2 TIMOTE 2 - Bafia Nouveau Testament

¹ Nni wɔ̀ man wɛm̀, foŋa ìtèɗ ɓì geesɛ̀n ìnɛ ì rì ɓi Yeesus Kiris ɓi ɗùm.

² Kìɓan ki ù wokà mɛ̀ di nkakàlì ɓi mis mɛ ɓɛwusìnɛ̀ɗ lɛɛ̀gwey, ghagsi kɔ rì ɓum ɓɛ ntyweeyi ɓɛ ɓɛ ri rì ìtèɗ wulɛ ɓɛ resàg girig ɓɛ̀ro ɓɛdɛŋ.

³ Wogha mɛ̀tɔɓ nɗaŋ ri mɛ̀ lɔŋ yɛ̀ɛ syeesyee à sujàà à Yeesus Kiris.

⁴ Sujàà ànɛ àrì ɓi kìsay à kaakàà lɛ a puɓsi ǹkɔ̀mɛ̀n wìì nɗem, ɓìɓan ɓi ɓi cɛɓ ki zɛy ɓi ti ɓyɛ̀ kɛɛ̀ ɓùùsi nyi ǹto.

⁵ Fɔɔnnɛ ǹghɛŋì-mɛ̀ree ànɛ à kpaŋi beèbɛ̀y ɓi ǹlog à mɛ̀ree, à yin lɛ à teɗ tàm à rìkem di à nɔ̀ɔ̀tii ɓi mɛsiŋdɛn mɛ ɓi nlog.

⁶ Ǹsalì-dɛm anɛ a teetekì ǹtɔɓ, à ghɛ̀ɛ̀sɛɛ kì ɓaà ŋwaà beèbɛ̀y ànɛ a teɗ ɓìɗùn.

⁷ Wogha com ki nkpaakpàà, ɓisuulɛ Kan à rì wɔ̀ ɓiì faà ɗyomzɛ̀n ɓi ɓìɓan ɓìcèm.

⁸ Yiti Yeesus Kiris ànɛ à ghèmɓɛ̀ngày a ɓìloŋ, di à yalɛɛ yì ɓi boo ì mum ì Davit lɔŋ yɛ̀ɛ Syeesyee à Ɓɔlɛ ànɛ mɛ̀ɛ ǹghaaghagsì a kpaakpàà;

⁹ Syeesyee à Ɓɔlɛ ànɛ̀n nnɛ nwowog mɛtɔɓ miì à kpaŋ ɓi lèg ànɛ lɛ ɓɛɛ kaŋ̀ mɛ̀ bɛn lɔŋ yɛ̀ɛ ǹwolì-ɓum, kìɓan kifog jɛ̀ɛ̀ ì Bɛ̀ll yɔ̀ɔ̀ yin nkàŋɛn bɛn.

¹⁰ Kìɓan kiǹ kɛɛ̀ki nceecenɛ̀n mɛ̀tɔɓ mɛ̀cèm ɓisuu ɓumɓɛ ɓɛ ri ɓɛ̀ɓɔ̀nɛn lɛ di ɓɔ girig ɓɛɛ ɓa rì cɛɓ ki ki ri ɓi Yeesus Kiris bas rì rìkem ɗi fiɗyàɓ fikɔ̀ɔ̀.

¹¹ Jɛ̀ɛ̀ ìnɛ ì rì saaɗ: I tì wughà nɗaŋ ɗi nyi, tì rì girig ɓiì ghɛɓì nɗaŋ ɗi nyi.

¹² I tì sììrɛɛ tyɛ̀ ki càrɛn lɛ mɛ̀tɔɓ, tì rì ɓiì làmii girig nɗaŋ ɗi nyi; I tì roòzɛɛ nyi, nyii roòzɛɛ gɛ girig ɓìsi.

¹³ I ɓìsii ti tyɛ̀ ki roòzi mɛkàg mis, nyii ri lɔŋ roànɛ a roozag mɛkàg mii cààmɛ̀n kìcèm ɓisuulɛ nyii yin lɛ à roòzɛ̀n rìɓa ɗii ɗi nyimiɗ.

Ɓìɓan ɓi ɓi komi cɛɓ ki ɓumɓɛ ɓɛ pasɛɛ, ɓɛ caɗ syeesyee à dɔgtɛ̀n

¹⁴ Ɓìɓan ɓiǹ ɓyɛɛ̀ɓi ù ghɛ̀ɛ̀sɛɛ kì ɓìiɓiìtàg ɓum, ù ki siisiŋdɛ̀n ɓɔ ɓi mis mɛ Bɛ̀ll, lɛ ɓɛɛ lɛg ɓɛsaaka rì rìnyoònyòlɛ̀n ɓi kìɓan ki mii, lɛ ɓi ghɛɓsii ɓi com, di nya lɛ ɓyɛɛ ɗyaŋzi ɓumɓɛ ɓɛɛ̀ wowog ɓɛsaaka ɓɛǹ.

¹⁵ Tèèsi nyoo lɛ u ghɛnɛn ɓi mis mɛ Bɛ̀ll fɛlɛ yɛ̀ɛ ŋwaànɛ à mɛ rèsi ɓum lɛ à rì mum, yɛ̀ɛ ǹkìì-kìsay anɛ à yin lɛ à wog ǹtoòrìɗ ri kìsay kii, ànɛ a rèresi jɛ̀ɛ̀ ì saaɗ yɛ̀ɛ kɛɛ̀ kɔ̀nkɔ̀n.

