2 TIMOTE 3 - Bafia Nouveau Testament

Mɛ̀ru mɛ siitòn

¹ Yiya lɛ, ɓi mɛ̀ru mɛ siitòn, ɓyààmɛ̀n ɓi ɓeɓtɛn ɓi ri ɓiì ɓaà.

² Ɓisuulɛ ɓum ɓɛ ri ɓa ɓɛ̀wemwèm, ɓɛ̀keesì-mɔ̀ɔ̀ni, ɓɛ ɓa ɓɛ̀daŋàdaŋa, ɓɛ ɓa ɓɛ̀kìì-kalɛn, ɓɛ feèfèngì Bɛ̀ll, ɓɛ kikì ɓɛ̀yalì ɓaa ntoòtèɗ, ɓɛ̀ kɛɛ̀ foŋ kirɔɔ ki ɓum ɓɛ kii ɓɔ, ɓɛ̀ kɛɛ̀ risi ɓyom ɓi ɓi ri kìcèlì.

³ Ɓɛ ɓa mɛ̀rem mɛ̀tèrɛn, ɓɛ ɓa kɛ̀ɛ̀ nyìighnyìg, ɓɛ kikì ɓɛ̀ɓɔlɛ, mɛ̀rem maa mɛ̀ kɛɛ̀ ɓanɛn, ɓɛ ɓa ɓɛ̀wolì-ɓum, ɓɛ ki ɓèeɓeèzɛ̀n ɓumɓɛ ɓɛɛ̀ kìki kirɔɔ,

⁴ ɓɛ ɓa ɓɛ̀tɔ̀kɔ̀tɔkɔ, ɓɔ mɛ̀rem lɛ bùɓbùɓ, ɓɔ rì kalɛn ɓi nɗem, ɓɛ keesì rìyɛ̀y ɗi cɛɓ ki mɛmùù à cee Bɛ̀ll;

⁵ ɓɛ ri rɔ̀ɓ ɓɛgherɛ̀n ɓi rìseesèè ɗi ɓidan, kìɓan kifog ɓɛ roòzɛ̀n com ki ki ri ìtèɗ wu righerɛ̀n. Ràɓsɛn mɛ̀kuu mɛ ɓum mɛ fɔlɔɔ.

⁶ Ɓum ɓɛdɛŋ ɓɛ ɓi nɗaŋ waa ɓɛ ti ɓɛ ɗiŋɗàg ɓi ɓɛ̀naa, ɓɛ ɓangìì ɓɔɔ ɓɛ̀yiɓ ɓɛdɛŋ ɓɛ ɓɛ tɛtɛɛgh ǹkun wu ɓiɓe, ɓɛ ki ɓa ɓɛ̀yiɓ ɓɛ ɓìɓan ɓi ɓi mɛ̀mùù mɛ̀kuu mɛ̀kuu ɓyɛɛ̀ yeeyeèsì, ɓi ɗiɗì mɛ̀rem ɗì rìkɔ̀n;

⁷ ɓɛ̀yiɓ ɓɛǹ ɓɛ ri lɔŋ cààmɛ̀n kìcèm ɓi cilag, kìɓan kifog ɓɛ̀ kɛɛ̀ ɓa ri ìtèɗ wulɛ ɓɛ kpaŋ ɓi nɗɛli wu ɓɛɛ yi saaɗ.

⁸ Fɛlɛ yɛ̀ɛ Zyanɛs rì Zyamɓirɛs ɓɛ ramgà wɛ̀y ri Moyis, fɔlɔɔ nnɛ ɓumɓɛ̀n ɓɛɛ̀ ɗùùɗuu girig rì saaɗ, ɓɛ ri ɓumɓɛ nghay waa wu ti wù ɗimɛn bee, rìgherɛ̀n ɗyaa ɗi yiǹ lɛ ɗi ɓanɛ̀n di mɛ̀fèèghrɛn mɛ tanɛɛ ɓɔ.

