2 TIMOTE 4 - Bafia Nouveau Testament

¹ M̀ɓɔ̀ŋzaagh wɔ̀ ɓi mis mɛ Bɛ̀ll rì ɓi mis mɛ Yeesus Kiris ànɛ à ghɛ̀ɛ̀sɛɛ kì yɔ̀mi lɛ rì ɓum ɓɛ cem rì ɓìloŋ, rì ɓi ɗii ɗi risugtìì ɗii, rì kìlɔ̀ŋ kii,

² lɛ u kakali jɛ̀ɛ̀ ì Bɛ̀ll, ù sììrɛ̀n miì ɓyààmɛ̀n ɓìcèm, lɛ rì ɓi syeesyee rì ɓi ɓeɓtɛn; kìya lɛ ɓum ɓɛɛ gherɛn, fwààdag ɓum, ù rerèɓ ɓɔ, ù yi rìnìɗ ɗi nɗem, ù ki rèeresàg ɓɔ.

³ Lɛ cààmɛ̀n kidɛŋ ki ri ɓiì ɓaà ki ɓum ɓaa cenɛnti ɓi riwowòg ɗi syeesyee à dɔgtɛ̀n, ɓɛ ri nɔ̀ɔnɔɔ̀tì lɔŋ ɓiɓan ɓi mɛ̀rem maa mɛɛ̀ kɔ̀nkɔ̀n, ɓɛ taŋzàg ǹkun wu ɓɛrèsàg, ɓɛ ɓɛɛ kpaakpaa ɓɔ ɓìɓan ɓi ɓyɛɛ̀ rɔɔrɔɔ ɓɔ rìwowòg;

⁴ ɓaa ramdi ɓi mɛreè lɛ ɓɛɛ wog saaɗ, ɓɛ ri mɔ ɓiì ramì lɛ ɓɛɛ wowog mɛ̀kànkàn.

⁵ Wɔ̀lɛ ɓi ɓɛg ànɛ a lɔ̀ŋkɔɔ, ɓèŋa rìmum ɗyɔɔ lɛ kɔ̀ɔ ghaasi wɛ̀ɛmiɗ ǹkpàn a com kidɛŋ, sììri nɗem ɓi mɛ̀tɔɓ, kìya kìsay ki ǹkalì-ɓɔlɛ, roozi kìsay kɔɔ lɛ syeesyee.

Pol à fèegh rìwu ɗii, à regì Timote

⁶ Ɓi san ànɛ a lɔ̀ŋkɛm̀, mɛ̀ nti lɛ com ki kifùna, cààmɛ̀n ki rìpɛ̀sɛ̀n ɗyɛm̀ kɛɛ̀ kɛ̀ɛ̀kɛɛyi.

⁷ M̀mɛ ɗùù syeesyee à wɛ̀y, m̀mɛ lègsi kighɛŋii mɛ̀ree, ǹki ɓèŋ righerɛ̀n.

⁸ Nni ɓigomìnɛ, tàm à rìkem ànɛ à rì tàm à saaɗ innɛ m̀ɓoŋɓoŋi, Kan ànɛ à rì ǹ-yɔ̀mì-ɓum ànɛ à rì lɛ saaɗ à rì mɛ̀ nyi ɓiì faà ŋwos anɛ̀n, nni àa mɛ̀ cɛ̀ncɛm nnɛ à rì ɓiì faà, kìɓan kifog à ɓiì faà ɓum ɓɛ̀cèm ɓɛ ɓɛ ɓoŋɓòŋgà rìsugtìì ɗii ri ǹkɔ̀nɛ̀n.

⁹ Kaaya bee inɛ u fyaŋziì kìyùu a lɔ̀ŋkɛm̀,

¹⁰ lɛ Demas àa nɗinii mɛ̀ à kɛ̀n a Tesalonika, lɛ ɓìɓan ɓi ɓi cɛɓ ki gɛɛ̀nɛ ɓyɛɛ̀ kɔ̀nkɔn nyi; Kiresaŋsɛ àa nkɛ̀ɛ a Galasi, Tit à kɛ̀n a Dalmasii.