¹⁶ Càra ɓìtòkì ɓi zɛy ɓi ɓi yin ɓiì kpaakpaa ɓiɓan ɓi righerɛ̀n ɓisuulɛ ɓumɓɛ ɓɛɛ̀ tòtog rikuu ɗi ɓitòkì ɗiǹ ɓɛ ri ɓiì ràaraɓsɛ̀n tì rì rìgherɛ̀n à cee fɔlɔɔ.

¹⁷ Jɛ̀ɛ̀ yàà i rì yɛ̀ɛ kìɓɛɛ ki ki ti ki cɛkì mum ìkòò, ki kpaŋ ɓi kìwoɓ. Imenee rì Filɛt ɓɛ ri ɓi bàlì ì ɓumɓɛ̀n;

¹⁸ ɓɛ pasɛ̀ngà, ɓɛ caɗ saaɗ, ɓɛ yoòyògsì rìgherɛ̀n ɗi ɓum ɓɛdɛŋ di ɓɛɛ̀ kpaakpaa lɛ, rìghèmɓɛ̀n ɗi ɓiloŋ ɗi mɛ kpaŋ.

¹⁹ Nsoò fɔlɔɔ kìgɔ̀ŋgɔ̀m ki mɛɛ ki Bɛ̀ll à yàghɛ̀ngà kìtoŋ miì ki kaka lɛ kpeg-kpeg. Jɛ̀ɛ̀ ì rì miì ǹkànɛn yɛ̀ɛ sìtam̀ lɛ: Kan à yii ɓɛ̀roɓɛ ɓɛ ri ɓɛŋkìì; fɔɔnnɛ mum ǹcèm ànɛ a rereŋi ɗii ɗi Kan, à ghɛ̀ɛ̀sɛɛ lɛ à sɔ̀ŋì ìkòò wii ɓi kìɓe.

²⁰ Àa ɓɛ̀ɓɛŋi ɓɛ gol rì ɓɛ ɓɛ ri ɓɛ̀kìyɛn ri swiɗ à mɔ̀ɔ̀ni ɓɛɛ ti ɓɛ ɓalàg ɓi mɛɛ mɛ mɛ teghɛɛ ɓɔ rì ɓɔ, ɓɛ̀ɓɛŋi ɓɛ soɓɛn ri kìte rì ɓɛ yèŋɛn ri fyòò ɓɛ rilàg girig wɔɔ. Ɓɛ kìyɛn ri gol, rì ɓɛ swiɗ à mɔ̀ɔ̀ni ɓɛ ri ɓisuu ɓiɓan ɓi bànà, ɓɛmbog ɓisuu titom ti zɛy.

²¹ Nni i mum à ɓèŋɗɛɛ nyimiɗ ntɛnɛn à rì ɓiì ɓaà ɓɛŋi anɛ ɓɛ ri lɛ ɓɛ teɗ ŋwosi kiɓan ki bànà; ɓɛŋi a ǹtɛnɛn ànɛ à rì rì gɛɓsɛ̀n ɓisuu ŋwaànɛ à rì rì nyi, à ki ɓa ɓɛŋi anɛ à ghɛ̀ɛ̀sɛɛ ɓisuu rikì ɗi ɓyom ɓi syeesyee.

²² Lɛgha ɓìɓeɓtàg ɓi ɓìɓan ɓi ɓi ti ɓi rɔɔghì ɓɛ̀dɛlì; kaaya saaɗ, rì rìgherɛ̀n, rì ǹkɔ̀nɛ̀n, rì fyòoog ànɛ rì ɓumɓɛ ɓɛ ti ɓɛ regì ɗii ɗi Kan rì nɗem wu tɛnɛn.

²³ Ɓèna nyoey yi zɛy rì zɛy yi yi ri kɛ̀ɛ̀-su, ù ki yi lɛ, yi ti yi syogìì ɓɛsaaka.

²⁴ Ǹkìì-kìsay a Kan à ghɛ̀ɛ̀sɛɛ ɓi ki ɓaà mum à ɓɛ̀saaka; à ghɛ̀ɛ̀sɛɛ lɔŋ lɛ a ghɛɓ rì ɓum ɓɛ̀cèm ɓi nkɔ̀nɛ̀n, à ɓa ŋwaànɛ à rì lɛ à rèsàg ɓum ɓìɓan, à ki yi rinìɗ ɗi nɗem.

²⁵ À rèrèsì ɓɛ̀bènàbena ɓii zɛ̀ɗ yaa ri nɗem wu tɛ̀tɛ̀rɛ̀ɛ̀, rì ntyweeyi lɛ Bɛ̀ll à rì lɛ à fa ɓɔ mààgh ànɛ lɛ ɓɛɛ lɔɔ̀ghrɛn mɛ̀rem, ɓɛɛ kpaŋ̀ ɓi nɗɛli wu ɓɛɛ yi saaɗ,

²⁶ fɔɔnnɛ ɓɛɛ sugtiì ɓi ɓɔmiɗ, ɓɛ ki sɔtɛn yi ɓi fìram fi Satàn a wɔɔsìghà ɓɔ miì lɛ ɓɛɛ kiki lɔŋ rìkɔ̀n ɗii.