⁹ Wɔ̀lɛ ɓaa kɛ̀ɛ̀di ɓi beèbɛ̀y lɛ kìyèg kaa ki rikì ki ri ɓiì ghɛnɛɛ ɓi mis mɛ ɓum ɓɛ̀cèm fɛlɛ yɛ̀ɛ ki Zyanɛs rì Zyamɓirɛs ki ghɛnɛ̀ngà.

Deɓ yi yi seesee Timote nyimiɗ

¹⁰ Ɓi ɓɛg wɔ̀ɔ̀, ù ghɛngà rìrèsì ɗyɛm̀ lɛ syeesyee, rì rìghɛghɛ̀ɓ ɗyɛm̀, rì ɓɛ̀fèg ɓɛm, ɗì rìgherɛ̀n ɗyɛm̀, ɗì rìnìɗ ɗyɛm̀ ɗi nɗem, rì ǹkɔ̀nɛ̀n wɛ̀m, rì kìsììrì kɛm̀,

¹¹ ù yii lɛ rì ǹ-yeesɛ̀n ànɛ ntuutulɛ̀n rì nyi, rì mɛ̀tɔɓ mɛ ǹwowoogh; rìkuu ɗi ntɔɓ aɗi ɗyɛɛ̀ɗi ǹɗɔ̀ɓi lɛ ǹghɛɛ ɓi a Aŋtyos rì Ikonyɔm rì a Listirɛ? Rìkuu ɗi ǹ-yeesɛ̀n aɗi ɗyɛɛ̀ɗi ǹɗɔ̀ɓi lɛ ǹtulɛɛ ɓi ri ɗyɔ, ǹki sìisiìrì nɗem? Wɔ̀lɛ Kan à ghɛɓsìghà mɛ̀ ɓi mɛ̀tɔɓ mɛ̀n mɛ̀cèm.

¹² Ki ri gì lɛ, ɓum ɓɛ̀cèm ɓɛ ɓɛɛ̀ kɔ̀nkɔn lɛ ɓɛɛ̀ ghɛɓ cɛɓ ki lɛ ɓɛ falɛ̀n rì Bɛ̀ll ɓi Yeesus Kiris lɛ kɔɔ̀kɔɔ̀, ɓɛ ri ɓiì tulɛɛ ri ǹ-yeesɛ̀n, à ɓum.

¹³ Kìɓan kifog ɓìɓeɓtàg ɓi ɓum rì ɓɛ̀pwààpwaà ɓɛ ri ɓiì kɛ̀nkɛni lɔŋ beèbɛ̀y ɗì rìkìkì ɗi kiɓe, ɓɛ naànààzì ɓum bee lɛ ɓɔmiɗ ɓɔɔ ka rì ɓɛ̀ɗimɛn bee.

¹⁴ Wɔ̀ɔ̀ sììrɛn lɛ tiŋtiŋ ɓi kìɓan ki ù yilàkà, kɛɛ̀ki ǹtyweeyi wɔɔ wu ri miì; ù yii ŋwaànɛ ù yilàkà kìɓan kiǹ a lɔ̀ŋkii.

¹⁵ À tumɛ̀n ɓi rìŋwɔɓti ɗyɔɔ, ù yii ɓìɓan ɓi ɓi kaàtà à Bɛ̀ll, ɓi ri lɛ ɓi fa wɔ̀ ɗyomzɛ̀n ɗi u ɓa rì cɛɓ, lɛ rìgherɛ̀n ɗi ù gherɛɛ Yeesus Kiris.

¹⁶ Ɓìɓan ɓìcèm ɓi ɓi ri ɓìkànɛn, ɓi kanɛ̀ngà rì ìtèɗ wu Nghay à Bɛ̀ll, ɓi ki rì rì gɛɓsɛ̀n, lɛ ɓyɛɛ resag ɓum saaɗ, ɓi ki lɛ ɓɛɛ gherɛn, ɓi rɛsàg ɓìɓan ɓi zɛ̀ɗ, ɓi ki tɔɔsi ɓum ɓi cɛɓ ki saaɗ,

¹⁷ lɛ mum à Bɛ̀ll a ɓa m̀pègsɛn lɛ kɔɔ̀kɔɔ̀, à ki ɓa ri bee inɛ lɛ a ki ɓìɓan ɓi syeesyee.