¹¹ Lukas cɛ̀ncii yɛɛ ri fɛ rì mɛ̀. Teray Marikus, ɓi yuiy ɓɛɛ̀ nyi, lɛ àrì mɛ̀ rì coo gɛɓsɛ̀n ɓi kìsay.

¹² Mɛ̀ɛ nɗomi Tisig a Efɛɛzɛ.

¹³ I ù ti ɓiì yùu, ù yùy mɛ̀ rì rɛ̀ŋkweɗ wɛ̀m ànɛ ǹcàɗkày a Tirowas yɛ̀ɛ Karipus, rì ɓɛ̀kaàtà, à ɓiisɛ̀n gòò yi nyàm yi ɓɛ ti ɓɛ kàngì ɓɛ̀kaàtà miì.

Ɓìɓan ɓi Pol à siitɛɛ kìkpaà, rì ɓìtɔkì

¹⁴ Alɛgsaŋdirɛ ànɛ à rì ǹsyaàgh-ìrɛm, àa nkìi mɛ̀ kìɓe lɛɛ̀gwey; Kan à lèɓi gɛ nyi lɔŋ yɛ̀ɛ rìkì ɗii ɗi ri.

¹⁵ Ù konàg girig ɗì nyi ɓisuulɛ à ɗùùghà rì ɓìɓan ɓi tì kpaaghà rì ìtèɗ.

¹⁶ Gɛ̀n i ǹtonto ìnɛ mɛ̀ɛ nɗì ɓi mɛ̀kpaà, mum àa nkɛ̀ɛ ɓi mɛ kìfoŋì nsoò bog, ɓɛ̀sɛ̀ɛ̀ ɓɛ̀cèm ɓɛ nɗinii mɛ̀, nni Bɛ̀ll à ghɛ̀ɛ̀sɛɛ ɓi ɓɔ kìnɔ̀ɔ̀tii ɓi rìkì ɗiǹ.

¹⁷ Lɔŋ Kan yɛɛ ǹɗì mɛ̀ jàŋbog, à ki fa mɛ ìtèɗ, lɛ nghagsi jɛ̀ɛ̀ ì Bɛ̀ll lɛ kɔɔ̀kɔɔ̀, yɛ̀ɛ woòghrɛn ɓi mɛ̀ree mɛ ɓum ɓɛ̀cèm ɓɛ ɓɛ yin Ɓɛ̀yudɛ̀n fɔɔnnɛ ɓɛ nɗùnɛɛ mɛ̀ ɓi ŋwɔm wu kimonɗo.

¹⁸ Kan à rì mɛ̀ ɓiì lɛgsii ɓiɓan ɓi ɓeɓtɛn ɓìcèm, à ki ghɛɓsi mɛ lɛ nɗiŋi ɓi kìlɔ̀ŋ kii ki ki ri aɗyòò. Nyi yɛɛ ghɛɛ̀sɛɛ rì rìkem fìɗyàɓ fikɔ̀ɔ̀. Ààmɛ̀n.

¹⁹ Tògsi Piriska rì Akilas rì naa ì ɓum ì Onezifɔɔr.

²⁰ Erast àa nɗɔ̀ɓi a Kɔrɛŋt, ǹki càɗ Tirofim a Milɛ di a roròɓ.

²¹ Kaaya bee inɛ lɛ u yu di bùmà ì ka tumɛn ɓi. Eɓulus rì Pudaŋs rì Linus rì Kiloodya rì ɓɛ̀geni ɓis ɓɛ̀cèm ɓɛ togsaghiì wɔ̀.

²² Kan a ɓeŋ̀ ǹghay wɔɔ! Geesɛ̀n ì Bɛ̀ll yɛ̀ɛ ɓa rì mìni ɓɛsɛ̀ɛ̀ ɓɛ̀cèm. Ààmɛ̀n.