ ti ghaàghàgsì ɓum Ɓɔlɛ wìì, tì ki sììrag ɓɔ kìresii lɛ, nnyɛɛ rì roànɛ Bɛ̀ll à rɛsìghà lɛ, à ri yù ki renì ɓìɓan ɓi ɓumɓɛ ɓɛ kaka cencem, rì ɓi ɓɛ ɓɛ mɛ wù.

⁴³ Yeesus ànɛ̀n nnɛ ɓɛ̀kpaŋzì-ɓìɓan ɓɛ̀cèm ɓɛ ɓugà yɛ̀ɛ ɓɛ kpaakpààghà lɛ: Ɓì ɗii ɗii nnɛ Bɛ̀ll à rì ɓiì cenɛɛ mum ǹcèm ànɛ à gherɛɛ nyi ɓìɓe.

Kìtɛntɛ̀ɛ̀n ki Nghay ki sɛniì ɓi ɓumɓɛ ɓɛ yin Ɓɛ̀yudɛ̀n

⁴⁴ Yɛ̀ɛ Pyɛɛri à ɓaghà di a ka tòtog a ŋwɔm fɔlɔɔ, nni Kìtɛntɛ̀ɛ̀n ki Nghay ki sɛngày ki ɗiŋì ɓi ɓum ɓɛ̀cèm ɓɛ ɓɛ wowòkà ɓìtòkì ɓii ɓiǹ.

⁴⁵ Fɔɔnnɛ ɓɛ̀gherɛ̀n ɓɛ ɓɛ ɓaghà Ɓɛ̀yudɛ̀n, ɓɛ ɓɛ ɓaghày ǹɗaŋ ɗi Pyɛɛri, ɓɛ kuuràkà lɛɛ̀gwey, yɛ̀ɛ ɓɛ ghɛngà lɛ Bɛ̀ll à faa ɓumɓɛ ɓɛ yin Ɓɛ̀yudɛ̀n Kìtɛntɛ̀ɛ̀n ki Nghay.

⁴⁶ Ɓɛ wowòkà di ɓumɓɛ̀n ɓɛɛ̀ tòtog ɓìkènekènè ɓi ɓitòkì, ɓɛ kpaàkpàgsɛ̀n ɗìkem ɗi Bɛ̀ll. Nni Pyɛɛri à kpaaghà min lɛ:

⁴⁷ Yɛ̀ɛ ɓumɓɛ ɓɛ mɛ teɗ Kitɛntɛ̀ɛ̀n ki Nghay lɔŋ yɛ̀ɛ ɓìsii tekà, nni cɛ kɛɛ ri ɓiì règtii lɛ, ɓɛ̀ kɛɛ̀ ɓàɓti ɓɔ rì mɛ̀nig?

⁴⁸ Fɔɔnnɛ à kalìghà min lɛ, ɓɛɛ ɓaɓti ɓɛǹ ɓi ɗii ɗi Kan Yeesus Kiris. Ɓumɓɛ̀n ɓɛ ki tɔg nyi lɛ, a kɔri tì a lɔ̀ŋkaa, gàɓ ì mɛ̀ru.